Jix Meltzo Ebꞌ Yicꞌaal Rubén, Gad Yetoj Nanxa Tujan Ebꞌ Yet Manasés
22
Jix lawi tuꞌ xin, jix awtele ebꞌ yicꞌaal naj Rubén, cꞌal ebꞌ yicꞌaal Gad yu naj Josué, yetoj nanxa tujan ebꞌ yicꞌaal Manasés. 2 Jix yalon tet ebꞌ jaxca tiꞌ: Jaex tiꞌ, caw jix je jije jantaj tzet jix yal can naj Moisés, yetoj cꞌal jantaj tzet jix wal ey jex an. 3 Masanil cꞌal yet yalantoj yetoj cꞌal tinaniꞌ, cꞌam bꞌey jix je bꞌejcan ebꞌ je yet conobꞌ tiꞌ xꞌojli, caw watxꞌ cꞌal jix yun je jijen ẍejbꞌanil Jehová cu Diosal. 4 Jaꞌ tinaniꞌ xin, tuxa jix yakꞌ eloc bꞌey jix yakꞌ can stiꞌ Jehová ey jon, yutol masanil ebꞌ ket conobꞌ tiꞌ ey tzalacꞌulal snan xol ebꞌ. Yu tuꞌ xin, jaꞌ tinaniꞌ, asiꞌwej, paxanwejtoj bꞌey txꞌotxꞌ je txꞌotxꞌ bꞌey skꞌaxepal ecꞌtoj jaꞌ Jordán, txꞌotxꞌ akꞌbꞌil can ey jex yu Moisés, naj ẍejabꞌ Jehová. 5 Asan jun chi cam walontoj ey jex an, cꞌam ojabꞌ bꞌakꞌin chi too qꞌueycꞌulal wan ley, cꞌal wan chejbꞌanile jix yal can naj Moisés ey jex, jaꞌton wan ẍejbꞌanil Dios. Caw che camcꞌulne cꞌal Jehová cu Diosal, che bꞌeybꞌalne sbꞌeybꞌal, che jijen ẍejbꞌanil yetoj masanil je cꞌul, yetoj cꞌal masanil je naꞌbꞌal, ẍi naj tet ebꞌ.6-9 Jix lawi tuꞌ xin, jix yalon watxꞌ kꞌane naj Josué yibꞌan ebꞌ jaxca tiꞌ: Jaex tiꞌ, paxanwejtoj bꞌey je txꞌotxꞌ, yetoj mimej bꞌeomal, yetoj cꞌal miman sbꞌisil noꞌ je jobꞌbꞌeal noꞌ, yetoj mimanoj chꞌen oro, chꞌen plata, chꞌen bronce yetoj cꞌal chꞌen hierro, yetoj cꞌal pax mimanoj an je pichil. Yetoj masanil wan jix je yiꞌecꞌ tet ebꞌ je cajat tuꞌ, che poꞌonwej ecꞌ masanil je xol, yetoj masanil ebꞌ ey can tituꞌ, ẍi naj tet ebꞌ. Jix lawi stakꞌelen can sbꞌa yetoj ebꞌ, catuꞌ jix too ebꞌ bꞌey sconobꞌ tuꞌ.
Akꞌbꞌil xꞌotxꞌ nan tujan ebꞌ yicꞌaal Manasés yu naj Moisés bꞌey yul yet txꞌotxꞌ Basán. Jaxa nanxa ebꞌ yicꞌaal Manasés xin, jaxa naj Josué jix akꞌon xꞌotxꞌ ebꞌ yetoj ebꞌ yet Israelal yetcꞌulal bꞌey chi too cꞌu bꞌey jaꞌ Jordán. Jix lawi tuꞌ, jix meltzo ebꞌ yicꞌaal Rubén, ebꞌ yicꞌaal Gad, cꞌal yetoj nan tujan ebꞌ yicꞌaal Manasés. Jix spoꞌon el sbꞌa ebꞌ xol ebꞌ Israel tuꞌ bꞌey txꞌotxꞌ Siló, bꞌey yul yet Canaán, catuꞌ jix meltzotoj ebꞌ bꞌey sattaj yul yet Galaad. Jaꞌ tituꞌ ey xꞌotxꞌ ebꞌ, jaxca cꞌal jix yun yalon can naj Moisés tet ebꞌ, jaxca jix yun yalon can Jehová.
