2 Bꞌitnoj jonwej cu masanil tet Jehová, yutol jaꞌ jix aon oc ebꞌ syaawil conobꞌ Israel, ey pax ebꞌ bꞌejan scꞌul stoo yin jowal.

3 ¡Jex rey, cꞌal jex yaaw, abꞌwej tzet oj wal ey jex! ¡Oj jin bꞌitnoj tet Jehová! ¡Oj jin bꞌitne sbꞌi Jehová cu Diosal jaon Israel jon tiꞌ!

4 Jaach Jehová cu Diosal, jaꞌ yet jix jaach el bꞌey txꞌotxꞌ wonan Seír, yetoj yet jix jaach ecꞌ el bꞌey txꞌotxꞌ Edom, caw wal jix bꞌilwi txꞌotxꞌ txꞌotxꞌ tiꞌ, cꞌal bꞌey satcanlaj, catuꞌ jix ja waon eytej nabꞌ xol asun.

5 Jaꞌ ja sattaj jaach Kaawil cu Diosal, caw wal jix xiwa mimej wonan, jix bꞌilwi a txꞌotxꞌ wonan Sinaí.

6 Jaꞌ yul stiempoal naj Samgar, scꞌaal Anat, cꞌal yul stiempoal ix Jael, yetoj cꞌal ebꞌ chi bꞌeelwi cꞌamxa chi oc ebꞌ yul miman bꞌe, jaxa cꞌal bꞌey yaliẍ bꞌe jix ecꞌ ebꞌ.

7 Masanil yaldeail txꞌotxꞌ conobꞌ Israel jix cancanoj, tzꞌinini xacꞌal jix yun canoj, masantaꞌcꞌal jix jin oc jain Débora jin tiꞌ, jaxca junoj ix txutxe jaxca tuꞌ jix yun woc xol conobꞌ Israel tiꞌ.

8 Jaꞌ yet tuꞌ jix seyon ecꞌ ebꞌ wet Israelal wan chi al-le oc diosal, caw wal jix jul ebꞌ akꞌom jowal bꞌey stiꞌ spuertail conobꞌ. Cꞌamxa junoj majbꞌal sat julbꞌal, cꞌamxa junoj lanza jix wil xol ebꞌ 40,000 ebꞌ wet Israelal tiꞌ.

9 Jaꞌ jin pixan, caw eyoc yetoj ebꞌ syaawil conobꞌ, ey pax oc yetoj ebꞌ cꞌasan scꞌul stoo yin jowal. ¡Kalwej watxꞌ kꞌane tet Jehová cu Diosal!

10 Je masanil jex wet conobꞌ, jex chex atoj yibꞌan noꞌ bꞌuru, jex mimej winaj, jantaj jex chex ey chotan yul ẍila tol labꞌabꞌi xacꞌal, yetoj jex chex bꞌey yetoj je yajan, bꞌitnewej sbꞌi cu Diosal.

11 Caw naat ojabꞌ chi apni oc yel yaw yul je nucꞌ, jaxca junoj chꞌen chꞌen bꞌey chi ey jaꞌ ucꞌbꞌal jaꞌ. Che yiꞌon a can sbꞌi Jehová, yutol jix eyqꞌuey ebꞌ cu cajat yu Naj, catuꞌ jix eyqꞌuey pax yaldeail conobꞌ Israel tiꞌ yu.

12 Jaach Débora, iꞌel ja weyan, aan waanoj, catuꞌ chach bꞌitni. Yetoj jaach Barac, scꞌaal Abinóam, asiꞌ, catuꞌ cha wiꞌontoj ebꞌ jix michꞌcha ja wu yin jowal.

13 Yutol jix eyol ebꞌ Israelita yakꞌon jowal, yetoj ebꞌ soldado Jehová yu yakꞌon jowal ebꞌ yetoj ebꞌ soldado jelan yakꞌon jowal.

14 Jix ey cꞌal pax jul ebꞌ yicꞌaal Efraín bꞌey acꞌal-laj yeqꞌui. Jix jul pax tzajan ebꞌ yicꞌaal Benjamín, cꞌal ebꞌ syaawil soldado yet Maquir, cꞌal ebꞌ eyoc yaawil xol ebꞌ yet Zabulón.

15 Jix colwa cꞌal pax ebꞌ yaaw yeoc xol ebꞌ yicꞌaal Isacar wetoj jain Débora jin tiꞌ, jix colwa cꞌal pax ebꞌ yetoj naj Barac, yet jix oc jowal bꞌey spananil stiꞌlaj jobꞌe.

Caw ey caabꞌcꞌulal xol ebꞌ yicꞌaal Rubén

16 ¿Tzet yu, yuxan jix jex cancan bꞌey chi maji oc noꞌ meꞌ, catuꞌ che yabꞌen yel yaw ebꞌ naj ilom meꞌ yet chi yawten smeꞌ ebꞌ naj? Caw yel, ey caabꞌcꞌulal xol ebꞌ naj yicꞌaal Rubén.

17 Jal pax ebꞌ a Galaad xin, jix cancan ebꞌ skꞌaxepal ecꞌtoj jaꞌ Jordán. Jal pax ebꞌ yicꞌaal Dan, jix cancan ebꞌ scꞌatan bꞌey ey teꞌ barco, jal ebꞌ yicꞌaal Aser xin, jix can cꞌal can ebꞌ bꞌey chi jul teꞌ barco, bꞌey stiꞌ jaꞌ mar, ma cꞌal el ebꞌ.

