3 Jix lawi tuꞌ xin, jix yakꞌon lista sbꞌa naj Josué yetoj ebꞌ soldado yet chi too ebꞌ yin jowal yin conobꞌ Ai, jix sicꞌon el 30,000 ebꞌ soldado caw jelan yin jowal, catuꞌ jix ẍejontoj ebꞌ yet akꞌbꞌalil. 4 Jix cam yalon naj tet ebꞌ soldado tuꞌ: Chi cam je yabꞌeni, jatuꞌ chex too bꞌey yintaj ecꞌtoj jun conobꞌ tuꞌ, catuꞌ che yewbꞌan el je bꞌa tituꞌ, scawilal cꞌal tuꞌ chex cancanoj yet watxꞌ majbꞌil xacꞌal je yu. 5 Jain chin can yetoj wanxa ebꞌ soldado tiꞌ, oj cu jitztoj cu bꞌa scawilal jun conobꞌ tuꞌ. Jaꞌ yet oj tit ebꞌ yakꞌon jowal tuꞌ kin jon, catuꞌ oj cu el tet ebꞌ jon, jaxca jix yun yel ebꞌ ket conobꞌ tet ebꞌ yet sbꞌabꞌelal. 6 Jaꞌ yet oj tit ebꞌ kintaj tuꞌ jon, catuꞌ oj cu el tet ebꞌ jon, yet oj snaꞌon ebꞌ tol oj cu eyqꞌuey yu ebꞌ junelxa. 7 Yuxan jaꞌ yet oj je yilon jaxca tuꞌ, catuꞌ oj jex eltej bꞌey che yewbꞌa el je bꞌa tuꞌ, catuꞌ chex oc lemna yul sconobꞌ ebꞌ tuꞌ, yutol jaꞌ Jehová oj aon oc jun conobꞌ tuꞌ yul cu kꞌabꞌ. 8 Jaꞌ yet xax eyqꞌuey jun conobꞌ tuꞌ je yu, catuꞌ che yaon oc skꞌakꞌal jaxca jix yun yalon Jehová. Jaꞌ jun tiꞌ chi wal ey jex, ẍi naj Josué tet ebꞌ.

9 Jix lawi tuꞌ, jix yalon naj tol chi too ebꞌ soldado tuꞌ, jix too ebꞌ naj xin, jix apni oc ebꞌ catuꞌ jix yewbꞌan el sbꞌa ebꞌ bꞌey snan xol Betel yetoj conobꞌ Ai, yetcꞌulal bꞌey chi too cꞌu, jal naj Josué tuꞌ xin, jix can junxa akꞌbꞌal yetoj wanxa ebꞌ soldado bꞌey bꞌulan ey ebꞌ tuꞌ. 10 Jaꞌ yet junxa cꞌual xin, caw sebꞌ jix a waan naj Josué, catuꞌ jix syambꞌan oc wanxa ebꞌ soldado. Jix lawi tuꞌ, jix bꞌabꞌi naj sattaj ebꞌ yetoj ebꞌ syaawil conobꞌ Israel. Jix too ebꞌ yakꞌon jowal yin ebꞌ a conobꞌ Ai. 11 Jix sjitzon xacꞌal oc sbꞌa ebꞌ bꞌey sattaj conobꞌ tuꞌ, yetcꞌulal bꞌey eyoc smajil jun conobꞌ tuꞌ, jix swaꞌnen a skꞌap na ebꞌ bꞌey jix ey bꞌulan ebꞌ, bꞌey spacꞌanil ecꞌtej jun panan ey snan xol yetoj jun conobꞌ tuꞌ. 12 Jix ẍejtoj jun 5,000 ebꞌ soldado naj Josué yet chi yewbꞌan el sbꞌa ebꞌ bꞌey snan xol Betel yetoj conobꞌ Ai, yetcꞌulal bꞌey chi too cꞌu. 13 Queytuꞌ jix yun spoꞌon ecꞌ ebꞌ soldado naj Josué, jun tujan ebꞌ jix yewbꞌa el sbꞌa bꞌey yintaj ecꞌtoj conobꞌ tuꞌ yetcꞌulal bꞌey chi too cꞌu, jal junxa tujan ebꞌ xin, jix can to can ebꞌ bꞌey bꞌulan ey ebꞌ bꞌey yetcꞌulal norte, jal pax naj Josué xin, jix bꞌabꞌitoj naj, jaꞌ tituꞌ jix ecꞌ akꞌbꞌal yu naj snanecꞌtoj jun panan tuꞌ.

