Jix Awtele Naj Gedeón Yu Jehová
6
Jaꞌ yet jix bꞌeycꞌaltej xin, jaꞌ ebꞌ conobꞌ Israel jix oc cꞌal spenail ebꞌ sattaj Jehová. Yu jun tuꞌ xin, yuxan jix ale can oc ebꞌ yul skꞌabꞌ ebꞌ Madianita yin jujebꞌ abꞌil. 2 Caw wal chi etnele ebꞌ Israel tuꞌ yu ebꞌ Madianita tuꞌ. Yu cꞌal jun tuꞌ xin, caw chi xiw ebꞌ tet ebꞌ Madianita tuꞌ, yuxan jix too yewbꞌa el sbꞌa ebꞌ bꞌey wan jolan chꞌen yichlaj wonan, bꞌey yaꞌtaj yapni oc ebꞌ yin ebꞌ. 3 Jaꞌ yet chi yawon ey stzetyetal ebꞌ Israel tuꞌ sat xꞌotxꞌ, jaxa ebꞌ Madianita tuꞌ, yetoj ebꞌ Amalecita, yetoj cꞌal wanxa ánima caan yetcꞌulal bꞌey chi aol cꞌu, jaꞌ yet chi yilon ebꞌ tol eyxa tzet awbꞌil yu ebꞌ Israel tuꞌ, catuꞌ chi bꞌet ebꞌ yetnetoj. 4 Catuꞌ jix bꞌet swaꞌne ey bꞌulan sbꞌa ebꞌ sat xꞌotxꞌ ebꞌ Israel tuꞌ, jix sqꞌueyon el ebꞌ masanil tzet awbꞌil tuꞌ, masantaꞌcꞌal chi apni oc ebꞌ bꞌey Gaza. Cꞌamxa cꞌal niꞌoj sloꞌbꞌe ebꞌ Israel tuꞌ jix cani, pilan jix elkꞌaneletoj noꞌ smeꞌ ebꞌ, noꞌ wacax cꞌal noꞌ sbꞌuru ebꞌ. 5 Jaꞌ tituꞌ jix swaꞌne a skꞌap na ebꞌ, jix yiꞌon cꞌal pax toj masanil noꞌ jobꞌbꞌeal noꞌ ebꞌ bꞌey sat txꞌotxꞌ xꞌotxꞌ ebꞌ Israel tuꞌ. Masanil tzetyetal ey sat txꞌotxꞌ tuꞌ jix lawi el masanil yu noꞌ sjobꞌbꞌeal noꞌ ebꞌ tuꞌ. Jix apni oc bꞌuloloj ebꞌ yetoj scamello, jaxca wal chi yun yetextoj tzetyetal yu noꞌ kochiꞌ noꞌ, queytuꞌ jix yun yetextoj masanil txꞌotxꞌ yu sjobꞌbꞌeal noꞌ ebꞌ tuꞌ. 6 Queywal tuꞌ jix yun scancan ebꞌ Israel yin mebꞌail yu tzet jix utele ebꞌ yu ebꞌ Madianita tuꞌ. Yu jun tuꞌ xin, caw jix cusa scꞌul ebꞌ conobꞌ Israel, yuxan jix a yaw ebꞌ tet Jehová.7 Jix oc cꞌal ian ebꞌ Israel tuꞌ skꞌanon scolwal Jehová, yet watxꞌ chi col-le el ebꞌ yul skꞌabꞌ ebꞌ Madianita tuꞌ, 8 jaxa Jehová jix yatej jun ẍejabꞌ xol ebꞌ Israel tuꞌ, jix yalon tet ebꞌ jaxca tiꞌ: Jaxca tiꞌ yalon Jehová cu Diosal: Jain jix jex wiꞌeltej bꞌey txꞌotxꞌ Egipto, bꞌey ey jex oc yin yakꞌomaloj servilal. 9 Man asanne oj cꞌal yul skꞌabꞌ ebꞌ a Egipto jix jex jin coloꞌ, jix jex jin col cꞌal pax el yul skꞌabꞌ ebꞌ jix jex aon oc yin syaꞌtajilal, jain jix wiꞌel ebꞌ je sattaj, catuꞌ jix wakꞌon txꞌotxꞌ xꞌotxꞌ ebꞌ ey jex. 10 Jix wal cꞌal ey jex, yutol jain Jehová jin tiꞌ, je Diosal jin. Jix walon cꞌal ey jex, tol cꞌam ojabꞌ chex xiw tet sdiosal ebꞌ Amorreo bꞌey txꞌotxꞌ txꞌotxꞌ bꞌey ey jex ecꞌ tiꞌ, asan xin, jaex tiꞌ caw ma je jije niꞌoj tzet jix walaꞌ.
