Scampamento Ebꞌ Israel Bꞌey Txꞌotxꞌ Guilgal
5
Masanil ebꞌ sreyal ebꞌ Amorreo caan bꞌey skꞌaxepal ecꞌtej jaꞌ Jordán yetcꞌulal bꞌey chi too cꞌu, yetoj cꞌal sreyal ebꞌ Cananeo caan bꞌey stiꞌ jaꞌ mar Mediterráneo, jix yabꞌ skꞌumal ebꞌ, tol ocnaj tucan jaꞌ Jordán yu Jehová yet jix ecꞌtoj ebꞌ Israel bꞌey chi ecꞌ eytoj jaꞌ jaꞌ tuꞌ. Yu jun tuꞌ caw jix xiw ebꞌ sicꞌlebꞌil, cꞌamxa junoj ebꞌ chi stecꞌbꞌa sbꞌa yeltoj yakꞌon jowal yin ebꞌ Israel tuꞌ.2 Jaꞌ yet jun tiempoal tuꞌ, jix yal Jehová tet naj Josué jaxca tiꞌ: Waꞌne jayebꞌoj chꞌen nawax, catuꞌ cha waloni tol chi akꞌle circuncidar*a ebꞌ ja wet conobꞌ, ẍi Dios tet naj Josué.
3 Jix swaꞌne jayebꞌ chꞌen nawax naj Josué tuꞌ, jix lawi tuꞌ jix akꞌle circuncidar masanil ebꞌ Israel yet eyecꞌ ebꞌ bꞌey txꞌotxꞌ tzalan Aralot. 4 Jix akꞌle circuncidar masanil ebꞌ winaj, yutol masanil ebꞌ naj stiempoal yoc yin soldadoal yet jix eltej ebꞌ bꞌey txꞌotxꞌ Egipto, masanil ebꞌ naj jix cam can ebꞌ naj bꞌey txꞌotxꞌ cusiltaj txꞌotxꞌ. 5 Yutol jaꞌ ebꞌ naj jix eltej bꞌey txꞌotxꞌ Egipto tuꞌ, akꞌbꞌil circuncidar ebꞌ naj masanil, jal ebꞌ naj jix ali bꞌey txꞌotxꞌ cusiltaj txꞌotxꞌ tuꞌ xin, man to akꞌbꞌil oj circuncidar ebꞌ naj. 6 Yutol cawinaj abꞌil jix ecꞌ ebꞌ conobꞌ Israel bꞌey txꞌotxꞌ cusiltaj txꞌotxꞌ, yuxan jaꞌ ebꞌ naj stiempoal wal yoc yin soldadoal yet tuꞌ, camnajxa ebꞌ naj, yutol ma sjije ebꞌ tzet jix yal Jehová. Yu cꞌal jun tuꞌ xin, yuxan jix yakꞌ can stiꞌ Jehová tol cꞌam junoj ebꞌ oj ilon oc yin txꞌotxꞌ txꞌotxꞌ tol albꞌilcan tet ebꞌ kichmam tol oj yakꞌ tet ebꞌ, txꞌotxꞌ caw ey syaxil sat. 7 Yu tuꞌ xin, jix akꞌle circuncidar ebꞌ yu naj Josué, jaꞌton scꞌaal ebꞌ naj camnajxa tuꞌ, cꞌam tocꞌal chi akꞌle circuncidar ebꞌ yutol eyoc ebꞌ yul bꞌe yet jix ali ebꞌ naj. 8 Jaꞌ yet jix lawi yakꞌle circuncidar ebꞌ naj, jix can ebꞌ naj bꞌey bꞌulan ey ebꞌ tuꞌ, masantaꞌcꞌal jix tajey bꞌey jix oc yechel smimanil ebꞌ naj tuꞌ. 9 Jix yalon Jehová tet naj Josué jaxca tiꞌ: Jaꞌ yetoj jun circuncisión chi oc yin ebꞌ tiꞌ, chi wiꞌ can el qꞌuixwanil tiꞌ je yin yet ey jex oc yin yakꞌomaloj servil bꞌey Egipto, ẍi Jehová. Yuxan, Guilgal,b jix yij can sbꞌi jun txꞌotxꞌ tuꞌ.
10 Jaꞌ yet bꞌulan ecꞌ ebꞌ Israel bꞌey txꞌotxꞌ Guilgal, yet 14 yoc jun bꞌabꞌel xꞌaaw yet yeycꞌualil, jix yaoc kꞌin Pascua ebꞌ bꞌey jun spananil sjobꞌeal ecꞌtej conobꞌ Jericó, jaꞌton jun xꞌaaw yet jix eltej ebꞌ bꞌey txꞌotxꞌ Egipto. 11 Jaꞌ yet junxa cꞌual tuꞌ, jaꞌ tzetyetal chi el bꞌey sat txꞌotxꞌ txꞌotxꞌ tuꞌ, jaꞌton jix sloꞌ ebꞌ, jaꞌton ixim pan cꞌam yich eeyoj, cꞌal ixim tiriw tucꞌal kꞌanbꞌinaj yul saam. 12 Jaꞌton yet jun tiempoal tuꞌ, jix oc tucan yey maná xol ebꞌ, yuxan cꞌamxa bꞌey jix sloꞌ maná ebꞌ Israel tuꞌ, jaꞌ yet tuꞌ jix el yich sloꞌon masanil tzetyetal chi el bꞌey txꞌotxꞌ Canaán tuꞌ ebꞌ.
Jix Yil Yin Naj Josué Jun Syaawil Ebꞌ Soldado Jehová
13 Jaꞌ yet eyto ecꞌ naj Josué bꞌey scawilal conobꞌ Jericó, jix yil yin jun soldado eyoc jun espada yul skꞌabꞌ, catuꞌ jix sjitzontoj sbꞌa Josué scawilal, jix skꞌanlen tet jaxca tiꞌ:
—¿Tumi ketoj ey jaach ocoj, ma tol yetoj ebꞌ cu cajat ey jaach ocoj? ẍi naj tet.
14 —Cꞌamaj, cꞌam mac yetoj ey jin ocoj, jain tiꞌ jix jin jul yu jin chejon ebꞌ soldado yet Dios, ẍi tet naj Josué.
Jaꞌ yet jix yalon jaxca tuꞌ, catuꞌ jix ey noan naj Josué sat txꞌotxꞌ, catuꞌ jix yalon tet jaxca tiꞌ:
—Jaach Waawil, tzet cha woche chi wun jain ja chejabꞌ jin tiꞌ. ¿Tzet chi yoche ja cꞌul chi wun tinaniꞌ? ẍi naj Josué. 15 Catuꞌ jix takꞌwi naj Syaawilal ebꞌ soldado Dios tet naj Josué jaxca tiꞌ:
—Iꞌeltej ja xanabꞌ tuꞌ, yutol jaꞌ jun txꞌotxꞌ bꞌey ey jaach ecꞌ tiꞌ, yet Jehová yeocoj, ẍi. Catuꞌ jix sjijen naj Josué tzet jix al-le tet.