Jun Yet Xaambꞌal Bꞌey Stiꞌ Jaꞌ Miman Jordán
10 Jaꞌ yet jix apni oc ebꞌ yicꞌaal Rubén, ebꞌ yicꞌaal Gad yetoj nanxa tujan ebꞌ yicꞌaal Manasés bꞌey stiꞌ jaꞌ miman Jordán yul yet txꞌotxꞌ Canaán, catuꞌ jix swaꞌnen a jun yet xaambꞌal ebꞌ. 11 Jix apni oc skꞌumal jun tiꞌ tet wanxa ebꞌ Israel, tol jix swaꞌne a jun yet xaambꞌal ebꞌ bꞌey smoonal txꞌotxꞌ Canaán bꞌey yetcꞌulal eytoj jaꞌ Jordán. 12 Jaꞌ yet jix yabꞌen ebꞌ jaxca tuꞌ, jix syambꞌa oc sbꞌa masanil ebꞌ bꞌey conobꞌ Siló, yet chi too ebꞌ yakꞌon jowal yetoj ebꞌ tituꞌ. 13 Jix chejletoj naj Finees, scꞌaal naj Eleazar naj yakꞌomal xaambꞌal, yet chi too kꞌanabꞌ yetoj ebꞌ yicꞌaal Rubén, ebꞌ yicꞌaal Gad, yetoj cꞌal nan tujan ebꞌ yicꞌaal Manasés bꞌey Galaad. 14 Jix too laonwan ebꞌ yaaw yeoc xol ebꞌ Israel yetoj naj, junjun cꞌal ebꞌ tuꞌ, yaaw yeoc ebꞌ xol junjun icꞌaaleal.
15 Masanil ebꞌ tuꞌ jix too tacꞌal ebꞌ bꞌey Galaad, bꞌey eyecꞌ ebꞌ nan yox icꞌaaleal tuꞌ, jix yalon ebꞌ jaxca tiꞌ:
16 —Jaon tiꞌ, chi jul kal tzet jix yal ebꞌ sconobꞌ Jehová. ¿Tzetyetal jun man watxꞌoj jix je yun yin Jehová cu Diosal tiꞌ? ¿Tzet yu, yuxan che yintajne el Naj, catuꞌ jix je waꞌnen a jun yet xaambꞌal yu je yakꞌon penacꞌulal yin cu Diosal? 17 Tumi cꞌam che naꞌtej jun spenail jix oc bꞌey txꞌotxꞌ Peor, tol eyto cꞌal ecꞌ kin tinaniꞌ. Yu cꞌal jun tuꞌ, yuxan ecꞌal ebꞌ ket conobꞌ jix cami. 18 ¿Tumi cꞌamxa cꞌal che naꞌtej niꞌoj jun tuꞌ jaex tiꞌ, tinaniꞌ jix je bꞌejcan Jehová? Ta tol che yun cꞌal jun spenail tuꞌ sattaj Naj tinaniꞌ, jaxa yet yecal chi tit sjowal scꞌul Naj kin cu masanil je yetoj. 19 Ta tol che naꞌ tol cꞌam chi skeꞌ je yoc eyilal tet cu Diosal bꞌey jun txꞌotxꞌ bꞌey ey jex ecꞌ tiꞌ, toonwej ketoj bꞌey txꞌotxꞌ tol asanne Jehová ey yet bꞌey eyecꞌ Snail Swa Kꞌane Jehová,* catuꞌ che seyon bꞌey chex can ketoj jon. Cꞌam ojabꞌ che yun jun spenail tiꞌ sattaj Dios. Ta che yiꞌel je naꞌbꞌal yin Naj, chi cu tzaji cꞌal pax toj je yetoj jon. Yu tuꞌ xin, cꞌam ojabꞌxa che waꞌne a junojxa yet xaambꞌal yintaj jun yet Jehová cu Diosal tuꞌ. 20 Naꞌwejtej tzet jix yun yeloc naj Acán scꞌaal Zérah, jix oc spenail naj yin wan tzetyetal tol tꞌinan cꞌaltaꞌ sqꞌueyle eloj. Yu cꞌal wal jun tuꞌ jix tit sjowal Jehová kin cu masanil. ¡Tumi asanne naj Acán jix cam yu spenail jix oc tuꞌ! ẍi ebꞌ tet ebꞌ.
