Wanxa Txꞌotxꞌ Conobꞌ Tol To Oj Eyqꞌueyoj
13
Jaꞌ yet caw icham winajxa naj Josué, jix yalon Jehová tet naj jaxca tiꞌ: Jaach tiꞌ caw icham winaj jaachxa, ilaꞌ caw ecꞌal to txꞌotxꞌ txꞌotxꞌ cꞌamto che yiꞌecꞌ tet wan ánima tiꞌ. 2 Cꞌam tocꞌal che yiꞌecꞌ txꞌotxꞌ yet ebꞌ Filisteo, yetoj cꞌal txꞌotxꞌ yet ebꞌ Guesureo, 3 jaꞌton txꞌotxꞌ chi too taꞌcꞌal bꞌey jaꞌ jaꞌ chi yij Sihor, yetcꞌulal bꞌey chi aol cꞌu bꞌey txꞌotxꞌ Egipto, masantaꞌcꞌal chi apni oc txꞌotxꞌ bꞌey smoonal yet Ecrón bꞌey yetcꞌulal norte, jaꞌton txꞌotxꞌ yet ebꞌ Cananeo. Jaꞌ bꞌey jun txꞌotxꞌ tuꞌ, jatuꞌ ey jowan syaawil ebꞌ Filisteo, jaꞌton ebꞌ yaaw yeoc bꞌey Gaza, bꞌey Asdod, bꞌey Ascalón, bꞌey Gat, cꞌal bꞌey Ecrón. Eyto cꞌal pax can txꞌotxꞌ yet ebꞌ Aveo, 4 yetoj cꞌal bꞌey sur, yetoj masanil txꞌotxꞌ yet ebꞌ Cananeo. Chi too tacꞌal txꞌotxꞌ bꞌey Mehara yul yet Sidonio, masantaꞌcꞌal chi apni oc txꞌotxꞌ bꞌey Afec, smoon sbꞌa txꞌotxꞌ yetoj yet ebꞌ Amorreo. 5 Chi to can cꞌal pax txꞌotxꞌ yet ebꞌ a Giblita, yetoj masanil txꞌotxꞌ Líbano yetcꞌulal bꞌey chi aol cꞌu, chi too tacꞌal bꞌey Baal-gad, bꞌey yich txꞌotxꞌ wonan chi yij Hermón, masantaꞌcꞌal chi oc apnoj txꞌotxꞌ bꞌey sbꞌeal Hamat. 6 Jaxa ebꞌ caan xol-laj wonan yul yet txꞌotxꞌ Líbano, masantaꞌcꞌal bꞌey Misrefot-maim, yetoj masanil ebꞌ a Sidonio. Jain oj wiꞌel masanil wan ánima tuꞌ je sattaj jaex Israel jex tiꞌ. Jaach oj ja poꞌoecꞌ txꞌotxꞌ txꞌotxꞌ tuꞌ, catuꞌ oj ja wakꞌon txꞌotxꞌ tet ebꞌ ja wet conobꞌ tiꞌ, yet chi smajon can oc txꞌotxꞌ ebꞌ, jaxca wal jix yun walon can ey jaach an. 7 Jaꞌ tinaniꞌ, oj ja poꞌocan ecꞌ masanil wan txꞌotxꞌ tiꞌ tet bꞌalonebꞌ icꞌaaleal, cꞌal tet nanxa tujan ebꞌ yicꞌaal Manasés, ẍi Jehová tet naj Josué.Txꞌotxꞌ Txꞌotxꞌ Yet Manasés, Rubén Yetoj Gad
8 Jaꞌ xol ebꞌ yicꞌaal Rubén, yetoj ebꞌ yicꞌaal Gad, yetoj cꞌal nanxa tujan ebꞌ yicꞌaal Manasés, jix ẍaꞌ can smajul txꞌotxꞌ ebꞌ tet naj Moisés, naj ẍejabꞌ Jehová, jaꞌton txꞌotxꞌ yet ebꞌ caan yetcꞌulal bꞌey chi aol cꞌu, bꞌey skꞌaxepal ecꞌtoj jaꞌ Jordán. 9 Masantaꞌcꞌal chi apni oc txꞌotxꞌ bꞌey conobꞌ Aroer, bꞌey stiꞌ jaꞌ jaꞌ chi yij Arnón, yetoj cꞌal pax jun conobꞌ ey bꞌey snanecꞌtoj spananil sjobꞌeal Arnón, yetoj cꞌal masanil spananil yet Medebá, masantaꞌcꞌal bꞌey Dibón. 