Jix Xꞌox Sbꞌa Yángel Jehová Bꞌey Boquim
2
Jaꞌ bꞌey Boquim jix xꞌoxa sbꞌa Naj Yángel Jehová, speto Naj bꞌey txꞌotxꞌ Guilgal, jix yalon tet ebꞌ conobꞌ Israel jaxca tiꞌ: Jain jix jex wiꞌeltej bꞌey txꞌotxꞌ Egipto, catuꞌ jix jex wiꞌontej bꞌey txꞌotxꞌ txꞌotxꞌ bꞌey jix wakꞌcan jin tiꞌ wakꞌon tet ebꞌ je yichmam, catuꞌ jix walon can tet ebꞌ. Tol cꞌam bꞌakꞌin oj ecꞌtoj jaxca bꞌey jix wakꞌcan jin tiꞌ ey jex, 2 yuxan jaex tiꞌ, cꞌam ojabꞌ bꞌakꞌin che waꞌnewej junoj je wa kꞌane yetoj ebꞌ ánima caan bꞌey sat txꞌotxꞌ txꞌotxꞌ bꞌey caan jex ecꞌ tiꞌ, jaꞌ jun che yunne tol che qꞌueywej el wan yet xaambꞌal ebꞌ, asan xin, jaex tiꞌ, ma je jije tzet jix wal an. ¿Tzet yu, yuxan che yun jun tiꞌ? 3 Yu tuꞌ xin, tinaniꞌ chi wal can ey jex, tol man oj wiꞌel wan conobꞌ tiꞌ je xol. Asan cꞌal cajlebꞌail ey je xol yetoj ebꞌ, jal sdiosal ebꞌ, jaxca junoj yaal queytuꞌ oj yun oc ebꞌ je yin, ẍi Naj ángel yet Jehová tet ebꞌ.4 Jaꞌ yet jix lawi skꞌanabꞌ jun yángel Naj Kaawil tuꞌ, jaxa ebꞌ conobꞌ Israel jix okꞌa ebꞌ masanil yin ipeal, 5 yu jun tuꞌ, yuxan Boquim,a jix yij can sbꞌi jun txꞌotxꞌ tuꞌ. Jaꞌ tituꞌ jix yakꞌ xaambꞌal ebꞌ tet Jehová.
Scamichal Naj Josué
6 Jaꞌ yet jix lawi stakꞌelen can sbꞌa naj Josué yetoj ebꞌ conobꞌ Israel tuꞌ, catuꞌ jix too ebꞌ sat xꞌotxꞌ tol chabꞌilxa yu. 7 Jaꞌ ebꞌ Israel tuꞌ, jix sjije cꞌal ebꞌ, catuꞌ jix oc ebꞌ yin eyilal tet Jehová yet iquisto ecꞌ naj Josué yetoj ebꞌ, yetoj cꞌal yet iquisto ecꞌ ebꞌ icham winaj yeoc yul conobꞌ yetoj ebꞌ, jaꞌton ebꞌ naj jix ilon tzet jix yun xꞌoxon yipalil Jehová snan xol ebꞌ conobꞌ Israel tuꞌ. 8 Eoc naj Josué yin 110 abꞌil skꞌinal yet jix cami, jaꞌton naj ẍejabꞌ Jehová. 9 Jaꞌ bꞌey jix mujle can smimanil naj, jaꞌton bꞌey xꞌotxꞌ naj chi yij Timnat-sérah bꞌey sattaj ecꞌtoj stzalanil txꞌotxꞌ Gaas, bꞌey txꞌotxꞌ tzalquiltaj yul yet Efraín.
