2 Yu tuꞌ xin, caw wal jix xiwa naj, yutol jaꞌ conobꞌ Gabaón, caw miman conobꞌ yeocoj. Caw wal bꞌinabꞌil, ecꞌbꞌan yintaj conobꞌ Ai, jaxa masanil ebꞌ ánima caan bꞌey jun conobꞌ tuꞌ caw jelan ebꞌ yin jowal. 3 Yu cꞌal jun tuꞌ xin, yuxan jix yatoj kꞌane naj Adonisédec tet naj Hoham sreyal Hebrón, cꞌal Piram sreyal Jarmut, cꞌal naj Jafía sreyal Laquis, cꞌal tet naj Debir sreyal Eglón: 4 Titanwej, colwaanwej wetoj an, catuꞌ chi kakꞌonwej jowal yetoj conobꞌ Gabaón, yutol jix yamigone ey sbꞌa ebꞌ yetoj Josué cꞌal yetoj conobꞌ Israel, ẍi toj naj tet ebꞌ. 5 Yuxan jix syambꞌa oc sbꞌa jowan ebꞌ rey tuꞌ, jaꞌton ebꞌ sreyal Jerusalén, Hebrón, Jarmut, Laquis yetoj Eglón, jix syambꞌa sbꞌa ebꞌ catuꞌ jix too swaꞌne ey bꞌulan sbꞌa ebꞌ soldado bꞌey scawilal conobꞌ Gabaón, yu yakꞌon jowal ebꞌ yetoj jun conobꞌ tuꞌ.

6 Jaxa ebꞌ a Gabaón tuꞌ jix yaltoj ebꞌ tet naj Josué, jatuꞌ eyecꞌ naj xol ebꞌ bꞌulan ey ebꞌ bꞌey Guilgal: Titan yin eymanil cu cꞌatan jon, catuꞌ chach jul colwa ketoj jon, yutol jaꞌ masanil ebꞌ naj sreyal ebꞌ Amorreo caan bꞌey tzalquiltaj txꞌotxꞌ tiꞌ, lalan syambꞌan oc sbꞌa ebꞌ naj kin jon, ẍi toj ebꞌ tet naj Josué. 7 Yu tuꞌ xin, yin eymanil jix yun stit naj Josué bꞌey Guilgal yetoj masanil ebꞌ soldado caw jelan yin jowal. 8 Jix yalon Jehová tet naj Josué jaxca tiꞌ: Cꞌam ojabꞌ chach xiw ja too sattaj ebꞌ naj tuꞌ, jain oj waoc ebꞌ yul ja kꞌabꞌ, cꞌam junoj ebꞌ oj skeꞌ stecꞌbꞌan sbꞌa yakꞌon jowal ja wetoj, ẍi Jehová.

9 Jix tit naj Josué yetoj ebꞌ soldado bꞌey Guilgal yet akꞌbꞌalil, catuꞌ jix sjitzontoj sbꞌa naj scawilal bꞌey bꞌulan ey ebꞌ Amorreo tuꞌ, caw eyoc ebꞌ yin qꞌueycꞌulal yet jix apni oc lemna naj yin ebꞌ. 10 Jaꞌ Jehová jix aon oc xiwcꞌulal yin ebꞌ, yet jix yilontoj ebꞌ tol lalan yapni oc ebꞌ Israel tuꞌ yin ebꞌ. Caw ecꞌal ebꞌ Amorreo jix makꞌle cam yu ebꞌ bꞌey Gabaón tuꞌ, catuꞌ jix oc cꞌal ian naj Josué yoc tzajan yintaj ebꞌ bꞌey jun bꞌe pitxan yeytoj bꞌey Bet-horón, catuꞌ jix smakꞌon cam jantaj cꞌal ebꞌ jix michꞌcha ey yu, masantaꞌcꞌal jix apni oc bꞌey Azecá, cꞌal bꞌey Maquedá. 11 Yajbꞌan lalan yeytej ebꞌ Amorreo bꞌey wonan Bet-horón, yu stoo scolon sbꞌa ebꞌ tet ebꞌ Israel, jaꞌ Jehová jix aon eytej mimej sajbꞌat yibꞌan ebꞌ, masantaꞌcꞌal bꞌey Azecá, yel xacꞌal miman ebꞌ jix cam yu chꞌen sajbꞌat tuꞌ yintaj ebꞌ jix makꞌle cam yetoj chꞌen espada yu ebꞌ Israel.

