2 Ta jaꞌ bꞌey wan conobꞌ oj yakꞌ Jehová cu Diosal ey jex tuꞌ,

ta jaꞌ tituꞌ chi ilcha oc spenail chi el yunen junoj winaj,

ma junoj ix chi yun tzetyetal tol cꞌam chi ẍaꞌ scꞌul Dios,

caw chi oc spenail yin jun swa kꞌane Dios,

ta tol man watxꞌoj tzet chi el sbꞌeybꞌalnen jaxca wan chi wal tiꞌ:

3 Ta tol chi oc yin eyilal tet wan comon dios,

ma chi oc eyilal tet cꞌu,

tet xꞌaaw,

ma tet weycan,

jaꞌton bꞌey wan jix yal can Jehová cu Diosal tol cꞌam chi skeꞌ yoc eyilal tet,

4 ta che yabꞌ skꞌumal yin junoj mactxequel,

chi cam wal je kꞌanlen je yabꞌe ta yel jix yun ebꞌ jun tzet man watxꞌoj tuꞌ,

5 sowalil chi naꞌle oc yin yu ebꞌ eyoc yin yaawil catuꞌ chi iꞌle eltoj jun chi oc spenail tuꞌ bꞌey spuertail jun conobꞌ tuꞌ,

catuꞌ chi kꞌojchꞌennele camoj.

6 Ta ey cawanoj,

ma oxwanoj testigo chi aloni,

chi skeꞌ yoc xacꞌal camich yibꞌan jun mactxequel tuꞌ.

Ta asanne junoj testigo xin,

cꞌam cꞌal chi skeꞌ yoc camich yibꞌan junoj mactxequel.

7 Jaꞌ ebꞌ testigo tuꞌ chi bꞌabꞌi kꞌojon oc chꞌen chꞌen yin jun mactxequel tuꞌ.

Catuꞌ chi skꞌojon pax oc yet masanil ebꞌ conobꞌ yin.

Queytuꞌ chi yun yelcan jun spenail ey je xol tuꞌ.

8 Ta cꞌuxan ey junoj jowal chi a yul je conobꞌ,

ta caw yaꞌtaj snaꞌcha eloj,

kꞌinaloj jaxca wan tiꞌ:

Ta tol yin snaꞌbꞌal junoj mactxequel chi tita,

catuꞌ chi smakꞌon cam junoj ánima,

ma xin tol man yin oj snaꞌbꞌal chi tita catuꞌ chi yuneni,

jaxca yin junoj jowal txꞌotxꞌ,

ma junoj makꞌlebꞌail chi oqui,

ma junojxa comon jowal chi a je xol;

ma junojxa tzetyetal chi apni oc bꞌey sattaj ebꞌ juez tuꞌ,

eyman chex too bꞌey jun lugar tol oj sicꞌle el yu Jehová cu Diosal,

9 catuꞌ che wa alne yetoj ebꞌ yakꞌomal xaambꞌal titnaj yin yicꞌaal Leví,

yetoj cꞌal ebꞌ juez,

catuꞌ che waꞌnen yeoc jun kꞌane tuꞌ.

Jaꞌ ebꞌ tuꞌ oj naꞌon tzet oj yun yeloc apnoj,

yet chi waꞌxi yeoc jun kꞌane tuꞌ.

10 Jal jex jaex tiꞌ,

jaꞌ tzet oj yal ebꞌ,

jaꞌ oj je jije,

jatacꞌalaꞌ tzet oj yun yalon ebꞌ ey jex.

11 Jaxca wal chi yun yalon ebꞌ tuꞌ,

queytuꞌ chi yun je jijeni.

Jaxca jix yun yal-le tuꞌ,

queytuꞌ che yute.

Cꞌam cꞌal bꞌey che qꞌuextoj niꞌoj skꞌaneal.

