—Jaxca tiꞌ yalon Jehová cu Diosal jaon Israel jon tiꞌ: Jaꞌ yet peyxa tuꞌ, jaꞌ tituꞌ jix caey ecꞌ naj je mam icham chi yij Térah, yetoj cawan scꞌaal, jaꞌton Abraham cꞌal Nahor, jatuꞌ jix caey ecꞌ ebꞌ bꞌey sattaj ecꞌtoj jaꞌ miman jaꞌ Éufrates, jix yakꞌon servil comon dios ebꞌ. 3 Jaꞌ tituꞌ jix wiꞌontej naj Abraham, jix cꞌoli yecꞌabꞌ cꞌal naj bꞌey yul yet txꞌotxꞌ Canaán tiꞌ. Jix wakꞌon jun scꞌaal naj, jaꞌton naj Isaac; jain jix wakꞌ chꞌibꞌ sbꞌisil yicꞌaal naj. 4 Jaxa tet naj Isaac jix wakꞌon cawan scꞌaal, jaꞌton Jacob yetoj naj Esaú. Catuꞌ jix wakꞌon txꞌotxꞌ Seír tet naj Esaú tuꞌ. Jal naj Jacob xin yetoj yuninal jix apni oc caan ebꞌ bꞌey txꞌotxꞌ Egipto. 5 Jix lawi tuꞌ xin, jix jin chejontoj naj Moisés, yetoj Aarón bꞌey Egipto tuꞌ, catuꞌ jix waontej wan mimej syaꞌilal yibꞌan ebꞌ a Egipto tuꞌ, masantaꞌcꞌal jix jul stiempoal yet jix wiꞌon eltej ebꞌ je yichmam tituꞌ. 6 Jaꞌ yet jix eltej ebꞌ je yichmam bꞌey txꞌotxꞌ Egipto tuꞌ, jix ujtele ebꞌ yu ebꞌ a Egipto yetoj carruaje yet jowal, masantaꞌcꞌal jix apni oc ebꞌ bꞌey jaꞌ Cajin Mar. 7 Jix jin yawte ebꞌ je yichmam tuꞌ. Yu tuꞌ xin, jain jix waoc jun kꞌejkꞌinal snan xol ebꞌ je yichmam tuꞌ yetoj ebꞌ a Egipto. Catuꞌ jix wakꞌon sjunbꞌane ey sbꞌa jaꞌ mar tuꞌ junelxa yibꞌan ebꞌ, jix muji cantoj ebꞌ yu jaꞌ. Jaex tiꞌ, caw je yilnaj sicꞌlebꞌil tzet jix wute ebꞌ a Egipto tuꞌ.

Jix lawi cꞌal tuꞌ, caw naatil jix ecꞌ ebꞌ je yichmam tuꞌ bꞌey txꞌotxꞌ cusiltaj txꞌotxꞌ, 8 masantaꞌcꞌal jix jex wiꞌtej yetoj ebꞌ bꞌey txꞌotxꞌ xꞌotxꞌ ebꞌ Amorreo ey yetcꞌulal bꞌey chi aol cꞌu bꞌey jaꞌ Jordán. Jix yakꞌon jowal ebꞌ je yetoj, jain xa jix waoc ebꞌ yul je kꞌabꞌ. Jix eyqꞌuey ebꞌ je yu, yuxan jix je yiꞌcan oc xꞌotxꞌ ebꞌ tuꞌ. 9 Jix lawi tuꞌ, jaxa pax naj Balac, scꞌaal Sipor, sreyal ebꞌ Moabita, jix tit pax yakꞌ jowal je yetoj. Jaꞌ naj Balac tuꞌ, jix yatoj ẍejabꞌ yet chi too tit naj Balaam, scꞌaal naj Beor, yu skꞌanontej syaꞌtajilal naj je yibꞌan yaloni. 10 Yu tuꞌ xin, jain tiꞌ ma jin chaꞌ tol chi skꞌantej syaꞌtajilal naj Balaam tuꞌ je yibꞌan, jaꞌ tzet jix yun naj, tol jaꞌ watxꞌ kꞌane jix yal can el naj je yibꞌan. Jaxca wal tuꞌ jix yun jex jin colon can eloj. 11 Jix lawi tuꞌ, catuꞌ jix jex kꞌaxbꞌo ecꞌtoj yul jaꞌ miman Jordán tuꞌ, masantaꞌcꞌal jix jex apni oc bꞌey Jericó. Jaꞌ ebꞌ caan bꞌey Jericó tuꞌ, jix eyqꞌuey ebꞌ je yu yetoj wipal, yetoj cꞌal ebꞌ Amorreo, ebꞌ Ferezeo, ebꞌ Cananeo, ebꞌ Heteo, ebꞌ Gergeseo, ebꞌ Heveo yetoj cꞌal ebꞌ Jebuseo, jix yakꞌ jowal ebꞌ je yetoj, jain xa jix wakꞌ je yip, yet jix eyqꞌuey ebꞌ je yu. 12 Jaxa cawan sreyal ebꞌ Amorreo tuꞌ, ma je yakꞌ eyqꞌuey ebꞌ jaex tiꞌ yetoj chꞌen je yespada cꞌal je julbꞌal, yutol jain tiꞌ jix jin xibꞌte a ebꞌ, yuxan jix el ebꞌ ey jex. 13 Jain jix wakꞌ je txꞌotxꞌ bꞌey chex caey ecꞌoj, manaj jex jix je yaw yawoal sat txꞌotxꞌ txꞌotxꞌ tiꞌ. Jix wakꞌ je na bꞌey chex caey ecꞌoj, man jaex oj jix je waꞌne aoj. Jaꞌ tinaniꞌ caan jex ecꞌ sat txꞌotxꞌ txꞌotxꞌ tiꞌ, che loꞌ sat an uva, cꞌal teꞌ olivo, tol man jaex oj jix je yawaꞌ, ẍi Jehová ey jonwej.

