Txꞌotxꞌ Txꞌotxꞌ Jix Can Tet Ebꞌ Yet Efraín Yetoj Manasés
16
Jaꞌ txꞌotxꞌ txꞌotxꞌ jix chaꞌlo scancan tet ebꞌ yicꞌaal José, jix ẍaꞌel yich txꞌotxꞌ yetcꞌulal bꞌey chi aol cꞌu bꞌey jaꞌ Jordán, bꞌey spacꞌanil atoj bꞌey chi aol snukꞌ jaꞌ jaꞌ yul yet Jericó, chi tocꞌal bꞌey txꞌotxꞌ cusiltaj txꞌotxꞌ bꞌey jun wonan chi too tacꞌal bꞌey Jericó, catuꞌ chi apni oc bꞌey Betel, jaꞌ chi yij cꞌal pax Luz. 2 Catuꞌ chi ecꞌtoj bꞌey txꞌotxꞌ yet ebꞌ Arquita masantaꞌcꞌal chi apni oc bꞌey Atarot. 3 Chi too cꞌal yetcꞌulal bꞌey chi too cꞌu, bꞌey txꞌotxꞌ yet ebꞌ Jafletita, masantaꞌcꞌal chi apni oc bꞌey yul smoonal Bet-horón ey yalan eytoj tuꞌ, catuꞌ chi apni cꞌal pax bꞌey Guézer, chi el cꞌal pax apnoj bꞌey jaꞌ mar Mediterráneo. 4 Jaꞌton txꞌotxꞌ tiꞌ jix smajcan oc ebꞌ yicꞌaal Manasés, yetoj Efraín, ebꞌ yicꞌaal naj José.Txꞌotxꞌ Xꞌotxꞌ Ebꞌ Yicꞌaal Efraín
5 Jaꞌ smoonal txꞌotxꞌ yet ebꞌ yicꞌaal Efraín chi el yich yetcꞌulal bꞌey chi aol cꞌu, chi ecꞌtoj bꞌey Atarot-adar, masantaꞌcꞌal bꞌey Bet-horón, bꞌey yibꞌan atoj jatacꞌalaꞌ jayebꞌ tujan yeoc yicꞌaal ebꞌ, 6 jix apni tacꞌal oc bꞌey jaꞌ mar Mediterráneo. Jaꞌ bꞌey snorteal smajul txꞌotxꞌ ebꞌ tuꞌ, jatuꞌ ey Micmetat, chi bꞌey cꞌaltoj smoonal yetcꞌulal bꞌey chi aol cꞌu, masantaꞌcꞌal chi apni oc bꞌey Taanat-siló, chi lawi tuꞌ chi ecꞌtoj bꞌey Janóah, 7 catuꞌ chi ey apnoj bꞌey Atarot, cꞌal bꞌey Naará, chi michꞌchatoj txꞌotxꞌ Jericó yu, catuꞌ chi ey apnoj bꞌey jaꞌ Jordán tuꞌ. 8 Chi ecꞌ pax toj bꞌey Tapúah, catuꞌ chi too can smoonal yetcꞌulal bꞌey chi too cꞌu, masantaꞌcꞌal chi apni oc bꞌey jaꞌ jaꞌ yul yet Caná, bꞌey jaꞌ mar Mediterráneo. Jaꞌton txꞌotxꞌ tuꞌ jix smajcan oc ebꞌ yicꞌaal Efraín, queytuꞌ jix yun spoꞌole ecꞌ txꞌotxꞌ xol junjun tujan ebꞌ. 9 Eyto cꞌal pax wanxa conobꞌ cꞌal wanxa aldealaj ey sat txꞌotxꞌ yet ebꞌ yicꞌaal Manasés, jix yiꞌ cꞌal pax oc ebꞌ yicꞌaal Efraín tuꞌ. 10 Asan xin, jaꞌ ebꞌ yicꞌaal Efraín, ma ujtele el ebꞌ Cananeo caan bꞌey Guézer yu ebꞌ, yuxan jix akꞌle pural ebꞌ yakꞌon stoolabꞌal. Yu jun tuꞌ, yuxan eyto cꞌal ebꞌ Cananeo caan ecꞌ xol ebꞌ tinaniꞌ.