Jaꞌ Txꞌotxꞌ Yet Ebꞌ Yicꞌaal Judá
15
Jaꞌ txꞌotxꞌ txꞌotxꞌ jix smajcan oc ebꞌ yicꞌaal Judá, jix apni tacꞌal oc txꞌotxꞌ bꞌey smoonal yet Edom, jaxa bꞌey sur, jix apni tacꞌal oc txꞌotxꞌ bꞌey cusiltaj txꞌotxꞌ chi yij Sin. 2 Jaꞌ txꞌotxꞌ tuꞌ, chi ecꞌtoj smoonal bꞌey yetcꞌulal sur bꞌey jaꞌ Camnaj Mar, 3 catuꞌ chi ecꞌtoj bꞌey jun wonan bꞌey chi ecꞌ eytoj jaꞌ jaꞌ chi yij Acrabim, catuꞌ chi ecꞌtoj bꞌey txꞌotxꞌ cusiltaj txꞌotxꞌ chi yij Sin, bꞌey sur yul yet Cadés-barnea. Chi lawi tuꞌ, catuꞌ chi too tacꞌal bꞌey Hesrón, chi aapnoj bꞌey Adar, catuꞌ chi meltzotoj bꞌey Carcá. 4 Jatuꞌ chi ecꞌtoj masantaꞌcꞌal bꞌey Asmón, catuꞌ chi apni oc txꞌotxꞌ bꞌey jaꞌ jaꞌ chi ecꞌtoj yul yet txꞌotxꞌ Egipto, chi apni tacꞌal oc bꞌey jaꞌ Mar Mediterráneo, jaꞌton jun tuꞌ jix oc smoonaloj Judá bꞌey yetcꞌulal sur. 5 Jaxa yetcꞌulal bꞌey chi aol cꞌu, jaꞌton jaꞌ Camnaj Mar eyoc smoonaloj txꞌotxꞌ, masantaꞌcꞌal bꞌey chi apni oc jaꞌ Jordán bꞌey jaꞌ Camnaj Mar tuꞌ. Jatuꞌ chi too cꞌal pax smoonal bꞌey norte, 6 chi ecꞌtoj bꞌey Bet-hoglá, catuꞌ chi ecꞌtoj bꞌey snorteal yet Bet-arabá, chi apni tacꞌal oc bꞌey chꞌen sat chꞌen bꞌey yet naj Bohan, Ben-rubén, 7 chi lawi tuꞌ xin, chi ecꞌ atoj smoonal bꞌey spananil sjobꞌeal Acor, catuꞌ chi apni oc bꞌey Debir, catuꞌ chi meltzo taꞌcꞌaltoj bꞌey Guilgal bꞌey sattaj ecꞌtej wonan bꞌey chi ecꞌ eytoj jaꞌ jaꞌ chi yij Adumim, bꞌey yetcꞌulal sur. Chi lawi tuꞌ, catuꞌ chi ecꞌtoj jun moon tuꞌ bꞌey jaꞌ snukꞌ jaꞌ yet En-semes, catuꞌ chi ecꞌtoj bꞌey jaꞌ snukꞌ jaꞌ yet En-roguel, 8 catuꞌ chi ecꞌtoj bꞌey spananil sat xꞌotxꞌ naj scꞌaal Hinom, bꞌey yetcꞌulal sur bꞌey txꞌotxꞌ wonan Jebús, jaꞌton conobꞌ Jerusalén. Chi lawi tuꞌ, catuꞌ chi ecꞌ atoj bꞌey sjolom wonan yetcꞌulal bꞌey chi too cꞌu bꞌey sjobꞌeal Hinom, cꞌal bꞌey snorteal spananil Refaim, 9 catuꞌ chi meltzo ecꞌtoj bꞌey sjolom wonan tuꞌ, masantaꞌcꞌal chi aol bꞌey jaꞌ snukꞌ jaꞌ yet Neftóah, masantaꞌcꞌal bꞌey wan conobꞌ bꞌey sjolom wonan yet Efrón, chi ecꞌtoj bꞌey Baalá, jacꞌal oc jun tuꞌ chi yij cꞌal pax sbꞌi Quiriat-jearim. 10 Jaꞌ bꞌey Baalá tuꞌ chi meltzo ecꞌtoj smoonal yetcꞌulal bꞌey chi too cꞌu, catuꞌ chi apni tacꞌal oc bꞌey sjolom wonan Seír, chi ecꞌtoj bꞌey Quesalón, chi ecꞌ cꞌal pax toj bꞌey norte yin scꞌul wonan Jearim, chi lawi tuꞌ chi ey apnoj bꞌey Bet-semes, catuꞌ chi ecꞌ cꞌaltoj bꞌey Timná. 11 Chi lawi tuꞌ, chi ecꞌ cꞌaltoj bꞌey jun tzalan bꞌey snorteal yet Ecrón, chi ecꞌtoj tꞌininoj smoonal bꞌey Sicrón, catuꞌ chi ecꞌtoj bꞌey sjolom wonan yet Baalá; chi lawi tuꞌ, chi apni oc bꞌey Jabneel, jaxa tituꞌ chi lawi can apnoj bꞌey jaꞌ mar Mediterráneo. 12 Jaxa jaꞌ mar Mediterráneo eyoc smoonal yetcꞌulal bꞌey chi too cꞌu. Jaꞌton wan smoonal txꞌotxꞌ jix smajcan oc ebꞌ yicꞌaal Judá, catuꞌ jix poꞌochatoj txꞌotxꞌ xol junjun tujan icꞌaaleal tuꞌ.Jix Eyqꞌuey Conobꞌ Hebrón Yetoj Debir Yu Naj Caleb
