4 Bꞌabꞌel jix chaꞌlo sicꞌle el yet ebꞌ yicꞌaal naj Quehat, jaꞌton ebꞌ yakꞌomal xaambꞌal xol ebꞌ yet Aarón. Ey oxlajonebꞌ wan conobꞌ jix akꞌle tet ebꞌ, jaꞌton wan conobꞌ ey yul yet ebꞌ yicꞌaal Judá, Simeón cꞌal Benjamín. 5 Jacꞌalaꞌ wanxa ebꞌ yicꞌaal naj Quehat, jix akꞌle junxa laonebꞌ conobꞌ ey yul yet ebꞌ yicꞌaal Efraín tet ebꞌ, cꞌal yet Dan yetoj nanxa tujan ebꞌ yicꞌaal Manasés.

6 Jaꞌ yet jix lawi jun tuꞌ xin, jix akꞌle smajul txꞌotxꞌ wanxa ebꞌ Levita titnaj yicꞌaal yin Guersón. Jaꞌ ebꞌ jix chaꞌlo smajon can oc oxlajonebꞌxa conobꞌ ey yul yet ebꞌ yicꞌaal Isacar, yetoj Aser, yetoj yet Neftalí, yetoj cꞌal nanxa yet ebꞌ yet Manasés eyecꞌ bꞌey Basán. 7 Jix lawi tuꞌ, jix akꞌle pax yet wanxa ebꞌ yicꞌaal Leví, ebꞌ titnaj yin yicꞌaal Merarí, jaꞌ ebꞌ jix iꞌon can oc lacawebꞌ conobꞌ, ey yul yet ebꞌ yicꞌaal Rubén, Gad cꞌal Zabulón.

8 Jaxca wal jix yun yalon can Jehová tet naj Moisés, queytuꞌ jix ẍaꞌlo sicꞌcha el wan conobꞌ tuꞌ yu ebꞌ Israel, cꞌal txꞌotxꞌ bꞌey chi low noꞌ sjobꞌbꞌeal noꞌ ebꞌ yicꞌaal Leví. 9 Jaꞌ wan conobꞌ chi bꞌina sbꞌi tiꞌ, jatuꞌ ey yul smajul txꞌotxꞌ ebꞌ yicꞌaal Judá cꞌal ebꞌ yicꞌaal Simeón. 10 Jaꞌ ebꞌ Levita jix chaꞌlo bꞌabꞌi ẍaꞌon xꞌotxꞌ ebꞌ, jaꞌton ebꞌ titnaj yin yicꞌaal naj Quehat, naj smam icham naj Aarón. 11 Jaꞌ txꞌotxꞌ Quiriat-arbá bꞌey tzalquiltaj txꞌotxꞌ yul yet Judá jix akꞌle tet ebꞌ, yetoj cꞌal txꞌotxꞌ bꞌey watxꞌ slow noꞌ sjobꞌbꞌeal noꞌ ebꞌ. Jaꞌ Quiriat-arbá tuꞌ, jaꞌ chi yij cꞌal pax Hebrón, (yichmam naj miman steel chi yij Anac yeoc naj Arbá tuꞌ). 12 Jaꞌ masanil txꞌotxꞌ majbꞌil a yu jun conobꞌ tuꞌ yetoj cꞌal yaldeail, akꞌbꞌil xa tet naj Caleb, scꞌaal Jefuné.