11 Jix lawi tuꞌ, jix too ey chotan jun yángel Jehová bꞌey yich jun teꞌ jii bꞌey sat xꞌotxꞌ jun naj chi yij Joás, yicꞌaal Abiézer. Jaꞌ Joás tuꞌ ey jun scꞌaal chi yij Gedeón. Jaꞌ yet jun tiempoal tuꞌ, lalan stecꞌwi tiriw naj Gedeón yin ewantajil. Yet watxꞌ cꞌam chi il-le naj yu ebꞌ Madianita tuꞌ, jaꞌ bꞌey chi tecꞌle el yal an uva, jatuꞌ chi tecꞌwi tiriw naj.
12 Jaꞌ tituꞌ jix xꞌoxa sbꞌa jun yángel Jehová tet naj Gedeón tuꞌ, catuꞌ jix yaloni:
—Cꞌam ojabꞌ chach xiwi, tecꞌan cꞌal cha wute ja bꞌa. Jaꞌ Jehová eyoc ja wetoj, ẍi tet naj.
13 Jix takꞌwi naj Gedeón jaxca tiꞌ:
—Akꞌ mimancꞌulal win jaach waawil, ey jun tzet oj wal ey jaach. Ta tol eyoc Jehová ketoj jon, ¿Tzet yu, yuxan chi jul wan tiꞌ kibꞌan jon? ¿Bꞌeytuꞌ eyoc wan yipalil Naj jix xꞌox tet ebꞌ kichmam jon, yet jix iꞌle eltej ebꞌ bꞌey txꞌotxꞌ Egipto? Yutol jaꞌ tinaniꞌ, jix cu sbꞌejcan Naj cu txꞌojli jon, ilaꞌ tol jix cu yaoc Naj yul skꞌabꞌ ebꞌ Madianita tiꞌ, ẍi naj Gedeón.
14 Jix lawi tuꞌ, jix oc tꞌanan Jehová yin naj, catuꞌ jix yalon tet naj jaxca tiꞌ:
—Jain chach jin chejtoj. Kꞌanbꞌalne ja wip akꞌbꞌil wu, yet cha colon eltej ebꞌ ja wet Israelal yul skꞌabꞌ ebꞌ Madianita tuꞌ, ẍi Jehová tet naj.
15 Catuꞌ jix takꞌwi naj Gedeón jaxca tiꞌ:
—Jaach jin Diosal, akꞌ mimancꞌulal yin tzet oj wal ey jaach. ¿Tzet wal oj yun jin colon el ebꞌ wet Israelal tiꞌ? Yutol caw mebꞌa jon jaon yicꞌaal jon naj Manasés tiꞌ jon. Ilaꞌ tol jain tzunan unin jin xacꞌal xol ebꞌ wuẍtaj an, ẍi naj Gedeón tuꞌ.
16 Jix yalon pax Jehová tet naj jaxca tiꞌ:
—Oj skeꞌ ja wu, yutol ey jin ecꞌ ja wetoj. Jaxca chi yun yeyqꞌuey junoj winaj tol cꞌam mac chi coloni, jaxca tuꞌ oj yun yeyqꞌuey ebꞌ Madianita tuꞌ ja wu.