13 Jaxa naj Josué, jix akꞌon jun tujan txꞌotxꞌ smajul txꞌotxꞌ ebꞌ yicꞌaal Judá tet naj Caleb, scꞌaal Jefuné. Jaxca jix yun yalon Jehová tet, yuxan jix akꞌle txꞌotxꞌ Hebrón tet naj. Jaꞌ jun conobꞌ Hebrón tuꞌ, jaꞌton sconobꞌ naj chi yij sbꞌi Arbá yet peyxa, jaꞌ jun Arbá tuꞌ, jaꞌton yichmam naj Anac. 14 Ey oxwan yicꞌaal jun Anac tuꞌ jix yujte el naj Caleb bꞌey Hebrón tuꞌ, jaꞌton naj Sesai, Ahimán cꞌal yetoj naj Talmai. 15 Jix lawi tuꞌ, jix too naj Caleb yin ebꞌ caan bꞌey Debir, jaꞌton jun conobꞌ chi yij sbꞌi Quiriat-séfer yet yalantoj. 16 Jix yalon naj Caleb jaxca tiꞌ: Jaꞌ mactxequel chi eyqꞌuey jun conobꞌ tuꞌ yu yin yakꞌon jowal yetoj, chi wakꞌ ix jin cutzꞌin Acsa tiꞌ yistiloj, ẍi naj Caleb tuꞌ.
17 Jaꞌ naj jix akꞌon eyqꞌuey jun conobꞌ tuꞌ, jaꞌton naj Otoniel, scꞌaal Quenaz, yuẍtaj naj Caleb, jix yakꞌon ix scutzꞌin naj yistiloj naj. 18 Jaꞌ yet jix nupi naj Otoniel yetoj ix Acsa tuꞌ, yet lalanxa stoo naj bꞌey sna yetoj yistil tuꞌ, catuꞌ jix yalon naj tet ix tol chi skꞌan xꞌotxꞌ ix tet smam, catuꞌ jix eytej ix yibꞌan noꞌ bꞌuru bꞌey eyxa atoj ix tuꞌ, catuꞌ jix skꞌanlen smam ix tet jaxca tiꞌ:
—¿Jaach cutzꞌin, tzet chi yoche ja cꞌul? ẍi naj tet ix.
19 Jix yalon ix tet smam jaxca tiꞌ:
—Chin oc tean ja win, ilaꞌ tol jaꞌ txꞌotxꞌ cusiltaj txꞌotxꞌ ey bꞌey Négueb jix ja wakꞌ ey jin, yuxan jaꞌ tinaniꞌ chin kꞌan ey jaach tol cha wakꞌ pax txꞌotxꞌ bꞌey chi aol snukꞌ jaꞌ ey jin, ẍi ix tet smam.
Yu tuꞌ xin, jix yakꞌon xꞌotxꞌ scutzꞌin naj Caleb tuꞌ, txꞌotxꞌ bꞌey chi aol snukꞌ jaꞌ bꞌey yibꞌan atoj tuꞌ, cꞌal txꞌotxꞌ ey bꞌey yalan eytoj tuꞌ.
Wan Sconobꞌ Ebꞌ Yicꞌaal Judá
20 Jaꞌton txꞌotxꞌ smajul txꞌotxꞌ ebꞌ yicꞌaal Judá tiꞌ jix poꞌocha cantoj xol ebꞌ, jatacꞌalaꞌ jantaj sbꞌisil yeoc junjun tujan ebꞌ. 21 Jaꞌ wan conobꞌ ey bꞌey sur, bꞌey smoon sbꞌa yetoj Edom, jaꞌton wan tiꞌ: Cabseel, Éder, Jagur, 22 Quiná, Dimoná, Adadá, 23 Quedes, Hasor, Itnán, 24 Zif, Télem, Bealot, 25 Hasor-hadatá, Queriot, Hesrón (jaꞌ jun tuꞌ chi yij cꞌal pax Hasor), 26 Amam, Semá, Moladá, 27 Hasar-gadá, Hesmón, Bet-pélet, 28 Hasar-sual, Beerseba, Bizotia, 29 Baalá, Iim, Ésem, 30 Eltolad, Quesil, Hormá, 31 Siclag, Madmaná, Sansaná, 32 Lebaot, Silhim, Ain cꞌal Rimón. Jaꞌ yin masanil wan tiꞌ, ey 29 conobꞌ yetoj cꞌal yaldeail.