Jix Sbꞌejcan Jehová Ebꞌ Conobꞌ Israel
10 Jaꞌ yet jix cam cꞌal toj ebꞌ Israel jix eecꞌ yetoj naj Josué. Jaxa ebꞌ jix ali yintaj ebꞌ tuꞌ, manxa yotaj oj Jehová ebꞌ, catuꞌ ma xa yil ebꞌ tzetyetal tol qꞌueyubꞌtaj jix yun xꞌoxon yipal Naj xol ebꞌ. 11 Yu tuꞌ xin, jaxa cꞌal spenail jix yun ebꞌ conobꞌ Israel sattaj Dios. Jix oc ebꞌ yin eyilal tet jun comon dios chi yij Baal. 12 Jix yiꞌel sbꞌa ebꞌ yintaj Jehová sDiosal yichmam ebꞌ, Naj jix iꞌon eltej ebꞌ bꞌey txꞌotxꞌ Egipto. Jix oc ebꞌ yin eyilal tet sdiosal ebꞌ ánima caan ecꞌ xol ebꞌ tuꞌ. Jix xꞌemontej sjowal scꞌul Jehová ebꞌ, 13 yutol jix sbꞌejcan Dios ebꞌ, jaxa cꞌal tet jun comon dios Baal, cꞌal tet Astarté jix oc ebꞌ yin eyilal. 14 Yu wal tuꞌ xin, caw wal jix tit sjowal scꞌul Jehová yin ebꞌ Israel, jix bꞌejle oc ebꞌ yul skꞌabꞌ ebꞌ elkꞌom, catuꞌ jix elkꞌaneletoj masanil tzet ey tet ebꞌ, ma tzaji ebꞌ scolon sbꞌa tet ebꞌ scajat tuꞌ. 15 Jaꞌ yet jix too ebꞌ Israel yakꞌon jowal yetoj ebꞌ scajat tuꞌ, jaxa Jehová ma xa colwa yetoj ebꞌ. Jix eyqꞌuey ebꞌ yu ebꞌ scajat tuꞌ, jaxca jix yun yalon can Jehová tet ebꞌ, yuxan caw jix oc ebꞌ yin cuscꞌulal.
16 Jix lawi tuꞌ, jaxa xol ebꞌ tuꞌ ey wan ebꞌ jix sicꞌle oc yu Jehová, yet watxꞌ chi col-le ebꞌ yul skꞌabꞌ ebꞌ chi oc elkꞌan yin ebꞌ tuꞌ. 17 Jaxa ebꞌ Israel tuꞌ, ma cꞌal ẍaꞌ niꞌoj yabꞌ ebꞌ tzet jix yal ebꞌ chi colwa yin ebꞌ tuꞌ yu Jehová, cꞌam cꞌal niꞌoj jix sjije ebꞌ tzet jix yal Dios. Tol jix oc cꞌal ebꞌ yin eyilal tet wan comon dios. Jix yiꞌon xacꞌal el sbꞌa ebꞌ yintaj sbꞌeybꞌal yichmam tuꞌ. Yutol jaꞌ yichmam ebꞌ tuꞌ, caw jijem jix yute sbꞌa ebꞌ tet ẍejbꞌanil Jehová, jal ebꞌ xin, junelne ma sjije ebꞌ. 18 Junjuntaj cꞌal el yet chi el yaw ebꞌ yu syaꞌilal yu tzet chi utele ebꞌ tuꞌ; jaxa Jehová chi okꞌ scꞌul yin ebꞌ, catuꞌ jix yaontej jun chi colwa yetoj ebꞌ. Yajbꞌan iquis ecꞌ jun chi colwa yetoj ebꞌ tuꞌ, ey cꞌal oc Dios yetoj ebꞌ, catuꞌ jix col-le el ebꞌ yu, tet ebꞌ scajat tuꞌ. 19 Jaxa yet jix camtoj jun chi colwa yetoj ebꞌ tuꞌ xin, catuꞌ jix too pax can ebꞌ yin spenail tol yel xacꞌal ecꞌbꞌan spenail yintaj sbꞌeybꞌal yichmam ebꞌ tuꞌ, jix oc ebꞌ yin eyilal tet wan comon dios. Cꞌam chi sbꞌejcan yunen pena bꞌeybꞌale tuꞌ ebꞌ, caw pit jix yute sbꞌa ebꞌ tet Jehová. 20 Yu cꞌal jun tuꞌ, yuxan caw jix tit sjowal scꞌul Jehová yin ebꞌ, jix yalon jaxca tiꞌ: Jaꞌ wan ánima tiꞌ, caw cꞌam chi sjije niꞌoj ebꞌ bꞌey jix wal can jin wa kꞌane yetoj smam icham ebꞌ, cꞌam chi yabꞌ niꞌoj ebꞌ tzet chi walaꞌ. 21 Yu cꞌal jun tuꞌ xin, manxa oj wiꞌel wanxa ebꞌ ánima jix to cancan yet jix camtoj naj Josué tuꞌ. 22 Oj can cꞌal can ebꞌ, queytuꞌ oj yun wakꞌon porobꞌal snaꞌbꞌal ebꞌ Israel tiꞌ, ta chi oc cꞌal tzajan ebꞌ wintaj an, jaxca jix yun yoc tzajan yichmam ebꞌ, ma cꞌamaj, ẍi Dios. 23 Yuxan ma xa iꞌle el jantaj ebꞌ ánima eyecꞌ xol ebꞌ conobꞌ Israel tuꞌ yu Jehová, jaꞌton wan ma ale oc yul skꞌabꞌ naj Josué tuꞌ, yutol eyto ebꞌ jix cancan xol ebꞌ tuꞌ.