3 Jal pax naj Selofhad xin, (scꞌaal Héfer, yitxiquin Galaad, jaꞌton scꞌaal Maquir yitxiquin Manasés), cꞌam cꞌaltaꞌ junoj scꞌaal naj; asan jowan scutzꞌin naj ey, jaꞌton ix Mahlá, Noá, Hoglá, Milcá cꞌal ix Tirsá. 4 Jaꞌton ebꞌ ix tiꞌ, jix apni oc ebꞌ ix sattaj naj yakꞌomal xaambꞌal chi yij Eleazar cꞌal Josué yetoj cꞌal sattaj ebꞌ syaawil conobꞌ. Jix yalon ebꞌ ix jaxca tiꞌ tet ebꞌ: Jaꞌ Jehová jix alon can tet naj Moisés tol chi akꞌle can cu majul txꞌotxꞌ jon, jaxca cꞌal chi yun yakꞌle xꞌotxꞌ masanil ebꞌ naj kican jon, ẍi ebꞌ ix. Yu tuꞌ xin, jix akꞌle xꞌotxꞌ ebꞌ ix yu naj Josué jaxca cꞌal yet ebꞌ naj yican smam ebꞌ ix tuꞌ, jaxca jix yun yalon Jehová.

5-6 Yutol jaꞌ ebꞌ ix scutzꞌin naj Selofhad, jix akꞌle xꞌotxꞌ ebꞌ, jaxca jix yun yakꞌle xꞌotxꞌ ebꞌ winaj, yuxan ey laonebꞌ tujan xꞌotxꞌ ebꞌ yicꞌaal Manasés jix ẍaꞌ. Txꞌoj pax ye txꞌotxꞌ jix yiꞌ wanxa ebꞌ yicꞌaal Manasés bꞌey Galaad cꞌal bꞌey Basán, jaꞌton txꞌotxꞌ ey yetcꞌulal bꞌey chi aol cꞌu bꞌey jaꞌ Jordán. 7 Jaꞌ xꞌotxꞌ ebꞌ yicꞌaal Manasés tuꞌ, chi too tacꞌal txꞌotxꞌ bꞌey Aser masantaꞌcꞌal jix apni oc bꞌey Micmetat. Jatuꞌ ey bꞌey sattaj Siquem, catuꞌ chi bꞌey cꞌaltoj bꞌey sur masantaꞌcꞌal bꞌey jaꞌ snukꞌ jaꞌ bꞌey Tapúah. 8 Caxcꞌal jaꞌ txꞌotxꞌ Tapúah tuꞌ yet ebꞌ yicꞌaal Manasés ye can ocoj, jaxa conobꞌ Tapúah tuꞌ xin, yet cꞌaltaꞌ ebꞌ yicꞌaal Efraín yeocoj. 9 Jaxa smoonal tuꞌ, chi bꞌey cꞌaltoj, chi ey apnoj bꞌey jaꞌ jaꞌ yul sjobꞌeal yet Caná. Jaꞌ wan conobꞌ ey bꞌey sur bꞌey jaꞌ jaꞌ tuꞌ, yet Efraín yeocoj, caxcꞌal jaꞌ txꞌotxꞌ ey bꞌey snorteal jaꞌ jaꞌ tuꞌ, yet Manasés. 10 Jaxa Efraín jix cancan yetcꞌulal sur bꞌey stiꞌ jaꞌ jaꞌ tuꞌ, jaxa Manasés bꞌey snorteal. Jaꞌ jaꞌ mar Mediterráneo ey can oc smoonaloj yetcꞌulal bꞌey chi too cꞌu. Jaꞌ txꞌotxꞌ yet ebꞌ yicꞌaal Aser jix can yetcꞌulal norte, jaxa txꞌotxꞌ yet Isacar jix can yetcꞌulal bꞌey chi aol cꞌu. 11 Jix yiꞌ cꞌal pax oc ebꞌ yicꞌaal Manasés tuꞌ wanxa conobꞌlaj tiꞌ, jaꞌton txꞌotxꞌ jix can yul yet Isacar cꞌal yul yet Aser, junjun cꞌal yetoj yaldeail eyoc bꞌey scawilal tuꞌ: Jaꞌton Bet-seán, Ibleam, Dor, Endor, Taanac, cꞌal Meguido; jaꞌ jun yet yox conobꞌ tuꞌ, chi yij sbꞌi Nafot Dor. 12 Jal pax ebꞌ yicꞌaal Manasés, ma skeꞌ yiꞌon smajul txꞌotxꞌ ebꞌ bꞌey wanxa conobꞌ tuꞌ, yutol jaꞌ ebꞌ Cananeo jix stecꞌbꞌa sbꞌa, yuxan jix can cꞌal ebꞌ tituꞌ. 13 Jaxa yet jix bꞌey cꞌaltoj xin, jaꞌ ebꞌ conobꞌ Israel caw jix yiꞌ cꞌal yip ebꞌ, catuꞌ jix ale oc toolabꞌal yibꞌan ebꞌ Cananeo tuꞌ yu ebꞌ, ma cꞌaltaꞌ iꞌle el ebꞌ yu ebꞌ tituꞌ.

