—Jaꞌ tinaniꞌ elan yetoj ebꞌ ánima tiꞌ,

ebꞌ jix ja wiꞌeltej bꞌey conobꞌ Egipto tuꞌ.

Iꞌtoj ebꞌ bꞌey txꞌotxꞌ txꞌotxꞌ bꞌey jix wakꞌcan jin tiꞌ wakꞌon tet Abraham,

tet Isaac cꞌal tet Jacob,

jaꞌton txꞌotxꞌ bꞌey wakꞌnaj can jin tiꞌ wakꞌon can tet yicꞌaal ebꞌ.

2 Jain oj jin wakꞌ bꞌabꞌoj jun wángel je sattaj,

jaꞌ oj jex ijbꞌanoj.

Oj wiꞌel ebꞌ ánima caan sat txꞌotxꞌ txꞌotxꞌ tuꞌ,

jaꞌton:

Ebꞌ Cananeo,

ebꞌ Amorreo,

ebꞌ Hitita,

ebꞌ Ferezeo,

ebꞌ Heveo yetoj cꞌal ebꞌ Jebuseo.

3 Asiꞌwej sat txꞌotxꞌ txꞌotxꞌ tol caw ey syaxil sat,

jal jin jain tiꞌ,

man oj jin toj je yetoj,

yutol caw pit ebꞌ ánima tiꞌ,

ey smey chex jin qꞌueycan el yul-laj bꞌe,

ẍi Jehová.

4 Jaꞌ yet jix yabꞌen ebꞌ ánima wan kꞌane tuꞌ,

caw jix cusa scꞌul masanil ebꞌ,

cꞌamxa mac jix yaoc ue yin snukꞌ cꞌal ome yin xiquin.

5 Yutol albꞌilcan tet Moisés yu Jehová jaxca tiꞌ:

—Al tet ebꞌ ja wet Israelal tol jain chi wal can jaxca tiꞌ:

Jaex tiꞌ caw pit jex.

Kꞌinaloj ta chin eecꞌ je yetoj junoj txolan,

ey smey chex wakꞌ lawoj eloj.

Jaꞌ tinaniꞌ iꞌwej el masanil je yu cꞌal je yom yin je txiquin,

jaxa wiloni tzet oj wute jin bꞌa je yetoj,

ẍi Dios.

6 Yu tuꞌ xin,

jix el ebꞌ bꞌey yich txꞌotxꞌ wonan Sinaí,

cꞌamxa cꞌal junoj ebꞌ jix yaoc yu yin snukꞌ cꞌal yom yin xiquin.

7 Catuꞌ jix xuyle ey jun Kꞌap Na yet Jehová yu naj Moisés,

naat ta jix yiꞌel naj stiꞌel bꞌey bꞌulan ey ebꞌ tuꞌ.

Catuꞌ jix yakꞌon yij sbꞌi jaxca tiꞌ:

Jun Kꞌap Na bꞌey chi cu chaꞌle cu bꞌa yetoj Dios.

Ta ey junoj mac chi too kꞌanabꞌ yetoj Jehová,

sowalil chi too ebꞌ bꞌey jun kꞌap na yet chi kꞌanabꞌ ebꞌ yetoj Dios.

8 Jaꞌ yet chi octoj naj Moisés yul jun kꞌap na tuꞌ,

masanil ebꞌ ánima chi eltej linan ebꞌ bꞌey stiꞌ smajil sna,

jun laan chi yun stoo tꞌanan ebꞌ yin naj Moisés,

masantaꞌcꞌal chi oc cantoj naj yul skꞌap na tuꞌ.

9 Asanne yet chi octoj naj,

catuꞌ chi eyol bꞌocꞌan jun asun yibꞌan,

chi oc joyan yin stiꞌ jun na tuꞌ,

queytuꞌ chi yun skꞌanabꞌ Jehová yetoj Moisés.

10 Jaꞌ yet chi yilon ebꞌ ánima yeyol bꞌocꞌan jun asun bꞌey stiꞌ kꞌap na tuꞌ,

chi ey caan masanil ebꞌ,

chi oc ebꞌ yin eyilal sattaj Jehová.

11 Jaccombꞌa chi yun skꞌanabꞌ Jehová yetoj naj Moisés,

jaxca wal chi yun cu kꞌanabꞌ yetoj junoj cu watxꞌil ánima.

