—¿Tumi jix je naꞌ tol miman tzet jix wun je yintaj? Jaꞌ tzet jix je yun yet xacꞌal slawubꞌal tiꞌ, caw miman yeloc apnoj yintaj tzet jix kun yet sbꞌabꞌelal, 3 yutol jix ale oc naj Oreb cꞌal naj Zeba, yul je kꞌabꞌ yu Jehová, jaꞌton ebꞌ naj syaawil ebꞌ soldado. ¿Tumi miman tzet jix wun yintaj tzet jix je yun tuꞌ che naꞌ? ẍi naj Gedeón tet ebꞌ.

Jaꞌ yet jix yabꞌen ebꞌ yicꞌaal Efraín tzet jix yal naj Gedeón tuꞌ, jix oc tucan yakꞌon sjowal ebꞌ tet naj. 4 Jix ey apnoj naj Gedeón yetoj ebꞌ 300 soldado bꞌey stiꞌ jaꞌ Jordán, catuꞌ jix kꞌaxbꞌon ecꞌtoj ebꞌ yul jaꞌ jaꞌ tuꞌ. Caxcꞌal caw chi cꞌuumbꞌi ebꞌ naj, jix too cꞌal tzajan ebꞌ naj yintaj scajat tuꞌ. 5 Jaꞌ yet jix apni oc ebꞌ bꞌey conobꞌ Sucot, catuꞌ jix yalon naj Gedeón tet ebꞌ yaaw tuꞌ jaxca tiꞌ:

—Chi wal ey jex, eloj wal yin je cꞌul, tol che yakꞌwej niꞌoj tzet chi sloꞌ ebꞌ naj jaꞌjun wetoj tiꞌ, yutol caw chi cꞌuumbꞌi ebꞌ naj, yutol ujtebꞌil oc ebꞌ syaawil ebꞌ Madianita ku jon, jaꞌton naj Zébah cꞌal naj Salmuná, ẍi naj Gedeón tuꞌ.

6 Catuꞌ jix takꞌwi ebꞌ yaaw yeoc yul conobꞌ tuꞌ tet naj jaxca tiꞌ:

—¿Tumi xax michꞌcha pax naj Zébah, cꞌal naj Salmuná tuꞌ je yu tinaniꞌ, yuxan cha woche chi low ebꞌ naj soldado tiꞌ? ẍi ebꞌ tet naj.

7 Catuꞌ jix takꞌwi naj Gedeón:

—Jaꞌ yet xax ale oc naj Zébah cꞌal naj Salmuná tuꞌ yul jin kꞌabꞌ yu Jehová, jaxa yet chin meltzotej titiꞌ, catuꞌ oj jin tzilon el je chiꞌbꞌeal je yin, catuꞌ oj jex jin makꞌon yetoj teꞌ qꞌuix oj wiꞌtej bꞌey txꞌotxꞌ cusiltaj txꞌotxꞌ, ẍi naj Gedeón.

8 Jix lawi tuꞌ, jix apni oc ebꞌ bꞌey conobꞌ Penuel, jix skꞌanon pax sloꞌbꞌe ebꞌ soldado tuꞌ tituꞌ, jaxca cꞌal jix yun yalon ebꞌ bꞌey conobꞌ Sucot, jaxca tuꞌ jix yun stakꞌwi pax ebꞌ a conobꞌ Penuel tet ebꞌ. 9 Jix yalon pax naj Gedeón tet ebꞌ jaxca tiꞌ:

—Jaꞌ yet oj jin meltzo yet xax eyqꞌuey ebꞌ jin cajat tuꞌ wu, oj jin makꞌon ey wejna jun je torre tiꞌ, ẍi naj tet ebꞌ.

10 Jaꞌ naj Zébah yetoj naj Salmuná eyecꞌ ebꞌ bꞌey conobꞌ Carcor, tzajan oc jun 15,000 soldado ebꞌ Madianita yintaj ebꞌ. Asanxane ebꞌ tuꞌ, yutol ey 120,000 ebꞌ xax cami. 11 Jix tzajlo naj Gedeón yetoj ebꞌ soldado yintaj ebꞌ scajat tuꞌ bꞌey stiꞌlaj txꞌotxꞌ cusiltaj txꞌotxꞌ bꞌey sattaj ecꞌtoj Nóbah, cꞌal bꞌey Jogbehá. Jix yakꞌon eyqꞌueyoj, yutol eyoc ebꞌ soldado Madianita tuꞌ yin qꞌueycꞌulal. 12 Jal pax naj Zébah, yetoj naj Salmuná jix el jininoj ebꞌ scolon sbꞌa, asan xin, jix too tzajan naj Gedeón tuꞌ yintaj ebꞌ, masantaꞌcꞌal jix michꞌcha ebꞌ yu naj, catuꞌ jix sajlemtoj soldado ebꞌ tuꞌ yu xiwcꞌulal tet naj Gedeón.

