3 Yu tuꞌ xin, jix yalon naj Josué tet ebꞌ yet conobꞌ jaxca tiꞌ: ¿Bꞌakꞌin wal oj je kꞌajtoj steꞌal txꞌotxꞌ je txꞌotxꞌ jix yakꞌ Jehová ey jex, jaꞌton cu Diosal yetoj ebꞌ kichmam? 4 Sicꞌwej el oxtajwanoj winaj xol junjun icꞌaaleal tuꞌ, yet watxꞌ oj jin chejtoj ebꞌ yu stoo yilon ecꞌ masanil txꞌotxꞌ txꞌotxꞌ ebꞌ tuꞌ, catuꞌ oj yalon ebꞌ wabꞌe, yu tzet wal yili oc txꞌotxꞌ, yet watxꞌ oj skeꞌ jin poꞌon ecꞌ txꞌotxꞌ je yin jaex tiꞌ. 5 Jaꞌ ebꞌ naj oj toj ilon ecꞌ txꞌotxꞌ tuꞌ, jujebꞌ tujan oj yun yechentej txꞌotxꞌ ebꞌ, catuꞌ chi cancan txꞌotxꞌ yet Judá bꞌey yetcꞌulal sur, jaxa ebꞌ yicꞌaal José chi iꞌon oc txꞌotxꞌ bꞌey yetcꞌulal norte. 6 Jaꞌ yet chi lawi spoꞌon ecꞌ txꞌotxꞌ txꞌotxꞌ ebꞌ tuꞌ yin jujebꞌ tujan, catuꞌ chi jul ebꞌ yalon ey jin, jain xa oj jin kꞌanle tet Jehová cu Diosal, yet chi xꞌoxon bꞌey chi can txꞌotxꞌ yet junjun icꞌaaleal. 7 Jal pax ebꞌ Levita xin, cꞌam junoj tujan xꞌotxꞌ ebꞌ oj yiꞌ. Jaꞌ tzetyetal oj yiꞌ ebꞌ, jaꞌton yopiso ebꞌ yin yakꞌomaloj xaambꞌal sattaj Jehová cu Diosal. Jaxa pax ebꞌ yicꞌaal Gad, cꞌal ebꞌ yicꞌaal Rubén, yetoj cꞌal nanxa ebꞌ yicꞌaal Manasés, eyxa smajul txꞌotxꞌ ebꞌ yetcꞌulal bꞌey chi aol cꞌu bꞌey jaꞌ Jordán, jaꞌton txꞌotxꞌ jix yakꞌ can Moisés, naj ẍejabꞌ Jehová, ẍi naj Josué tet ebꞌ.

8 Jaꞌ yet lalan stoo ebꞌ naj jix chejletoj yechen jun txꞌotxꞌ tuꞌ, jix yalon naj Josué tet ebꞌ jaxca tiꞌ: Asiꞌwej xin, che bꞌeytzen jun txꞌotxꞌ tuꞌ masanil, catuꞌ che yiꞌon a yechel txꞌotxꞌ, chi lawi je yilon txꞌotxꞌ xin, catuꞌ chex meltzotej, jain xa oj jin kꞌanle tet Jehová cu Diosal bꞌey Siló tiꞌ, yet watxꞌ chi txeclo yeoc bꞌey chi can yet junjun icꞌaaleal, ẍi naj tet ebꞌ.

9 Jix too ebꞌ naj ilom txꞌotxꞌ tuꞌ xin, jix ecꞌ ebꞌ naj yilon jun txꞌotxꞌ tuꞌ masanil. Jujebꞌ tujan jix yun yechen ebꞌ, jix stzꞌibꞌentej ebꞌ masanil jantaj jix yun junjun tujan txꞌotxꞌ. Jix lawi tuꞌ xin, jix meltzotej ebꞌ bꞌey bꞌulan ey ebꞌ bꞌey conobꞌ Siló, bꞌey ey can ecꞌ naj Josué. 10 Jix skꞌanlen naj Josué tet Jehová yin sbꞌabꞌelal bꞌey conobꞌ Siló, bꞌeytuꞌ chi can oc can xꞌotxꞌ junjun icꞌaaleal, jix lawi tuꞌ jix spoꞌon ecꞌ txꞌotxꞌ txꞌotxꞌ naj Josué xol ebꞌ yet Israelal.

