Jain tiꞌ, caw wal icham winaj jin xa, caw ecꞌalxa sbꞌisil wabꞌilal. 3 Jaex tiꞌ je yilnaj masanil tzet jix yun smulna Jehová cu Diosal yetoj wan conobꞌ chi jowi oc je yin tiꞌ, wan bꞌey jix je tecꞌbꞌa je bꞌa je yakꞌon jowal yetoj, jaꞌton Naj jix colwa je yetoj yin jun jowal tuꞌ. 4 Jain jix jin poꞌoecꞌ txꞌotxꞌ txꞌotxꞌ tiꞌ je xol je masanil. Man asanne oj txꞌotxꞌ iꞌbꞌil ecꞌ tet wanxa nacionlaj jix eyqꞌueyi jix jin poꞌon ecꞌ je xol, ilaꞌ jix jin poꞌo cꞌal pax ecꞌ txꞌotxꞌ yet wanxa ebꞌ cꞌamto chi eyqꞌuey ku, txꞌotxꞌ chi too tacꞌal bꞌey jaꞌ Jordán, masantaꞌcꞌal bꞌey jaꞌ mar Mediterráneo yetcꞌulal bꞌey chi too cꞌu. 5 Jaꞌ Jehová cu Diosal, oj iꞌon el masanil ebꞌ ánima caan bꞌey wan txꞌotxꞌ tiꞌ, jaxa jex jaex tiꞌ oj je yiꞌcan oc txꞌotxꞌ txꞌotxꞌ jaxca wal jix yun yalon can Dios.

6 Akꞌwej je yip je jijen masanil wan chejbꞌanile chi yal can yul an yuunal ley yet naj Moisés; jijewej jaxca wal jix yun stzꞌibꞌelecanoj, quey ojabꞌ tuꞌ chi yun je jijeni. 7 Cꞌam ojabꞌ che caltoj je bꞌa xol wan ánima caan to ecꞌ je xol tiꞌ. Cꞌam ojabꞌ chex oc yin eyilal tet sdiosal ebꞌ, cꞌam ojabꞌ che jije tzet chi yal ebꞌ, tam wal je yakꞌon bꞌina sbꞌi sdiosal ebꞌ tuꞌ, cꞌam ojabꞌ che yakꞌ bꞌina sbꞌi sdiosal ebꞌ xol je kꞌane. 8 Jaꞌ smoo che yunne, tol chex oc cꞌal tzajan yintaj Jehová cu Diosal, jaxca cꞌal jix yun cu bꞌeytej yet yalantoj masantaꞌcꞌal tinaniꞌ. 9 Yutol jaꞌcaw Jehová cu Diosal jix iꞌon el wan mimej conobꞌ ey smey cu sattaj. Yuxan cꞌam junoj ebꞌ jix stecꞌbꞌa sbꞌa cu sattaj masantaꞌcꞌal tinaniꞌ. 10 Jaꞌ bꞌey junoj jon chi ela junoj mil ebꞌ ey jon, yutol jaꞌ Jehová cu Diosal chi colwa ketoj, jaxca wal jix yun yakꞌon can stiꞌ ey jon. 11 Caw wal che teyne cꞌal je bꞌa jaex tiꞌ, che camcꞌulne cꞌal Jehová cu Diosal. 12 Caw wal chi woche tol che yotajne el wan tiꞌ: Ta tol che yiꞌel je bꞌa yintaj Dios, catuꞌ che kalontoj je bꞌa xol sbꞌeybꞌal wan ánima eyecꞌ je xol tuꞌ, catuꞌ chex nupi yetoj ebꞌ. 13 Ta jaxca tuꞌ oj je yute je bꞌa, manxa oj colwa Jehová cu Diosal je yetoj yu yiꞌle el wan ánima tiꞌ je sattaj, yutol oj jex skꞌanbꞌalne ebꞌ jaxca junoj yaal, jaxca wal chi yun yeytoj junoj tzetyetal yul txim, queytuꞌ oj je yun yu ebꞌ, ma jaxca wal junoj tzꞌuum chi makꞌle oc yin je yichin, ma jaxca wal junoj qꞌuix chi octoj yul je sat, masantaꞌcꞌal oj jex qꞌueyle el bꞌey sat txꞌotxꞌ txꞌotxꞌ tol caw watxꞌ jix yakꞌ Jehová cu Diosal ey jon.

14 Jain tiꞌ tuxa oj jin camoj, yuxan chi wal can ey jex, yutol caw je yotaj wal sicꞌlebꞌil yetoj je naꞌbꞌal cꞌal je pixan, tol jix eloc masanil bꞌey jix yakꞌ can stiꞌ Jehová cu Diosal ey jon, cꞌam junoj tzetyetal tol ma yun bꞌey jix yakꞌ can stiꞌ. 15 Jaxca wal tuꞌ jix yun yiꞌon sbꞌa masanil tzetyetal, wan bꞌey jix yakꞌ can stiꞌ Jehová ey jonwej, quey cꞌal pax tuꞌ oj yun yaontej masanil syaꞌtajilal je yibꞌan, ta tol man oj je jije je yunen jaxca yalon ẍejbꞌanil Jehová cu Diosal jix yal can ey jex. 16 Ta jaxa cꞌal tet comon dios oj jex oc yin eyilal, ta jaxa cꞌal sattaj wan tuꞌ oj jex ey noanoj, oj tit sjowal scꞌul Jehová je yin, catuꞌ yin xacꞌal eymanil oj yun je qꞌueyle eloj, cꞌamxa junoj jex oj jex cancan sat txꞌotxꞌ txꞌotxꞌ txꞌojxa swatxꞌil jix yakꞌ ey jex tiꞌ, ẍi naj Josué tet ebꞌ.