Jix Waꞌne Yeoc Jun Swa Kꞌane Ebꞌ Yetoj Ebꞌ Gabaonita
9
Jix yabꞌ skꞌumal ebꞌ ey scawilal wan tzet jix yun naj Josué tuꞌ, jaꞌton ebꞌ Heteo, ebꞌ Amorreo, ebꞌ Cananeo, ebꞌ Ferezeo, ebꞌ Heveo cꞌal ebꞌ Jebuseo caan ebꞌ bꞌey tzalquiltaj txꞌotxꞌ bꞌey spananil ecꞌtoj stiꞌ jaꞌ Jordán, cꞌal bꞌey satlaj acꞌal, yetoj cꞌal txꞌotxꞌ ey bꞌey stiꞌlaj jaꞌ mar Mediterráneo, masantaꞌcꞌal chi apni oc bꞌey Líbano. 2 Yu tuꞌ xin, jix swa alne ebꞌ catuꞌ jix slatiꞌne sbꞌa ebꞌ, yet chi scol-len sbꞌa ebꞌ yet chi too yakꞌon jowal ebꞌ yetoj naj Josué, cꞌal yin conobꞌ Israel. 3 Jaꞌ ebꞌ naj Heveo caan bꞌey Gabaón, jaꞌ yet jix yabꞌen oc ebꞌ tzet jix yun sqꞌueyle el conobꞌ Jericó, cꞌal conobꞌ Ai yu naj Josué tuꞌ, 4 jix snaꞌon ebꞌ tzet chi yun yeyqꞌuey naj Josué tuꞌ yu ebꞌ. Jix syambꞌa ey wan icham coẍtal ebꞌ cꞌal icham tzꞌuum sneetal yal uva jatiltaj xacꞌal yoqui, jix yaon oc ebꞌ yibꞌan sbꞌuru, catuꞌ jix too ebꞌ. 5 Jix yaon oc an icham pichile ebꞌ niptaj xacꞌal yoqui, jix yaon oc icham xanabꞌe ebꞌ, catuꞌ jix yiꞌontoj ebꞌ wan pan kꞌuxumtaj xacꞌal yoqui. 6 Jaꞌ yet jix apni oc ebꞌ bꞌey Guilgal, jix yalon ebꞌ tet naj Josué, cꞌal tet ebꞌ syaawil conobꞌ Israel jaxca tiꞌ:—Caw wal naat cu peto jon, chi koche chi cu waꞌne junoj cu wa kꞌane je yetoj, ẍi ebꞌ tet ebꞌ naj.
7 Catuꞌ jix takꞌwi ebꞌ syaawil conobꞌ Israel tet ebꞌ a Heveo jaxca tiꞌ:
—Asan tala cu cawilal tiꞌ caan jex pax oj, ¿tzet wal chi yun cu waꞌnen junoj cu wa kꞌane je yetoj? ẍi ebꞌ.
8 Jix oc cꞌal ian ebꞌ yalon tet naj Josué jaxca tiꞌ:
—Jaon tiꞌ jon bꞌejan cu cꞌul koc je chejabꞌoj, ẍi ebꞌ. Catuꞌ jix skꞌanlen naj Josué tet ebꞌ:
—¿Mac jex txequel jaex tiꞌ xin? ¿Bꞌeytuꞌ je peto ocoj? ẍi naj tet ebꞌ.
9 Jix takꞌwi ebꞌ jaxca tiꞌ:
—Caw wal naat cu peto jon; yutol jix kabꞌoc jon tol ey yipalil Jehová je Diosal, catuꞌ jix kabꞌeni tzet jix je yun bꞌey txꞌotxꞌ Egipto, 10 yetoj cꞌal tzet jix yun Jehová yin ebꞌ cawan sreyal ebꞌ Amorreo bꞌey skꞌaxepal ecꞌtoj jaꞌ Jordán, jaꞌton naj Sihón ey bꞌey Hesbón yetoj cꞌal naj Og bꞌey Astarot yul yet Basán. 11 Yu cꞌal wal jun tuꞌ xin, yuxan jix yal ebꞌ cu yaawil jon, cꞌal ebꞌ ket conobꞌ jon: Iꞌwejtoj je loꞌbꞌe yul-laj bꞌe, catuꞌ chi too je yilon ebꞌ Israel bꞌeytuꞌ eyoc ecꞌ ebꞌ, catuꞌ che yaloni tol chi cu ocwej ẍejabꞌoj ebꞌ, catuꞌ chi cu waꞌnen yeoc junoj cu wa kꞌane yetoj ebꞌ, ẍi ebꞌ naj ey jon. 12 Jaꞌ yet jix cu tit jex cu seyon tiꞌ jon, caw wal kꞌaxanto ixim pan tiꞌ yet jix kiꞌontej jon, jal tinaniꞌ xin, jix tajtoj ixim catuꞌ jix kꞌuxumbꞌitoj ixim. 13 Jacꞌalaꞌ wan neet tiꞌ, caw wal acꞌto ebꞌ yet jix kaon eytoj yal uva yul, jaxa tinaniꞌ jatilxa cꞌal yoc ebꞌ; jacꞌalaꞌ an cu pichil tiꞌ jon, cꞌal cu xanabꞌ tiꞌ jon, caw jix jolchatoj yutol caw wal naat cu peto jon, ẍi ebꞌ naj.
