2 Jix yalon Jehová tet naj Gedeón jaxca tiꞌ: Ilaꞌ caw ecꞌal ebꞌ ánima iꞌbꞌil oc ja wu. Ta chi waoc ebꞌ Madianita yul je kꞌabꞌ tinaniꞌ, catuꞌ chi eyqꞌuey ebꞌ je yu, chim la je yalaꞌ tol jaꞌ yetoj je yipalil yul je yet che yakꞌon eyqꞌuey ebꞌ. 3 Yu tuꞌ xin, al tet masanil ebꞌ ja soldado tol chi syambꞌa oc sbꞌa masanil ebꞌ, ta ey ebꞌ chi xiw stoo yin jowal, chi skeꞌ ja chejon meltzo ebꞌ bꞌey sna, ẍi Jehová tet naj.

Queytuꞌ jix yun smeltzo jun 22,000 ebꞌ soldado bꞌey sna. Yuxan asanxane 10,000 ebꞌ jix cancanoj. 4 Jix yalon pax Jehová tet naj Gedeón jaxca tiꞌ: Caw miman to ebꞌ soldado tiꞌ jix cancan ja wetoj. Jaxa tinaniꞌ cha wiꞌtoj ebꞌ naj bꞌey stiꞌ jaꞌ jaꞌ. Jaꞌ tituꞌ oj cam ja wilon oc ebꞌ. Oj jin txꞌoxoc mactxequel ebꞌ smoo stoo yin jowal ja wetoj, cꞌal ebꞌ man oj skeꞌ stoo yin jowal ja wetoj, ẍi Jehová.

5 Jix yiꞌontoj ebꞌ soldado naj Gedeón bꞌey stiꞌ jaꞌ jaꞌ tuꞌ. Jix yalon Jehová jaxca tiꞌ: Masanil ebꞌ tol chi sletxatej jaꞌ yul skꞌabꞌ yuqꞌueꞌ jaxca chi yun slekꞌon jaꞌ noꞌ txꞌiꞌ, jaꞌ ebꞌ tuꞌ txꞌoj cha wiꞌ can el ebꞌ, catuꞌ txꞌoj cha wiꞌ can el ebꞌ tol chi eytoj noan yuqꞌuen atej jaꞌ, ẍi Jehová.

6 Jaꞌ ebꞌ tucꞌal jix sletxatej jaꞌ yul skꞌabꞌ yet jix yuqꞌuen jaꞌ ebꞌ, ey 300 ebꞌ soldado tuꞌ, jal wanxa ebꞌ xin, tol jix eytoj noan ebꞌ yuqꞌuen atej jaꞌ. 7 Jix lawi tuꞌ xin, jix yalon Jehová tet naj Gedeón: Kꞌojbꞌil cꞌal oj jex colcha el wu yetoj ebꞌ 300 soldado tuꞌ, catuꞌ oj je yakꞌon eyqꞌuey ebꞌ Madianita tuꞌ. Jal pax ebꞌ tol jix eytoj noan yuqꞌuen atej jaꞌ jaꞌ tuꞌ xin, pax ojabꞌtoj ebꞌ bꞌey sna, ẍi Jehová.

8 Yu tuꞌ xin, jix yalon naj Gedeón tol chi meltzo cantoj ebꞌ bꞌey sna. Jaꞌ yet cꞌamto chi paxtoj ebꞌ bꞌey sna tuꞌ, jix iꞌle can ecꞌ sloꞌbꞌe ebꞌ yu naj Gedeón cꞌal scacho ebꞌ chi xuꞌ. Asanxane ebꞌ 300 soldado jix sicꞌle can el tuꞌ, jix cancan ebꞌ yetoj naj Gedeón. Jaꞌ bꞌey bꞌulan ey ebꞌ tuꞌ, jaꞌton bꞌey sjolom wonan bꞌey yetcꞌulal yalan eytej bꞌey bꞌulan ey ebꞌ Madianita tuꞌ.

