3 Jaꞌ tzetyetal eyoc smajuloj ebꞌ yakꞌomal xaambꞌal,

jaꞌton noꞌ wacax,

cꞌal noꞌ meꞌ chi yakꞌ ebꞌ ánima yin xaambꞌaloj,

jaꞌ wan chi akꞌle tet ebꞌ jaꞌton wan tiꞌ:

Noꞌ sjolom xicꞌ,

noꞌ ẍiꞌbꞌeal yalan stiꞌ,

cꞌal yetoj stzucutz noꞌ.

4 Catuꞌ jaꞌ ebꞌ chi iꞌon cꞌal pax can oc ixim bꞌabꞌel tiriw chi yakꞌ ebꞌ conobꞌ,

an bꞌabꞌel uva,

cꞌal bꞌabꞌel aceite olivo,

yetoj noꞌ bꞌabꞌel lana chi el yin noꞌ meꞌ.

5 Yutol jaꞌ Jehová cu Diosal jix sicꞌon can el ebꞌ yetoj yicꞌaal bꞌey xol masanil wanojxa icꞌaale,

yet watxꞌ chi yakꞌ servil Jehová ebꞌ yin junelne.

6 Ta ey junoj ebꞌ yicꞌaal Leví eyecꞌ je xol bꞌey caan jex jaex Israel jex tiꞌ,

ta chi snaꞌbꞌalne eloj tol jaꞌ bꞌey jun lugar oj sicꞌ can el Jehová,

7 chi skeꞌ yoc yin yakꞌon servil Jehová cu Diosal,

laan cꞌal chi yun can jaxca ebꞌ yet Levitail lalan yakꞌon servil Dios.

8 Laan cꞌal oj yun ẍaꞌon sloꞌbꞌe jaxca yet ebꞌ tuꞌ,

caxcꞌal ey tzet jix ẍaꞌ smajuloj tet smam.

9 Jaꞌ yet oj jex apnoj oc bꞌey txꞌotxꞌ txꞌotxꞌ oj yakꞌ Jehová cu Diosal ey jex,

cꞌam ojabꞌ che bꞌeybꞌalne sbꞌeybꞌal ebꞌ ánima caan tituꞌ.

10 Cꞌam ojabꞌ junoj jex che yakꞌ tzꞌaꞌ je yuninal yin xaambꞌalil.

Cꞌam ojabꞌ mactxequel chi scuy sbꞌa yet chi snaꞌon el junoj kꞌane,

cꞌam ojabꞌ junoj mactxequel chi naꞌon el junoj kꞌane yin eyojto,

ma chi yal tzet chi yal junoj labꞌ,

cꞌam ojabꞌ junoj mactxequel chi yaoc sbꞌa yin atxumal,

11 cꞌam ojabꞌ junoj mactxequel chi skꞌanle sbꞌa tet ebꞌ chi yal sbꞌa jelanil.

Cꞌam ojabꞌ junoj mactxequel chi awten spixan camom.

12 Yutol jaꞌ ebꞌ chi bꞌeybꞌalnen wan tuꞌ,

caw yaabꞌil el ebꞌ yu Jehová.

Yu spenail chi sbꞌeybꞌalne wan nación tuꞌ,

yu cꞌal wan tuꞌ,

yuxan jaꞌ Jehová cu Diosal,

oj iꞌon el ebꞌ je sattaj.

13 Jal jex jaex tiꞌ xin,

caw sowalil tol caw watxꞌ che yute je naꞌbꞌal sattaj Dios.

14 Jaꞌ ebꞌ ánima ey bꞌey wan nación bꞌey oj jex caey ecꞌ tuꞌ,

caw chi yaoc ebꞌ yin scꞌul tzet chi yal ebꞌ atxum,

cꞌal ebꞌ chi alon el junoj kꞌane tol to oj juloj.

Jal jex pax jaex tiꞌ xin,

cꞌam chi ẍaꞌ scꞌul Jehová cu Diosal tol che bꞌeybꞌalne wan tzetyetal tuꞌ.

15 Jaꞌ Jehová cu Diosal,

oj sicꞌon el junoj je yet conobꞌ yet oj oc ẍejabꞌoj,

jaxca jix yun jin sicꞌle el jain tiꞌ yu Jehová.

Sowalil oj je jije tet yin tzet oj yalaꞌ.

16 Caw yel jaꞌton jun tuꞌ jix je kꞌan tet Jehová cu Diosal,

yet ey jex ecꞌ bꞌey txꞌotxꞌ wonan Horeb,

yet yaman jex oc yet jun cꞌual tuꞌ,

jix je yalon jaxca tiꞌ:

Cꞌamxa chi yoche cu cꞌul chi kabꞌ yoc yul snukꞌ Jehová cu Diosal tuꞌ,

cꞌamxa chi yoche cu cꞌul chi kil yin jun miman kꞌakꞌ tuꞌ,

yet watxꞌ cꞌam chi cu cami,

je chi jix je yaloni.

17 Yu jun tuꞌ xin,

yuxan jix yal Jehová ey jin jaxca tiꞌ:

Watxꞌ tzet jix yal ebꞌ ánima tuꞌ.

18 Jain oj jin sicꞌ eltej junoj jin chejabꞌ xol ebꞌ jaxca jix yun jaach jin sicꞌon ocoj.

Jain tiꞌ oj wakꞌ yotajne el tzet oj yalaꞌ,

catuꞌ oj yalon masanil ey jex jantaj tzet chi walaꞌ.

19 Jaꞌ mactxequel tol man oj ẍaꞌ yabꞌ tzet chi yal jun jin chejabꞌ tuꞌ,

tol jaꞌ oj kꞌanabꞌ jin qꞌuexeloj,

sowalil oj wakꞌ sowalil tet ebꞌ man oj jijen tuꞌ.

20 Jal pax junoj chi stzꞌaj yaloc sbꞌa jin chejabꞌoj tol chi alon jin kꞌane yaloni,

ma xin yin sbꞌi junojxa comon dios chi kꞌanabꞌ eloj,

jaꞌ jun tuꞌ,

sowalil chi cami,

ẍi Jehová.

21 Ta ey jex jaex tiꞌ oj je yal jaxca tiꞌ:

¿Tzet wal oj yun kotajnen eloj ta manaj Jehová cu Diosal chi alon wan tzet chi yal tuꞌ?

ta je chi,

che yaloni.

22 Ta jaꞌ jun chejabꞌwom tuꞌ,

lalan yalon el wanoj kꞌane yin jin bꞌi jain Jehová jin tiꞌ,

ta cꞌam chi el pax oc tzet chi yalaꞌ,

jaꞌton jun tuꞌ chi txꞌoxon eloj tol man jain oj chi walaꞌ,

tucꞌal chi snaꞌa yul yet chi yal tuꞌ,

yuxan cꞌam chi skeꞌ comon cꞌal chex xiwa yun wan tzet chi yal ebꞌ tuꞌ.