33 Jal bꞌey spananil yichlaj wonan tuꞌ jix yiꞌecꞌ wanxa conobꞌ ebꞌ: Jaꞌton Estaol, Sora, Asná, 34 Zanóah, En-ganim, Tapúah, Enam, 35 Jarmut, Adulam, Socó, Azecá, 36 Saaraim, Aditaim, Guederá cꞌal Guederotaim. Ey 14 conobꞌ, yetoj cꞌal yaldeail yin masanil.
37 Jix yiꞌ cꞌal pax oc conobꞌ Senán, Hadasá, Migdal-gad, 38 Dileán, Mizpá, Jocteel, 39 Laquis, Boscat, Eglón, 40 Cabón, Lahmam, Quitlís, 41 Guederot, Bet-dagón, Naamá, cꞌal Maquedá. Ey 16 conobꞌ yetoj cꞌal yaldeail.
42 Jix yiꞌ cꞌal pax oc conobꞌ Libná, Éter, Asán, 43 Iftah, Asná, Nesib, 44 Queilá, Aczib cꞌal Maresá ebꞌ. Ey bꞌalonebꞌ conobꞌ yetoj cꞌal yaldeail.
45 Yetoj cꞌal pax masanil conobꞌ ey yul yet Ecrón yetoj cꞌal yaldeail, 46 cꞌal masanil conobꞌ ey yul yet Asdod yetoj cꞌal yaldeail. Jatuꞌ ey bꞌey snan xol Ecrón yetoj jaꞌ mar Mediterráneo.
47 Yetoj cꞌal pax masanil conobꞌ ey yul yet Asdod, yetoj cꞌal yaldeail, cꞌal masanil conobꞌ ey yul yet Gaza, yetoj cꞌal yaldeail, masantaꞌcꞌal chi apni oc bꞌey jaꞌ jaꞌ chi ecꞌtoj yul yet txꞌotxꞌ Egipto, bꞌey stiꞌlaj jaꞌ mar Mediterráneo.
48 Jaxa txꞌotxꞌ bꞌey tzalquiltaj txꞌotxꞌ, jatuꞌ jix can xꞌotxꞌ ebꞌ yicꞌaal Judá, jaꞌton wan conobꞌ tiꞌ: Samir, Jatir, Socó, 49 Daná, Quiriat-saná, (jaꞌ chi yij cꞌal pax Debir) 50 Anab, Estemoa, Anim, 51 Gosen, Holón cꞌal Guiló. Ey jusluqꞌuebꞌ conobꞌ yetoj yaldeail.
52 Jix yiꞌon cꞌal pax oc wanxa conobꞌ ebꞌ, jaꞌton Arab, Dumá, Esán, 53 Janum, Bet-tapúah, Afecá, 54 Humtá, Quiriat-arbá, (jaꞌ chi yij cꞌal pax Hebrón,) cꞌal Sior. Ey bꞌalonebꞌ conobꞌ yetoj yaldeail.
55 Yetoj cꞌal conobꞌ, Maón, Carmel, Zif, Jutá, 56 Jezreel, Jocdeam, Zanóah, 57 Caín, Guibeá, cꞌal Timná. Ey laonebꞌ conobꞌ yetoj cꞌal yaldeail.
58 Yetoj cꞌal pax conobꞌ Halhul, Bet-sur, Guedor, 59 Maarat, Bet-anot cꞌal Eltecón. Ey wajebꞌ conobꞌ yetoj cꞌal yaldeail.
60 Jix yiꞌon cꞌal pax oc conobꞌ Quiriat-baal ebꞌ, jaꞌ chi yij cꞌal pax Quiriat-jearim, cꞌal Rabá yetoj cꞌal yaldeail.
61 Catuꞌ jix yiꞌon cꞌal oc txꞌotxꞌ cusiltaj txꞌotxꞌ ebꞌ bꞌey Bet-arabá, Midín, Secacá, 62 Nibsán, jaꞌton conobꞌal Atzꞌam, cꞌal En-gadi. Ey wajebꞌ conobꞌ yetoj yaldeail.
63 Jaꞌ xol ebꞌ yicꞌaal Judá tuꞌ, ma skeꞌ yujtele el ebꞌ Jebuseo caan bꞌey Jerusalén tuꞌ yu ebꞌ, yu jun tuꞌ, yuxan eyto cꞌal ebꞌ Jebuseo caan tituꞌ yetoj ebꞌ yicꞌaal Judá.