Jix Poꞌole Ecꞌ Txꞌotxꞌ Canaán Yu Naj Josué
14
Jaꞌton wan txꞌotxꞌ txꞌotxꞌ ey yul yet Canaán jix yiꞌoc ebꞌ Israel yin smajul txꞌotxꞌ, jatacꞌalaꞌ jix yun yakꞌle tet ebꞌ yu naj yakꞌomal xaambꞌal chi yij Eleazar, yetoj naj Josué scꞌaal Nun, yetoj cꞌal ebꞌ yaaw yeoc yin junjun tujan icꞌaaleal xol ebꞌ Israel. 2 Jix poꞌole ecꞌ txꞌotxꞌ xol ebꞌ snan bꞌalonebꞌ tujan icꞌaaleal, jatacꞌalaꞌ bꞌeytuꞌ jix can oc can smajul txꞌotxꞌ junjun ebꞌ, jaxca wal jix yun yalon can Jehová tet naj Moisés. 3 Jaꞌton txꞌotxꞌ jix yakꞌ can naj Moisés yet tax yalantoj bꞌey junxa skꞌaxepal jaꞌ Jordán tet ebꞌ yicꞌaal Rubén, cꞌal tet ebꞌ yet Gad, yetoj cꞌal pax tet nan tujan ebꞌ yicꞌaal Manasés. Jal pax ebꞌ Levita xin, cꞌam cꞌal xꞌotxꞌ ebꞌ jix akꞌle canoj. 4 Jaꞌ xol ebꞌ yicꞌaal naj José, caabꞌ icꞌaale yeoc ebꞌ, jaꞌton yet Manasés, cꞌal Efraín. Jal pax ebꞌ Levita xin, cꞌam cꞌal junoj tujan txꞌotxꞌ jix akꞌle can tet ebꞌ, yutol asan wan conobꞌ bꞌey chi skeꞌ scaey ecꞌ ebꞌ, cꞌal yinlaj conobꞌ tuꞌ bꞌey chi low sjobꞌbꞌeal noꞌ ebꞌ. 5 Jix spoꞌoecꞌ txꞌotxꞌ txꞌotxꞌ ebꞌ Israel tuꞌ yin, jaxca wal jix yun yalon can Jehová tet naj Moisés.Txꞌotxꞌ Smajul Txꞌotxꞌ Naj Caleb
6 Ey jun cꞌual, yet eyecꞌ ebꞌ Israel bꞌey Guilgal, jix jul ebꞌ yicꞌaal naj Judá kꞌanabꞌ yetoj naj Josué tituꞌ, jaxa naj Caleb, a conobꞌ Quenezita scꞌaal Jefuné, jix alon tet naj jaxca tiꞌ: Naꞌtej tzet jix yun yalon can Jehová tet ẍejabꞌ Moisés, yet jix yalon can ja win jaach tiꞌ, cꞌal win jain tiꞌ, yet eyecꞌ bꞌey Cadés-barnea. 7 Eyxa cawinaj abꞌil jin kꞌinal, catuꞌ jix cu ẍejontoj naj Moisés bꞌey Cadés-barnea tuꞌ, yu jul kilon ecꞌoj tzet utbꞌil yili jun txꞌotxꞌ tiꞌ. Jaꞌ yet jix cu meltzo xin, jaxca cꞌal wal yili, queytuꞌ jix yun kaloni. 8 Jal pax ebꞌ naj jix julecꞌ ketoj xin, tol jix xibꞌtele ebꞌ ánima yu ebꞌ naj, jal jon pax jaon tiꞌ xin, jichan cꞌal jix yun kalon sattaj Jehová cu Diosal. 9 Jix yakꞌon can stiꞌ naj Moisés ey jin, jix yalon jaxca tiꞌ: Jaꞌ txꞌotxꞌ jix bꞌet ja bꞌeytze tuꞌ, ja wet oj yun can oc txꞌotxꞌ yetoj ebꞌ ja wicꞌaal, yutol jichan cꞌal yeoc ja naꞌbꞌal sattaj Jehová cu Diosal, ẍi can naj ey jin an. 10 Jaꞌ jun tuꞌ, eyxa 45 abꞌil yalon can naj Moisés tuꞌ yu Jehová, yet eyto ecꞌ ebꞌ conobꞌ Israel bꞌey txꞌotxꞌ cusiltaj txꞌotxꞌ. Jaꞌ yu jun tzet albꞌilcan tuꞌ, yuxan iquis jin to ecꞌ yu Naj tinaniꞌ. Ilaꞌ tol eyxa 85 abꞌil jin kꞌinal an, 11 caw eyto cꞌal pax wip chi wabꞌe, jaxca yet jix cu ẍejontej naj Moisés cu bꞌeytzen jun txꞌotxꞌ txꞌotxꞌ tiꞌ, caw eyto cꞌal wip chi wabꞌe, chi tocꞌal skeꞌ jin bꞌeyecꞌoj, chi to skeꞌ wakꞌon jowal, jaxca cꞌal yet achꞌe jin to. 12 Yuxan chi wal ey jaach an tol cha wakꞌ txꞌotxꞌ tzalquiltaj txꞌotxꞌ tiꞌ ey jin an, jaxca jix yun yalon can Jehová. Jix ja wabꞌ skꞌumal jaach tiꞌ yet tuꞌ, tol jaꞌ tituꞌ caan ebꞌ mimej winaj yicꞌaal Anac, caw wal mimej conobꞌ yeoc ebꞌ, caw wal watxꞌ yeoc smuroal sconobꞌ ebꞌ tuꞌ. Jain tiꞌ, chi waoc Jehová yipoj jin cꞌul tol jaꞌ oj colwa wetoj an, yet oj skeꞌ wiꞌon el ebꞌ tituꞌ, jaxca jix yun yalon Dios ey jin an, ẍi naj Caleb.
13 Yu jun tuꞌ xin, yuxan jix yal watxꞌ kꞌane naj Josué yibꞌan naj Caleb, catuꞌ jix akꞌle can txꞌotxꞌ Hebrón tet naj, yetoj cꞌal tet masanil yicꞌaal. 14 Queytuꞌ jix yun yiꞌon can oc txꞌotxꞌ Hebrón naj Caleb yetoj ebꞌ yicꞌaal, masantaꞌcꞌal tinaniꞌ, yutol jichan cꞌal yeoc snaꞌbꞌal naj yul sat Jehová, sDiosal Israel. 15 Jaꞌ conobꞌ Hebrón tuꞌ, Quiriat-arbá sbꞌi yet peyxa tuꞌ, yutol Arbá sbꞌi jun winaj caw miman steel, caw wal ey smey xol ebꞌ yicꞌaal Anac. Jaꞌ yet jix lawi yiꞌon can oc xꞌotxꞌ junjun tujan icꞌaaleal tuꞌ, queytuꞌ jix yun yoc tucan jowal bꞌey wan conobꞌ tuꞌ.