Chi lawi tuꞌ,

chi meltzotej naj Moisés.

Jal pax Josué xin,

naj ẍejabꞌ Moisés,

jaꞌton naj scꞌaal Nun,

cꞌam cꞌal chi eltej naj yul kꞌap na tuꞌ.

12 Jix yalon naj Moisés tet Jehová:

—Jaach Jehová jin Diosal,

jaach jix ja wal ey jin tol jain chi wijbꞌa jun conobꞌ tiꞌ,

yutol ma pax ja wal ey jin mactxequel oj colwa wetoj.

Catuꞌ jix ja waloni tol caw otajbꞌil jin ja wu,

yutol ey ja camcꞌulal win.

13 Yuxan ta jaxca tuꞌ,

akꞌ wotajne eloj,

tzet naꞌbꞌil ja wu,

yet watxꞌ chi skeꞌ jaach jin camcꞌulneni,

catuꞌ chi wakꞌon tzalabꞌoj ja cꞌul.

Jaꞌ wotaj sicꞌlebꞌil tol jaꞌ jun ja conobꞌ cha waoc yul jin kꞌabꞌ tiꞌ,

ja conobꞌ yeocoj,

ẍi naj Moisés.

14 —Catuꞌ jix takꞌwi Dios jaxca tiꞌ:

Jain caw oj jin toj je yetoj,

jaxa je can yin tzalacꞌulal bꞌey sat txꞌotxꞌ txꞌotxꞌ tiꞌ,

ẍi Dios tet naj Moisés.

15 Jix takꞌwi pax Moisés jaxca tiꞌ:

—Caw watxꞌ ta ey jaach cꞌal ecꞌ ketoj jon jaach jin Diosal,

ta tol cꞌam chach too ketoj jon,

watxꞌ mi tol cꞌam chi cu el bꞌey jun txꞌotxꞌ tiꞌ jon.

16 Kꞌinaloj ta cꞌam chach too ketoj tinaniꞌ jon,

¿tzet wal chi yun xeclo eloj,

ta ey ja tzalacꞌulal win,

cꞌal yin ebꞌ ja conobꞌ tiꞌ?

Ta tol chach eecꞌal ecꞌ ketoj jon xin,

chi xꞌoxel sbꞌa tol ja conobꞌ jon,

catuꞌ sicꞌbꞌil jon el ja wu xol masanil wanxa conobꞌ,

ẍi Moisés tet Jehová.

17 —Jix yalon Jehová tet Moisés jaxca tiꞌ:

Jaꞌ wan kꞌane jix ja wal tiꞌ,

oj wun jaxca cha wal tuꞌ,

yutol caw chach waoc yipoj jin cꞌul,

catuꞌ chach jin camcꞌulne,

ẍi Jehová tet naj Moisés.

18 —Jaach jin Diosal,

txꞌox wal ja tzejejial wil an,

ẍi Moisés.

19 Jix takꞌwi Dios jaxca tiꞌ:

—Masanil jin watxꞌcꞌulal oj jin txꞌox ey jaach,

jaꞌ ja sattaj oj wal jin bꞌi,

tol jain ton Jehová jin,

tol oj wakꞌ jin watxꞌcꞌulal tet mac chi yal jin cꞌul,

catuꞌ oj okꞌ jin cꞌul yin mac bꞌey chi yal jin cꞌul.

20 Chi wal ey jaach,

tol ma skeꞌ ja wilon oc yin jin sat,

yutol cꞌam junoj mac chi skeꞌ yilon jin sat,

ta ey mac chi ilon yin jin sat,

yin jun txolan chi cami.

21 Jaꞌ jin cawilal tiꞌ ey jun chꞌen chꞌen bꞌey chi skeꞌ ja woc tecꞌan yibꞌan.

22 Jaꞌ yet oj jin ecꞌtoj yetoj jin tzejejial tuꞌ,

oj jaach waoctoj yul sjolanil chꞌen chꞌen tuꞌ,

catuꞌ oj jin majchen ey ja sat yetoj jin kꞌabꞌ,

yet watxꞌ chin ecꞌ cantoj.

23 Jaxa yet oj jin ecꞌ cantoj,

oj wiꞌon el jin kꞌabꞌ,

asanne wichin oj skeꞌ ja wiloni;

jal pax jin sat xin,

cꞌam niꞌoj oj ja wilaꞌ,

ẍi Jehová.