23
Manche je yal lekꞌtiꞌal kꞌane yin je yet animail,
cꞌam che junbꞌane je bꞌa yetoj junoj pena snaꞌbꞌal.
Manche je yatoj je bꞌa xol lekꞌtiꞌ kꞌaneal yetoj junojxa.
2 Manche je yatoj je bꞌa xol lekꞌtiꞌal kꞌane,
yu je yoc yetoj junojxa bꞌulan ánima chi unen spenail.
3 Caxcꞌal mebꞌa junoj ánima,
ta ey spenail,
cꞌam che yaoc je bꞌa yetoj.
4 Ta ey junoj mactxequel chi ilcha junoj noꞌ wacax,
ma bꞌuru yu,
tol qꞌueynajtoj,
akꞌwej meltzo tet mac ey yet,
caxcꞌal chi jowi oc je yin.
5 Sowalil chex colwa yin ebꞌ chi jowi oc scꞌul je yin.
Ta che yil stelkꞌo junoj sbꞌuru tuꞌ yalan ijatz,
chex colwa je yiꞌon a waan noꞌ yetoj.
6 Ey ojabꞌ yeloc apnoj ebꞌ mebꞌa ánima yul je sat,
ta tol jichan yeoc skꞌane ebꞌ chi yalaꞌ.
7 Manche je yaoc je bꞌa yin junoj ánima tol chi naꞌle a kꞌane yibꞌan,
tam wal je yaon oc camich yibꞌan junoj ánima tol cꞌam spenail,
yutol jain oj waoc syaꞌilal yin jun mactxequel jaxca tuꞌ chi el yuneni.
8 Manche je chaꞌ tumin yet che waꞌnen yeoc junoj kꞌane,
yutol jaꞌ yu chꞌen tumin tuꞌ,
jaxca wal tol cꞌam snaꞌbꞌal jun mac chi waꞌnen yeoc jun kꞌane tuꞌ,
catuꞌ chi yakꞌon ijtzan jun mac cꞌam spenail.
9 Manche je yetne ebꞌ ánima txꞌoj conobꞌal,
yutol jaex tiꞌ naatil jix jex eecꞌ yin txꞌoj conobꞌal bꞌey txꞌotxꞌ Egipto,
je yotaj xa tol yin syaꞌtajil jix yun je yeecꞌ bꞌey txꞌoj conobꞌal tuꞌ.
Sowalil Chi Xew Txꞌotxꞌ Txꞌotxꞌ
10 Mulnaanwej sat txꞌotxꞌ txꞌotxꞌ,
catuꞌ che yambꞌan a sat je yawo,
asanne yin wajebꞌ abꞌil.
11 Jaxa yet sjuj abꞌil,
catuꞌ che yakꞌon can xew txꞌotxꞌ.
Jaꞌ jantaj to tzet chi chꞌibꞌa sat txꞌotxꞌ,
cꞌamxa che mitxꞌa,
yet xa ebꞌ mebꞌa eyecꞌ yul je conobꞌal tuꞌ,
jaxa cꞌal noꞌ noꞌ ey xol-laj teꞌ,
oj loꞌon sat awo chi el sat txꞌotxꞌ.
Jaxca pax tuꞌ chi yun je yakꞌon can an uva,
yetoj teꞌ olivo.
12 Yin wajebꞌ cꞌual che yil je mulnail,
jaxa yet sjuj cꞌual xin,
chex xewi,
catuꞌ chi xew cꞌal pax noꞌ je wacax cꞌal noꞌ je bꞌuru,
cꞌal ebꞌ je chejabꞌ chi ali je yintaj yul je na,
cꞌal ebꞌ txꞌoj conobꞌal chi mulna je yetoj.
13 Jijewej masanil tzet chi wal ey jex an.
Cꞌam che yal je bꞌa tet wan chi al-le oc diosal,
cꞌam ojabꞌ che yakꞌ bꞌina sbꞌi ebꞌ.
Jaꞌ Oxebꞌ Mimej Kꞌin
14 Che naꞌtej oxebꞌ mimej kꞌin yul junjun abꞌil,
yu je yiꞌon a can jin bꞌi.
15 Jaꞌ yul jun xꞌaaw chi yij sbꞌi Abib,
jaꞌ yet tuꞌ che yaon oc skꞌinal ixim pan cꞌam yich eeyoj,
jaxca jix wute walon can ey jex,
yin jujebꞌ cꞌual che loꞌ ixim pan cꞌam yich eeyoj;
yutol jaꞌ yet jun xꞌaaw tuꞌ,
jix jex el bꞌey Egipto.
Cꞌam junoj mac chi jul jin sattaj yin tol cꞌam niꞌoj yofrenda iꞌbꞌil oc yu.
16 Che naꞌon pax tej skꞌinal yet chi elol bꞌabꞌel sat je yawo;
jacꞌalaꞌ che naꞌon pax junxa kꞌin yet chi lawi can a masanil sat je yawo yet slawubꞌ abꞌil.
17 Jain Jehová jin,
chi walaꞌ,
tol sowalil chi jul masanil ebꞌ winaj jin sattaj,
jaꞌton yet che naꞌontej oxebꞌ kꞌin yul junjun abꞌil.
18 Jaꞌ yet che yakꞌon noꞌ noꞌ yin xaambꞌalil ey jin,
man ojabꞌ junne oj chi yun je yakꞌon ẍiqꞌuil noꞌ noꞌ yetoj ixim pan eey yich.
Cꞌam che cꞌubꞌatoj ẍepuꞌal noꞌ xaambꞌal tuꞌ yet junxa cꞌual.
19 Jaꞌ ojabꞌ bꞌabꞌel sat je yawo caw watxꞌ chi el sat je txꞌotxꞌ,
jaꞌ che yiꞌtoj bꞌey snail jin calubꞌal.
