—Aantej bꞌey ey jin ecꞌ tiꞌ yetoj naj Aarón,

Nadab cꞌal Abihú,

yetoj 70 ebꞌ icham winaj yeoc yul je conobꞌ tuꞌ.

Jaꞌ yet cꞌamto chex jul jin cꞌatan,

che yiꞌon ey je bꞌa ey jin.

2 Asanne jaach chi skeꞌ ja jitzontej ja bꞌa jin cꞌatan,

jaxa pax ebꞌ naj tuꞌ,

cꞌam chi skeꞌ sjitzontej sbꞌa ebꞌ,

tam wal ebꞌ conobꞌ tuꞌ,

cꞌam chi skeꞌ yatej ebꞌ ja wetoj,

ẍi Jehová.

3 Jix lawi tuꞌ xin,

jix paxeytej naj Moisés,

jix yalon naj tet ebꞌ ánima wan chejbꞌanile jix yal Jehová,

cꞌal tzet jix yute yaloni.

Jaxa masanil ebꞌ ánima xin,

junne jix yun stakꞌwi ebꞌ:

—Masanil tzet jix yal Jehová tuꞌ oj cu jije,

ẍi ebꞌ.

4 Jix lawi tuꞌ xin,

catuꞌ jix stzꞌibꞌen naj Moisés masanil tzet jix yal Jehová.

Jaxa yet skꞌinibꞌalil yet junxa cꞌual,

jix a waanoj,

catuꞌ jix swaꞌnen a jun yet xaambꞌal bꞌey yich jun wonan tuꞌ,

catuꞌ jix slatzꞌon a lacawebꞌ chꞌen chꞌen naj.

Junjun chꞌen chꞌen tuꞌ,

yin junjun icꞌaaleal ebꞌ Israel.

5 Yin eymanil,

jix yalon naj tet wan ebꞌ naj achꞌe winaj tol chi smakꞌ cꞌam noꞌ achꞌe wacax ebꞌ,

yet chi oc noꞌ yin xaambꞌalil,

jun xaambꞌal yet watxꞌcꞌulal chi akꞌle tet Jehová.

6 Jaxa naj Moisés jix chaꞌon nanoj ẍiqꞌuil noꞌ yul jun neet,

jal nanxa xin,

jix stiẍoc naj yin jun yet xaambꞌal tuꞌ.

7 Jix lawi tuꞌ xin,

jix iꞌle an slibroal bꞌey tzꞌibꞌebꞌilcan ey swa kꞌane Dios yu naj Moisés,

catuꞌ jix awtele a an tet ebꞌ conobꞌ Israel.

Catuꞌ jix yalon ebꞌ conobꞌ tuꞌ jaxca tiꞌ:

—Masanil tzet chi yal Jehová,

chi kaoc yin cu cꞌul cu jijeni,

ẍi ebꞌ.

8 Jix lawi tuꞌ xin,

jix iꞌletej ẍiqꞌuil noꞌ noꞌ ey can ey yul jun neet tuꞌ yu naj Moisés,

jix stiẍontoj naj yibꞌan ebꞌ conobꞌ tuꞌ,

catuꞌ jix yalon naj jaxca tiꞌ:

—Jaꞌ ẍiqꞌuil noꞌ noꞌ tiꞌ chi aon oc yip jun swa kꞌane Jehová jix swaꞌne can ketoj.

9 Jix lawi tuꞌ,

jix a pax toj naj Moisés yetoj naj Aarón,

naj Nadab,

naj Abihú cꞌal ebꞌ 70 icham winaj,

bꞌey wonan Sinaí.

10 Jaꞌ tituꞌ jix yil yin sDiosal ebꞌ.

Jaꞌ yalan yajan tuxa cꞌal chi kopopi jaxca yili chꞌen safiro caw watxꞌ xacꞌal yili,

jaxca yili syaxil satcan.

11 Cꞌam tzet jix utele ebꞌ naj yu yipalil Jehová.

Jix il-le yin Jehová tuꞌ yu ebꞌ,

catuꞌ jix low ebꞌ,

jix yuqꞌuen jaꞌ ebꞌ.

12 Jix yalon Jehová tet naj Moisés:

—Aantej bꞌey sjolom wonan bꞌey ey jin ecꞌ tiꞌ,

catuꞌ chach cancan jin cꞌatan tiꞌ,

yutol oj wakꞌ caabꞌ chꞌen chꞌen ey jaach bꞌey tzꞌibꞌebꞌil ey wan chejbꞌanile wu,

yet chi oc je cuybꞌaniloj,

ẍi Jehová tet naj.

13 Catuꞌ jix too naj Moisés bꞌey sjolom jun wonan tuꞌ,

yetoj jun ẍejabꞌ jaꞌton naj Josué.

14 Jaꞌ yet cꞌamto chi too naj,

jix yalon tet ebꞌ icham winaj yeoc yul conobꞌ tuꞌ jaxca tiꞌ:

—Cananwej can titiꞌ masantaꞌcꞌal chi cu meltzo jon,

oj cancan naj Aarón cꞌal naj Hur je yetoj.

Ta ey tzet chi yoche je cꞌul chi waꞌxi,

jaꞌ ebꞌ naj oj waꞌnen ey jex,

ẍi naj Moisés.

15 Yet jix lawi yalon can naj wan tuꞌ,

catuꞌ jix atoj naj bꞌey sjolom wonan tuꞌ,

yin eymanil jix oc bꞌocꞌan jun asun sjolom jun wonan tuꞌ.

16 Jaxa yeyol kopna stzejejial Jehová bꞌey sjolom wonan Sinaí,

wajebꞌ cꞌual jix oc bꞌocꞌan jun asun bꞌey sjolom jun wonan tuꞌ.

Jaxa yet sjuj cꞌual,

jix awtele naj Moisés yu Jehová bꞌey xol asun tuꞌ.

17 Jix xꞌoxon a sbꞌa Jehová yetoj stzejejial bꞌey jun miman wonan tuꞌ sattaj ebꞌ conobꞌ.

Jaꞌ stzejejial tuꞌ,

laan yili jaxca junoj xaj kꞌakꞌ caw chi cu tzꞌaꞌtoj yu.

18 Jix lawi tuꞌ xin,

jix too naj Moisés xol jun asun tuꞌ;

jix aapnoj naj bꞌey ẍumuc jun wonan tuꞌ.

Jaꞌ tituꞌ jix cancan naj yin cawinaj cꞌu,

cꞌal cawinaj akꞌbꞌal.