4 Jaꞌ yet jun tiempoal tuꞌ, ey jun ix ix jix ale oc yin yaawil xol ebꞌ Israel tuꞌ Débora sbꞌi ix, ẍejabꞌ Jehová ix, jaꞌ chi waꞌnen yeoc skꞌane ebꞌ conobꞌ Israel, yistil naj chi yij Lapidot yeoc ix. 5 Jaꞌ ix Débora tuꞌ, jatuꞌ chi ey cꞌaltaꞌ chotan ix yich jun teꞌ palma bꞌey txꞌotxꞌ tzalquiltaj yul yet Efraín, bꞌey snan xol conobꞌ Betel yetoj Ramá. Jaꞌ tituꞌ chi apni oc ebꞌ conobꞌ Israel swaꞌne yeoc junoj jowal sattaj ix. Yu tuꞌ xin, jix akꞌle can yij teꞌ palma tuꞌ jaxca tiꞌ yu ebꞌ: Jaꞌ teꞌ spalma ix Débora.

6 Jaꞌ yet jun tiempoal tuꞌ, ey jun winaj xol ebꞌ yicꞌaal Neftalí, chi yij Barac, scꞌaal naj Abinóam caan bꞌey Quedes. Jix awtele naj yu ix Débora tuꞌ, catuꞌ jix yalon ix tet naj jaxca tiꞌ:

—Jaꞌ Jehová cu Diosal chi alon ey jaach: Asiꞌ bꞌey sjolom txꞌotxꞌ wonan Tabor, catuꞌ cha yambꞌantoj junoj 10,000 ebꞌ soldado yet yicꞌaal Neftalí, cꞌal ebꞌ yet yicꞌaal Zabulón. 7 Jain oj wakꞌ tit naj Sísara, naj eyoc syaawiloj ebꞌ soldado naj Jabín bꞌey stiꞌ jaꞌ Quisón, oj tit naj yakꞌ jowal ja win yetoj scarruaje, cꞌal ebꞌ soldado; jain xa oj waoc ebꞌ yul ja kꞌabꞌ, ẍi Jehová, ẍi ix Débora tuꞌ.

8 —Catuꞌ jix takꞌwi naj Barac jaxca tiꞌ: Chin too an xin, ta tol chach too wetoj an. Ta cꞌam chach too wetoj an xin, cꞌam chin too an, ẍi naj Barac tuꞌ tet ix.

9 —Chin too an xin, ẍi ix Débora tuꞌ, asan xin, man jaach oj, oj jaach bꞌina yet oj eyqꞌuey jun jowal tuꞌ, yutol jaꞌ yul skꞌabꞌ junoj ix ix oj ale oc naj Sísara tuꞌ yu Jehová, ẍi ix.

Jix lawi tuꞌ xin, jix too ix Débora tuꞌ yetoj naj Barac bꞌey Quedes. 10 Jaꞌ tituꞌ jix syambꞌa el jun 10,000 ebꞌ soldado naj Barac xol ebꞌ yicꞌaal Zabulón, cꞌal xol ebꞌ yicꞌaal Neftalí. Jix lawi tuꞌ, jix too ebꞌ yetoj ebꞌ soldado tuꞌ; catuꞌ jix too cꞌal pax ix Débora yetoj ebꞌ.

11 Jaꞌ bꞌey scawilal Quedes tuꞌ, bꞌey ey teꞌ jii yet Zaanaim, jaꞌ tituꞌ waꞌnebꞌil a skꞌap na ebꞌ Quenita chi yij Héber, jaꞌton naj jix spoꞌoel sbꞌa xol ebꞌ yet Quenitail, jaꞌton ebꞌ yicꞌaal naj Hobab, sniꞌ naj Moisés. 12 Jaꞌ yet jix yabꞌen naj Sísara tol jix aapnoj naj Barac bꞌey sjolom txꞌotxꞌ wonan Tabor tuꞌ, 13 catuꞌ jix syambꞌan oc masanil scarruaje yet jowal naj, ey 900 chꞌen yin masanil, yetoj cꞌal masanil ebꞌ soldado eyecꞌ yetoj naj, catuꞌ jix el bꞌey Haróset-goím, catuꞌ jix apni oc ebꞌ bꞌey stiꞌ jaꞌ Quisón. 14 Jix lawi tuꞌ, jix yalon ix Débora tet naj Barac jaxca tiꞌ:

—Asiꞌ, yutol jaꞌ tinaniꞌ jix jul scꞌual yale oc naj Sísara tiꞌ yul cu kꞌabꞌ yu Jehová. Bꞌabꞌel stoo Jehová cu sattaj tinaniꞌ, ẍi ix Débora tuꞌ.