10 Jix oc cꞌal pax wan conobꞌ stzꞌajiloj wan majbꞌil oc yu naj Sihón, sreyal ebꞌ Amorreo bꞌey Hesbón yet yalantoj, masantaꞌcꞌal chi apni oc txꞌotxꞌ bꞌey smoonal yet ebꞌ Amonita. 11 Jix yiꞌon cꞌal pax oc txꞌotxꞌ Galaad ebꞌ, txꞌotxꞌ yet ebꞌ Guesureo, yetoj cꞌal txꞌotxꞌ yet ebꞌ a Maacáteo, yetoj cꞌal masanil txꞌotxꞌ wonan Hermón, yetoj masanil txꞌotxꞌ yet Basán, chi apni tacꞌal oc txꞌotxꞌ bꞌey Salcá. 12 Jix yiꞌon cꞌal pax oc masanil txꞌotxꞌ txꞌotxꞌ ebꞌ bꞌey chi yakꞌ yaawil naj Og, sreyal Basán, naj yakꞌnaj yaawil bꞌey Astarot, cꞌal bꞌey Edrei, jaꞌton naj tiꞌ slawubꞌal xacꞌal yeoc xol ebꞌ yicꞌaal Refaíta. Jaꞌton wan ebꞌ rey tiꞌ, eyqꞌueynaj ebꞌ yu naj Moisés yin jowal, masanil jix ujtele el ebꞌ yul sconobꞌ yu ebꞌ conobꞌ Israel. 13 Jaxa pax ebꞌ a Guesur, cꞌal ebꞌ a Maacá, ma ujtele el ebꞌ yu ebꞌ, jix eecꞌal ecꞌ ebꞌ xol ebꞌ conobꞌ Israel masantaꞌcꞌal tinaniꞌ.
14 Jaxa pax tet ebꞌ yicꞌaal Leví xin, ma yiꞌ smajul txꞌotxꞌ ebꞌ yu naj Moisés, yutol yet ebꞌ yeoc masanil xaambꞌal chi akꞌle tzꞌaꞌ tet Jehová, sDiosal Israel, jatacꞌalaꞌ jix yun yalon canoj.
Smajul Txꞌotxꞌ Ebꞌ Yicꞌaal Rubén
15 Jix spoꞌon ecꞌ txꞌotxꞌ txꞌotxꞌ naj Moisés xol ebꞌ yicꞌaal Rubén, jatacꞌalaꞌ jayebꞌ tujan yeoc sbꞌisil ebꞌ. 16 Yuxan chi too tacꞌal txꞌotxꞌ yet ebꞌ tuꞌ bꞌey conobꞌ Aroer, bꞌey stiꞌ jaꞌ Arnón, yetoj cꞌal jun conobꞌ ey spananil stiꞌ sjobꞌeal Arnón tuꞌ, yetoj cꞌal masanil spananil yet Medebá, 17 masantaꞌcꞌal chi apni oc txꞌotxꞌ bꞌey Hesbón yetoj cꞌal masanil conobꞌlaj ey bꞌey pananlaj tuꞌ: Jaꞌton Dibón, Bamot-baal, Bet-baal-meón, 18 Jahas, Cademot, Mefáat, 19 Quiriataim, Sibmá, Séret-sáhar. Jaꞌ jun tuꞌ, jatuꞌ ey bꞌey stzalquiltajil jun panan tuꞌ, 20 yetoj Bet-peor, cꞌal Bet-jesimot, yetoj cꞌal masanil tzalquiltaj ey sjolomtaj txꞌotxꞌ wonan chi yij Pisgá. 21 Masanil wan conobꞌ ey bꞌey pananlaj, yetoj masanil bꞌey chi yakꞌ yaawil naj Sihón, jaꞌton sreyal ebꞌ Amorreo bꞌey Hesbón, jix eyqꞌuey ebꞌ yu naj Moisés, yetoj ebꞌ yaaw yeoc bꞌey Madián. Jaꞌ ebꞌ yaaw yeoc yalan ẍejbꞌanil naj rey Sihón: Jaꞌton Eví, Réquem, Sur, Hur, cꞌal Reba. 22 Jix makꞌle cꞌal pax cam naj naꞌom el kꞌane, jaꞌton naj Balaam, scꞌaal Beor; ecꞌal tocꞌal wanxa ebꞌ jix cam yetoj. 23 Jaꞌ xꞌotxꞌ ebꞌ yicꞌaal Rubén, jatacꞌalaꞌ jayebꞌ tujan yeoc sbꞌisil ebꞌ, ey cꞌal oc wanxa conobꞌlaj, cꞌal wanxa yaldeail stzꞌajiloj, catuꞌ chi apni tacꞌal oc bꞌey jaꞌ Jordán.
