Tzet Jix Yun Yoc Jowal Yin Conobꞌ Jericó
6
Jaꞌ conobꞌ Jericó caw wal watxꞌ yeoc smajil sicꞌlebꞌil, yutol caw chi xiw ebꞌ ánima tuꞌ tet ebꞌ conobꞌ Israel. Yutol cꞌam junoj mactxequel chi skeꞌ yeltej cꞌal yoctoj yul jun conobꞌ tuꞌ. 2 Yuxan jix yalon Jehová tet naj Josué jaxca tiꞌ: Jain, oj waoc conobꞌ Jericó tiꞌ yul ja kꞌabꞌ yetoj cꞌal sreyal ebꞌ soldado tol akꞌom jowal. 3 Je masanil jaex soldado Israel jex tiꞌ, junjun cꞌal cꞌu oj jex ecꞌ joyoyoj junel yin jun conobꞌ tiꞌ, wajebꞌ cꞌu oj je yun jaxca tuꞌ. 4 Jujwan ebꞌ yakꞌomal xaambꞌal chi bꞌabꞌi sattaj teꞌ Scaẍail Jin Wa Kꞌane, iꞌbꞌil oc scacho junjun ebꞌ. Jaꞌ yet sjuj cꞌual xin, jujel oj jex ecꞌ joyoyoj yinlaj conobꞌ tuꞌ, catuꞌ chi xuon noꞌ scacho ebꞌ iꞌbꞌil oc tuꞌ. 5 Jaꞌ yet oj je yabꞌeni, tol manxa oj oc tucan xuon noꞌ cacho ebꞌ tuꞌ, catuꞌ oj je yaon el je yaw yin ipeal; jaxa je yiloni, tol oj ey wejlabꞌoj smuroal jun conobꞌ tiꞌ. Jaꞌ yet jun txolan tuꞌ, junjun jex cꞌal chex octoj yul conobꞌ tuꞌ yetcꞌulal bꞌey ey jex ecꞌ tuꞌ, ẍi Jehová. 6 Catuꞌ jix awtele ebꞌ naj yakꞌomal xaambꞌal yu naj Josué, jix yalon tet ebꞌ jaxca tiꞌ: Iꞌwejtoj teꞌ Scaẍail Swa Kꞌane Jehová. Jujwan jex chex bꞌabꞌi sattaj teꞌ caẍa tuꞌ, che yiꞌontoj noꞌ je cacho junjun jex, ẍi naj Josué. 7 Jix yalon cꞌal pax naj tet ebꞌ conobꞌ jaxca tiꞌ: Asiꞌwej, chex ecꞌ joyoyoj juneloj yin jun conobꞌ tiꞌ. Bꞌabꞌel ojabꞌ stoo ebꞌ naj soldado akꞌom jowal sattaj teꞌ Scaẍail Swa Kꞌane Jehová, ẍi naj Josué.
8 Jix sjije masanil ebꞌ tzet jix yal naj Josué; jaꞌ ebꞌ jujwan yakꞌomal xaambꞌal tuꞌ, bꞌabꞌel ebꞌ naj sattaj teꞌ Scaẍail Swa Kꞌane Jehová, catuꞌ chi xuon cꞌal scacho ebꞌ sjujwanil, catuꞌ tzajan oc teꞌ caẍa tuꞌ yintaj ebꞌ. 9 Bꞌabꞌel stoo ebꞌ naj soldado akꞌom jowal sattaj ebꞌ yakꞌomal xaambꞌal tuꞌ; ey pax nanxa tujan ebꞌ naj soldado tzajan oc yintaj ebꞌ, jaꞌ ebꞌ yakꞌomal xaambꞌal jix oc cꞌal ian xuon noꞌ cacho ebꞌ. 10 Jix yalon naj Josué tet masanil ebꞌ conobꞌ Israel, tol cꞌam ojabꞌ junoj ebꞌ chi el yaw tam wal skꞌanabꞌi, masantaꞌcꞌal jaꞌ naj chi aloni, catuꞌ chi a yaw masanil ebꞌ yin ipal.