13 Jaꞌ yet jix meltzo naj Gedeón yin jowal tuꞌ, jix ecꞌtoj ebꞌ bꞌey jun cotzan chi yij Heres. 14 Jaꞌ tituꞌ jix michꞌcha jun naj achꞌe a conobꞌ Sucot yu ebꞌ, catuꞌ jix skꞌanlen el ebꞌ tet naj, tzettaj cꞌal sbꞌi ebꞌ eyoc syaawiloj conobꞌ Sucot, catuꞌ jix stzꞌibꞌen sbꞌi junjun ebꞌ, ey 77 ebꞌ yin masanil. 15 Jix lawi tuꞌ, jix too naj Gedeón bꞌey conobꞌ Sucot, catuꞌ jix yalon tet ebꞌ ánima tituꞌ jaxca tiꞌ:

—¿Chim je naꞌtej tzet jix yun je bꞌuchwa win yu naj Zébah, cꞌal yu naj Salmuná? Jacꞌalaꞌ ¿chim je naꞌtej tol ma je yakꞌ niꞌoj sloꞌbꞌe ebꞌ naj jin soldado yet caw ey swail ebꞌ naj, yet caw chi cꞌuumbꞌi ebꞌ naj? Jix je yaloni: Tumi xax michꞌcha ebꞌ naj tuꞌ je yu, je chi ey jin. Jaꞌ tinaniꞌ xin, ti ey ebꞌ naj tiꞌ, ẍi naj Gedeón tet ebꞌ.

16 Jix lawi tuꞌ, jix yiꞌontej jun teꞌ qꞌuix naj Gedeón jix yiꞌtej bꞌey txꞌotxꞌ cusiltaj txꞌotxꞌ, jix tzil-le el ẍiꞌbꞌeal ebꞌ syaawil conobꞌ Sucot tuꞌ yu naj yetoj teꞌ qꞌuix tuꞌ. 17 Jix lawi tuꞌ, jix too pax naj bꞌey conobꞌ Penuel, catuꞌ jix smakꞌon ey wejna jun torre naj tituꞌ, jix smakꞌon cam masanil ebꞌ winaj ey tituꞌ. 18 Jix lawi tuꞌ xin, jix skꞌanlen naj Gedeón tet naj Zébah, cꞌal tet naj Salmuná jaxca tiꞌ:

—¿Tzet utbꞌil yili ebꞌ naj jix je makꞌ cam bꞌey Tabor? ẍi naj tet ebꞌ.

Catuꞌ jix takꞌwi ebꞌ tet naj:

—Laan yili ebꞌ naj jaxca ja wili tiꞌ. Jaxca yili ebꞌ yaaw, queytuꞌ yili ebꞌ naj, ẍi ebꞌ naj.

19 Jaꞌ yet jix yabꞌen naj Gedeón jaxca tuꞌ, jix a yaw naj:

—Wuẍtaj jin bꞌa yetoj ebꞌ naj jix je makꞌ cam tuꞌ, junne jin txutx yetoj ebꞌ naj. Jaꞌ tinaniꞌ chi waoc Jehová yin testigoal. Tol oj wal ma je makꞌ cam ebꞌ naj wuẍtaj tuꞌ, cꞌam mi chex jin makꞌ cam tinaniꞌ, ẍi naj Gedeón tet ebꞌ naj.

20 Jix lawi tuꞌ, jix yalon naj tet jun sbꞌabꞌel scꞌaal chi yij Jéter jaxca tiꞌ:

—Aan waanoj, catuꞌ cha makꞌon cam ebꞌ naj tiꞌ, ẍi naj tet scꞌaal tuꞌ.

Jaꞌ naj Jéter tuꞌ, colantaj achꞌe naj, yuxan chi xiw naj yiꞌon atej yespada tuꞌ yet chi smakꞌon cam ebꞌ. 21 Jix lawi tuꞌ xin, jix yalon naj Zébah yetoj naj Salmuná tet naj Gedeón jaxca tiꞌ:

—¿Tzet yuxan man jaach oj chon ja makꞌ camoj, yutol caw otajbꞌil jaach, tol cꞌam chach xiwi, caw ey ja wip? ẍi ebꞌ tet naj.

Catuꞌ jix a lemna naj Gedeón, jix smakꞌon cam ebꞌ yaaw tuꞌ naj. Jix yiꞌon el naj wan chꞌen chꞌen eyoc yelawiloj yin snukꞌ noꞌ scamello ebꞌ. 22 Jix lawi tuꞌ xin, jix yalon ebꞌ yet Israelal tet naj Gedeón jaxca tiꞌ:

—Jaach tiꞌ jix jon ja colel yul skꞌabꞌ ebꞌ Madianita, yuxan jaach tiꞌ yetoj cꞌal ebꞌ ja wicꞌaal chi oc can ebꞌ yin yaawil cu xol jon, ẍi ebꞌ tet naj.

