Jun Chejbꞌanile Miman Yeloc Apnoj
6
Jix yalon naj Moisés jaxca tiꞌ:
Jaꞌton wan ley cꞌal wan chejbꞌanile tiꞌ jix yal Jehová cu Diosal tol chi wal ey jex,
tol oj je bꞌeybꞌalne yet oj je yiꞌon oc txꞌotxꞌ txꞌotxꞌ bꞌey skꞌaxepal ecꞌtoj jaꞌ Jordán.
2 Yuxan jijewej cꞌal ẍejbꞌanil Jehová chi wal can ey jex tiꞌ,
cꞌal ebꞌ je yuninal cꞌal ebꞌ je yitxiquin,
ey ojabꞌ cꞌal yeloc apnoj Jehová cu Diosal yul je sat yet ey jex ecꞌ bꞌey yul yibꞌankꞌinal tiꞌ.
Ta jaxca tuꞌ caw ecꞌal abꞌil oj je yil bꞌey sat txꞌotxꞌ txꞌotxꞌ tiꞌ.
3 Jex wet conobꞌ Israel,
abꞌwej,
awej oc yin je cꞌul je jijen wan chejbꞌanile tiꞌ,
yet watxꞌ,
watxꞌ cꞌal oj jex elocoj,
yel xacꞌal miman conobꞌ oj yun je yeloc bꞌey sat txꞌotxꞌ txꞌotxꞌ caw ey syaaxil sat tuꞌ,
jaxca jix yun yalon Jehová cu Diosal ey jon yetoj cꞌal tet ebꞌ kichmam.
4 Jex wet conobꞌ Israel,
abꞌwej xin:
Asanne Jehová cu Diosal,
cꞌam junojxa.
5 Camcꞌulnewej Jehová cu Diosal yetoj masanil je cꞌul,
cꞌal yetoj masanil je pixan,
cꞌal yetoj masanil je yip.
6 Jaꞌ wan kꞌane chi wal ey jex tinaniꞌ,
cꞌubꞌawej can yin je naꞌbꞌal.
7 Jaꞌ wan tiꞌ oj je yakꞌ cꞌal scuy ebꞌ je yuninal yin junjun cꞌu.
Che yal tet ebꞌ yet ey jex ecꞌ bꞌey je na,
cꞌal yet lalan je bꞌeyi,
yetoj yet chex wey can aoj,
cꞌal yet chex a waanoj.
8 Tzꞌibꞌewej cꞌal oc wan chejbꞌanile tiꞌ yin je kꞌabꞌ cꞌal snan je sat,
jaxca junoj txꞌoxbꞌanile chi yun can oc ey jex yu je naꞌontej.
9 Catuꞌ che tzꞌibꞌen cꞌal pax oc yin spilaliẍal cꞌal yin smajil stiꞌ je na.
Jix Yal Naj Moisés Tol Chi Sjije Sley Jehová Ebꞌ Conobꞌ
10 Jaꞌ Jehová cu Diosal,
jaꞌ oj jex iꞌon apnoj oc bꞌey jun txꞌotxꞌ txꞌotxꞌ tol jix yakꞌ can stiꞌ yakꞌon can tet ebꞌ kichmam,
jaꞌton Abraham,
Isaac cꞌal Jacob.
Ey wan conobꞌ tol txꞌojxa swatxꞌil yili bꞌey jun txꞌotxꞌ tuꞌ,
tol man jaex oj,
jix je waꞌne aoj.
11 Jantaj na tol nonaj yu tzetyetal caw wal watxꞌ yili,
man jaex oj jix je yakꞌ noel yul.
Ey jaꞌ ucꞌbꞌal jaꞌ jotbꞌil,
tol man jaex oj jix je yakꞌ syaꞌil je jotoni.
Ey an uva cꞌal teꞌ olivo awbꞌil,
tol man jaex oj jix je yawaꞌ.
Jaꞌ wan tuꞌ tuxa cꞌal oj je loꞌ masantaꞌcꞌal oj no je cꞌul.