Manche je txic noꞌ yuneꞌ chiw xol yal yim noꞌ txutxe.a
Jun Yángel Jehová
20 Oj jin chejtoj junoj wángel je sattaj,
yet watxꞌ chex teynele yul-laj bꞌe,
catuꞌ oj jex yiꞌontoj bꞌey jun txꞌotxꞌ txꞌotxꞌ tol watxꞌ xa yeoc wu an,
jaꞌton bꞌey oj jex caey ecꞌoj.
21 Chi cam je yiloni tol manche je pitnewej je bꞌa tet,
tol che jije tzet chi yalaꞌ.
Jaxca tol jaꞌ chi mulna jin qꞌuexeloj,
cꞌam chi yakꞌ mimancꞌulal je yin,
ta tol cꞌam che jije tzet chi yalaꞌ.
22 Ta tol che jije tzet chi yalaꞌ,
catuꞌ che yunen cꞌal tzet chi yal jin qꞌuexeloj,
oj watoj sjowal jin cꞌul yin mac pena chi yute snaꞌbꞌal je yin,
oj jin oc linan sattaj mactxequel chi yoche chi stecꞌbꞌa sbꞌa je sattaj.
23 Jaꞌ jun wángel tuꞌ oj bꞌabꞌoj je sattaj,
catuꞌ oj jex yiꞌontoj bꞌey sat txꞌotxꞌ xꞌotxꞌ ebꞌ Amorreo,
ebꞌ Heteo,
ebꞌ Ferezeo,
ebꞌ Cananeo,
ebꞌ Ferezeo cꞌal ebꞌ Jebuseo;
junelne oj jin qꞌueycan el ebꞌ.
24 Cꞌam ojabꞌ chex ey noan sattaj sdiosal wan conobꞌ tuꞌ;
tam wal chex ey kaan tet,
cꞌam che bꞌeybꞌalne sbꞌeybꞌal ebꞌ conobꞌ tuꞌ yin yiꞌon a can sbꞌi sdiosal ebꞌ.
Jaꞌ tiꞌ je yet,
tol che makꞌ poꞌo sdiosal ebꞌ tuꞌ,
cꞌal masanil chꞌen chꞌen yet xaambꞌal ebꞌ.
25 Asanne jin Jehová,
je Diosal jin,
chex ey noan ey jin.
Ta jaxca tuꞌ che yute,
oj wakꞌ je loꞌbꞌe masanil.
Man oj jex jin chaꞌ yaꞌbꞌoj eyoj.
26 Catuꞌ oj wakꞌon naatbꞌoj je kꞌinal.
Jaxa yul je conobꞌ tiꞌ,
cꞌam junoj ebꞌ ix ix tucꞌal oj ecꞌ el yuneꞌ,
cꞌam pax junoj ebꞌ ix man oj uneꞌwoj.
27 Oj jin xibꞌte ebꞌ ánima chi jowi oc je yin,
oj wakꞌ somcha el snaꞌbꞌal ebꞌ conobꞌ chi yakꞌ jowal je yetoj,
cꞌal masanil ebꞌ pena chi yute snaꞌbꞌal je yin,
oj ela ebꞌ ey jex.
28 Jaꞌ yet cꞌamto chex apni oc bꞌey txꞌotxꞌ tuꞌ,
jaxa wakꞌon somcha el snaꞌbꞌal ebꞌ chi jowi oc je yin,
oj watoj noꞌ chiꞌwawom noꞌ xol ebꞌ,
jaxa yela ebꞌ tuꞌ,
jaꞌton ebꞌ Heveo,
ebꞌ Cananeo,
yetoj cꞌal ebꞌ Heteo.
29 Man oj wiꞌel ebꞌ je sattaj yin jun abꞌil,
yet watxꞌ cꞌam chi etextoj txꞌotxꞌ txꞌotxꞌ tuꞌ,
cꞌal sjulcan noꞌ xol-laj teꞌal noꞌ bꞌey txꞌotxꞌ.
30 Cꞌuancꞌulal cꞌal oj yun wiꞌel ebꞌ ánima tuꞌ je sattaj,
masantaꞌcꞌal yet chi chꞌibꞌ je bꞌisil,
catuꞌ chi noel sat txꞌotxꞌ txꞌotxꞌ tuꞌ je yu.
31 Jix wa can ey smoonal bꞌey oj ina je txꞌotxꞌ tuꞌ.
Chi ẍaꞌel yich bꞌey jaꞌ Cajin Mar,
masantaꞌcꞌal chi apni oc bꞌey jaꞌ miman Éufrates,
catuꞌ chi too tacꞌal bꞌey jaꞌ Mar Mediterráneo,
bꞌey eyecꞌ ebꞌ Filisteo,
masantaꞌcꞌal bꞌey txꞌotxꞌ cusiltaj txꞌotxꞌ.
Catuꞌ oj waon oc ebꞌ caan sat txꞌotxꞌ tuꞌ yul je kꞌabꞌ;
jaex xa oj je yujte el ebꞌ bꞌey sat txꞌotxꞌ tuꞌ.
32 Cꞌam cꞌal junoj je wa kꞌane che waꞌne yetoj ebꞌ,
tam wal je yoc yin eyilal tet sdiosal ebꞌ.
33 Catuꞌ cꞌamxa che chaꞌoc ebꞌ yul je conobꞌ,
yet watxꞌ cꞌam chex yijbꞌa ebꞌ je yunen spenail jin sattaj.
Ta chex ey noan tet sdiosal ebꞌ tuꞌ,
jaex wal che yetnetoj je bꞌa chi yal tuꞌ,
ẍi Jehová,
tet naj Moisés.