14 Jaꞌ yet jix yilontej naj sreyal conobꞌ Ai, tol lalan yapni oc naj Josué yetoj ebꞌ soldado yin ebꞌ, catuꞌ jix eltej naj yetoj masanil ebꞌ soldado yet caw skꞌinibꞌto, catuꞌ jix ẍaꞌlen sbꞌa ebꞌ yetoj ebꞌ Israel bꞌey spananil bꞌey chi ey apnoj jaꞌ Jordán, caw man yotaj oj ebꞌ, ta tol ey ebꞌ naj soldado ewanxa ecꞌtoj yintaj sconobꞌ ebꞌ tuꞌ. 15 Jaꞌ yet jix yilon naj Josué stit ebꞌ, jaxca tol jix xiwa ebꞌ naj tet ebꞌ, catuꞌ jix el yetoj ebꞌ soldado yin ani, jix apni oc ebꞌ bꞌey sbꞌeal txꞌotxꞌ cusiltaj txꞌotxꞌ. 16 Masanil ebꞌ soldado yet conobꞌ Ai, jix chejle ebꞌ yu stoo ujtele naj Josué yetoj soldado tuꞌ yu ebꞌ. Jaxa jix yunne, tol caw naat cꞌal jix ijbꞌale cꞌal el ebꞌ bꞌey sconobꞌ tuꞌ yu ebꞌ. 17 Cꞌamxa junoj winaj jix can bꞌey conobꞌ Ai cꞌal bꞌey conobꞌ Betel, masanil ebꞌ jix too tzajan yintaj naj Josué cꞌal yintaj soldado. Yutol jix too tzajan ebꞌ masanil yintaj ebꞌ Israel, yuxan cꞌamxa yilomal conobꞌ tuꞌ jix cancan yu ebꞌ. 18 Jix lawi tuꞌ, jix yalon Jehová tet naj Josué: Etcꞌulnetoj chꞌen ja lanza yetcꞌulal conobꞌ Ai, yutol tuxa wal jix waoc jun conobꞌ tuꞌ yul ja kꞌabꞌ, ẍi Jehová.

Yin eymanil jix yetcꞌulnetoj chꞌen slanza naj Josué yin conobꞌ Ai tuꞌ. 19 Yet cꞌal jun txolan tuꞌ jix octoj lemna ebꞌ naj soldado yul conobꞌ Ai, jaꞌton ebꞌ naj jix yewbꞌa el sbꞌa tuꞌ. Catuꞌ jix yaon oc kꞌakꞌ ebꞌ yin jun conobꞌ tuꞌ.

20 Jaꞌ yet jix meltzotoj tꞌanan ebꞌ naj a conobꞌ Ai, jix yilontoj ebꞌ naj tol bꞌakꞌakꞌi xacꞌal stoo smucꞌal sconobꞌ ebꞌ tuꞌ satcan. Cꞌamxa bꞌey chi skeꞌ scolon sbꞌa ebꞌ, yutol jaꞌ ebꞌ Israel chi el tet ebꞌ tuꞌ, jix meltzo pax ebꞌ naj yakꞌon jowal yin ebꞌ. 21 Jaꞌ yet jix yilon naj Josué yetoj ebꞌ soldado, tol bꞌakꞌakꞌi xacꞌal ya smucꞌal conobꞌ Ai, jix yotajne el naj tol xax oc ebꞌ naj soldado bꞌey yul conobꞌ tuꞌ. Yu jun tuꞌ, jix meltzotoj naj yetoj ebꞌ soldado, catuꞌ jix qꞌueyle el ebꞌ a conobꞌ Ai tuꞌ yu ebꞌ. 22 Jaꞌ ebꞌ jix oc yul jun conobꞌ tuꞌ, jix eltej ebꞌ yin ebꞌ, yuxan masanil ebꞌ a conobꞌ Ai jix cancan ebꞌ snan ebꞌ soldado a Israel tuꞌ. Yuxan cꞌamxa junoj mactxequel jix colcha canoj, jix cam ebꞌ masanil yu ebꞌ Israel tuꞌ. 23 Asanxane naj sreyal conobꞌ Ai, jix mitxꞌle can ey naj yin yiquisal, catuꞌ jix yiꞌontoj ebꞌ sattaj naj Josué.

