10 Jaꞌ txꞌotxꞌ jix chaꞌlo sicꞌcha eltej yet yox tujan, jaꞌ tet ebꞌ yicꞌaal Zabulón jix can txꞌotxꞌ, jatacꞌalaꞌ jayebꞌ tujan yeoc sbꞌisil ebꞌ. Jaꞌ smoonal txꞌotxꞌ jix apni tacꞌal oc bꞌey Sarid, 11 catuꞌ chi too cꞌal yetcꞌulal bꞌey chi too cꞌu masantaꞌcꞌal bꞌey Maralá, catuꞌ chi apni oc bꞌey Dabéset, chi lawi can apnoj bꞌey jaꞌ jaꞌ bꞌey sattaj ecꞌtej Jocneam. 12 Chi el bꞌey Sarid, catuꞌ chi apni tacꞌal oc smoonal txꞌotxꞌ yetcꞌulal bꞌey chi aol cꞌu bꞌey Quislot-tabor, catuꞌ chi ecꞌ pax toj bꞌey Daberat, catuꞌ chi ecꞌ atoj bꞌey Jafía. 13 Jaꞌ tituꞌ chi ecꞌtoj smoonal yetcꞌulal bꞌey chi aol cꞌu, bꞌey chi yij Gat-héfer, catuꞌ chi ecꞌtoj bꞌey Itá-casín, chi sjoy sbꞌa smoonal txꞌotxꞌ bꞌey Neá, catuꞌ chi apni tacꞌal oc bꞌey Rimón. 14 Jaxa pax bꞌey norte chi meltzotoj smoonal bꞌey Hanatón, catuꞌ chi apni oc bꞌey spananil ecꞌtoj Jefté-el. 15 Jaꞌ bꞌey jun txꞌotxꞌ tuꞌ ey lacawebꞌ conobꞌ, yetoj cꞌal yaldeail eyoc scawilal; jaꞌ xol wan tuꞌ, jatuꞌ ey conobꞌ Catat, Nahalal, Simrón, Idalá cꞌal Belén. 16 Jaꞌton jun txꞌotxꞌ tuꞌ jix yiꞌ ebꞌ yicꞌaal Zabulón, yetoj cꞌal sconobꞌal, cꞌal yaldeail.

17 Jaꞌ txꞌotxꞌ jix chaꞌlo sicꞌcha eltej yet scan tujan, jaꞌ ebꞌ yicꞌaal Isacar jix iꞌon can txꞌotxꞌ, jatacꞌalaꞌ jayebꞌ tujan yeoc sbꞌisil ebꞌ. 18 Ey wan conobꞌ eey sat jun txꞌotxꞌ tuꞌ, jaꞌton conobꞌ: Jezreel, Quesulot, Sunem, 19 Hafaraim, Sihón, Anaharat, 20 Rabit, Quisión, Ebes, 21 Rémet, En-ganim, En-hadá, cꞌal Bet-pasés. 22 Jaꞌ smoonal chi apni tacꞌal oc bꞌey Tabor, Sahasimá cꞌal Bet-semes, catuꞌ chi lawi can apnoj bꞌey jaꞌ Jordán. Ey 16 wan conobꞌ tuꞌ yetoj cꞌal yaldeail yin masanil. 23 Jaꞌton jun txꞌotxꞌ tuꞌ jix yiꞌcan oc ebꞌ yicꞌaal Isacar, yetoj cꞌal sconobꞌal cꞌal yaldeail.

24 Jaꞌ txꞌotxꞌ jix chaꞌlo sicꞌcha eltej yet sjoꞌ tujan, jaꞌ ebꞌ yicꞌaal Aser jix iꞌon can txꞌotxꞌ, jatacꞌalaꞌ jayebꞌ tujan yeoc sbꞌisil ebꞌ. 25 Wanxa conobꞌ eyoc stzꞌajiloj jaꞌton ebꞌ tiꞌ: Helcat, Halí, Beten, Acsaf, 26 Alamélec, Amad cꞌal Misal, masantaꞌcꞌal chi apni oc bꞌey sjolom wonan Carmelo, yetcꞌulal bꞌey chi too cꞌu, yetoj cꞌal Sihor-libnat. 27 Chi lawi tuꞌ, chi ecꞌ apnoj yetcꞌulal bꞌey chi too cꞌu bꞌey Bet-dagón, catuꞌ chi apni oc yin txꞌotxꞌ yet Zabulón bꞌey spananil yet Jefté-el, Bet-émec, Neiel, catuꞌ chi ecꞌ cꞌaltoj bꞌey sattajto Cabul. 28 Chi michꞌcha cꞌal pax toj conobꞌ Abdón, Rehob, Hamón, cꞌal Caná, masantaꞌcꞌal chi apni oc bꞌey miman conobꞌ Sidón. 29 Chi lawi tuꞌ, chi ecꞌtoj smoonal bꞌey yibꞌantoj Ramá, masantaꞌcꞌal chi apni oc bꞌey jun conobꞌ eyoc smuroal, jaꞌton Tiro, catuꞌ chi bꞌey cꞌaltoj bꞌey Hosá, catuꞌ chi apni oc bꞌey jaꞌ mar Mediterráneo tuꞌ. Ey cꞌal pax oc conobꞌ Mahaleb, Aczib, 30 Umá, Afec cꞌal Rehob stzꞌajiloj. Ey 22 conobꞌ, yetoj cꞌal yaldeail ey scawilal. 31 Jaꞌton jun txꞌotxꞌ tuꞌ jix yiꞌcan oc ebꞌ yicꞌaal Aser yetoj sconobꞌal yetoj cꞌal yaldeail.