17 Catuꞌ jix too naj Gedeón scꞌatan jun ángel tuꞌ, jix yalon naj jaxca tiꞌ:
—Jaach Waawil, ta watxꞌ jin yul ja sat, txꞌox junoj yechel ey jin, yet watxꞌ oj naꞌcha el wu, tol ẍejabꞌ Dios jaach. 18 Chi wal ey jaach tinaniꞌ an, cꞌam ojabꞌ to chach el titiꞌ, masantaꞌcꞌal yet chin meltzo yet chi too wiꞌontej junoj jin saꞌbꞌeal tol chi woche chi wakꞌ ey jaach an, ẍi naj Gedeón tuꞌ.
Catuꞌ jix takꞌwi Jehová:
—Chach wechbꞌane an xin, masantaꞌcꞌal oj jaach juloj, ẍi tet Naj.
19 Catuꞌ jix too naj Gedeón swaꞌne el jun noꞌ yuneꞌ chiw, jix swaꞌne ey naj oxebꞌoj echbꞌal ixim jarina yin panil tol cꞌam yich. Jix lawi swaꞌxi el scaabꞌ stujanil tuꞌ yu naj, jix yaon eytoj noꞌ chiꞌbꞌe tuꞌ yul jun xuc, jaxa yal noꞌ chiꞌbꞌe tuꞌ jix yaeytoj naj yul jun xi, jix yiꞌontoj naj bꞌey yich jun teꞌ jii. 20 Catuꞌ jix yalon naj yángel Jehová tet naj jaxca tiꞌ: Aey noꞌ chiꞌbꞌe tuꞌ yetoj ixim pan cꞌam yich tuꞌ yibꞌan jun chꞌen chꞌen tiꞌ, catuꞌ cha secon ey yal noꞌ chiꞌbꞌe tuꞌ yibꞌan. Jix sjije cꞌal naj Gedeón masanil tzet jix al-le tet tuꞌ. 21 Jaxa Naj yángel Jehová tuꞌ jix stenoc xam skꞌojoch yin noꞌ chiꞌbꞌe tuꞌ, yetoj cꞌal yin ixim pan tuꞌ, catuꞌ jix elol jun kꞌakꞌ yul chꞌen miman chꞌen tuꞌ, catuꞌ jix tzꞌaꞌtoj noꞌ chiꞌbꞌe tuꞌ yetoj ixim pan, jix lawi tuꞌ xin, yin eymanil jix qꞌueya jun yángel Jehová tuꞌ sattaj naj. 22 Queytuꞌ jix yun snaꞌcha el yu naj Gedeón tuꞌ, tol yel jaꞌ Jehová jix kꞌanabꞌ yetoj naj, catuꞌ jix yalon naj jaxca tiꞌ:
—Jaach jin Diosal, caw wal yin jaccombꞌa jix yun jin kꞌanabꞌ ja wetoj, ẍi naj Gedeón tuꞌ.
23 Jix yalon Jehová tet naj Gedeón tuꞌ jaxca tiꞌ:
—Cꞌam ojabꞌ chach xiwi, man oj jaach camoj, chi wakꞌ jin watxꞌcꞌulal ey jaach, ẍi Naj.
24 Jix lawi tuꞌ, catuꞌ jix swaꞌnen a jun yet xaambꞌal naj, yu yiꞌon a can sbꞌi Jehová naj, catuꞌ jix yakꞌon yij sbꞌi jaxca tiꞌ: Jaꞌ Jehová Naj Akꞌom Watxꞌcꞌulal. Jaꞌ jun yet xaambꞌal tuꞌ eyto ecꞌ bꞌey conobꞌ Ofrá, yul yet txꞌotxꞌ yet ebꞌ yicꞌaal Abiézer.