14 Jix yabꞌlen ebꞌ Israel wan sloꞌbꞌe ebꞌ Gabaonita tuꞌ, asan xin, ma pax skꞌanle ebꞌ tet Jehová yu tzet watxꞌ chi yun ebꞌ yetoj ebꞌ. 15 Jix lawi tuꞌ, catuꞌ jix swaꞌne jun swa kꞌane naj Josué yetoj ebꞌ yet chi yamigone sbꞌa yetoj ebꞌ. Jix yalon naj Josué tol cꞌam chi makꞌle cam ebꞌ, tol chi oc mimancꞌulal yin ebꞌ. Quey cꞌal pax tuꞌ jix yun yalon ebꞌ syaawil conobꞌ Israel.
16 Yox cꞌualxa wal jix swaꞌnen yeoc jun swa kꞌane ebꞌ tuꞌ, catuꞌ jix yabꞌen oc ebꞌ Israel tol scawilal chꞌan ebꞌ naj tuꞌ caan ebꞌ naj Gabaonita tuꞌ. 17 Jix lawi tuꞌ xin, jix too ebꞌ soldado Israel seyon bꞌey eyecꞌ ebꞌ tuꞌ. Yin xa yox cꞌual jix yun yapni oc ebꞌ bꞌey sconobꞌ ebꞌ tuꞌ: Tol jaꞌton conobꞌ Gabaón, Quefirá, Beerot cꞌal yetoj Quiriat-jearim. 18 Ma makꞌle cam ebꞌ naj yu ebꞌ Israel, yutol xax yakꞌ stiꞌ ebꞌ syaawil conobꞌ tet Jehová, tol cꞌam chi cam ebꞌ.
Yu cꞌal jun tuꞌ xin, yuxan jix alxi a ebꞌ conobꞌ tuꞌ yin ebꞌ syaawil conobꞌ Israel. 19 Jix yalon ebꞌ yaaw tuꞌ tet ebꞌ yet conobꞌ jaxca tiꞌ:
—Jaon tiꞌ jon tuxa jix kaꞌ cu tiꞌ tet Jehová cu Diosal, tol cꞌam chi cu makꞌwej cam ebꞌ naj, yuxan cꞌam tzet oj kute ebꞌ naj jon. 20 Chi can cꞌal ebꞌ naj jaxca tuꞌ, yet watxꞌ cꞌam chi cu qꞌuextoj bꞌey jix kakꞌ cu tiꞌ sattaj Jehová, ta cꞌamaj oj tit sjowal scꞌul Dios kibꞌanwej, ẍi ebꞌ naj.
21 Jix yalon pax ebꞌ jaxca tiꞌ: Cꞌam ojabꞌ chi cam ebꞌ naj, tol ojabꞌ chi oc ebꞌ naj cu siꞌwomoj cꞌal yijomaloj jaꞌ cu xol cu masanil, ẍi ebꞌ naj. Queytuꞌ jix yun yeloc bꞌey jix yakꞌ can stiꞌ ebꞌ syaawil conobꞌ tuꞌ.
22 Catuꞌ jix awtele ebꞌ syaawil ebꞌ Gabaonita tuꞌ yu naj Josué, jix skꞌanlen tet ebꞌ jaxca tiꞌ:
—¿Tzet yuxan jix je xij je yal ey jon? Tol caw naat je peto je yaloni, ilaꞌ tol cawil pax caan jex. 23 Yu cꞌal jix je yun jaxca tuꞌ, yuxan chi oc can jun syaꞌtajilal tiꞌ je yibꞌan yu Dios cꞌal je yoc yin yakꞌomaloj servilal ey jon, jon, chex oc can yin tzokꞌo siꞌ cꞌal yin iꞌo jaꞌ chi kꞌanle bꞌey snail scalubꞌal cu Diosal jon, ẍi naj tet ebꞌ.
24 Jix takꞌwi ebꞌ tet naj Josué jaxca tiꞌ:
—Jix ton kakꞌ cu lekꞌtiꞌal ey jex jon, yutol chi cu xiw ey jex, tala chon je makꞌ camoj, yutol jix kabꞌ tzet jix yun yalon Jehová tet jun ẍejabꞌ, jaꞌton naj Moisés, tol oj yakꞌ masanil jun txꞌotxꞌ tiꞌ yul je kꞌabꞌ, catuꞌ che qꞌueyon can el masanil ebꞌ ánima caan sat txꞌotxꞌ. 25 Yuxan jaꞌ tinaniꞌ ey jon xa oc yul je kꞌabꞌ, jaex che yalaꞌ tzet chon je yute jon, ẍi ebꞌ naj.
26 Yu tuꞌ xin, ma ẍaꞌ scꞌul naj Josué tol chi makꞌle cam ebꞌ a Gabaón yu ebꞌ yet conobꞌ tuꞌ. 27 Asan xin, caw jix ale oc ebꞌ naj yin siꞌwomal, cꞌal yin iꞌo jaꞌ xol ebꞌ Israel tuꞌ, cꞌal bꞌey chi akꞌle xaambꞌal tet Jehová jaꞌton bꞌey sicꞌbꞌil can el yu Dios. Chi tocꞌal mulna cꞌal ebꞌ Gabaonita tuꞌ yin jun mulnail tuꞌ tinaniꞌ.