2 Jaꞌ yet eyecꞌ naj Josué yetoj ebꞌ Israel bꞌey Jericó, jix yaontoj jaywan ebꞌ winaj yet chi too sbꞌeytzen ebꞌ tzet wal yili oc conobꞌ Ai. Jatuꞌ ey bꞌey sattaj ecꞌtej Betel bꞌey scawilal Bet-avén. Catuꞌ jix too yilon ebꞌ tzet wal yili jun conobꞌ tuꞌ. 3 Jix lawi tuꞌ jix meltzo ebꞌ naj, catuꞌ jix yalon ebꞌ tet naj Josué jaxca tiꞌ: Cꞌam ojabꞌ chi too ebꞌ ánima tiꞌ masanil yin jowal bꞌey jun conobꞌ tuꞌ, caw cꞌuxan chi tzaji caabꞌoj ma oxebꞌoj mil ebꞌ naj chi too yakꞌ jowal yetoj conobꞌ Ai tuꞌ, ta chi too masanil ebꞌ, tuxa cꞌal mi chi yetne scꞌul ebꞌ naj yeqꞌui, yutol txenne sbꞌisil ebꞌ chi teynen jun conobꞌ tuꞌ, ẍi ebꞌ. 4 Yu tuꞌ xin, asanne oxebꞌ mil ebꞌ naj soldado jix too yin jowal yin conobꞌ Ai. Jaxa wal jix yun xin, jix eyqꞌuey ebꞌ naj soldado Israel yu ebꞌ conobꞌ Ai tuꞌ. 5 Jix ujtele ebꞌ naj yu ebꞌ bꞌey spuertail conobꞌ masantaꞌcꞌal bꞌey chi iꞌle eltej chꞌen chꞌen chi joslei. Jix makꞌle cam 36 ebꞌ naj soldado a Israel yu ebꞌ bꞌey sat pacꞌan yalan eytoj conobꞌ tuꞌ. Yu jun tuꞌ, caw jix jul scaabꞌcꞌulal ebꞌ Israel tuꞌ, caw jix xiwa ebꞌ naj sicꞌlebꞌil.

6 Jaꞌ yet jix yabꞌen oc naj Josué yetoj ebꞌ syaawil conobꞌ Israel, jix snicꞌontoj stiꞌ spichil ebꞌ, catuꞌ jix yaon atoj pojoj ebꞌ naj yin sjolom yu scuscꞌulal, jix lawi tuꞌ xin, jix ey kaan ebꞌ sattaj teꞌ Scaẍail Swa Kꞌane Jehová, jix ey noan ebꞌ sat txꞌotxꞌ masantaꞌcꞌal jix too cꞌu. 7 Jix yalon naj Josué:

—Aay, jaach Kaawil, ¿tzet yuxan jix ja wiꞌecꞌtej ebꞌ ja conobꞌ tiꞌ bꞌey skꞌaxepal ecꞌtej jaꞌ Jordán tiꞌ? ¿Tumi asan yu jon ja waon oc yul skꞌabꞌ ebꞌ Amorreo tiꞌ yet chi cu sqꞌueyon el ebꞌ, yuxan jaxca tuꞌ jix jon ja wute? Yel xacꞌal mi watxꞌ, ta jix cu cancan bꞌey skꞌaxepal ecꞌtoj jaꞌ Jordán tuꞌ.

8 —Aay, jaach Kaawil, ¿tzet to wal chi wute walon an? Ilaꞌ tuxa jix eyqꞌuey ebꞌ ja conobꞌ tiꞌ yu ebꞌ cu cajat tiꞌ jon. 9 Masanil mi ebꞌ Cananeo, yetoj masanil ebꞌ ánima caan bꞌey wanojxa conobꞌ tiꞌ, oj yabꞌoc ebꞌ tzet jix yun yeyqꞌuey ebꞌ ja conobꞌ tiꞌ, jaxam wal syambꞌan oc sbꞌa ebꞌ tuꞌ, catuꞌ chi tit ebꞌ kin jon, cꞌamxam bꞌey oj bꞌina can ecꞌ niꞌoj cu bꞌi jon. Ta jaxca tuꞌ chi yunne, ¿tzet to wal oj yun sbꞌinale ja bꞌi tol miman yeloc apnoj? ẍi naj Josué.