24 Yetoj cꞌal pax yet ebꞌ yicꞌaal Gad, jix poꞌole can ecꞌ xꞌotxꞌ ebꞌ yu naj Moisés, jatacꞌalaꞌ jayebꞌ tujan yeoc sbꞌisil ebꞌ yin yicꞌaal. 25 Jaꞌ txꞌotxꞌ jix yiꞌcan oc ebꞌ tuꞌ, jaꞌton txꞌotxꞌ Jaser yetoj masanil conobꞌlaj yul yet Galaad, yetoj nan txꞌotxꞌ yet ebꞌ Amonita, masantaꞌcꞌal bꞌey Aroer, jatuꞌ ey sattaj ecꞌtej Rabá. 26 Chi el yich txꞌotxꞌ bꞌey Hesbón, masantaꞌcꞌal chi apni oc txꞌotxꞌ bꞌey Ramat-mizpé, cꞌal Betonim, ey bꞌey snan xol Mahanaim, cꞌal bꞌey smoonal yet Debir. 27 Jaxa bꞌey spananil ecꞌtoj tuꞌ, jix yiꞌcan oc txꞌotxꞌ Bet-aram ebꞌ, cꞌal Bet-nimrá, cꞌal Sucot, yetoj Safón. Asanxane wan tuꞌ jix cancan bꞌey yakꞌnaj yaawil naj Sihón, sreyal Hesbón. Jix apni oc txꞌotxꞌ yet ebꞌ bꞌey yetcꞌulal sur, bꞌey ey jaꞌ miman paam jaꞌ chi yij Quinéret.a 28 Jaꞌton masanil wan conobꞌlaj tuꞌ yetoj cꞌal yaldeail jix yiꞌoc ebꞌ yicꞌaal Gad, jatacꞌalaꞌ jayebꞌ tujan yeoc sbꞌisil ebꞌ.
29 Yetoj cꞌal pax oj, jix akꞌle can txꞌotxꞌ tet nanxa ebꞌ yicꞌaal Manasés yu naj Moisés, jatacꞌalaꞌ jayebꞌ tujan yeoc sbꞌisil ebꞌ, queytuꞌ jix yun spoꞌole ecꞌ txꞌotxꞌ yin ebꞌ. 30 Jaꞌ ebꞌ jix iꞌon oc masanil txꞌotxꞌ yet naj Og, naj sreyal conobꞌ Basán yet yalantoj, masanil txꞌotxꞌ Basán chi too tacꞌal txꞌotxꞌ bꞌey Mahanaim yetoj 60 conobꞌ ey yul yet Jaír ey yul yet Basán tuꞌ. 31 Jix yiꞌ cꞌal pax oc nanxa txꞌotxꞌ Galaad ebꞌ, yetoj conobꞌ Astarot, cꞌal Edrei jaꞌton sconobꞌ naj Og, sreyal Basán. Masanil wan txꞌotxꞌ txꞌotxꞌ tuꞌ, nan tujan ebꞌ yicꞌaal Maquir jix iꞌon ocoj, ebꞌ scꞌaal Manasés, jatacꞌalaꞌ jayebꞌ tujan yeoc sbꞌisil ebꞌ.
32 Jaꞌton wan txꞌotxꞌ tiꞌ jix yakꞌ can naj Moisés tet ebꞌ yicꞌaal Rubén, Gad yetoj Manasés bꞌey txꞌotxꞌ yacꞌalil Moab, yetcꞌulal bꞌey chi aol cꞌu, bꞌey skꞌaxepal ecꞌtoj jaꞌ Jordán, bꞌey sattaj conobꞌ Jericó. 33 Jal pax ebꞌ yicꞌaal Leví xin, cꞌam smajul txꞌotxꞌ ebꞌ jix akꞌle canoj, yutol jix al-le tet ebꞌ tol jaꞌ Jehová sDiosal Israel, jaꞌ eyoc smajuloj ebꞌ.