Jix Eyqꞌuey Naj Jabín Yetoj Cꞌal Ebꞌ Eyoc Yetoj
11
Jaꞌ yet jix yabꞌen naj Jabín sreyal conobꞌ Hasor, catuꞌ jix yaontoj ẍejabꞌ naj bꞌey naj Jobab, sreyal conobꞌ Madón, yetoj cꞌal tet ebꞌ rey ey bꞌey Simrón, cꞌal bꞌey Acsaf, yet chi syambꞌan oc sbꞌa yetoj ebꞌ. 2 Jix yaon cꞌal paxtoj ẍejabꞌ naj bꞌey masanil ebꞌ rey ey bꞌey txꞌotxꞌ tzalquiltaj txꞌotxꞌ bꞌey norte, bꞌey spananil stiꞌ jaꞌ Jordán yetcꞌulal sur bꞌey jaꞌ naabꞌ jaꞌ Quinéret,a bꞌey acꞌal-laj, cꞌal bꞌey scawilal yet Dor yetcꞌulal bꞌey chi too cꞌu, 3 yetoj ebꞌ Cananeo ey yetcꞌulal bꞌey chi aol cꞌu cꞌal bꞌey chi too cꞌu, yetoj ebꞌ Amorreo, ebꞌ Hitita, ebꞌ Ferezeo, ebꞌ Jebuseo; jaꞌton ebꞌ tiꞌ ey bꞌey tzalquiltaj txꞌotxꞌ, yetoj ebꞌ Heveo bꞌey Hermón yul yet Mizpá. 4 Masanil wan rey tuꞌ jix eltej ebꞌ yetoj soldado, yetoj ẍe cꞌal scarruaje ebꞌ yet jowal. Cꞌamxa chi bꞌischa jantaj sbꞌisil soldado ebꞌ, jaxca xacꞌal yarenail bꞌey stiꞌ jaꞌ mar. 5 Masanil wan rey tuꞌ, junxane jix yute sbꞌa ebꞌ. Jatuꞌ jix syambꞌa oc sbꞌa ebꞌ masanil bꞌey scawilal stiꞌ jaꞌ naabꞌ jaꞌ chi yij Merom, yu yakꞌon jowal ebꞌ yin ebꞌ Israel.6 Jix yalon Jehová tet naj Josué: Cꞌam cꞌal chach xiw niꞌoj tet ebꞌ ánima tuꞌ, yutol jaꞌ yet yecal jaxca wal jun hora tinaniꞌ, camnajxa ey latzꞌan masanil ebꞌ wu je sattaj jaex Israel jex tiꞌ. Jaex xa oj je makꞌ kꞌatoj yajan ẍe ebꞌ, catuꞌ oj je yaon can oc skꞌakꞌal scarruaje ebꞌ yet jowal tuꞌ, ẍi Jehová.
7 Yuxan jaꞌ naj Josué, yetoj masanil ebꞌ jaꞌjun yetoj, jix oc ebꞌ yakꞌon jowal yetoj ebꞌ ánima tuꞌ bꞌey stiꞌ jaꞌ Merom, caw man yotaj oj ebꞌ ta chi apni oc lemna ebꞌ yin ebꞌ. 8 Jaꞌ Jehová jix aon oc ebꞌ yul skꞌabꞌ ebꞌ Israel, yuxan jix eyqꞌuey wan conobꞌ tuꞌ yul-laj bꞌe yu ebꞌ, masantaꞌcꞌal jix apni oc ebꞌ bꞌey jun miman conobꞌ chi yij Sidón, cꞌal bꞌey Misrefot-maim, yetcꞌulal bꞌey chi aol cꞌu, masantaꞌcꞌal bꞌey jun acꞌal yul yet Mizpá, cꞌamxa junoj jix cancan yin yiquisal tituꞌ. 9 Jix sjije naj Josué yunen masanil tzet jix yal Jehová, jix makꞌle kꞌatoj yajan noꞌ che tuꞌ yu ebꞌ, jix nusle can tzꞌaꞌ masanil carruaje yet jowal yu ebꞌ naj.