10 Catuꞌ jix takꞌwi Jehová tet naj Josué jaxca tiꞌ:

—Aan waanoj, ¿tzet yuxan noan jaach ey sat txꞌotxꞌ tuꞌ? 11 Jaꞌ ebꞌ ja wet Israelal tiꞌ jix oc spenail ebꞌ, yutol ma sjije ebꞌ tzet jix walaꞌ. Jix yelkꞌanetej wan tzetyetal ebꞌ tol jix walaꞌ tol chi qꞌueyle el masanil. Jix yewan iꞌnetej ebꞌ, catuꞌ jix scꞌubꞌan a ebꞌ bꞌey scꞌuanbꞌal bꞌey eyecꞌoj. 12 Yu cꞌal jun tuꞌ yuxan ma skeꞌ je tecꞌbꞌan je bꞌa tet ebꞌ je cajat tuꞌ, ilaꞌ tol jix jex el tet ebꞌ. Yu tuꞌ xin, jaꞌ tinaniꞌ smoo tol jaex chex qꞌueyle el yu ebꞌ. Ta tol man oj je qꞌueyel masanil tzetyetal jix walaꞌ tol chi qꞌueyle eloj, caw yel manxa oj jin colwa je yetoj. 13 Jaꞌ tinaniꞌ xin, aan waanoj, al tet ebꞌ conobꞌ tiꞌ tol chi yakꞌ lista sbꞌa ebꞌ, catuꞌ chi sajbꞌanen sbꞌa ebꞌ masanil, yutol jaꞌ yet skꞌinibꞌ yecal, masanil ebꞌ chi jul jin sattaj, yutol jain Jehová je Diosal jin chi wal jaxca tiꞌ: Yutol jaꞌ je xol jaex Israel jex tiꞌ, ey tzet jix je yiꞌtej tol jix walaꞌ tol cꞌam che yiꞌtej, yuxan ta tol cꞌam chi iꞌle el jun tiꞌ je xol, caw yel manxa oj skeꞌ je tecꞌbꞌan je bꞌa sattaj ebꞌ je cajat tuꞌ. 14 Jaꞌ yet skꞌinibꞌ yecal, yin junjun icꞌaaleal chi yun je jul je txꞌoxon je bꞌa jin sattaj. Jaꞌ jun icꞌaaleal chin txꞌoxoc tuꞌ, jaꞌ xol jun tuꞌ chi oc jin sattaj yin junjun tujan, jaꞌ jun tujan chin txꞌoxoc tuꞌ, chi jul jin sattaj yin junjun, jaꞌ jun tujan chin txꞌoxoc tuꞌ, chi jul masanil ebꞌ winaj ey xol yin junjun jin sattaj. 15 Jaꞌ mactxequel chi ilcha el junoj tzetyetal yin, wan tol jix walaꞌ tol chi qꞌueyle eloj, jaꞌ jun tuꞌ chi makꞌle camoj, chi lawi tuꞌ chi nusle tzꞌaꞌ yetoj yuninal, yetoj cꞌal masanil tzetyetal ey tet, yutol cꞌam swatxꞌil wan tzetyetal jix yiꞌtej xol yet conobꞌ tuꞌ, yutol ma sjije wan bꞌey jix wakꞌcan jin tiꞌ ey jex, ẍi Jehová.

16 Jaxa yet junxa cꞌu, caw sebꞌ jix a waan naj Josué, jix yalon naj tol chi syambꞌa oc sbꞌa ebꞌ ánima yin junjun icꞌaaleal, yin eymanil jix xꞌoxoc Dios ebꞌ yicꞌaal Judá. 17 Jix yalon naj Josué tol yin junjunal chi yun xꞌoxon sbꞌa ebꞌ yicꞌaal Judá tuꞌ, jix xꞌoxon eltej sbꞌa ebꞌ yicꞌaal Zérah, catuꞌ jix xꞌoxon eltej sbꞌa ebꞌ yicꞌaal Zabdí. 18 Yin junjunal jix yun sjul ebꞌ sattaj naj Josué. Jaꞌ xol ebꞌ naj tuꞌ jix xꞌox eltej sbꞌa naj Acán scꞌaal Carmí, yitxiquin naj Zabdí scaabꞌ yitxiquin Zérah, xol ebꞌ yicꞌaal Judá.