12 Jaꞌ yet lalan yale oc ebꞌ Amorreo tuꞌ yul skꞌabꞌ ebꞌ Israel yu Jehová, catuꞌ jix txali naj Josué tet Jehová sattaj masanil ebꞌ Israel, jix yalon yin xa jaxca tiꞌ:

Queytuꞌ ye stzꞌibꞌelecan yul an slibro naj chi yij Justo, bꞌey chi yal jaxca tiꞌ: Tol jix oc tucan sbꞌey cꞌu bꞌey snan satcan, jun cꞌu jix oc tucan sbꞌeyi, catuꞌ ma kꞌejbꞌoj yet jun cꞌu tuꞌ. 14 Cꞌam junojxa cꞌual jix yun jaxca jun cꞌual tuꞌ, tam wal yet yalantoj, tam wal yet cu sattajto, yutol jix yabꞌ Jehová tzet jix yal jun kꞌetxan ánima, yutol jaꞌ Jehová jix colwa yetoj ebꞌ conobꞌ Israel yin jowal.

15 Jix lawi tuꞌ xin, jix meltzo naj Josué yetoj ebꞌ Israel bꞌey Guilgal. 16 Jaꞌ jowan ebꞌ rey tuꞌ, jix tzaji yel ebꞌ, jix too yewbꞌa el sbꞌa ebꞌ bꞌey yul jun nachꞌen bꞌey Maquedá. 17 Yin cꞌuancꞌulal jix yun sbꞌet ilcha eltej ebꞌ bꞌey yul jun chꞌen nachꞌen tuꞌ, jix bꞌet al-le tet naj Josué. 18 Yuxan jix yal naj Josué tet ebꞌ jaxca tiꞌ: Tenwejtoj chꞌen mimej chꞌen tuꞌ, catuꞌ che majchen can el jun nachꞌen tuꞌ. Che yaon oc jaywanoj ebꞌ soldado steynen stiꞌ chꞌen tuꞌ. 19 Jal jex jaex tiꞌ xin, cꞌam cꞌal chex cancan linanoj, asan tol chex too tzajan yintaj wanxa ebꞌ cu cajat lalan yela tuꞌ. Cꞌamxa che chaꞌ meltzo ebꞌ bꞌey sconobꞌ, tuxa jix ale oc ebꞌ yul cu kꞌabꞌ yu Jehová cu Diosal, ẍi naj Josué tet ebꞌ.

20 Yuxan caw miman ebꞌ Amorreo jix cam yu naj Josué yetoj ebꞌ soldado Israel. Eyto jaywanxa ebꞌ ma cam yu jowal tuꞌ, yutol jix too scol sbꞌa ebꞌ bꞌey wanxa conobꞌlaj eyoc smuroal yinlaj. 21 Jix lawi tuꞌ, jix paxtoj ebꞌ soldado Israel, jix meltzotej ebꞌ yin tzalacꞌulal bꞌey bꞌulan ecꞌ ebꞌ bꞌey Maquedá, jix apni oc ebꞌ bꞌey eyecꞌ naj Josué, cꞌamxa junoj mactxequel jix stecꞌbꞌa sbꞌa yalon pena kꞌane yin ebꞌ Israel tuꞌ.

