2 Jaꞌ yet scꞌual jun kꞌin tuꞌ,

che yakꞌ noꞌ wacax cꞌal noꞌ meꞌ yin xaambꞌaloj tet Jehová cu Diosal,

jaꞌton bꞌey jun txꞌotxꞌ tol sicꞌbꞌil can el yu Naj,

bꞌey chi oc eyilal tet.

3 Jaꞌ noꞌ noꞌ oj je yakꞌ yin xaambꞌal tuꞌ,

oj je chiꞌ noꞌ yetoj ixim pan cꞌam yich eeyoj.

Jujebꞌ cꞌu che loꞌwej ixim pan tuꞌ,

jaꞌton ixim chi txꞌoxontej jun syaꞌilal ecꞌnaj el je yibꞌan,

catuꞌ yin eymanil jix yun je yeltej bꞌey txꞌotxꞌ Egipto.

Yuxan masanil tiempo yet iquisto jex ecꞌoj,

oj je naꞌcꞌaltej jun scꞌual yet jix jex eltej bꞌey txꞌotxꞌ Egipto.

4 Jaꞌ yin jujebꞌ cꞌual tuꞌ,

cꞌam ojabꞌ cꞌal bꞌey eey niꞌoj yich ixim pan bꞌey yul je conobꞌ bꞌey caan jex tuꞌ.

Yetoj cꞌal pax noꞌ chiꞌbꞌe oj je yakꞌ yin xaambꞌalil yet yeycꞌualil yet sbꞌabꞌel cꞌual tuꞌ,

cꞌam ojabꞌ niꞌojxa noꞌ chi cancan yet skꞌinibꞌalil yet junxa cꞌu.

5 Man ojabꞌ comonoj che yakꞌ je xaambꞌal yet kꞌin tuꞌ,

bꞌey junojxa txꞌoj conobꞌal bꞌey oj yakꞌ Jehová cu Diosal ey jex.

6 Asanne ojabꞌ bꞌey jun lugar tol jaꞌ Naj jix sicꞌon el bꞌey chex oc yin eyilal tet,

jaꞌ tituꞌ che makꞌwej cam noꞌ yet yeycꞌualil yet lalanxa stoo cꞌu,

jaꞌton yet jun hora tuꞌ yet jix jex el bꞌey txꞌotxꞌ Egipto.

7 Jaꞌ noꞌ chiꞌbꞌe tuꞌ,

tucꞌal oj je bꞌol noꞌ xol stzakꞌakꞌ,

catuꞌ oj je chiꞌon noꞌ bꞌey jun txꞌotxꞌ sicꞌbꞌil can el yu Jehová cu Diosal.

Jaxa yet junxa skꞌinibꞌal xin,

catuꞌ chex meltzo bꞌey caan jex tuꞌ.

8 Jaꞌ yul wajebꞌ cꞌual tuꞌ,

jacꞌal ixim pan cꞌam yich che loꞌ.

Jaxa yet sjuj cꞌual xin,

che yambꞌa oc je bꞌa yin mimej tzalacꞌulal yu je yiꞌon a can sbꞌi Jehová cu Diosal.

Jaꞌ yet jun cꞌual tuꞌ,

cꞌam junoj mactxequel chi swaꞌne niꞌoj smulnail.

9 Jaꞌ yet chi ẍaꞌel yich skꞌuple a ixim tiriw,

jaꞌ yet tuꞌ chi ẍaꞌel yich sbꞌisle jujebꞌ semana.

10 Jaꞌ yet chi lawi jujebꞌ semana tuꞌ,

catuꞌ che yaon cꞌal pax oc kꞌin yet chi lawi skꞌuple a ixim tiriw tuꞌ,

yu yiꞌle a can sbꞌi Jehová,

catuꞌ che yakꞌon je yofrenda chi el yin je cꞌul je yakꞌoni,

jatacꞌalaꞌ jantaj chi yun yakꞌon syaaxilal Jehová cu Diosal ey jex.

11 Che yaoc jun kꞌin tuꞌ sattaj Jehová bꞌey jun txꞌotxꞌ sicꞌbꞌil can el yu,

yet chi oc eyilal tet.

Jaꞌ tituꞌ che yambꞌawej oc je bꞌa yetoj ebꞌ je yuninal,

cꞌal yetoj ebꞌ je yakꞌomal servil,

ebꞌ Levita caan je xol,

ebꞌ txꞌoj conobꞌal,

ebꞌ cꞌamxa smam cꞌal ebꞌ cꞌamxa xutx,

yetoj cꞌal ebꞌ ix ix camnajxa yichamil caan ecꞌ je yetoj yul je conobꞌ tuꞌ.

12 Naꞌwej cꞌal pax tej jaex tiꞌ,

tol yin yakꞌomal servil jix yun je yecꞌ bꞌey txꞌotxꞌ Egipto.

