Wanxa Conobꞌ Jix Cancan Yul Yet Txꞌotxꞌ Canaán
3
Ey wan conobꞌ jix cancan yu Jehová xol ebꞌ conobꞌ Israel, yet chi akꞌle porobꞌal ebꞌ, jaꞌton ebꞌ cꞌamto chi ali yet jix oc jowal yet jix eyqꞌuey txꞌotxꞌ Canaán yu smam icham ebꞌ tuꞌ. 2 Jix cancan wan conobꞌ tuꞌ yu Jehová, yet watxꞌ chi scuy sbꞌa ebꞌ cꞌam tocꞌal bꞌey chi yakꞌ jowal juneloj. 3 Ey joebꞌ conobꞌal ebꞌ Filisteo yetoj syaawil jix cani, yetoj masanil ebꞌ Cananeo, ebꞌ Sidonio, yetoj cꞌal ebꞌ Heveo, jaꞌton ebꞌ jix ecꞌle caan bꞌey txꞌotxꞌ tzalquiltaj txꞌotxꞌ bꞌey Líbano, chi too tacꞌal bꞌey sjolom wonan Baal-hermón, masantaꞌcꞌal bꞌey chi cu octoj bꞌey Hamat. 4 Jaꞌ yetoj ebꞌ tuꞌ, jix akꞌle porobꞌal ebꞌ Israel yu Jehová, yet watxꞌ chi yil Naj, ta chi sjije ebꞌ masanil wan chejbꞌanile jix yal can naj Moisés, jaꞌton tet smam icham ebꞌ. 5 Queytuꞌ jix yun scaey cꞌal ecꞌ ebꞌ Israel xol ebꞌ Cananeo, ebꞌ Heteo, ebꞌ Amorreo, ebꞌ Ferezeo, ebꞌ Heveo, cꞌal xol ebꞌ Jebuseo. 6 Jaxa scꞌaal ebꞌ, cꞌal scutzꞌin ebꞌ Israel tuꞌ, jix nupi scꞌaal ebꞌ cꞌal scutzꞌin ebꞌ naj txꞌoj conobꞌal tuꞌ yetoj ebꞌ. Jix oc cꞌal pax ebꞌ yin eyilal tet sdiosal ebꞌ tuꞌ.Jaꞌ Naj Otoniel Jix Colon Ebꞌ Israel Tet Naj Cusán-risataim
7 Caw pena jix yute sbꞌa ebꞌ Israel sattaj Jehová, yutol jix too qꞌueycꞌulal Naj yu ebꞌ, jaxa cꞌal tet yechel comon dios chi yij Baal, cꞌal tet yechel Astarté jix oc ebꞌ yin eyilal. 8 Yu cꞌal jun tuꞌ xin, caw jix tit sjowal scꞌul Jehová yin ebꞌ, yuxan jix ale oc ebꞌ yul skꞌabꞌ naj Cusán-risataim, sreyal conobꞌ Mesopotamia. Waxajebꞌ abꞌil jix akꞌle servil jun rey tuꞌ yu ebꞌ naj Israel tuꞌ, 9 masantaꞌcꞌal jix yal sbꞌa ebꞌ tet Jehová, yuxan jix ale oc jun syaawil ebꞌ chi colon eloj. Jaꞌ naj Otoniel scꞌaal naj Quenaz jix oqui. Jaꞌ naj Quenaz tuꞌ, slawubꞌal xacꞌal yuẍtaj naj Caleb yeoc naj. 10 Jaꞌ Yespíritu Jehová jix oc yin naj Otoniel, yuxan jaꞌ jix oc syaawiloj ebꞌ Israel. Jix too naj yin jowal, jaxa Jehová jix colwa yetoj naj, yuxan jix eyqꞌuey naj rey Cusán-risataim yu naj.
11 Jaꞌ yet jix lawi ecꞌ wan tuꞌ, cawinaj abꞌil jix can ebꞌ Israel yin tzalacꞌulal, masantaꞌcꞌal jix camtoj naj Otoniel scꞌaal Quenaz.
