4 Jix lawi cꞌal tuꞌ xin, jix yawten naj Josué lacawan ebꞌ winaj jix sicꞌ el tuꞌ. 5 Jix yalon naj tet ebꞌ: Eyanwejtoj bꞌey snan yul jaꞌ jaꞌ tuꞌ, catuꞌ chex apni oc sattaj teꞌ Scaẍail Swa Kꞌane Jehová cu Diosal, junjun jex cꞌal che yiꞌatej junjunoj chꞌen chꞌen, che yiꞌontej chꞌen sjolom je xicꞌ, jun yin junjun icꞌaaleal, yet watxꞌ lacawebꞌ chi yun sbꞌisil chꞌen. 6 Jaꞌ chꞌen oj oc can yin txꞌoxbꞌanileal cꞌal yin je naꞌletej jaex tiꞌ yet bꞌakꞌin, jaxa yet oj skꞌanle ebꞌ je yuninal yet bꞌakꞌin ey jex: ¿Tzet chi yal yeloc apnoj wan chꞌen chꞌen tiꞌ? ta ẍi ebꞌ ey jex, 7 catuꞌ oj je yalon tet ebꞌ jaxca tiꞌ: Jaꞌ tzet chi xꞌoxtej wan chꞌen chꞌen tiꞌ, tol jaꞌ yet jix kꞌaxbꞌo ecꞌtej ebꞌ yakꞌomal xaambꞌal yetoj teꞌ Scaẍail Swa Kꞌane Jehová, catuꞌ jix spoꞌon sbꞌa jaꞌ Jordán sattaj teꞌ Scaẍail Swa Kꞌane Dios. Yuxan jaꞌ chꞌen chꞌen tiꞌ chi yakꞌ chꞌen cu naꞌtej yin tzet yunnaj yet jun tiempoal tuꞌ kin jaon Israel jon tiꞌ, je chi tet ebꞌ, ẍi naj Josué tet ebꞌ.

8 Jix sjije ebꞌ yunen tzet jix yal naj Josué tuꞌ. Jix eytoj ebꞌ yiꞌon atej junjun chꞌen bꞌey yul sbꞌe jaꞌ Jordán tuꞌ, junjun chꞌen yin junjun icꞌaaleal xol ebꞌ Israel, catuꞌ jix yiꞌontoj chꞌen chꞌen ebꞌ bꞌey bꞌulan ey ebꞌ ánima tuꞌ, jix syambꞌa oc bꞌulan chꞌen ebꞌ jaxca jix yute yalon Jehová tet naj Josué. 9 Jix yalon naj Josué tol chi yambꞌale oc bꞌulan lacawebꞌxa chꞌen chꞌen bꞌey yul sbꞌe jaꞌ Jordán tuꞌ bꞌey jix oc linan ebꞌ naj yakꞌomal xaambꞌal yetoj teꞌ Scaẍail Swa Kꞌane Dios tuꞌ, bꞌulan tocꞌal ey chꞌen chꞌen tuꞌ tinaniꞌ.