10 Jix lawi tuꞌ xin, jix jul ebꞌ bꞌey conobꞌ Hasor, caw miman conobꞌ yeocoj, jix makꞌle cꞌal pax cam sreyal jun conobꞌ tuꞌ yu naj Josué, 11 yetoj cꞌal masanil ebꞌ ánima caan tituꞌ. Masanil jix qꞌueycan el yu ebꞌ, jix yakꞌon can tzꞌaꞌ jun conobꞌ tuꞌ ebꞌ. 12 Laan cꞌal jix yute wanxa conobꞌ jix sjunbꞌane sbꞌa yin ebꞌ Israel tuꞌ. Masanil ebꞌ sreyal wan conobꞌ tuꞌ, jix cam ebꞌ yu chꞌen espada, cꞌamxa cꞌal junoj mac jix colcha can el xol jowal tuꞌ, jaxca wal jix yun yalon can naj ẍejabꞌ Dios chi yij Moisés. 13 Jaxa ebꞌ soldado Israel xin, ma snus tzꞌaꞌ wanxa conobꞌlaj ebꞌ eyxa cꞌaltaꞌ yet peyxa, asan conobꞌ Hasor jix yakꞌ tzꞌaꞌ ebꞌ. 14 Jix smakꞌon cam masanil ánima ebꞌ tol caan tituꞌ yetoj espada, cꞌamxa junoj jix yakꞌ can ebꞌ yin yiquisal. Jaxa cꞌal noꞌ jobꞌbꞌeal noꞌ, cꞌal jantaj tzetyetal ey tet ebꞌ, jix yiꞌcan oc ebꞌ.
Jix Sjije Naj Josué Tzet Jix Yal Can Naj Moisés
15 Jaxca wal jix yun yalon can Jehová tet naj Moisés, queytuꞌ jix yun yalon can naj Moisés tet naj Josué, jix sjije yunen masanil. 16 Yuxan jix yiꞌcan oc naj Josué yetoj ebꞌ soldado Israel masanil txꞌotxꞌ xꞌotxꞌ ebꞌ ánima tuꞌ, jaꞌton txꞌotxꞌ sjolomlaj wonan, txꞌotxꞌ Négueb, txꞌotxꞌ yul yet Gosen, cꞌal txꞌotxꞌ miman acꞌal, yetoj cꞌal spananil stiꞌlaj sjobꞌeal jaꞌ Jordán, yetoj cꞌal masanil txꞌotxꞌ tzalquiltaj txꞌotxꞌ, jaꞌton txꞌotxꞌ yet ebꞌ Israel yetoj cꞌal yacꞌalil. 17 Chi too tacꞌal txꞌotxꞌ bꞌey yich jun wonan chi yij sbꞌi Halac chi atoj txꞌotxꞌ bꞌey Seír, masantaꞌcꞌal chi apni oc bꞌey Baal-gad, txꞌotxꞌ ey spananil txꞌotxꞌ Líbano, jaꞌton txꞌotxꞌ chi apni oc bꞌey yich txꞌotxꞌ wonan Hermón. Jix mitxꞌle ey masanil ebꞌ sreyal wan nacionlaj tuꞌ yu naj Josué, catuꞌ jix smakꞌon can camoj. 18 Caw naatil jix yakꞌ jowal naj Josué yetoj wan rey tuꞌ. 19 Asanxane wal ebꞌ Heveo a conobꞌ Gabaón, jaꞌton ebꞌ jix yakꞌ swa kꞌane yetoj ebꞌ Israel, ma camoj; jal pax masanil wanxa ebꞌ xin, jix cam ebꞌ yin jowal jix oc tuꞌ. 20 Jaꞌ Jehová jix akꞌon pitbꞌoj el snaꞌbꞌal ebꞌ scajat ebꞌ Israel tuꞌ yet chi stecꞌbꞌan sbꞌa sattaj ebꞌ yaloni. Jix yun ebꞌ jaxca tuꞌ, yet watxꞌ chi qꞌueyle el ebꞌ masanil. Cꞌam cꞌal bꞌey jix okꞌ scꞌul ebꞌ Israel yin ebꞌ jaxca jix yun yalon Jehová tet naj Moisés.
21 Jaꞌton yet jun tiempoal tuꞌ, jix yiꞌcan ecꞌ masanil wan conobꞌ naj Josué bꞌey caan ebꞌ mimej steel, ebꞌ yicꞌaal naj Anac bꞌey Hebrón, bꞌey Debir cꞌal bꞌey Anab, yetoj cꞌal masanil txꞌotxꞌ tzalquiltaj txꞌotxꞌ yul yet Judá, cꞌal yul yet Israel. 22 Yu jun tuꞌ, cꞌamxa junoj ebꞌ ánima mimej steel, jaꞌton ebꞌ yicꞌaal Anac jix cancan sat xꞌotxꞌ ebꞌ Israel tuꞌ; asanxane bꞌey Gaza, bꞌey Gat cꞌal bꞌey Asdod jix cancan jaywanxa ebꞌ.
23 Queytuꞌ jix yun yiꞌon can ecꞌ masanil txꞌotxꞌ txꞌotxꞌ tuꞌ naj Josué, jaxca wal jix yun yalon Jehová tet naj Moisés. Jix lawi tuꞌ, jix spoꞌon ecꞌ naj xol masanil ebꞌ yicꞌaal Israel, yet chi oc can txꞌotxꞌ smajuloj ebꞌ. Jaꞌ yet jix ecꞌ el jun tuꞌ xin, queyton wal tuꞌ jix yun yoc tucan jowal bꞌey wan conobꞌ tuꞌ.