21 Jix lawi tuꞌ, catuꞌ jix takꞌwi ebꞌ yicꞌaal Rubén, ebꞌ yicꞌaal Gad yetoj nanxa tujan ebꞌ yet Manasés tet ebꞌ yaaw yeoc xol ebꞌ yet Israelal jaxca tiꞌ:
22 —Jaꞌ Jehová Naj Chi Skeꞌ Yu Masanil, yotaj Naj sicꞌlebꞌil, tol man yu oj cu poꞌon el cu bꞌa, man yu oj kiꞌon el cu naꞌbꞌal yin Naj yuxan jix cu waꞌne a jun yet xaambꞌal tiꞌ jon. Caw yotaj Naj yeoc jun tiꞌ, oj yakꞌ cꞌal pax Naj je yotajne el jaex tiꞌ, ta jaꞌ yu kunen junoj spenail yin Naj yuxan jix cu waꞌne jun tiꞌ jon, cꞌam ojabꞌ che yakꞌ mimancꞌulal kin jon. 23 Ta yu cu poꞌon el cu bꞌa yintaj Jehová, yuxan jix cu waꞌne a jun yet xaambꞌal tiꞌ, ma yu kakꞌon tzꞌaꞌ cu xaambꞌal, ma cu saꞌbꞌeal chi kakꞌ yin ixim tiriw, ma wanojxa xaambꞌal yet watxꞌcꞌulal, jaꞌ ojabꞌ Naj oj akꞌon sowalil ey jon. 24 Caw man jaxca oj tuꞌ, jaꞌ jun tiꞌ jix cu waꞌne a jon, yutol cꞌam chi yoche cu cꞌul chi yal ebꞌ je yuninal tet ebꞌ kuninal yet bꞌakꞌin: ¿Cꞌam je yalon je yet yin Jehová cu Diosal jaon Israel jon tiꞌ? 25 Yutol jaꞌ Jehová jix akꞌon can jaꞌ Jordán tiꞌ cu nan cu xol je yetoj, jaex yicꞌaal jex Rubén tiꞌ, cꞌal jex yet Gad. Yuxan cꞌam je yalon je yet yin Jehová, ẍi tala ebꞌ. Yuxan, tala cꞌuxan chi yal ebꞌ je yuninal yin ebꞌ kuninal yet bꞌakꞌin tuꞌ. Ta jaxca tuꞌ cꞌamxam yeloc apnoj Jehová yul sat ebꞌ kuninal tuꞌ, chi yal tuꞌ. 26 Yu jun tuꞌ, jix cu naꞌ yibꞌan jon, yuxan jix cu waꞌne a jun yet xaambꞌal tiꞌ, man yu oj kakꞌon tzꞌaꞌ xaambꞌal cꞌal kakꞌon wanxa xaambꞌal tet Jehová cu Diosal. 27 Yuxan jaxca junoj txꞌoxbꞌanile chi yun can jun tiꞌ cu nan cu xol je yetoj, cꞌal snan xol ebꞌ kuninal yet bꞌakꞌin, yet watxꞌ, jaon tiꞌ chi skeꞌ cꞌal pax kakꞌon servil Jehová, cꞌal koc sattaj Naj yin kakꞌon tzꞌaꞌ cu xaambꞌal, cꞌal cu xaambꞌal yu cu penail, yetoj cꞌal xaambꞌal yet chi oc watxꞌcꞌulal nan cu xol yetoj Naj. Yu jun tuꞌ xin, jaꞌ ebꞌ je yicꞌaal jaex tiꞌ, cꞌam chi skeꞌ yalon ebꞌ tet ebꞌ kuninal jaon tiꞌ jon: Jaex tiꞌ, cꞌam je yalon je yet yin Jehová, man ẍi oj ebꞌ. 28 Yuxan jix cu naꞌ jon, tala cꞌuxan ey