9 Jaꞌ yet jun akꞌbꞌal tuꞌ, jix yalon Jehová tet naj Gedeón: Aan waanoj, catuꞌ chi too ja wakꞌon jowal yetoj ebꞌ Madianita, yutol jain oj waoc ebꞌ yul ja kꞌabꞌ. 10 Ta chach xiw ja too ja wakꞌon jowal yetoj ebꞌ xin, iꞌtoj naj ja chejabꞌ chi yij Purá ja wetoj bꞌey bꞌulan ey ebꞌ je cajat tuꞌ, 11 catuꞌ oj je majon je yabꞌ bꞌey stiꞌlaj skꞌap na ebꞌ tuꞌ, tzet lalan yalon ebꞌ tet junjun, yu wan oj je yabꞌ yalon ebꞌ tuꞌ yuxan man oj jaach xiw ja wakꞌon jowal, ẍi Jehová tet naj Gedeón tuꞌ.

Queytuꞌ jix yute naj Gedeón. Jix too naj yetoj jun ẍejabꞌ chi yij Purá yet akꞌbꞌalil sbꞌey stiꞌlaj bꞌey bꞌulan ey ebꞌ Madianita tuꞌ, jix smajon ebꞌ yabꞌ tzet chi yal ebꞌ. 12 Jaꞌton ebꞌ Madianita, yetoj ebꞌ Amalecita, yetoj cꞌal ebꞌ jix tit yetcꞌulal bꞌey chi aol cꞌu, yutol caw sajleminaj yetoj ebꞌ bꞌey jun acꞌal tuꞌ, jaxca noꞌ mimej kochiꞌ noꞌ. Yutol cꞌamxa chi bꞌischa jantaj sbꞌisil scamello ebꞌ iꞌbꞌil oc yu; laan xacꞌal yilitoj jaxca yarenail bꞌey stiꞌ jaꞌ mar. 13 Catuꞌ jix sjitzontoj sbꞌa naj Gedeón bꞌey stiꞌ skꞌap na ebꞌ scajat tuꞌ, jix yabꞌen yalon sweyich jun naj soldado tet junxa yet soldadoal tuꞌ.

—Ey jun jin weyich jix oqui, tol ey jun ixim pan cebada jix tit xoylabꞌoj yibꞌan atoj bꞌey bꞌulan jon ecꞌ tiꞌ, jix oc chacꞌna ixim yin cu kꞌap na tiꞌ, catuꞌ jix ecꞌ wejna yu, ẍi naj.

14 Jix takꞌwi naj yet soldadoal tuꞌ tet naj jaxca tiꞌ:

—Jaꞌ jun chi yal yeloc apnoj jun ja weyich tuꞌ, tol jaꞌ naj Gedeón scꞌaal Joás a Israel yetoj ebꞌ soldado. Jaꞌ Dios oj cu aon oc yul skꞌabꞌ yetoj cꞌal masanil bꞌey bꞌulan jon ecꞌ tiꞌ, ẍi naj.

15 Jaꞌ yet jix yabꞌen naj Gedeón tzet jix yute yalon jun weyiche tuꞌ ebꞌ, catuꞌ jix ey kaan naj sattaj Jehová yu yalon yu diosalil. Jix lawi tuꞌ, jix too naj bꞌey bꞌulan ecꞌ ebꞌ Israel tuꞌ, jix yalon tet ebꞌ jaxca tiꞌ: Toonwej, tuxa jix ale oc ebꞌ Madianita yul cu kꞌabꞌ yu Jehová, ẍi naj.

16 Jix lawi tuꞌ, oxebꞌ tujan jix yun spoꞌoletoj ebꞌ 300 soldado tuꞌ yu naj Gedeón, catuꞌ jix akꞌle junjun scacho ebꞌ yu naj yet chi xuon ebꞌ, cꞌal junjun mooc eeytoj tzejtebꞌal yul. 17 Jix yalon naj Gedeón tet ebꞌ jaxca tiꞌ:

—Jaꞌ yet oj jin ecꞌ apnoj bꞌey skꞌaxepal ecꞌtoj bꞌey bꞌulan ey ebꞌ cu cajat tuꞌ, oj je yiloni tzet oj wunne, queytuꞌ oj je yun pax jaex tiꞌ. 18 Jaꞌ yet oj je yabꞌen jin xuon noꞌ jin cacho yetoj ebꞌ jaꞌjun wetoj tiꞌ, catuꞌ oj je xuon pax je yet je masanil bꞌey stiꞌlaj bꞌey bꞌulan ecꞌ ebꞌ cu cajat tuꞌ, catuꞌ oj je yaon el je yaw. Oj je yalon jaxca tiꞌ: ¡Yu Jehová cꞌal yu naj Gedeón! je chi, ẍi naj tet ebꞌ.