10-13 Jaꞌ yet linan to oc ebꞌ naj yakꞌomal xaambꞌal bꞌey snan jaꞌ Jordán tuꞌ, jix sjije cꞌal ebꞌ Israel tzet jix yal naj Josué, jaxca jix yun yalon Jehová. Masanil jix yiꞌ sbꞌa jaxca jix yun yalon can naj Moisés tet naj Josué tuꞌ. Jix ecꞌtoj ebꞌ naj soldado ebꞌ yicꞌaal Rubén, cꞌal ebꞌ yet Gad, yetoj ebꞌ yet Manasés, iꞌbꞌil oc smitxꞌkꞌabꞌ yet jowal ebꞌ, catuꞌ jix bꞌabꞌi ebꞌ sattaj ebꞌ conobꞌ jaxca jix yun yalon can naj Moisés. Ey mi junoj 40,000 ebꞌ naj jix bꞌabꞌi sattaj ebꞌ sconobꞌ Jehová, catuꞌ jix apni oc bꞌulan ebꞌ ánima tuꞌ masanil bꞌey jun acꞌal sattaj ecꞌtej conobꞌ Jericó. Yin xacꞌal eymanil jix yun yecꞌtoj ebꞌ conobꞌ Israel tuꞌ. Jaꞌ yet jix ecꞌ cantoj ebꞌ ánima tuꞌ masanil, catuꞌ jix ecꞌtoj ebꞌ yakꞌomal xaambꞌal yetoj teꞌ Scaẍail Swa Kꞌane Jehová tuꞌ. Jix lawi tuꞌ xin, catuꞌ jix bꞌabꞌi ebꞌ sattaj masanil ebꞌ ánima. 14 Jaꞌ yet jun cꞌual tuꞌ, jix yakꞌ Jehová iꞌle a can sjelanil naj Josué yu ebꞌ yet conobꞌ Israel, tol caw miman yeloc apnoj naj yul sat ebꞌ masantaꞌcꞌal jix cam naj Josué tuꞌ, jaxca jix yun sjijen ebꞌ tet naj Moisés.

15 Jaꞌ yet jix lawi yecꞌ cantoj ebꞌ conobꞌ bꞌey yul jaꞌ Jordán tuꞌ, jix yalon Jehová tet naj Josué jaxca tiꞌ: 16 Al tet ebꞌ yakꞌomal xaambꞌal inen oc teꞌ Scaẍail Swa Kꞌane Dios, tol chi ecꞌtej ebꞌ bꞌey yul jaꞌ jaꞌ tuꞌ, ẍi Jehová.

17 Jix yalon naj Josué tet ebꞌ, tol chi atej ebꞌ yul sbꞌe jaꞌ jaꞌ tuꞌ. 18 Jix cꞌal atej ebꞌ yul jaꞌ tuꞌ xin, catuꞌ jix eyol secna jaꞌ majan can oc bꞌey yibꞌan atoj tuꞌ, caw jix malel jaꞌ yul sbꞌe jaxca cꞌaltaꞌ chi yun sbꞌey jaꞌ. 19 Jaꞌ yet jix ecꞌtoj ebꞌ conobꞌ Israel yul jaꞌ Jordán tuꞌ, jaꞌton yet laonebꞌ yoc bꞌabꞌel xꞌaaw, catuꞌ jix apni oc ebꞌ bꞌey txꞌotxꞌ Guilgal, sattaj ecꞌtej conobꞌ Jericó yetcꞌulal bꞌey chi aol cꞌu. 20 Jaꞌ tituꞌ jix syambꞌa ey bꞌulan lacawebꞌ chꞌen chꞌen ebꞌ jix yiꞌatej ebꞌ bꞌey yul jaꞌ Jordán tuꞌ. 21 Jix yalon naj Josué tet ebꞌ yet conobꞌ jaxca tiꞌ: Ta ey bꞌakꞌin oj skꞌanle ebꞌ je yuninal ey jex: ¿Tzet chi yal yeloc apnoj wan chꞌen chꞌen tiꞌ? ta ẍi ebꞌ, 22 che yalon tet ebꞌ, yutol ecꞌnaj jontej yul sbꞌe jaꞌ Jordán tiꞌ yin tajin txꞌotxꞌal, 23 yet jix spoꞌon sbꞌa jaꞌ, yutol jaꞌ Jehová cu Diosal jix aloni, yutol tajin txꞌotxꞌ yili yet jix cu ecꞌtej tuꞌ, jaxca jix yun spoꞌon sbꞌa jaꞌ Cajin Mar yu Jehová yet jix cu eltej bꞌey txꞌotxꞌ Egipto. 24 Queytuꞌ oj yun yotajne el masanil ebꞌ ánima ey bꞌey yul yibꞌankꞌinal tiꞌ, tol miman yeoc yipalil Jehová cu Diosal. Yu tuꞌ xin, miman ojabꞌ yeloc apnoj Jehová yul je sat yin tobꞌalkꞌinal, je chi tet ebꞌ, ẍi naj Josué.