14 —Catuꞌ jix oc cꞌal ian naj Josué yalon masanil wan tiꞌ tet ebꞌ, jix yalon jaxca tiꞌ: Ey ojabꞌ yeloc apnoj Jehová yul je sat, che jijewej masanil tzet chi yal Naj, caw watxꞌ cꞌal che yute je bꞌa. Iꞌwej el wan comon dios je xol, jaxca wan bꞌey jix yiꞌey sbꞌa ebꞌ kichmam bꞌey sattaj ecꞌtoj jaꞌ Éufrates, cꞌal bꞌey Egipto. Asanne ojabꞌ cꞌal Jehová che yakꞌ servil. 15 Ta cꞌam chi yal je cꞌul che yakꞌ servil cu Diosal xin, sicꞌlewej tinaniꞌ mactxequel che yakꞌ servil. Tumi jaꞌ wan comon dios yakꞌnaj servil ebꞌ cu mam icham bꞌey skꞌaxepal ecꞌtoj jaꞌ Éufrates, ma jaꞌ sdiosal ebꞌ Amorreo titiꞌ, jal jin jain tiꞌ yetoj ebꞌ wuninal an, jaꞌ Jehová oj wakꞌ servil yetoj ebꞌ, ẍi naj Josué tet ebꞌ.

16 Catuꞌ jix takꞌwi ebꞌ conobꞌ jaxca tiꞌ:

—Cꞌam bꞌakꞌin oj cu bꞌejcan Jehová cu Diosal, cꞌam bꞌakꞌin oj kakꞌ servil junojxa comon dios. 17 Yutol jaꞌ Jehová cu Diosal jix cu iꞌon eltej bꞌey txꞌotxꞌ Egipto, bꞌey ocnaj ebꞌ cu man icham yin yakꞌomaloj servilal. Caw qꞌueyubꞌtaj xacꞌal yeoc yipalil jix xꞌox kilaꞌ. Jaꞌ jix cu teyneni, catuꞌ jix cu steynen yet jix cu tit yul-laj bꞌe cꞌal yet jix cu ecꞌtej bꞌey wan conobꞌlaj. 18 Jaꞌ Jehová cu Diosal jix iꞌon el masanil wan conobꞌlaj cu sattaj, cꞌal ebꞌ Amorreo caan ecꞌ yet jix cu jul titiꞌ. Yu masanil wan tzetyetal jix yun Naj tuꞌ, yuxan oj kakꞌ cꞌal servil Naj, yutol cu Diosal Naj, ẍi ebꞌ conobꞌ tuꞌ.

19 Yu tuꞌ xin, jix yalon naj Josué tet ebꞌ conobꞌ jaxca tiꞌ:

—Jaex tiꞌ ma skeꞌ je yakꞌon servil Jehová, yutol jaꞌ Dios caw wal watxꞌ cꞌal Naj, catuꞌ jow Naj yin spenail. Caw cꞌam chi techa yilon oc spenail che yunne, yutol caw wal chi tit sjowal scꞌul ta tol chi cu oc yin eyilal tet wan comon dios, caw wal cꞌam chi yakꞌ mimancꞌulal Naj yin cu penail jaxca tuꞌ. 20 Ta che yiꞌel je bꞌa yintaj Naj, catuꞌ che yakꞌon servil wan comon dios, oj meltzo oc sjowal scꞌul Naj je yin, catuꞌ oj jex qꞌueyle el yu Naj, caxcꞌal ecꞌal tzetyetal watxꞌ jix yunne, ẍi naj Josué tet ebꞌ.