23 Jix takꞌwi naj Gedeón tet ebꞌ jaxca tiꞌ:

—Man jain oj, oj wakꞌ yaawilal je xol, manaj pax ebꞌ wuninal yet bꞌakꞌin, yutol asanne Jehová oj yakꞌ yaawilal kibꞌan. 24 Asan jun chin kꞌan ey jex, tol che yakꞌ chꞌen kolkꞌabꞌe ey jin, chꞌen jix je yiꞌecꞌ bꞌey jix oc jowal tuꞌ, ẍi naj Gedeón.

Yutol oro cꞌal el wan kolkꞌabꞌe eyoc yin skꞌabꞌ ebꞌ caan bꞌey txꞌotxꞌ cusiltaj txꞌotxꞌ. 25 Catuꞌ jix takꞌwi ebꞌ conobꞌ Israel tet naj jaxca tiꞌ:

—Yetoj masanil cu cꞌul chi kakꞌon jantaj chꞌen oro tiꞌ ey jaach. Catuꞌ jix sjenbꞌan ey jun kꞌap ebꞌ sat txꞌotxꞌ, jix yaon ey masanil chꞌen oro ebꞌ tuꞌ yibꞌan.

26 Jaꞌ yet jix yechen chꞌen oro ebꞌ tuꞌ, ey 42 libra yalil chꞌen. Txꞌoj pax ye wanxa chꞌen chꞌen watxꞌ yili, cꞌal wan yelawil spichil ebꞌ sreyal Madianita, yetoj cꞌal wan chꞌen chꞌen eyoc yelawiloj snukꞌ noꞌ scamello ebꞌ. 27 Jaꞌ yetoj wan chꞌen oro tuꞌ, jix swaꞌne jun echele naj Gedeón, catuꞌ jix yaon can oc yul jun conobꞌ chi yij Ofrá. Jaxa masanil ebꞌ yet conobꞌ naj tuꞌ, jix yintajne can el Jehová ebꞌ, jix oc ebꞌ yin eyilal tet jun echele tuꞌ. Jaꞌ jun tuꞌ jix akꞌon etex el snaꞌbꞌal naj Gedeón yetoj cꞌal ebꞌ yuninal.

28 Jal ebꞌ Madianita tuꞌ xin, jix oc can ebꞌ yakꞌomaloj servil ebꞌ Israel, cꞌamxa cꞌal chi skeꞌ scolon sbꞌa ebꞌ. Yin cawinaj abꞌil jix can ebꞌ conobꞌ Israel yin tzalacꞌulal yet iquisto ecꞌ naj Gedeón yetoj ebꞌ, cꞌamxa jowal jix oc yul sconobꞌ ebꞌ tuꞌ.

29 Jix lawi tuꞌ xin, jix paxtoj naj Jerubaal bꞌey sconobꞌ. 30 Ey 70 yuninal naj jix ali, yutol caw ecꞌal yistil naj jix yiꞌ. 31 Ey pax junxa ix scaabꞌ yistil naj bꞌey conobꞌ Siquem. Jix ali jun yuneꞌ ix yetoj naj, jix yakꞌon yij sbꞌi naj Abimélec.

32 Caw icham winajxa naj Gedeón, scꞌaal Joás yet jix cami. Jatuꞌ jix muji naj bꞌey mujan smam bꞌey conobꞌ Ofrá, bꞌey yul txꞌotxꞌ yet ebꞌ yicꞌaal Abiézer.

33 Jaꞌ yet jix camtoj naj Gedeón tuꞌ, jix cꞌoli yiꞌon el sbꞌa ebꞌ conobꞌ Israel yintaj Jehová. Jaxa tet jun yechel comon dios chi yij Baal jix yiꞌey sbꞌa ebꞌ, jaxa jun comon dios chi yij Baal-berit jix yaloc ebꞌ sdiosaloj. 34 Jix too qꞌueycꞌulal Jehová cu Diosal yu ebꞌ conobꞌ Israel. Cꞌamxa chi snaꞌ niꞌoj ebꞌ, ta tol jaꞌ Dios jix colon el ebꞌ yul skꞌabꞌ ebꞌ scajat ebꞌ tuꞌ. 35 Cꞌamxa junoj tzetyetal watxꞌ jix yakꞌ ebꞌ spajtzebꞌaloj tet ebꞌ yicꞌaal naj Jerubaal, jaꞌton naj Gedeón, yu jantaj bꞌey jix colwa naj yin ebꞌ.