24 Jaꞌ yet jix lawi scam masanil ebꞌ soldado jix ujten ebꞌ Israel tuꞌ, catuꞌ jix too cꞌal pax ebꞌ bꞌey yul conobꞌ Ai, jix bꞌet sqꞌueyon xacꞌal el ebꞌ jantaj to ánima jix can bꞌey yul conobꞌ tuꞌ. 25 Jaꞌ yet jun cꞌual tuꞌ, ey 12,000 ebꞌ ánima a conobꞌ Ai jix cami, ebꞌ ix ix cꞌal ebꞌ winaj. 26 Cꞌam cꞌal niꞌoj xewilal yu naj Josué, yutol lalan cꞌal naj yaloni tol chi oc jowal masantaꞌcꞌal chi cam can masanil ebꞌ a conobꞌ Ai. 27 Jaxa ebꞌ Israel jix yiꞌcan oc noꞌ jobꞌbꞌeal noꞌ ebꞌ, cꞌal masanil stzetyetal jaxca wal jix yun yalon Jehová tet naj Josué. 28 Catuꞌ jix yalon naj Josué tol chi nusle can tzꞌaꞌ conobꞌ Ai tuꞌ yin junelne, masanil na asan xacꞌal xeꞌ txequel ye can tinaniꞌ. 29 Jaꞌ naj Josué tuꞌ, jix yalaꞌ tol chi tꞌunbꞌale a naj sreyal Ai tuꞌ yin skꞌabꞌ jun teꞌ teꞌ, masantaꞌcꞌal yet jix kꞌejbꞌi eyoj, catuꞌ jix yalon naj tol chi too iꞌle eytej smimanil naj rey tuꞌ. Jix iꞌletoj bꞌey spuertail conobꞌ, catuꞌ jix toocan bꞌulan chꞌen chꞌen yibꞌan naj yu ebꞌ. Jaꞌ jun bꞌulan chꞌen chꞌen tuꞌ, txequel tocꞌal tinaniꞌ.

30 Jix lawi tuꞌ xin, catuꞌ jix swaꞌne jun yet xaambꞌal naj Josué sattaj Jehová sDiosal Israel, bꞌey txꞌotxꞌ wonan Ebal. 31 Jix swaꞌne jaxca wal jix yun yalon can Moisés, naj ẍejabꞌ Jehová yet chi yalon tet ebꞌ conobꞌ Israel, jaxca wal yalon can yul an slibroal ley bꞌey chi yal jaxca tiꞌ: Jaꞌ chꞌen chꞌen man josbꞌiloj chi oc yin junoj yet xaambꞌal, ẍi jun ley tuꞌ. Jix lawi tuꞌ, jix yakꞌon tzꞌaꞌ xaambꞌal ebꞌ Israel yibꞌan chꞌen sattaj Jehová, catuꞌ jix yakꞌon cꞌal pax xaambꞌal yet watxꞌcꞌulal. 32 Sattaj wal masanil ebꞌ conobꞌ tuꞌ jix stzꞌibꞌe oc jun ley naj Josué jix yakꞌ can naj Moisés tet ebꞌ yet Israelal yin chꞌen chꞌen yet xaambꞌal tuꞌ. 33 Jix lawi tuꞌ xin, masanil ebꞌ Israel yetoj cꞌal ebꞌ txꞌoj conobꞌal caan ecꞌ xol ebꞌ, cꞌal ebꞌ icham winaj yul conobꞌ, cꞌal ebꞌ syaawil ebꞌ soldado, yetoj cꞌal ebꞌ juez, jix jul ebꞌ yinlaj scꞌul teꞌ Scaẍail Swa Kꞌane Dios bꞌey sattaj ebꞌ yakꞌomal xaambꞌal tuꞌ, jaꞌton ebꞌ Levita, jaꞌton ebꞌ jix sjolomxicꞌnetoj teꞌ caẍa tuꞌ. Nan ebꞌ ánima tuꞌ jix toocan bꞌey yich txꞌotxꞌ wonan Guerizim, jal nanxa xin jix toocan ebꞌ bꞌey yich txꞌotxꞌ wonan Ebal. Jaꞌ ebꞌ yakꞌomal xaambꞌal tuꞌ lalan yalon watxꞌ kꞌane ebꞌ yibꞌan conobꞌ Israel, jaxca wal jix yun yalon can naj Moisés, naj ẍejabꞌ Jehová yet yalantoj.

34 Jix lawi tuꞌ xin, catuꞌ jix yawten a an yuunal ley naj Josué yin ipal xol ebꞌ conobꞌ bꞌey albꞌilcan yu naj Moisés tet ebꞌ Israel, jaꞌton wan kꞌane yibꞌan syaaxilal cꞌal yibꞌan syaꞌtajilal. 35 Jaꞌ yet tuꞌ yaman oc masanil ebꞌ ix ix, ebꞌ unin, cꞌal ebꞌ ánima txꞌoj conobꞌal eyecꞌ xol ebꞌ. Jix yawte a naj Josué masanil wan chejbꞌanile tuꞌ yabꞌ ebꞌ conobꞌ tuꞌ.