Yuxan caw chi cam je yiloni tzet chi yun je bꞌeybꞌalnen masanil tzet chi yal can sley cu Diosal.

13 Jaꞌ yet chi lawi je kꞌupon a ixim je tiriw,

cꞌal yet chi lawi je tecꞌon el yal an uva,

che yaoc jujebꞌoj cꞌual kꞌin yet wan pat waꞌnebꞌil a yetoj skꞌabꞌ teꞌ.

14 Jaꞌ yet jun kꞌin tuꞌ che yakꞌon tzalabꞌoj je cꞌul yetoj ebꞌ je yuninal,

yetoj ebꞌ je yakꞌomal servil,

ebꞌ Levita,

ebꞌ txꞌoj conobꞌal,

ebꞌ unin cꞌamxa smam xutx,

yetoj cꞌal ebꞌ ix ix camnajxa yichamil caan ecꞌ yul je conobꞌ tuꞌ.

15 Jujebꞌ cꞌual che yaoc jun kꞌin tuꞌ,

yu je yiꞌon a can sbꞌi Jehová cu Diosal,

jaꞌton bꞌey sicꞌbꞌilxa can el yu Naj.

Jaxca ton wal tuꞌ oj yun yakꞌon syaaxilal Naj yibꞌan sat je yawo,

cꞌal yibꞌan je mulnail.

Queytuꞌ oj yun je caey ecꞌ yin tzalacꞌulal.

16 Masanil ebꞌ winaj,

sowalil oxel chi jul ebꞌ sattaj Jehová cu Diosal yul junjun abꞌil,

jaꞌton bꞌey jun lugar tol jaꞌ Naj jix sicꞌon can eloj.

Jaꞌ wan kꞌin oj oc tuꞌ,

jaꞌton kꞌin yet ixim pan cꞌam yich,

kꞌin yet chi lawi skꞌuple a ixim tiriw,

cꞌal kꞌin yet wan pat waꞌnebꞌil a yetoj skꞌabꞌ teꞌ.

Cꞌam cꞌal junoj chi apni oc sattaj Jehová yin tol cꞌam yofrenda iꞌbꞌil oc yu,

17 yuxan junjun cꞌal mactxequel chi yiꞌtoj yofrenda,

jatacꞌalaꞌ jantaj syaaxilal ey yul skꞌabꞌ yu Jehová cu Diosal.

18 Sicꞌle ojabꞌ oc ebꞌ juez cꞌal ebꞌ yaaw,

bꞌey masanil wan conobꞌ oj yakꞌ Jehová cu Diosal tet junjun icꞌaale,

yet chi naꞌle oc yin ebꞌ conobꞌ yu ebꞌ yin sjichanil.

19 Man ojabꞌ qꞌuexan oj chi yun snaꞌon oc ebꞌ yaaw yin junoj kꞌane,

cꞌam ojabꞌ chi sqꞌuextoj skꞌaneal junoj tzet chi swaꞌne oc ebꞌ,

bꞌey cꞌal ian ojabꞌ chi yun snaꞌon oc ebꞌ yin junoj mactxequel.

Cꞌam ojabꞌ sqꞌuexanil ebꞌ ánima yul sat ebꞌ,

cꞌam ojabꞌ chi ẍaꞌ tumin ebꞌ yin ewantajil tet junoj mactxequel,

yutol jaꞌ yetoj chꞌen tumin tuꞌ,

eyman chi qꞌuexchatoj snaꞌbꞌal ebꞌ.

Jacꞌal ton yetoj chꞌen tumin tuꞌ,

chi qꞌuexchatoj skꞌane ebꞌ watxꞌ yeoc snaꞌbꞌal.

20 Watxꞌ ojabꞌ cꞌal chi yun snaꞌon oc ebꞌ yin junoj mactxequel.

Jaꞌton jun tiꞌ smoo je yuneni,

yet watxꞌ tzalacꞌulal cꞌal oj jex caey ecꞌ sat txꞌotxꞌ txꞌotxꞌ oj yakꞌ Jehová cu Diosal ey jex.

21 Cꞌam ojabꞌ che yaw eytoj junoj teꞌ teꞌ yet chi oc txꞌoxbꞌanile yet eyilal tet jun comon dios chi yij Aserá.

Cꞌam ojabꞌ che yaw eytoj teꞌ teꞌ bꞌey scawilal yet xaambꞌal chi akꞌle tet Jehová cu Diosal.

22 Cꞌam ojabꞌ che waꞌne a latzꞌan chꞌen chꞌen bꞌey chi yiꞌey sbꞌa ebꞌ ánima.

Jaꞌ wan tuꞌ caw yaabꞌetaj yul sat Jehová cu Diosal.