12 Jal pax mactxequel chi waꞌnen yeoc junoj kꞌane yul yet xin,

ta tol man jaxca oj jix yun yalon naj yakꞌomal xaambꞌal chi akꞌon servil Jehová cu Diosal,

ma jaxca yalon ebꞌ juez,

jaꞌ jun tuꞌ chi oc cꞌal pax camich yibꞌan.

Queytuꞌ oj yun slawi ey masanil spenail je xol.

13 Jaꞌ yet oj yotajnen el ebꞌ conobꞌ jun tuꞌ,

oj xiwa ebꞌ,

manxa oj swaꞌne yeoc junoj kꞌane ebꞌ yul yet.

14 Jaꞌ yet oj jex apnoj oc sat txꞌotxꞌ txꞌotxꞌ oj yakꞌ Jehová cu Diosal ey jex,

yet xax ecꞌ can txꞌotxꞌ je yu tuꞌ,

jaxa je caey ecꞌ sat txꞌotxꞌ tuꞌ.

Catuꞌ oj je yalon jaxca tiꞌ:

Cu sicꞌwej oc junoj cu reyal chi yakꞌ yaawilal cu xol,

jaxca wan nación ey cu cawilal tiꞌ,

ta je chi.

15 Jaꞌ ojabꞌ junoj je yet conobꞌ che yaoc je reyaloj.

Jaꞌ ojabꞌ caw Jehová cu Diosal chi sicꞌon ocoj.

Man ojabꞌ txꞌoj conobꞌal oj junoj che yaoc je reyaloj,

yutol man je yet conobꞌoj.

16 Yuxan jaꞌ jun rey tuꞌ,

man ojabꞌ ecꞌaloj noꞌ che oj smaneloj,

man oj ẍejtoj ebꞌ winaj bꞌey txꞌotxꞌ Egipto yu stoo smanontej ecꞌaloj noꞌ ẍe ebꞌ tituꞌ,

yutol jaꞌ Jehová jix alon jaxca tiꞌ:

Cꞌamxa bꞌakꞌin oj jex meltzo bꞌey txꞌotxꞌ Egipto junelxa.

17 Jacꞌalaꞌ pax oj,

tol man ojabꞌ ecꞌaloj ix chi oc yistiloj,

yet watxꞌ cꞌam chi ijbꞌaletoj naj yin spenail yu ebꞌ ix,

man ojabꞌ pax mimanoj chꞌen oro cꞌal chꞌen plata chi syambꞌa ocoj.

18 Jaꞌ yet chi oc jun rey tuꞌ yin yopiso,

oj je waꞌnewej junoj scopiail jun cuybꞌanile tiꞌ.

Jaꞌ an bꞌabꞌel copia eyoc yul skꞌabꞌ ebꞌ yakꞌomal xaambꞌal xol ebꞌ yicꞌaal Leví,

jaꞌ oj iꞌle eltej.

19 Sowalil tol iꞌbꞌil cꞌal oc scopiail jun cuybꞌanile tuꞌ yu naj,

catuꞌ oj scuyon cꞌal naj junjun cꞌu,

yet watxꞌ ey yeloc apnoj Jehová cu Diosal yul sat naj,

yetoj cꞌal pax oj tol ey ojabꞌ yeloc apnoj yul sat yet chi sbꞌeybꞌalnen wan chejbꞌanile tiꞌ.

20 Scuy ojabꞌ cꞌal wan chejbꞌanile tuꞌ naj,

yet watxꞌ cꞌam chi snaꞌ naj tol miman yeloc apnoj naj yintaj ebꞌ yet conobꞌ,

yetoj cꞌal pax oj,

yet watxꞌ cꞌam chi yiꞌel sbꞌa naj yin junoj tujan wan chejbꞌanile tiꞌ.

Ta jaxca tuꞌ oj yute sbꞌa naj,

caw naatil oj yakꞌ yaawilal naj xol ebꞌ yet conobꞌ tuꞌ.