2 Jaꞌ jun rey jix bꞌabꞌi eyqꞌueyi, jaꞌton naj Sihón, sreyal ebꞌ Amorreo caan bꞌey conobꞌ Hesbón. Jaꞌ yul smajbꞌe bꞌey chi yakꞌ yaawil chi too tacꞌal txꞌotxꞌ bꞌey Aroer, bꞌey stiꞌ jaꞌ Arnón, chi ẍaꞌel bꞌey snan spananil stiꞌ jobꞌe masantaꞌcꞌal bꞌey jaꞌ jaꞌ chi yij Jaboc, jaꞌton bꞌey chi ẍaꞌel yich txꞌotxꞌ yet ebꞌ Amonita, (chi yal yeloc apnoj jaꞌton nanoj txꞌotxꞌ Galaad.) 3 Jaꞌ jix akꞌon cꞌal yaawil yibꞌan txꞌotxꞌ spananil stiꞌ jaꞌ Jordán yetcꞌulal bꞌey chi aol cꞌu, chi ẍaꞌel yich bꞌey jaꞌ naabꞌ jaꞌ chi yij Quinéret,^a catuꞌ chi apni tacꞌal bꞌey jaꞌ Camnaj Mar, bꞌey yetcꞌulal yet Bet-jesimot, bꞌey yetcꞌulal sur masantaꞌcꞌal bꞌey yich txꞌotxꞌ wonan chi yij Pisgá.

4 Jix eyqꞌuey cꞌal pax naj Og, sreyal Basán, jaꞌton jun slawubꞌal xacꞌal xol ebꞌ Refaíta, jatuꞌ jix ecꞌle caan naj bꞌey Astarot cꞌal bꞌey Edrei. 5 Jaꞌ smajul txꞌotxꞌ bꞌey chi yakꞌ yaawil chi apni tacꞌal oc bꞌey sjolom wonan Hermón, chi apni cꞌal pax bꞌey Salcá cꞌal masanil yul yet Basán, smoon sbꞌa txꞌotxꞌ yet Guesur cꞌal yet Maacá, masantaꞌcꞌal nanxa txꞌotxꞌ yet Galaad, txꞌotxꞌ yet taꞌ naj Sihón yet yalantoj, jaꞌton naj sreyal conobꞌ Hesbón.

6 Jaꞌton wan rey tuꞌ jix eyqꞌuey yu naj Moisés, naj ẍejabꞌ Jehová, yetoj ebꞌ soldado conobꞌ Israel. Jaxa naj Moisés tuꞌ jix akꞌon can wan txꞌotxꞌ tuꞌ tet ebꞌ yicꞌaal Rubén, cꞌal tet ebꞌ yicꞌaal Gad, cꞌal tet nanxa tujan ebꞌ yicꞌaal Manasés.

7 Jaꞌton masanil wan rey jix eyqꞌuey yu naj Josué, yetoj ebꞌ Israel tiꞌ, jaꞌton ebꞌ ey bꞌey skꞌaxepal ecꞌtej jaꞌ Jordán yetcꞌulal bꞌey chi aol cꞌu. Chi tit taꞌcꞌal txꞌotxꞌ bꞌey Baal-gad bꞌey spananil txꞌotxꞌ Líbano, masantaꞌcꞌal bꞌey yich txꞌotxꞌ wonan Halac, chi aapnoj scawilal Seír. Jix lawi tuꞌ xin, jix spoꞌon ecꞌ naj Josué masanil txꞌotxꞌ tuꞌ tet ebꞌ yicꞌaal Israel, jix akꞌle tet ebꞌ yin junelne. 8 Masanil txꞌotxꞌ tzalquiltaj, cꞌal txꞌotxꞌ acꞌal-laj, cꞌal txꞌotxꞌ spananil stiꞌ sjobꞌeal jaꞌ Jordán, cꞌal txꞌotxꞌ pacꞌanlaj, yetoj cꞌal txꞌotxꞌ cusiltaj txꞌotxꞌ, yetoj cꞌal txꞌotxꞌ Négueb, jaꞌ masanil txꞌotxꞌ tuꞌ; yet ebꞌ Heteo, ebꞌ Amorreo, ebꞌ Cananeo, ebꞌ Ferezeo, ebꞌ Heveo cꞌal ebꞌ Jebuseo.

9 Jaꞌ wan conobꞌ jix eyqꞌuey sreyal yu ebꞌ conobꞌ Israel, jaꞌton ebꞌ tiꞌ: Sreyal Jericó, sreyal Ai jun conobꞌ ey scawilal Betel, 10 sreyal Jerusalén, sreyal Hebrón, 11 sreyal Jarmut, sreyal Laquis, 12 sreyal Eglón, sreyal Guézer, 13 sreyal Debir, sreyal Guéder, 14 sreyal Hormá, sreyal Arad, 15 sreyal Libná, sreyal Adulam, 16 sreyal Maquedá, sreyal Betel, 17 sreyal Tapúah, sreyal Héfer, 18 sreyal Afec, sreyal Sarón, 19 sreyal Madón, sreyal Hasor, 20 sreyal Simrom-merón, sreyal Acsaf, 21 sreyal Taanac, sreyal Meguido, 22 sreyal Quedes, sreyal Jocneam yul yet Carmelo, 23 sreyal Dor, bꞌey yul yet txꞌotxꞌ Dor tuꞌ, sreyal Goím bꞌey yul yet Guilgal, 24 yetoj sreyal Tirsá, ey 31 ebꞌ rey tuꞌ yin masanil.