25 Jaꞌ yet jun akꞌbꞌal tuꞌ jix yalon Jehová tet naj Gedeón jaxca tiꞌ:
—Cha wiꞌtej junoj noꞌ icham wacax xol noꞌ swacax naj ja mam, noꞌ yet scaabꞌ yuneꞌ noꞌ txutxe tuꞌ, noꞌ jujebꞌ abꞌil skꞌinal, catuꞌ cha wuchon ey jun yet xaambꞌal waꞌnebꞌil a yu naj ja mam tet jun dios chi yij Baal, catuꞌ cha makꞌon ey teꞌ teꞌ tol yaꞌ yili eya scꞌatan jun yet xaambꞌal tuꞌ, jun chi yij Aserá. 26 Jaꞌ yibꞌan chꞌen chꞌen waꞌnebꞌil ey bꞌey jun tzalan tuꞌ, jatuꞌ cha waꞌne can a junoj yet xaambꞌal ey jin an. Catuꞌ cha wiꞌontej noꞌ wacax tuꞌ, catuꞌ cha wakꞌon tzꞌaꞌ noꞌ yibꞌan jun yet xaambꞌal tuꞌ. Jaꞌ jun teꞌ teꞌ cha makꞌey tuꞌ, jaꞌ teꞌ cha waoc siꞌal, catuꞌ cha wakꞌon tzꞌaꞌ jun xaambꞌal tuꞌ yibꞌan.
27 Jix lawi tuꞌ, jix yawtentoj laonwan ebꞌ ẍejabꞌ naj Gedeón tuꞌ, catuꞌ jix sjijen jaxca jix yun yalon Jehová tet. Asan xin, tol chi xiw naj swaꞌnen yet cꞌualil yu ebꞌ yican, cꞌal yetoj ebꞌ ánima ey yul conobꞌ tuꞌ, yuxan jaꞌ yet akꞌbꞌalil jix swaꞌne naj. 28 Jaꞌ yet jix kꞌinibꞌi a yet junxa cꞌual, jix yilontej ebꞌ ánima ey yul conobꞌ tuꞌ, tol xax uchle ey jun yet xaambꞌal yet Baal, cꞌal yetoj teꞌ teꞌ eya yin scꞌul jun yet xaambꞌal tuꞌ. Catuꞌ ey jun yet xaambꞌal tol acꞌ waꞌnebꞌil tituꞌ, tol jix akꞌle tzꞌaꞌ jun noꞌ wacax yibꞌan. 29 Catuꞌ jix skꞌanlen ecꞌ ebꞌ: ¿Mactxequel jix unen jun tiꞌ? ẍi ebꞌ.
Jix lawi cꞌal yecꞌ ebꞌ skꞌanlen yabꞌe, catuꞌ jix abꞌchatej, tol jaꞌ naj Gedeón, scꞌaal Joás jix unen jun tuꞌ. Yu jun tuꞌ xin, jix yalon ebꞌ tet Joás jaxca tiꞌ:
30 —Iꞌeltej naj ja cꞌaal tuꞌ, catuꞌ chi cu makꞌon cam naj jon. ¿Tzet yu, yuxan jix yuchey naj jun yet xaambꞌal yet Baal, catuꞌ jix smakꞌon ey teꞌ teꞌ naj tol eya yin scꞌul jun yet xaambꞌal tuꞌ? ẍi ebꞌ ánima tuꞌ.
31 Catuꞌ jix takꞌwi naj Joás tet masanil ebꞌ ánima joyan oc yin tuꞌ jaxca tiꞌ:
—¿Tumi sowalil che col jun Baal tuꞌ, catuꞌ che yakꞌon je jowal syaꞌiloj? Ta jaxca tuꞌ xin, chi skeꞌ scam jun mactxequel chi colon ecꞌ Baal tuꞌ, yajbꞌan cꞌamto chi sajbꞌi eloj. Ta yel tol Dios jun Baal tuꞌ, scol ojabꞌ sbꞌa yul yet, yutol jaꞌ ey yet jun yet xaambꞌal jix uchle ey tuꞌ, ẍi naj Joás.