19 Jaꞌ yet jix apni oc naj Gedeón yetoj ebꞌ 100 soldado tzajan oc yintaj bꞌey skꞌaxepal ecꞌtoj bꞌey ey ebꞌ Madianita tuꞌ, lalan wal sqꞌuexlen sbꞌa ebꞌ chi teynen yet chuman akꞌbꞌal. Jaꞌton wal yet tuꞌ jix xuon noꞌ scacho ebꞌ, jix smakꞌon poꞌo smooc ebꞌ iꞌbꞌil ocoj. 20 Junne cꞌal jix yun xuon scacho ebꞌ yox tujanil, cꞌal smakꞌon poꞌo smooc ebꞌ, jaxa yetoj sqꞌuexan kꞌabꞌ ebꞌ tzejnen a stzejtebꞌal ebꞌ tuꞌ, jix yalon ebꞌ yin ipal jaxca ti: ¡Kakꞌwej jowal yu Jehová cꞌal yu naj Gedeón! ẍi ebꞌ. 21 Jix can xacꞌal can linan ebꞌ soldado Israel tuꞌ yinlaj bꞌey bꞌulan ecꞌ ebꞌ tuꞌ. Jaxa wan scajat ebꞌ tuꞌ, tol ipan xacꞌal yel ebꞌ, caw chi el yaw ebꞌ yu xiwcꞌulal. 22 Jaꞌ yet jix xuon scacho ebꞌ 300 ebꞌ Israel tuꞌ, jaxa Jehová jix somontoj snaꞌbꞌal wan scajat ebꞌ tuꞌ, jaxa cꞌal oc ebꞌ jix smakꞌle cam sbꞌa. Ey pax ebꞌ jix eli, jix too ebꞌ bꞌey conobꞌ Bet-sitá, bꞌey yetcꞌulal Sererá, masantaꞌcꞌal jix apni oc ebꞌ bꞌey smoonal txꞌotxꞌ Abel-meholá bꞌey scawilal Tabat.

23 Jix lawi tuꞌ, jix awtele ebꞌ yicꞌaal Neftalí, ebꞌ yicꞌaal Aser, yetoj cꞌal ebꞌ yicꞌaal Manasés, yu scolwa ebꞌ stoo yintaj ebꞌ Madianita tuꞌ. 24 Catuꞌ jix yalon naj Gedeón tol chi tit cꞌal pax ebꞌ yicꞌaal Efraín, ebꞌ caan bꞌey tzalquiltaj txꞌotxꞌ, yet chi too ebꞌ smajon yin eymanil bꞌey chi skꞌaxbꞌonen jaꞌ Jordán ebꞌ ánima bꞌey Bet-bará, jaꞌ yet cꞌamto chi apni oc wan scajat ebꞌ tuꞌ, eyman jix too ebꞌ yicꞌaal Efraín tuꞌ yu stoo smajoni. 25 Jix michꞌcha cawan syaawil ebꞌ soldado tuꞌ yu ebꞌ, ey jun chi yij Oreb, ey junxa, chi yij Zeeb. Jaꞌ naj Oreb tuꞌ jix cam bꞌey jun chꞌen chꞌen chi yij Oreb tinaniꞌ. Jaxa naj Zeeb jix cam naj bꞌey jun tecꞌbꞌal uva, yuxan ja jun tecꞌbꞌal uva tuꞌ, Zeeb sbꞌi tinaniꞌ. Jix lawi tuꞌ, catuꞌ jix tzajlo ebꞌ yicꞌaal Efraín yintaj ebꞌ Madianita tuꞌ, catuꞌ jix iꞌletoj sjolom naj Oreb cꞌal sjolom naj Zeeb yu ebꞌ tet naj Gedeón, bꞌey jaꞌ Jordán.