22 Jix yalon naj Josué tet ebꞌ jaxca tiꞌ: Jajwej stiꞌ jun nachꞌen tuꞌ, catuꞌ che yiꞌon eltej ebꞌ jowan rey tuꞌ, ẍi naj. 23 Catuꞌ jix iꞌle eltej ebꞌ jowan rey eyoctoj yul chꞌen nachꞌen tuꞌ yu ebꞌ Israel, jaꞌton sreyal Jerusalén, sreyal Hebrón, sreyal Jarmut, sreyal Laquis cꞌal naj sreyal Eglón. 24 Jaꞌ yet jix iꞌle eltej ebꞌ sattaj naj Josué tuꞌ, jix yawten masanil ebꞌ soldado, catuꞌ jix yalon naj tet ebꞌ syaawil soldado Israel tuꞌ jaxca tiꞌ: Jitzwejtej je bꞌa, catuꞌ che tecꞌon ey snukꞌ wan rey tiꞌ, ẍi naj tet ebꞌ. Catuꞌ jix oc tecꞌan ebꞌ yibꞌan snukꞌ wan rey tuꞌ. 25 Jix yalon pax naj Josué tet ebꞌ jaxca tiꞌ: Cꞌam ojabꞌ cꞌal chex xiwi, cꞌam ojabꞌ che yakꞌ caabꞌcꞌulal; caw yelcꞌulal ojabꞌ che yakꞌ jowal, yutol jaxca tiꞌ oj yute Jehová masanil ebꞌ chi jowi oc kin, ẍi naj.

26 Jix lawi tuꞌ xin, jix smakꞌon cam jowan ebꞌ rey naj Josué tuꞌ, jix yalon naj, tol chi tꞌunbꞌale a ebꞌ yin junjunoj teꞌ teꞌ. Jaꞌ tituꞌ jix a locan ebꞌ, masantaꞌcꞌal jix too cꞌu. 27 Jaꞌ yet lalanxa stoo cꞌu tuꞌ xin, jix yalon naj Josué tol chi iꞌle eytej ebꞌ yin teꞌ teꞌ tuꞌ, catuꞌ chi ale octoj ebꞌ yul chꞌen nachꞌen tuꞌ junelxa bꞌey jix yewbꞌa el sbꞌa ebꞌ tuꞌ. Catuꞌ jix smajchen can stiꞌ chꞌen ebꞌ yetoj mimej chꞌen, eyto cꞌal ecꞌ wan chꞌen tuꞌ tinaniꞌ.

28 Jacꞌal oc yet jun cꞌual tuꞌ, jix oc cꞌal pax naj Josué yul conobꞌ Maquedá, jix yakꞌ lawoj el yin junelne. Jix smakꞌon cam masanil ánima bꞌey conobꞌ tuꞌ yetoj chꞌen espada, cꞌamxa junoj ebꞌ jix cancanoj. Jaxca wal jix yun sreyal conobꞌ Jericó queytuꞌ jix utele naj sreyal Maquedá yu ebꞌ.

29 Jix lawi tuꞌ xin, jix too naj Josué yetoj ebꞌ soldado bꞌey conobꞌ Libná, jix yakꞌon jowal ebꞌ tituꞌ. 30 Jaꞌ Dios jix aon oc jun conobꞌ yetoj sreyal yul skꞌabꞌ ebꞌ soldado Israel. Cꞌamxa junoj jix can yin yiquisal tituꞌ, jaxca jix utele naj sreyal conobꞌ Jericó, quey pax tuꞌ jix utele naj sreyal Libná yu ebꞌ.

31 Jix lawi yakꞌon jowal naj Josué yetoj ebꞌ soldado bꞌey conobꞌ Libná tuꞌ, catuꞌ jix too pax ebꞌ bꞌey conobꞌ Laquis, jaꞌ sattaj ecꞌtoj jun conobꞌ tuꞌ, jatuꞌ jix swaꞌne ey bꞌulan sbꞌa ebꞌ. Jix lawi tuꞌ, catuꞌ jix yakꞌon jowal ebꞌ yetoj jun conobꞌ tuꞌ. 32 Jaxa yet yewial tuꞌ xin, jix ale oc jun conobꞌ tuꞌ yul skꞌabꞌ ebꞌ yu Jehová, jaxca jix yun conobꞌ Libná yu ebꞌ. Jix smakꞌon cam masanil ebꞌ ánima caan tituꞌ cꞌal yetoj noꞌ noꞌ. 33 Jaꞌ naj Horam, sreyal conobꞌ Guézer, jix eltoj yetoj ebꞌ soldado yet chi colwa yetoj ebꞌ conobꞌ Laquis. Jaxa jix yun xin, jix cam naj yetoj masanil ebꞌ soldado yu naj Josué. Cꞌamxa junoj ebꞌ jix cancan yin yiquisal yu naj.