19 Jix lawi tuꞌ jix yalon naj Josué tet naj Acán jaxca tiꞌ:

—Jaach jaxca tol wuninal ja weocoj, sattaj wal Jehová cu Diosal, catuꞌ cha walon eloj tzet jun spenail jix ja wun tuꞌ, cꞌam ojabꞌ cha webꞌa eloj, ẍi Josué tet naj.

20 Jix takꞌwi naj Acán tet naj Josué jaxca tiꞌ:

—Caw yel, jix oc jin penail sattaj Jehová cu Diosal. Ey ton tzetyetal jix welkꞌanetej an. 21 Jaꞌ xol masanil tzetyetal ey bꞌey conobꞌ Jericó tuꞌ, jix wiꞌtej jun an kꞌap titnaj bꞌey Babilonia caw wal watxꞌ yili, yetoj cꞌal pax 200 siclo chꞌen tumin plata, yetoj jun telan chꞌen oro 50 siclo yalil. Caw wal jix wiloc jin cꞌul yin, yuxan jix wiꞌtej. Jatuꞌ mujan eytoj wu bꞌey snan yul jin kꞌap na. Jaꞌ yalan jun kꞌap tuꞌ, jatuꞌ eeytoj chꞌen oro cꞌal chꞌen plata tuꞌ wu an, ẍi naj Acán.

22 Jix lawi tuꞌ xin, jix ẍejontoj jaywan ebꞌ winaj naj Josué yu stoo yilon ebꞌ bꞌey yul skꞌap na naj Acán tuꞌ, yin eymanil jix yun stoo ebꞌ naj yu yiꞌon atej ebꞌ wan tzetyetal tuꞌ. Jaꞌ bꞌey yalan tuꞌ, jatuꞌ eeytoj chꞌen oro cꞌal chꞌen plata tuꞌ yu naj Acán. 23 Jix yiꞌontej wan tzetyetal tuꞌ ebꞌ tet naj Josué cꞌal sattaj masanil ebꞌ Israel. Jix lawi tuꞌ, jix bꞌatxbꞌale ey sattaj Jehová. 24 Yet cꞌal jun txolan tuꞌ jix iꞌletoj naj Acán bꞌey jun acꞌal chi yij sbꞌi Acor, yetoj masanil tzetyetal jix yelkꞌanetej tuꞌ, yetoj cꞌal ebꞌ scꞌaal, ebꞌ scutzꞌin, cꞌal noꞌ wacax jobꞌbꞌil yu, noꞌ bꞌuru, noꞌ meꞌ, yetoj cꞌal skꞌap na, yetoj cꞌal masanil tzettaj yetal ey tet.

25 Jix yalon naj Josué tet naj Acán jaxca tiꞌ:

—¿Tzet wal yu, yuxan jix ja wiꞌtej jun syaꞌilal tiꞌ kibꞌan? Jaꞌ tinaniꞌ xin, ya ojabꞌ eytej syaꞌilal Jehová ja wibꞌan, ẍi.

Jix lawi yalon naj jaxca tuꞌ, catuꞌ jix oc ian masanil ebꞌ Israel yiꞌon a chꞌen chꞌen, catuꞌ jix kꞌojchꞌennele cam naj Acán yetoj yuninal yu ebꞌ. Jix lawi scam ebꞌ catuꞌ jix nusle tzꞌaꞌ naj yetoj masanil tzetyetal ey tet naj. 26 Jix lawi tuꞌ, jix sicꞌon can oc bꞌulan chꞌen chꞌen ebꞌ yibꞌan camom Acán; bꞌulan tocꞌal a wan chꞌen tuꞌ tinaniꞌ. Yuxan jaꞌ tinaniꞌ txꞌotxꞌ acꞌal Acor,^a sbꞌi jun acꞌal tuꞌ tinaniꞌ. Queytuꞌ jix yun yoc tucan sjowal scꞌul Jehová yibꞌan ebꞌ conobꞌ Israel.