13 Jaꞌ Hebrón tuꞌ, jaꞌton junoj wan conobꞌ bꞌey chi scol sbꞌa ebꞌ chi makꞌwi cam ánima. Jaꞌ xol ebꞌ yicꞌaal Aarón jix yiꞌ cꞌal pax oc wanxa conobꞌ ebꞌ, jaꞌton: Libná, 14 Jatir, Estemoa, 15 Holón, Debir, 16 Ain, Jutá, cꞌal Bet-semes. Jaꞌton bꞌalonebꞌ conobꞌ tiꞌ; junjun cꞌal wan conobꞌ tuꞌ ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ. 17 Jaxa yul yet txꞌotxꞌ yet ebꞌ yicꞌaal Benjamín xin, jix akꞌle conobꞌ Gabaón tet ebꞌ yetoj conobꞌ Guibeá, 18 Anatot, cꞌal Almón, jaꞌton canebꞌ conobꞌ tiꞌ, junjun cꞌal wan conobꞌ tuꞌ ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ. 19 Yuxan jaꞌ wan conobꞌ tuꞌ jix yiꞌcan oc ebꞌ yakꞌomal xaambꞌal, jaꞌton ebꞌ yicꞌaal Aarón, ey oxlajonebꞌ conobꞌ yin masanil. Junjun cꞌal wan conobꞌ tuꞌ, ey cꞌal bꞌey chi skeꞌ slow sjobꞌbꞌeal noꞌ ebꞌ.

20 Jal wanxa ebꞌ Levita yicꞌaal naj Quehat xin, jix akꞌle wanxa conobꞌ tet ebꞌ, wan txꞌotxꞌ majbꞌil oc yu ebꞌ yicꞌaal Efraín. 21 Jaꞌ txꞌotxꞌ Siquem bꞌey tzalquiltaj txꞌotxꞌ yul yet Efraín jix akꞌle tet ebꞌ, jaꞌton jun conobꞌ bꞌey chi skeꞌ scolon sbꞌa ebꞌ chi makꞌwi cam ánima. Jix akꞌle cꞌal pax txꞌotxꞌ Guézer, 22 Quibsaim, yetoj cꞌal Bet-horón, ey canebꞌ conobꞌal; junjun cꞌal wan conobꞌ tuꞌ ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ. 23 Jal pax ebꞌ yicꞌaal Dan xin, jix yiꞌ cꞌal pax oc conobꞌ Eltequé ebꞌ, cꞌal Guibetón, 24 Aialón, cꞌal Gat-rimón, chi yal yeloc apnoj ey canebꞌ conobꞌ, junjun cꞌal wan conobꞌ tuꞌ ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ. 25 Jal nanxa tujan ebꞌ yicꞌaal Manasés xin, ey caabꞌ tujan conobꞌ jix yiꞌcan oc ebꞌ, jaꞌton Taanac, yetoj Gat-rimón, ey cꞌal bꞌey chi low noꞌ sjobꞌbꞌeal noꞌ ebꞌ. 26 Yu tuꞌ xin, ey laonebꞌ conobꞌ jix ẍaꞌ ebꞌ yicꞌaal Quehat, jatacꞌalaꞌ jayebꞌ tujan yeoc ebꞌ. Junjun cꞌal wan conobꞌ tuꞌ ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ.

27 Jal pax ebꞌ Levita yicꞌaal Guersón xin, ey caabꞌ tujan conobꞌ jix akꞌle tet ebꞌ, jatuꞌ ey txꞌotxꞌ yul yet ebꞌ yicꞌaal Manasés. Jaꞌ wan conobꞌ tuꞌ, ey cꞌal bꞌey chi low noꞌ sjobꞌbꞌeal noꞌ ebꞌ, jaꞌton Golán, ey yul yet Basán, bꞌey chi scol sbꞌa ebꞌ chi makꞌwi cam ánima, cꞌal yetoj Beesterá. 28 Jaxa bꞌey txꞌotxꞌ yet ebꞌ yicꞌaal Isacar jix akꞌle conobꞌ Quisión, Daberat, 29 Jarmut, yetoj cꞌal En-ganim. Ey canebꞌ conobꞌ, junjun cꞌal wan conobꞌ tuꞌ ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ. 30 Jaxa yin txꞌotxꞌ yet ebꞌ yicꞌaal Aser, jix akꞌle conobꞌ Misal, Abdón, 31 Helcat, cꞌal Rehob tet ebꞌ. Ey canebꞌ conobꞌ, junjun cꞌal wan conobꞌ tuꞌ ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ. 32 Jaxa yul txꞌotxꞌ yet ebꞌ yicꞌaal Neftalí, jix akꞌle can oxebꞌ conobꞌ tet ebꞌ, yetoj cꞌal txꞌotxꞌ bꞌey chi skeꞌ slow noꞌ noꞌ, jaꞌton Quedes, bꞌey yul yet Galilea, bꞌey chi skeꞌ scolon sbꞌa ebꞌ chi makꞌwi cam ánima. Jix akꞌle cꞌal pax Hamot-dor, cꞌal Cartán tet ebꞌ. 33 Yu tuꞌ xin, ey oxlajonebꞌ tujan wan conobꞌ tuꞌ jix yiꞌcan oc ebꞌ Gersonita. Junjun cꞌal wan conobꞌ tuꞌ ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ.