14 Jix yalon ebꞌ yicꞌaal José tet naj Josué jaxca tiꞌ:

—¿Tzet yu, yuxan tol jun chꞌan tujan cu txꞌotxꞌ jix chaꞌlo ja wakꞌoni? Jaon tiꞌ caw ecꞌal cu bꞌisil, yutol jaꞌ Jehová jix akꞌon chꞌibꞌ cu bꞌisil jon, ẍi ebꞌ.

15 Jix yalon naj Josué tet ebꞌ jaxca tiꞌ:

—Ilaꞌ tol mimanxa je bꞌisil jaex tiꞌ, cꞌamxa chi yabꞌ bꞌey chex eecꞌ bꞌey txꞌotxꞌ tzalquiltaj jix akꞌle can ey jex, yuxan jaꞌ tinaniꞌ, asiꞌwej bꞌey txꞌotxꞌ kꞌajteꞌlaj bꞌey txꞌotxꞌ yet ebꞌ Ferezeo yetoj cꞌal txꞌotxꞌ yet ebꞌ Refaíta, jaꞌton txꞌotxꞌ tuꞌ chi skeꞌ je kꞌajon ey steꞌal, ẍi naj tet ebꞌ.

16 Jix yalon ebꞌ jaxca tiꞌ:

—Caw yel toni, caw ma yabꞌ txꞌotxꞌ tzalquiltaj tiꞌ kin jon. Ilaꞌ ebꞌ Cananeo caan bꞌey acꞌal-laj tuꞌ, ey ẍꞌen scarruaje yet jowal ebꞌ, quey cꞌal pax tuꞌ ebꞌ caan bꞌey Bet-seán yetoj cꞌal ebꞌ caan bꞌey aldealaj bꞌey acꞌal Jezreel, ẍi ebꞌ.

17 Jix takꞌwi naj Josué tet ebꞌ yicꞌaal José, jaꞌton ebꞌ yicꞌaal Efraín, cꞌal Manasés, jix yalon tet ebꞌ jaxca tiꞌ:

—Jaex tiꞌ ma skeꞌ tol asanne jun tujan txꞌotxꞌ tuꞌ oj je yiꞌocoj, yutol caw mimanxa je bꞌisil, ey xacꞌal pax smey je bꞌinai, yu jun tuꞌ, yuxan ma skeꞌ asan junoj tujan je txꞌotxꞌ oj je yiꞌocoj, 18 yu tuꞌ xin, masanil txꞌotxꞌ kꞌajteꞌlaj yecꞌ tuꞌ, je yet chi yun can oc txꞌotxꞌ; jaex oj je yakꞌ je naꞌbꞌaloj yetoj teꞌ teꞌ tuꞌ, yutol oj je yiꞌoc txꞌotxꞌ masanil. Jal ebꞌ Cananeo tuꞌ xin, oj je yujte el ebꞌ tituꞌ, caxcꞌal ey smey ebꞌ, caxcꞌal ey ẍꞌen scarruaje ebꞌ, ẍi naj Josué tet ebꞌ.