11 Jaꞌ txꞌotxꞌ bꞌabꞌel jix chaꞌlo sicꞌcha eltej, jaꞌton txꞌotxꞌ jix akꞌle tet ebꞌ yicꞌaal Benjamín. Jaꞌ txꞌotxꞌ jix yiꞌ ebꞌ tuꞌ, jatuꞌ jix cancan bꞌey snan xol txꞌotxꞌ yet ebꞌ yicꞌaal Judá yetoj yet ebꞌ yicꞌaal José. 12 Jaꞌ smoonal jun xꞌotxꞌ ebꞌ tuꞌ, jaꞌ bꞌey yetcꞌulal norte chi el yich bꞌey jaꞌ Jordán, catuꞌ chi tocꞌal bꞌey snorteal yet Jericó, catuꞌ chi bꞌey cꞌaltoj bꞌey txꞌotxꞌ tzalquiltaj txꞌotxꞌ yetcꞌulal bꞌey chi too cꞌu, chi apni taꞌcꞌal txꞌotxꞌ bꞌey txꞌotxꞌ cusiltaj txꞌotxꞌ yul yet Bet-avén. 13 Chi ecꞌ cꞌaltoj tituꞌ, catuꞌ chi atoj bꞌey sur yul yet conobꞌ Luz, (jacꞌal oc chi yij pax Betel,) catuꞌ chi ey apnoj txꞌotxꞌ bꞌey Atarot-adar bꞌey jun tzalan bꞌey yetcꞌulal sur yul yet Bet-horón ey yalan eytoj tuꞌ. 14 Chi meltzotoj smoonal tuꞌ bꞌey yetcꞌulal sur bꞌey txꞌotxꞌ wonan ey bꞌey sattaj Bet-horón tuꞌ, masantaꞌcꞌal bꞌey Quiriat-baal, (jacꞌal oc chi yij cꞌal pax Quiriat-jearim,) yet ebꞌ yicꞌaal Judá yeoc jun conobꞌ tuꞌ, jaꞌton smoonal chi can yetcꞌulal bꞌey chi too cꞌu.

15 Jaxa smoonal bꞌey sur chi apni oc bꞌey Quiriat-jearim, yetcꞌulal bꞌey chi too cꞌu bꞌey chi aol jaꞌ snukꞌ jaꞌ yet Neftóah, 16 masantaꞌcꞌal chi ey apnoj txꞌotxꞌ bꞌey jun tzalan ey bꞌey sattaj ecꞌtej spananil stiꞌ sjobꞌeal yet Ben-hinom, bꞌey jaꞌ snukꞌ jaꞌ bꞌey snorteal spananil yet Refaim. Jix lawi tuꞌ, chi ey apnoj bꞌey sjobꞌeal yet Hinom, catuꞌ chi ecꞌtoj yetcꞌulal jun wonan yet Jebús, catuꞌ chi ecꞌtoj bꞌey jaꞌ snukꞌ jaꞌ yet En-roguel. 17 Jaꞌ tituꞌ chi meltzo pax toj bꞌey norte, catuꞌ chi apni oc bꞌey En-semes, chi tocꞌal masantaꞌcꞌal bꞌey Gelilot, jaꞌton jun ey bꞌey sattaj spananil Adumim, catuꞌ chi ey apnoj bꞌey sjolom chꞌen sat chꞌen yul yet Bohan, Ben-rubén. 18 Chi ecꞌ cꞌal pax toj bꞌey wonan yetcꞌulal norte, bꞌey sattaj ecꞌtoj spananil stiꞌ sjobꞌeal jaꞌ Jordán, catuꞌ chi ey apnoj bꞌey jaꞌ Jordán tuꞌ. 19 Chi ecꞌ pax toj bꞌey snorteal Bet-hoglá, catuꞌ chi lawi can apnoj bꞌey snorteal stiꞌlaj jaꞌ Camnaj Mar, bꞌey chi apni can oc jaꞌ Jordán, jaꞌton smoonal bꞌey sur.

20 Jaꞌ jaꞌ Jordán eyoc smoonaloj yetcꞌulal bꞌey chi aol cꞌu. Jaꞌton wan tiꞌ eyoc smoonaloj txꞌotxꞌ jix poꞌole ecꞌ xol ebꞌ yicꞌaal Benjamín.

21 Jal wanxa conobꞌ jix yiꞌcan oc ebꞌ yicꞌaal Benjamín tuꞌ, jaꞌton conobꞌ Jericó, Bet-hoglá, Émec-quesís, 22 Bet-arabá, Semaraim, Betel, 23 Avim, Pará, Ofrá, 24 Quefar-haamoní, Ofní cꞌal Guibeá. Ey lacawebꞌ conobꞌ yin masanil, yetoj cꞌal yaldeail. 25 Yet cꞌal pax ebꞌ jix yun can oc conobꞌ Gabaón, Ramá, Beerot, 26 Mizpá, Quefirá, Mosá, 27 Réquem, Irpeel, Taralá, 28 Selá, Élef, Jebús, (jaꞌton conobꞌ Jerusalén) Guibeá cꞌal Quiriat. Ey canlajonebꞌ sbꞌisil wan conobꞌ tuꞌ yetoj cꞌal yaldeail. Jaꞌton txꞌotxꞌ tuꞌ jix yiꞌcan oc ebꞌ yicꞌaal Benjamín.