34 Eyto ebꞌ Levita jix cancanoj, jaꞌton ebꞌ yicꞌaal Merarí. Jix akꞌle smajul txꞌotxꞌ ebꞌ, bꞌey yet ebꞌ yicꞌaal Zabulón, jaꞌton Jocneam, Cartá, 35 Dimná cꞌal Nahalal. Ey canebꞌ conobꞌ, junjun cꞌal wan conobꞌ tuꞌ ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ. 36 Jaxa yul txꞌotxꞌ yet ebꞌ yicꞌaal Rubén jix akꞌle conobꞌ Béser, Jahas, 37 Cademot, yetoj cꞌal Mefáat. Ey canebꞌ conobꞌ, junjun cꞌal wan conobꞌ tuꞌ ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ. 38 Jaxa yul txꞌotxꞌ yet ebꞌ yicꞌaal Gad jix akꞌle can conobꞌ Ramot, yul yet Galaad bꞌey chi skeꞌ scolon sbꞌa ebꞌ chi makꞌwi cam ánima. Jix akꞌle cꞌal pax txꞌotxꞌ conobꞌ Mahanaim, 39 Hesbón cꞌal Jazer tet ebꞌ. Ey canebꞌ conobꞌ, junjun cꞌal wan conobꞌ tuꞌ ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ. 40 Yu tuꞌ xin, ey lacawebꞌ tujan wan conobꞌ tuꞌ jix yiꞌcan oc ebꞌ yicꞌaal Merarí, yicꞌaal pax cꞌal Leví ebꞌ, jatacꞌalaꞌ jayebꞌ tujan yeoc sbꞌisil ebꞌ.

41-42 Jaꞌ wan conobꞌ jix yiꞌcan oc ebꞌ Levita bꞌey sat xꞌotxꞌ ebꞌ Israel majbꞌil can a yu tuꞌ, ey 48 yin masanil, junjun cꞌal wan conobꞌ tuꞌ, ey cꞌal bꞌey chi skeꞌ slow noꞌ sjobꞌbꞌeal noꞌ ebꞌ.

43 Jaxca tuꞌ jix yun yakꞌle txꞌotxꞌ txꞌotxꞌ yu Jehová tet ebꞌ Israel, jaꞌton masanil txꞌotxꞌ bꞌey jix yakꞌ can stiꞌ yakꞌon can tet yichmam ebꞌ. Jix smajcan oc txꞌotxꞌ ebꞌ, catuꞌ jix caey cꞌal ecꞌ ebꞌ tituꞌ. 44 Jix el cꞌal oc jaxca jix yun yakꞌon can stiꞌ Jehová tet ebꞌ, jix yakꞌon swatxꞌcꞌulal Dios yibꞌan masanil wan conobꞌ tuꞌ. Cꞌamxa cꞌal junoj scajat ebꞌ jix stecꞌbꞌa sbꞌa yakꞌon jowal yetoj ebꞌ, yutol jaꞌ Dios jix aon oc ebꞌ yul skꞌabꞌ ebꞌ Israel. 45 Masanil cꞌal bꞌey jix yakꞌ can stiꞌ Jehová tet ebꞌ conobꞌ Israel, jix cꞌal yunne, cꞌam cꞌal junojxa bꞌelan kꞌane ma yunne.