32 Jaꞌ txꞌotxꞌ jix chaꞌlo sicꞌcha eltej yet swaj tujan, jaꞌ ebꞌ yicꞌaal Neftalí jix iꞌon can txꞌotxꞌ, jatacꞌalaꞌ jayebꞌ tujan yeoc sbꞌisil ebꞌ. 33 Jaꞌ xꞌotxꞌ ebꞌ tuꞌ, chi too tacꞌal bꞌey Hélef, Elón-saananim, Adamí-néqueb, cꞌal Jabneel, masantaꞌcꞌal bꞌey Lacum, catuꞌ chi apni oc bꞌey jaꞌ Jordán. 34 Jaꞌ yetcꞌulal bꞌey chi too cꞌu jatuꞌ ey smoonal, chi too tacꞌal bꞌey Asnot-tabor, catuꞌ chi apni oc bꞌey Hucoc, yuxan jaꞌ bꞌey yetcꞌulal ecꞌtoj sur chi ẍaꞌle sbꞌa smoonal txꞌotxꞌ yet ebꞌ tuꞌ yetoj cꞌal txꞌotxꞌ yet Zabulón, jaxa yetcꞌulal bꞌey chi too cꞌu chi ẍaꞌle sbꞌa yetoj txꞌotxꞌ yet ebꞌ yicꞌaal Aser. Jaxa yetcꞌulal bꞌey chi aol cꞌu chi apni oc txꞌotxꞌ yet ebꞌ yicꞌaal Neftalí, chi apni tacꞌal bꞌey jaꞌ Jordán. 35 Jal wanxa conobꞌ eyoc smuroal jix yiꞌcan oc ebꞌ: Jaꞌton Sidim, Ser, Hamat, Racat, Quinéret, 36 Adamá, Ramá, Hasor, 37 Quedes, Edrei, En-hasor, 38 Irón, Migdal-el, Horem, Bet-anat cꞌal Bet-semes. Ey 19 conobꞌ yin masanil, yetoj cꞌal yaldeail ey scawilal. 39 Jaꞌton txꞌotxꞌ tiꞌ yetoj cꞌal sconobꞌal, cꞌal yaldeail jix yiꞌcan oc ebꞌ yicꞌaal Neftalí.

40 Jaꞌ txꞌotxꞌ jix chaꞌlo sicꞌcha eltej yet sjuj tujan, jaꞌ ebꞌ yicꞌaal Dan jix iꞌon can txꞌotxꞌ, jatacꞌalaꞌ jayebꞌ tujan yeoc sbꞌisil ebꞌ. 41 Jaꞌ bꞌey xꞌotxꞌ ebꞌ tuꞌ, jatuꞌ ey conobꞌ Sora, Estaol, Ir-semes, 42 Saalbim, Aialón, Jetlá, 43 Elón, Timná, Ecrón, 44 Eltequé, Guibetón, Baalat, 45 Jehúd, Bené-berac, Gat-rimón, 46 Mejarcón, cꞌal Racón, yetoj cꞌal txꞌotxꞌ chi cancan bꞌey sattaj ecꞌtoj conobꞌ Jope. 47 Jaxa jix yun xin, ma yabꞌa jun txꞌotxꞌ tuꞌ yin ebꞌ, yutol cꞌamto xꞌotxꞌ ebꞌ yicꞌaal Dan chi yiꞌ, yuxan jix too ebꞌ naj yicꞌaal Dan tuꞌ stokꞌon ecꞌ conobꞌ Lésem, jaꞌ yet jix lawi smakꞌle cam ebꞌ ánima caan tituꞌ yu ebꞌ, catuꞌ jix yiꞌon can oc txꞌotxꞌ txꞌotxꞌ tuꞌ ebꞌ. Jix sqꞌuexon sbꞌi jun conobꞌ tuꞌ ebꞌ, jix yakꞌon yij sbꞌi ebꞌ, Dan, yet chi bꞌinale can ecꞌ sbꞌi smam icham ebꞌ. 48 Queyton tuꞌ jix yun yiꞌon can oc jun txꞌotxꞌ ebꞌ yicꞌaal Dan tuꞌ, yetoj cꞌal wan conobꞌlaj, cꞌal yaldeail.

49 Jaꞌ yet jix lawi spoꞌole ecꞌ txꞌotxꞌ txꞌotxꞌ tuꞌ xol ebꞌ Israel tuꞌ, jix akꞌle cꞌal pax can smajul txꞌotxꞌ naj Josué scꞌaal Nun yu ebꞌ, jaꞌ yin txꞌotxꞌ yet ebꞌ tuꞌ jix el yet naj Josué. 50 Jatacꞌalaꞌ tzet jix yun skꞌanoni cꞌal xꞌoxon Dios tet ebꞌ, yuxan jaꞌ txꞌotxꞌ Timnat-sérah ey bꞌey tzalquiltaj bꞌey yet Efraín jix akꞌle can tet naj, jaꞌ tituꞌ jix swaꞌne a jun conobꞌ naj, catuꞌ jix caey cꞌal ecꞌ naj tituꞌ. 51 Masanil wan txꞌotxꞌ txꞌotxꞌ tuꞌ jix spoꞌocan ecꞌ Eleazar, naj yakꞌomal xaambꞌal yeocoj, cꞌal naj Josué, yetoj cꞌal ebꞌ syaawil conobꞌ xol ebꞌ Israel. Sattaj wal Jehová bꞌey chi ẍaꞌle sbꞌa ebꞌ yetoj Dios bꞌey conobꞌ Siló tuꞌ, jaꞌ tituꞌ jix skꞌan ebꞌ tet Dios yet chi txꞌoxle tet ebꞌ tzet wal chi yun spoꞌon ecꞌ jun txꞌotxꞌ tuꞌ ebꞌ, yuxan tzꞌajan cꞌal jix yun yeloc txꞌotxꞌ yin ebꞌ.