Jix lawi tuꞌ, jix eytej naj Barac yetoj 10,000 ebꞌ soldado bꞌey sjolom wonan Tabor tuꞌ. 15 Jaꞌ yet jix ẍaꞌon oc naj Barac yakꞌon jowal tuꞌ, yin eymanil jix yaoc jun miman xiwcꞌulal Jehová yin ebꞌ ánima inen oc masanil wan chꞌen carruaje yet jowal tuꞌ, yetoj cꞌal ebꞌ soldado, jal naj Sísara jix eytej naj yul scarruaje tuꞌ, catuꞌ jix el naj yin ani yu scolon sbꞌa. 16 Jix too naj Barac yintaj naj Sísara tuꞌ, yetoj cꞌal yintaj ebꞌ soldado naj tuꞌ, yetoj cꞌal chꞌen carruaje yet jowal tuꞌ, masantaꞌcꞌal jix apni oc bꞌey Haróset-goím. Jaꞌ yet jun cꞌual tuꞌ, cꞌamxa junoj ebꞌ soldado naj Sísara jix colcha canoj, yutol jix cam ebꞌ masanil.

17 Jaꞌ naj Sísara tuꞌ, jix apni oc naj bꞌey waꞌnebꞌil a skꞌap na ix Jael, ix yistil naj Héber Quenita, yutol swatxꞌil ánima sbꞌa ebꞌ yuninal naj Héber yetoj naj Jabín sreyal Hasor. 18 Jix eltej ix Jael ẍaꞌon yapni oc naj Sísara tuꞌ, jix yalon ix tet naj jaxca tiꞌ:

—Ocan jaach yaaw, cꞌam ojabꞌ chach xiwi, ẍi ix tet naj.

Catuꞌ jix octoj naj Sísara tuꞌ yul skꞌap na ix tuꞌ, jix yiꞌontej jun an sábana ix, jix yaontoj ix yibꞌan naj yet chi ewbꞌale el naj yu ix. 19 Jix lawi tuꞌ, jix skꞌanon jaꞌ naj yucꞌ tet ix, yutol caw ey stajin tiꞌal naj. Jix yiꞌel smajil jun neet tzꞌuum bꞌey cꞌuan noꞌ lech yu ix, jix yakꞌon ix yucꞌ naj. Jix lawi tuꞌ, jix majchele pax ey naj yu ix. 20 Jix yalon naj Sísara tet ix jaxca tiꞌ:

—Watxꞌ ja we bꞌey stiꞌ kꞌap na tiꞌ. Ta ey mactxequel chin jul kꞌanlen ecꞌoj, ey mi mac eyecꞌ titiꞌ, ta ẍi ebꞌ, catuꞌ cha waloni tol cꞌam mactxequel eyecꞌoj, ẍi naj tet ix.

21 Jix lawi tuꞌ, jix tit sweyan naj Sísara tuꞌ, yutol caw chi cꞌuumbꞌi naj sbꞌeyi. Jix iꞌletej jun teꞌ estaca mitxꞌbꞌal ey kꞌap na yu ix Jael tuꞌ. Jaꞌ yet caw camnaj el naj yu weyan, yin cꞌuancꞌulal jix yun stoo ix scꞌatan naj, jix smakꞌon eytoj teꞌ estaca tuꞌ ix yul sjolom naj, bꞌey yetcꞌulal xeꞌ xiquin naj, masantaꞌcꞌal jix kꞌaxbꞌo ecꞌtoj teꞌ yul sjolom naj, catuꞌ jix toocan teꞌ yul txꞌotxꞌ. Queytuꞌ jix yun scam naj yu ix ix tuꞌ. 22 Jaxa yet jix apni oc naj Barac bꞌey yul skꞌap na tuꞌ yu seyon ecꞌ naj Sísara tuꞌ, eyman jix eltej ix Jael tuꞌ ẍaꞌon yapni naj, catuꞌ jix yalon ix tet naj jaxca tiꞌ:

—Ocantej, jul il mactxequel cha seyecꞌ tuꞌ, ẍi ix tet naj.

Jaxa yet jix oc apnoj naj Barac bꞌey yul kꞌap na tuꞌ, jix yilon naj tol camnajxa ey naj Sísara tuꞌ, makꞌbꞌil eytoj teꞌ estaca tuꞌ yul sjolom naj.

23 Queytuꞌ jix yun yeyqꞌuey naj Jabín, sreyal ebꞌ Cananeo yu Jehová sattaj ebꞌ Israel, 24 yuxan jix oc ian ebꞌ conobꞌ Israel yakꞌon jowal yin naj Jabín, masantaꞌcꞌal jix qꞌueyle el masanil ebꞌ soldado naj yu ebꞌ.