Jaꞌ Naj Ehud Jix Colon El Ebꞌ Israel Tet Ebꞌ A Moab
12 Jix lawi tuꞌ, jix oc cꞌal pax spenail ebꞌ Israel sattaj Jehová junelxa. Yu jun tuꞌ, jaꞌ Jehová jix yakꞌ sjelanil tet naj Eglón, sreyal Moab yet chi eyqꞌuey ebꞌ Israel tuꞌ yu. 13 Jix sjunbꞌane ey sbꞌa snaꞌbꞌal naj Eglón yetoj ebꞌ Amonita, yetoj cꞌal ebꞌ Amalecita, jix oc ebꞌ yakꞌon jowal yin ebꞌ Israel, jix yiꞌon ecꞌ jun conobꞌ ebꞌ bꞌey caw ey teꞌ palma, jaꞌton conobꞌ Jericó. 14 Ey 18 abꞌil jix akꞌle servil naj Eglón yu ebꞌ Israel, 15 masantaꞌcꞌal jix yal sbꞌa ebꞌ tet Jehová. Queyton wal tuꞌ jix yun yale oc junxa mac chi colwa yetoj ebꞌ. Jaꞌton naj Ehud scꞌaal Guerá, titnaj yin yicꞌaal naj Benjamín, jaꞌton naj sqꞌuexan skꞌabꞌ chi mulnai.
Ey jun cꞌual jix chejletoj naj Ehud tuꞌ akꞌo can chꞌen toolabꞌal yu ebꞌ Israel bꞌey naj Eglón, sreyal conobꞌ Moab. 16 Jaxa naj Ehud tuꞌ, jix swaꞌne jun chꞌen espada tol ey yee scaabꞌ paqꞌuil, nan metro steel, jix yaon oc skꞌalil bꞌey yetcꞌulal swatxꞌ kꞌabꞌ bꞌey yul yet spichil. 17 Jix yiꞌontoj chꞌen toolabꞌal tumin naj tet naj Eglón. Jaꞌ naj rey tuꞌ caw wal bꞌakꞌech naj. 18 Jaꞌ yet jix lawi yakꞌon can chꞌen toolabꞌal tumin naj tet naj Eglón tuꞌ, catuꞌ jix eltej naj yetoj ebꞌ jaꞌjun yetoj. 19 Jaxa yet jix apni oc naj bꞌey wan echele bꞌey scawilal Guilgal, jix meltzotoj naj Ehud tuꞌ junelxa bꞌey Eglón, jix yalon tet jaxca tiꞌ:
—Jaach rey, ey wal jun kꞌane chi woche chi wal ey jaach ja txꞌojli, ẍi naj tet.
Jix yalon naj rey tet masanil ebꞌ chi akꞌon servil naj bꞌey sdespacho, tol chi eltoj ebꞌ bꞌey stiꞌ na tuꞌ. 20 Jaꞌ yet jix can naj Ehud xꞌojli yetoj naj Eglón tuꞌ xin, jix sjitzon oc sbꞌa naj scꞌatan naj rey tuꞌ, chotan ey naj rey yul jun scuarto siclabꞌinaj xacꞌal yul, naat eyaoj, jix yalon naj Ehud tet naj jaxca tiꞌ:
—Jaꞌ jun kꞌane oj wal ey jaach tiꞌ, yet Jehová, ẍi naj.
Jaꞌ yet jix yabꞌen naj Eglón jaxca tuꞌ, jix a waan naj yul ẍila, 21 jaxa naj Ehud xin, jix yaon ecꞌtoj skꞌexan kꞌabꞌ bꞌey swatxꞌ kꞌabꞌ, jix yiꞌon atej yespada, jix stejon octoj naj yul scꞌul naj Eglón tuꞌ. 22 Yetoj masanil yip naj jix stejon octoj chꞌen espada naj tuꞌ, man asanne oj smachital chꞌen jix octoj, pilan cꞌal jix octoj yajan chꞌen yul scꞌul naj rey tuꞌ, yuxan ma xa yiꞌeltej chꞌen espada naj Ehud tuꞌ. 23 Jix lawi tuꞌ, jix eltej naj Ehud, jix yaon can oc slaweal smajil jun despacho tuꞌ, catuꞌ jix eltoj naj yul jun wentana.