mactxequel chi alon ey jon jaxca tuꞌ ma tet ebꞌ kicꞌaal jon, yuxan jaon tiꞌ chi skeꞌ cu takꞌwi tet ebꞌ jaxca tiꞌ: Ilwej ton abꞌi, jaꞌ ebꞌ kichmam jon jix swaꞌne a jun yet xaambꞌal ebꞌ tet Jehová, man yu oj yakꞌle tzꞌaꞌ xaambꞌal, ma junojxa tujan xaambꞌal, asan tol ey can oc yin txꞌoxbꞌanile cu nan cu xol je yetoj, cu chi tet ebꞌ jon. 29 Colwa ojabꞌ Jehová ketoj yet man oj kintajne can el Naj, tam wal cu bꞌejon canoj, yu cu waꞌnen a junojxa yet xaambꞌal yet chi kakꞌ cu xaambꞌal, cꞌal kakꞌon ixim tiriw yin saꞌbꞌeal, ma kakꞌon wanojxa xaambꞌal tol smoo jaꞌ bꞌey yet xaambꞌal yet Jehová cu Diosal chi akꞌlei, ẍi ebꞌ.
30 Jaꞌ yet jix yabꞌen naj Finees, naj yakꞌomal xaambꞌal yetoj ebꞌ syaawil conobꞌ tzet jix yal ebꞌ yicꞌaal Rubén, ebꞌ yicꞌaal Gad, cꞌal yetoj nanxa ebꞌ yicꞌaal Manasés, watxꞌ jix yabꞌ ebꞌ. 31 Jix lawi tuꞌ xin, jaꞌ naj Finees scꞌaal naj yakꞌomal xaambꞌal chi yij Eleazar, jix yalon tet ebꞌ jaxca tiꞌ:
—Jaꞌ tinaniꞌ xin, tuxa jix naꞌcha el jun tiꞌ ku jon tol eyoc Jehová ketoj, yutol jaex tiꞌ man yu oj je yintajnen can el Jehová cu Diosal yuxan jix je yun jun tiꞌ, yuxan jaꞌ tinaniꞌ cꞌam cꞌal syaꞌilal oj yatej Naj kibꞌan je yetoj.
32 Jix lawi tuꞌ xin, jix stakꞌelen can sbꞌa naj Finees yetoj ebꞌ jaꞌjun yetoj, catuꞌ jix meltzotej ebꞌ. Jix el ebꞌ bꞌey yul yet txꞌotxꞌ Galaad, jix apni oc ebꞌ bꞌey yul yet Canaán, bꞌey eyecꞌ wanxa ebꞌ yet Israelal ebꞌ. Jix yalon ebꞌ tet ebꞌ ey can bꞌey Canaán tuꞌ masanil tzet jix yal ebꞌ yet Israelal tuꞌ. 33 Jaꞌ spajtzebꞌal jix yakꞌ ebꞌ tuꞌ, jix ẍaꞌ scꞌul ebꞌ, yuxan jix yal watxꞌ kꞌane ebꞌ tet Dios. Jatax cꞌal yet tuꞌ, cꞌamxa bꞌey jix yakꞌ jowal ebꞌ yetoj ebꞌ yicꞌaal Rubén, yetoj ebꞌ yet Gad, tam wal yetneletoj xꞌotxꞌ ebꞌ yu ebꞌ. 34 Yuxan jaꞌ ebꞌ yicꞌaal Rubén, cꞌal yetoj ebꞌ yicꞌaal Gad, jix yakꞌ yij sbꞌi jun yet xaambꞌal tuꞌ ebꞌ: Chi Yakꞌ Stiꞌ Kin. Jix yalon ebꞌ jaxca tiꞌ: Jaꞌ jun yet xaambꞌal tiꞌ, chi Yakꞌ Stiꞌ Kin, queytuꞌ chi yun can oc cu nan cu xol je yetoj, tol jaꞌ Jehová cu Diosal toni, ẍi ebꞌ.