18 Jaxa bꞌey chi oc jowal jix too ebꞌ yicꞌaal Zabulón, cꞌal ebꞌ yicꞌaal Neftalí, jix sbꞌej xacꞌal oc skꞌinal ebꞌ yul skꞌabꞌ camich.

19 Jix lawi tuꞌ, jix jul ebꞌ sreyal ebꞌ Cananeo bꞌey txꞌotxꞌ Taanac, bꞌey scawilal jaꞌ Meguido, catuꞌ jix jul ebꞌ sreyal Cananeo yakꞌon jowal snaꞌoni, jaxa jix yuneni cꞌam cꞌal chꞌen plata, tam wal bꞌeomal jix yiꞌ ebꞌ.

20 Jaꞌ weycan bꞌey satcan, yetoj cꞌal wanxa tzet ey yipal tituꞌ, jaꞌ ebꞌ jix yakꞌ jowal yetoj naj Sísara.

21 Jaꞌ jaꞌ Quisón, jaꞌ ey cꞌaltaꞌ yet peyxa jaꞌ jaꞌ jix ijontoj masanil ebꞌ. Yu tuꞌ xin, jix kakꞌwej kip cu tecꞌon ey ebꞌ caw ey yip.

22 Caw jix bꞌilwi yeyqꞌuey yajan noꞌ che, yet jix too noꞌ yin jowal.

23 Jaxa naj yángel Jehová, jix alon jaxca tiꞌ: Tit ojabꞌ sjowal scꞌul Jehová yibꞌan conobꞌ Meroz; yetoj cꞌal yibꞌan masanil ebꞌ caan tituꞌ, yutol ma colwa ebꞌ yetoj Jehová yin jowal, jaxca jix yun scolwa ebꞌ soldado cꞌam chi xiw yakꞌon jowal, ẍi jun ángel tuꞌ.

24 Yel watxꞌ ix Jael, ix yistil naj Héber a Quenita yintaj masanil ebꞌ ix ix. Caw watxꞌ ix yintaj masanil ebꞌ ix ix caan yul-laj kꞌap na waꞌnebꞌil aoj.

25 Jaꞌ yet jix skꞌanon naj Sísara yucꞌ jaꞌ tet ix, lech jix yakꞌ ix Jael tet naj, catuꞌ jix yakꞌon crema ix sloꞌbꞌeoj naj yul jun miman secꞌ caw wal watxꞌ yili.

26 Jix yiꞌon a jun teꞌ estaca ix yetoj sqꞌuexan kꞌabꞌ, catuꞌ jix yiꞌon a jun teꞌ makꞌbꞌal ey estaca ix yetoj swatxꞌ kꞌabꞌ. Catuꞌ jix smakꞌon oc ix yin sjolom naj, jix lawi tuꞌ jix sbꞌatxbꞌan oc teꞌ ix yin spacꞌul sjolom naj, catuꞌ jix skꞌoxon eytoj teꞌ ix, jix kꞌaxbꞌo eytoj teꞌ yul txꞌotxꞌ.

27 Tuxa cꞌal jix ecꞌ bꞌal-labꞌoj naj bꞌey yajantaj ix Jael yu syaꞌil. Jix cꞌamxa cꞌal el naj tituꞌ.

28 Caw chi tac xacꞌal scꞌul ix xutx naj Sísara tuꞌ, jix eltej tꞌanan ix yul swentanail sna. Jix yalon ix jaxca tiꞌ: ¿Tzet la yu, yuxan caw wal chi ecꞌ tiempo sjul naj wuneꞌ tuꞌ an? ¿Tzet la yu, yuxan cꞌam cꞌal chꞌen scarruaje naj yet jowal chi juli? ẍi ix.

29 Catuꞌ jix takꞌwi junoj ebꞌ ix yakꞌomal servil ix txutxe tuꞌ. Jacꞌalaꞌ jix yun yalon cꞌal pax ix txutxe tuꞌ, jaxca jix yun snaꞌon tuꞌ.

30 Tejan lalan mi spoꞌon ecꞌ ebꞌ yin jantaj tzetyetal jix yiꞌ ebꞌ naj yin jowal tuꞌ. Lalan mi sicꞌlen ebꞌ naj junjunoj ebꞌ ix ix, ma xin catajwan oj yet junjun ebꞌ naj oj yiꞌtej, ma xin, ey an pichile caw wal watxꞌ lalan sicꞌletej naj Sísara tuꞌ, jam wal an caw sakꞌal xacꞌal yeoc yelawil, yet watxꞌ, oj yaoc naj jix akꞌon eyqꞌuey jowal tuꞌ yin snukꞌ, ẍi ebꞌ ix.

31 Jaxca ojabꞌ tuꞌ, chi yun sqꞌueyle el ebꞌ chi jowi oc ja win jaach Waawil cu Diosal. Jaxa mactxequel chach camcꞌulneni, jaxca ojabꞌ skopopi yajan cꞌu quey ojabꞌ tuꞌ yili ebꞌ, ẍi ix Débora, cꞌal naj Barac yin sbꞌit.