24 Jaxa yet xax eltoj naj xin, catuꞌ jix jul ebꞌ naj chi teynen naj rey tuꞌ, jix yilon ebꞌ tol majan eltej spuertail despacho tuꞌ. Jaꞌ snaꞌon ebꞌ tol jaꞌ naj rey tuꞌ jix smajchen eltej, tejan tol chi txuli naj yalon ebꞌ. 25 Yuxan, jix yechbꞌane cꞌal ebꞌ xin, jix cꞌoli cꞌal snaꞌon ebꞌ, yutol cꞌam cꞌal naj rey tuꞌ chi elol yul sdespacho tuꞌ. Catuꞌ jix yiꞌontej slaweal jun puerta tuꞌ ebꞌ, jix sjajon ebꞌ, catuꞌ jix yilon ebꞌ tol camnajxa naj rey tuꞌ, tuxa cꞌal jabꞌan cantoj naj sat piso.
26 Jaꞌ yet lalan cꞌal yechbꞌanen ebꞌ chi akꞌon servil naj rey tuꞌ, jaxa naj Ehud xin, naat xa chi too naj yet chi scolon sbꞌa. Jix ecꞌtoj naj bꞌey ey yechel wan comon dios bꞌey txꞌotxꞌ Guilgal, jix apni oc naj scol sbꞌa yul yet txꞌotxꞌ Seirat. 27 Jaꞌ yet jix apni oc naj bꞌey txꞌotxꞌ tzalquiltaj yul yet Efraín, jix xuon noꞌ cacho naj, yu syambꞌan oc ebꞌ yet Israelal. Junne xacꞌal jix yun yeytej ebꞌ bꞌey junjun tzalan tuꞌ. Jaꞌ naj Ehud bꞌabꞌel sattaj ebꞌ. 28 Jix yalon naj Ehud tuꞌ tet ebꞌ jaxca tiꞌ: Ocanwej tzajan wintaj an, yutol jix ale oc ebꞌ cu cajat tiꞌ yul cu kꞌabꞌ yu Jehová cu Diosal, jaꞌton ebꞌ Moabita. Yuxan jix oc tzajan ebꞌ yintaj naj, jix too smajon can oc txꞌotxꞌ txꞌotxꞌ ebꞌ bꞌey chi skeꞌ skꞌaxbꞌonen jaꞌ Jordán ebꞌ ánima. Cꞌamxa junoj mactxequel chi ẍaꞌ kꞌaxbꞌon ecꞌtoj ebꞌ tituꞌ. 29 Jaꞌ yet jun tiempoal tuꞌ, jix smakꞌ cam 10,000 Moabita ebꞌ naj, jaꞌton ebꞌ soldado caw jelan yin jowal, cꞌamxa junoj jix colcha can el yul skꞌabꞌ ebꞌ. 30 Queytuꞌ jix yun yeyqꞌuey ebꞌ Moabita yu ebꞌ Israel. Jix lawi tuꞌ xin, cꞌamxa cꞌal jowal jix oc xol ebꞌ conobꞌ Israel yin 80 abꞌil.
Jaꞌ Naj Samgar Jix Colon Ebꞌ Israel Tet Ebꞌ Filisteo
31 Ey junxa winaj yintaj naj Ehud tuꞌ, jix colwa yin ebꞌ conobꞌ Israel, jaꞌton naj Samgar, scꞌaal naj Anat. Jix smakꞌ cam jun 600 ebꞌ Filisteo yetoj jun teꞌ teꞌ chi chucle oc yin noꞌ wacax eyoc jun chꞌen chꞌen sjolom teꞌ teꞌ tuꞌ, queytuꞌ jix yun scol-le el ebꞌ Israel yu naj Samgar tuꞌ.