32 Jaꞌ yet tuꞌ, jix yakꞌon ebꞌ ánima yij sbꞌi Gedeón tuꞌ yin Jerubaal,a chi yal yeloc apnoj scol ojabꞌ sbꞌa jun Baal tuꞌ tet naj, ẍi ebꞌ. Yutol jaꞌ Gedeón jix makꞌon ey jun yet xaambꞌal tuꞌ.
33 Jix lawi tuꞌ xin, jix syambꞌan oc sbꞌa ebꞌ Madianita, yetoj cꞌal ebꞌ Amalecita, yetoj cꞌal ebꞌ caan yetcꞌulal bꞌey chi aol cꞌu, jix kꞌaxbꞌo ecꞌtoj ebꞌ yul jaꞌ Jordán, catuꞌ jix apni oc bꞌulan ebꞌ bꞌey jun panan stiꞌ sjobꞌeal yul yet Jezreel. 34 Jaꞌ yet tuꞌ jix oc Yespíritu Jehová yin naj Gedeón; jix xuon jun yucꞌaꞌ meꞌ naj, catuꞌ jix syambꞌan oc sbꞌa ebꞌ yicꞌaal Abiézer yetoj. 35 Catuꞌ jix yaon cꞌal pax toj ẍejabꞌ bꞌey ebꞌ yicꞌaal Manasés, ta chi yaoc sbꞌa ebꞌ yetoj naj, yetoj cꞌal pax ebꞌ yicꞌaal Aser, cꞌal yetoj ebꞌ yet Zabulón cꞌal yetoj ebꞌ yet Neftalí.
36 Jix yalon naj Gedeón tet Jehová jaxca tiꞌ: Ta caw yel jain chin ja kꞌanbꞌalne yet cha colon el conobꞌ Israel, jaxca ja waloni, txꞌox junoj yechel ey jin an. 37 Jaꞌ tinaniꞌ, oj waey junoj noꞌ stzꞌuumal noꞌ meꞌ pim xil bꞌey yul tecꞌbꞌal tiriw. Jaxa yet skꞌinibꞌ yecal xin, ta caw chꞌacan xil noꞌ tzꞌuum tuꞌ, jaxa pax bꞌey sat txꞌotxꞌ xin, tajin ojabꞌ yili, queytuꞌ oj yun wotajnen eloj, tol yel jain oj jin ja kꞌanbꞌalne yet oj ja colon el ebꞌ conobꞌ Israel, jaxca jix yun ja waloni, ẍi naj Gedeón tuꞌ.
38 Jaxca wal jix yun yalon naj tuꞌ, queytuꞌ jix yunne. Jaꞌ yet jix a waan naj yet jix sajbꞌi eloj, jix spitzꞌon el yal noꞌ tzꞌuum naj, jun miman secꞌ jaꞌ jix el yin noꞌ. 39 Jix yalon naj Gedeón junelxa tet Jehová: Cꞌam ojabꞌ chi tit sjowal ja cꞌul win jaach jin Diosal, yutol chin awi cꞌal oc ja win. Eyto wal junxa yechel chi woche cha txꞌox ey jin an. Jaꞌ yet junelxa tiꞌ, jaꞌ ojabꞌxa sat txꞌotxꞌ txꞌotxꞌ chi chꞌacanbꞌi yu yal akꞌbꞌal, jaxa pax noꞌ tzꞌuum tuꞌ, tol ojabꞌ tajin noꞌ, ẍi naj.
40 Jaꞌ yet jun akꞌbꞌal tuꞌ, jix yun Dios jaxca wal jix yute naj yalon tuꞌ. Jaꞌ yet jix sajbꞌi yet junxa cꞌu, caw wal tajin xil noꞌ tzꞌuum tuꞌ, jaxa pax sat txꞌotxꞌ xin, caw chꞌacan yu yal akꞌbꞌal.