34 Jaꞌ yet jix lawi jowal bꞌey conobꞌ Laquis tuꞌ, catuꞌ jix too naj Josué yetoj ebꞌ soldado bꞌey conobꞌ Eglón. Jix swaꞌne pax ey bꞌulan sbꞌa ebꞌ bꞌey scawilal jun conobꞌ tuꞌ. Jix lawi tuꞌ, jix yakꞌon pax jowal ebꞌ tituꞌ. 35 Jaꞌ yet jun cꞌual tuꞌ, jix cam masanil ebꞌ ánima yu ebꞌ, cꞌamxa junoj jix colcha canoj, jaxca wal jix yun bꞌey conobꞌ Laquis.

36 Jaꞌ yet jix el naj Josué yetoj ebꞌ soldado bꞌey Eglón tuꞌ, jix too ebꞌ bꞌey conobꞌ Hebrón, catuꞌ jix yakꞌon pax jowal ebꞌ tituꞌ. 37 Jaꞌ yet jix oc ebꞌ yin jun conobꞌ tuꞌ, jix yakꞌ lawoj el ebꞌ yin junelne, jix makꞌle cam naj sreyal jun conobꞌ tuꞌ yu ebꞌ, yetoj masanil ebꞌ ánima, noꞌ jobꞌbꞌeal noꞌ yetoj cꞌal wanxa conobꞌ ey scawilal tuꞌ, jaxca wal jix yun conobꞌ Eglón.

38 Jaꞌ yet jix lawi tuꞌ, jix too naj Josué yetoj ebꞌ soldado bꞌey conobꞌ Debir, jix yakꞌon cꞌal pax jowal ebꞌ tituꞌ. 39 Jix smakꞌon cam sreyal jun conobꞌ tuꞌ ebꞌ, yetoj cꞌal masanil ebꞌ ánima caan scawilal tuꞌ. Cꞌamxa junoj ebꞌ ánima caan bꞌey Debir jix cancanoj. Jix cam ebꞌ masanil jaxca wal jix yun ebꞌ conobꞌ Hebrón, cꞌal bꞌey Libná yetoj cꞌal sreyal junjun ebꞌ.

40 Queytuꞌ jix yun slawi el wan ánima tuꞌ yetoj sconobꞌ yu naj Josué tuꞌ. Jix lawi cꞌal pax el masanil ebꞌ rey bꞌey yul-laj yet conobꞌ Négueb, bꞌey sjolomlaj wonan, bꞌey miman acꞌal, cꞌal bꞌey pacꞌanlaj yeqꞌui. Jix cam masanil ebꞌ yu naj, cꞌamxa junoj ebꞌ iquisto jix cancan bꞌey wan conobꞌ tuꞌ. Jix eloc jaxca jix yun yalon can Jehová, Naj sDiosal conobꞌ Israel.

41-42 Junelne jix lawi el masanil ebꞌ rey tuꞌ yu naj Josué, jix yiꞌon can oc masanil txꞌotxꞌ txꞌotxꞌ ebꞌ ey bꞌey snan xol Cadés-barnea yetoj Gaza, yetoj masanil txꞌotxꞌ ey yul yet Gosen, masantaꞌcꞌal jix apni oc txꞌotxꞌ bꞌey Gabaón, yutol jaꞌ Jehová jix colwa yetoj ebꞌ yin jowal. 43 Jix lawi tuꞌ, catuꞌ jix meltzotoj naj Josué bꞌey bꞌulan ecꞌ ebꞌ bꞌey Guilgal yetoj masanil ebꞌ soldado tuꞌ.