Jix Eyqꞌuey Conobꞌ Jericó
11 Jix yalon naj Josué, tol chi ecꞌ joyoyoj juneloj ebꞌ yetoj teꞌ caẍa tuꞌ bꞌey yinlaj conobꞌ Jericó tuꞌ. Jix lawi tuꞌ, catuꞌ jix meltzotej naj yetoj masanil ebꞌ ánima bꞌey bꞌulan cꞌaltaꞌ ey ebꞌ tuꞌ. Jaꞌ tituꞌ jix ecꞌ akꞌbꞌal yu ebꞌ. 12 Jaxa yet junxa cꞌu, caw sebꞌ jix a waan naj Josué, catuꞌ jix yiꞌon a teꞌ Scaẍail Swa Kꞌane Jehová ebꞌ. 13 Bꞌabꞌel cꞌal stoo ebꞌ jujwan yakꞌomal xaambꞌal sattaj teꞌ caẍa tuꞌ. Jaꞌ yet tuꞌ, lalan cꞌal pax xuon scacho ebꞌ, jal ebꞌ naj soldado xin, ey ebꞌ bꞌabꞌel, ey pax ebꞌ tzajan oc yintaj ebꞌ. Jaꞌ snan ebꞌ tuꞌ, jatuꞌ eyoc teꞌ Scaẍail Swa Kꞌane Jehová, lalan cꞌal xuon scacho ebꞌ. 14 Jaꞌ yet scaabꞌ cꞌual tuꞌ, jix sjoyon sbꞌa ebꞌ yin conobꞌ Jericó. Jix lawi tuꞌ, jix meltzo pax toj ebꞌ bꞌey bꞌulan cꞌaltaꞌ ey ebꞌ tuꞌ. Quey cꞌal tuꞌ jix yute sbꞌa ebꞌ yin wajebꞌ cꞌual.
15 Jaꞌ yet sjuj cꞌual xin, caw sebꞌ jix a waan ebꞌ, catuꞌ jix too pax ebꞌ sjoyon sbꞌa yin conobꞌ tuꞌ junelxa. Jujel jix ecꞌ joyoyoj ebꞌ yet jun cꞌual tuꞌ. 16 Jaꞌ yet sjujelal tuꞌ, yet jix xuon scacho ebꞌ yakꞌomal xaambꞌal tuꞌ, jix yalon naj Josué tet masanil ebꞌ ánima jaxca tiꞌ: ¡Awej el je yaw yin ipeal! Tuxa jix yaoc Jehová jun conobꞌ tiꞌ yul cu kꞌabꞌ. 17 Tuxa jix yalaꞌ tol oj cu qꞌueywej el masanil ebꞌ ánima caan yul jun conobꞌ tiꞌ, yetoj cꞌal masanil tzetyetal, jaxca wal junoj xaambꞌal oj yun yakꞌle tet Jehová, asanxane ojabꞌ ix amul ix chi yij Rahab che colcan eloj yetoj cꞌal masanil mactxequel eyoctoj yul sna ix, yutol jaꞌ ix jix colwa yin ebꞌ naj jix cu chejtej jul ilon ecꞌ jun conobꞌ tiꞌ yet sbꞌabꞌelal. 18 Jal jex jaex tiꞌ xin, caw chi cam je yabꞌeni, cꞌam ojabꞌ che mitxꞌwej junoj tzetyetal ey tet ebꞌ ánima yul jun conobꞌ tiꞌ, cꞌam chi skeꞌ je yiꞌontoj cꞌal je mitxꞌoni, yutol jix yal Jehová tol chi qꞌueyle el masanil, ta che mitxꞌ junoj tzetyetal, oj tit sjowal scꞌul Jehová kibꞌan cu masanil je yetoj, catuꞌ chi jul junoj syaꞌtajilal kibꞌan. 19 Asan chꞌen oro, chꞌen plata, yetoj cꞌal tzetyetal tol bronce, cꞌal chꞌen hierro, jaꞌ wan tuꞌ chi oc can yetoj Jehová, catuꞌ che yaon cantoj yul scꞌuanbꞌal, ẍi naj Josué tet ebꞌ.