12 Jaꞌ yet oj yunen masanil wan tuꞌ,
cꞌam ojabꞌ chi too qꞌueycꞌulal Jehová cu Diosal je yu.
Naꞌwejtej tol jaꞌ Naj jix jex iꞌon eltej bꞌey txꞌotxꞌ Egipto,
bꞌey ey jex oc yin yakꞌomaloj servil.
13 Asanne ojabꞌ tet Jehová cu Diosal chex ey kaanoj,
asanne ojabꞌ Naj che yakꞌ servil.
Asanne ojabꞌ sbꞌi che yakꞌ bꞌinaoj,
yet che yakꞌon can je tiꞌ yin junoj tzetyetal.
14 Cꞌam ojabꞌ chex oc tzajan yintaj wan sdiosal ebꞌ ánima caan je cawilal,
15 yutol caw jow scꞌul Jehová cu Diosal yin wan tuꞌ.
Yutol eyecꞌ Naj je xol tuꞌ,
jaxa tala chi yunne,
chi tit sjowal scꞌul Naj je yin catuꞌ chex yakꞌon qꞌueyeloj,
yutol cꞌam chi ẍaꞌ scꞌul Naj tol chi kaoc cu naꞌbꞌal yin junojxa comon dios.
16 Cꞌam ojabꞌ che yakꞌ porobꞌal Jehová cu Diosal,
jaxca jix je yute je bꞌa bꞌey txꞌotxꞌ cusiltaj txꞌotxꞌ chi yij Masá.
17 Jijewej cꞌal sley cꞌal ẍejbꞌanil Naj,
jaꞌton jantaj ẍejbꞌanil jix yalcanoj.
18 Watxꞌ cꞌal che yute je naꞌbꞌal cꞌal je bꞌeybꞌalnen watxꞌ bꞌeybꞌale jaxca chi yoche Dios,
yet watxꞌ,
watxꞌ cꞌal oj jex elocoj.
Oj je yiꞌcan oc txꞌotxꞌ txꞌotxꞌ bꞌey jix yakꞌ can stiꞌ Naj yakꞌon tet ebꞌ kichmam.
19 Jaꞌ Jehová,
oj ujten el ebꞌ chi jowi oc je yin,
jaxca jix yun yalon canoj.
20 Jaꞌ yet cu sattajto tuꞌ,
oj skꞌanle ebꞌ je yuninal ey jex:
¿Tzet yu,
yuxan ey can wan ley cꞌal wan chejbꞌanile jix yakꞌ can Jehová cu Diosal?
ta ẍi ebꞌ ey jex.
21 Catuꞌ chex takꞌwi tet ebꞌ jaxca tiꞌ:
Jaon tiꞌ tol yakꞌomal servil keoc bꞌey naj sreyal Egipto yet peyxa tuꞌ,
man ket oj cu bꞌa,
jaxa Jehová jix cu colon eltej yetoj miman yipalil.
22 Jaon tiꞌ jix kil yin wan tzet qꞌueyubꞌtaj yili jix xꞌoxo yetoj jantaj tzetyetal tol eyxa smey yili ocoj.
Masanil jix xꞌox tet naj sreyal txꞌotxꞌ Egipto,
yetoj cꞌal masanil ebꞌ yet conobꞌ tuꞌ.
23 Jix cu yiꞌon eltej Naj tituꞌ,
catuꞌ jix cu yiꞌontej Naj bꞌey txꞌotxꞌ txꞌotxꞌ jix yakꞌ can stiꞌ yakꞌon tet ebꞌ kichmam.
24 Jix yalon Jehová cu Diosal,
tol chi cu jije wan chejbꞌanile tiꞌ,
yu cu naꞌon cꞌaltej Naj,
yet watxꞌ,
watxꞌ cꞌal cu cꞌul,
jaxca cꞌal keoc tinaniꞌ.
25 Yuxan ta oj cu jije cꞌal wan chejbꞌanile tiꞌ jaxca jix yun yalon can Jehová,
watxꞌ jon yul sat,
je chi tet ebꞌ je yuninal tuꞌ.