21 Jix takꞌwi masanil ebꞌ conobꞌ jaxca tiꞌ:

—Cꞌamaj, cꞌam bꞌakꞌin oj kakꞌ servil wan comon dios tuꞌ, asan Jehová oj kakꞌ servil, ẍi ebꞌ. 22 Catuꞌ jix takꞌwi naj Josué jaxca tiꞌ:

—Jaex caw che yal can yetoj je tiꞌ, tol jaꞌ Jehová oj je yakꞌ servil.

—Caw wal yel, jaon ton chi kalaꞌ, ẍi ebꞌ conobꞌ tuꞌ.

23 Jix yalon naj Josué tet ebꞌ jaxca tiꞌ:

—Ta jaxca tuꞌ xin, iꞌwej el masanil wan comon dios je xol, catuꞌ che yakꞌon servil Jehová cu Diosal, yetoj masanil je cꞌul, ẍi naj Josué.

24 Jix takꞌwi masanil ebꞌ conobꞌ jaxca tiꞌ:

—Jaon tiꞌ, yetoj wal masanil cu cꞌul chi kaloni, tol jaꞌ Jehová cu Diosal, oj kakꞌ servil, oj cu jije cꞌal masanil tzet chi yalaꞌ, ẍi ebꞌ.

25 Jaꞌ yet jun cꞌual tuꞌ jix swaꞌ alne jun swa kꞌane naj Josué yetoj ebꞌ conobꞌ Israel bꞌey Siquem, jix yakꞌon wan chejbꞌanile naj Josué tet ebꞌ. 26 Jix lawi tuꞌ, jix stzꞌibꞌen can yul an yuunal ley yet Dios. Jix lawi tuꞌ jix yiꞌontej jun chꞌen miman chꞌen naj, jix yaon can octoj chꞌen naj bꞌey yich jun teꞌ jii, bꞌey sattaj Snail Swa Kꞌane Dios.* 27 Jix yalon tet masanil ebꞌ conobꞌ jaxca tiꞌ:

—Jaꞌton jun chꞌen chꞌen tiꞌ chi oc can yin testigoal yin tzet jix yal can Jehová ey jon. Jaꞌ chꞌen chi oc can yin txꞌoxbꞌanile, ta man oj je jije tzet chi yal cu Diosal, ẍi naj Josué tet ebꞌ.

28 Jix lawi tuꞌ xin, jix ẍejontoj naj junjun yicꞌaal ebꞌ yet Israelal bꞌey txꞌotxꞌ txꞌotxꞌ chabꞌilxa yu ebꞌ.

29 Jix lawi tuꞌ xin, jix cam naj Josué scꞌaal Nun, naj ẍejabꞌ Dios. Ey 110 abꞌil skꞌinal naj yet jix cami. 30 Jatuꞌ jix mujle naj bꞌey txꞌotxꞌ Timnat-sérah, bꞌey txꞌotxꞌ tzalquiltaj txꞌotxꞌ yul yet Efraín bꞌey sattaj atoj txꞌotxꞌ wonan Gaas. 31 Jaꞌ ebꞌ conobꞌ Israel tuꞌ, caw wal watxꞌ jix yun sjijen ẍejbꞌanil Jehová ebꞌ yet iquisto ecꞌ naj Josué, jix too sjije cꞌal ebꞌ yet eyto cꞌal ecꞌ ebꞌ icham winaj yul conobꞌ, ebꞌ jix ilon masanil tzet jix yun Jehová yetoj ebꞌ.

32 Jix mujle can sbꞌajil naj José jix yiꞌtej ebꞌ Israel bꞌey txꞌotxꞌ Egipto. Jatuꞌ jix mujle can bꞌey Siquem, bꞌey txꞌotxꞌ manbꞌil yu naj Jacob yin jun cien chꞌen plata tet ebꞌ scꞌaal naj Hamor, smam naj Siquem. Jaꞌ jun txꞌotxꞌ tuꞌ jix oc can yetoj ebꞌ yicꞌaal naj José.

33 Jix cam cꞌal pax naj Eleazar, scꞌaal naj Aarón. Jatuꞌ jix mujle can naj bꞌey jun tzalan bꞌey sat xꞌotxꞌ jun scꞌaal chi yij Finees, jaꞌton txꞌotxꞌ jix akꞌle tet naj bꞌey txꞌotxꞌ tzalquiltaj yul yet Efraín.