20 Jaꞌ yet jun txolan tuꞌ jix xuon noꞌ cacho ebꞌ yakꞌomal xaambꞌal tuꞌ, jix yabꞌen masanil ebꞌ conobꞌ Israel, catuꞌ jix yaon el yaw masanil ebꞌ yin ipal, catuꞌ jix cꞌoli yey wejlabꞌoj smuroal jun conobꞌ tuꞌ, eyman jix octoj ebꞌ yul conobꞌ tuꞌ, junjun cꞌal yetcꞌulal bꞌey eyecꞌ ebꞌ tuꞌ. 21 Catuꞌ jix makꞌle cam ebꞌ ánima eyecꞌ yul conobꞌ tuꞌ masanil, ebꞌ winaj, ebꞌ ix, cꞌal ebꞌ icham animaxa, cꞌal masanil ebꞌ unin, yetoj cꞌal pax noꞌ noꞌ, noꞌ wacax, noꞌ meꞌ, cꞌal noꞌ bꞌuru, masanil jix qꞌueyle eloj.
22 Jix yalon naj Josué tet cawan ebꞌ naj jix bꞌet ilon ecꞌ jun conobꞌ tuꞌ yet sbꞌabꞌelal: Asiꞌwej, catuꞌ che yiꞌon eltej ix amul ix yetoj masanil ebꞌ eyecꞌ scol sbꞌa bꞌey sna ix tuꞌ, jaxca jix yun je yakꞌon can je tiꞌ tet ix, ẍi naj tet ebꞌ. 23 Jix too cꞌal ebꞌ naj xin, catuꞌ jix bꞌet iꞌle eltej ix Rahab yul sna yu ebꞌ naj, yetoj cꞌal smam xutx ix, ebꞌ sno ix yetoj cꞌal masanil ebꞌ yican ix, jix iꞌletoj ebꞌ yu ebꞌ, bꞌey yinel eltoj bꞌey bꞌulan ey ebꞌ Israel tuꞌ. 24 Jix lawi tuꞌ, jix nusle can tzꞌaꞌ jun conobꞌ tuꞌ yu ebꞌ soldado tuꞌ, jix stzꞌaꞌtoj masanil tzetyetal. Asanxane chꞌen plata, chꞌen oro, chꞌen bronce, yetoj chꞌen hierro jix yiꞌtoj ebꞌ, catuꞌ jix scꞌubꞌan can a ebꞌ bꞌey cꞌuanbꞌal bꞌey scalubꞌal Jehová. 25 Jal ix Rahab tuꞌ xin, yetoj smam cꞌal txutx, yetoj ebꞌ yican, ma qꞌueyle el ebꞌ yu naj Josué, yutol jix colwa ix yin ebꞌ naj jix bꞌet ilon ecꞌ conobꞌ Jericó yet sbꞌabꞌelal. Queyton tuꞌ jix yun scancan yicꞌaal ix Rahab xol conobꞌ Israel masantaꞌcꞌal tinaniꞌ.
26 Jix lawi tuꞌ xin, catuꞌ jix yalon jun kꞌane naj Josué jaxca tiꞌ: Jaꞌ ojabꞌ sjowal scꞌul Dios chi tit can yibꞌan mactxequel chi scaꞌ waꞌnen a jun conobꞌ tiꞌ yet bꞌakꞌin. Tol ojabꞌ chi cam sbꞌabꞌel unin ebꞌ yet chi el yich yaon ey xeꞌ, jaꞌ yet chi oc smajil, tol ojabꞌ chi cam syaliẍ unin ebꞌ, ẍi naj Josué.
27 Caw wal jix colwa Jehová yetoj naj Josué, caw wal bꞌinabꞌil naj yu masanil ebꞌ ánima bꞌey junjun conobꞌ.