2 —Yutol kicanto cu bꞌa je yetoj, yuxan chi wal ey jex, ta chi el yin je cꞌul, tol che monte ebꞌ je yet conobꞌ bꞌey Siquem tiꞌ, catuꞌ che kꞌanlen tet ebꞌ jaxca tiꞌ: Ta watxꞌ chi oc ebꞌ 70 scꞌaal naj Jerubaal yin yaawil je xol, ma yel xacꞌal watxꞌ tol junne winaj chi oc je yaawiloj. Naꞌwejtej, tol asanne jin ey wu jin bꞌa je yetoj, ẍi naj tet ebꞌ.

3 Yutol eyto yu sbꞌa naj yetoj ebꞌ, yu tuꞌ xin, yuxan jix oc ian naj smonten ebꞌ ánima bꞌey Siquem tuꞌ, tol jaꞌ Abimélec tuꞌ chi oc yin yaawil xol ebꞌ. 4 Yetoj cꞌal pax oj, jix yiꞌon eltej jun 70 chꞌen tumin plata ebꞌ yul stemplo jun comon dios Baal-berit, jix yakꞌon ebꞌ tet naj Abimélec tuꞌ. Jaꞌ chꞌen tumin tuꞌ jix yakꞌ tet wan ebꞌ winaj caw pena tzet chi el yuneni, yet chi oc ebꞌ yetoj naj, catuꞌ jix too ebꞌ yintaj naj, 5 bꞌey conobꞌ Ofrá, bꞌey jix ecꞌ naj Jerubaal smam naj. Jaꞌ tituꞌ jix makꞌle cam ebꞌ 70 yuẍtaj naj Abimélec yibꞌan jun chꞌen chꞌen yu ebꞌ. Asanxane naj Jotam jix colcha canoj, yutol jix yewbꞌa el sbꞌa naj. Jaꞌ naj tuꞌ, tzunan unin xacꞌal naj yintaj masanil ebꞌ scꞌaal naj Jerubaal tuꞌ. 6 Jix lawi tuꞌ xin, jaꞌ masanil ebꞌ ánima bꞌey conobꞌ Siquem, cꞌal ebꞌ ey bꞌey conobꞌ Bet-milo jix syambꞌa oc sbꞌa ebꞌ bꞌey yich jun teꞌ jii ey bꞌey Siquem tuꞌ. Jaꞌ tituꞌ ey jun chꞌen chꞌen yaꞌ yili oc yu ebꞌ, jaꞌton tituꞌ jix oc naj Abimélec yin yaawil yu ebꞌ.

7 Jaꞌ yet jix yabꞌen naj Jotam, tol jix oc naj Abimélec yin yaawil yu ebꞌ, catuꞌ jix atoj naj bꞌey jun tzalan yin scꞌul wonan Guerizim, jix awi eytej naj yin ipal, yet watxꞌ masanil ebꞌ chi abꞌen tzet chi yal naj, jix yalon naj jaxca tiꞌ:

Je masanil jex caan bꞌey conobꞌ Siquem, chi cam je yabꞌen tzet oj walaꞌ, yet watxꞌ jaxca tuꞌ oj yabꞌ Dios tzet oj je yalaꞌ.

8 Jaꞌ yet junel, masanil abꞌ teꞌ teꞌ jix yoche teꞌ tol ey junoj syaawil teꞌ chi yaocoj. Yu tuꞌ xin, jix yalon masanil teꞌ teꞌ tet teꞌ olivo, tol chi oc teꞌ syaawiloj teꞌ masanil. 9 Jix takꞌwi teꞌ olivo tuꞌ, jix yalon teꞌ jaxca tiꞌ: Cꞌamaj, ta chin oc je yaawiloj je masanil, cꞌamxa chi wakꞌ aceite olivo, chi kꞌanbꞌalnele yu yiꞌle a can sbꞌi Dios, cꞌal yet chi skꞌanbꞌalne ebꞌ ánima, ẍi abꞌ teꞌ.

10 Jix lawi tuꞌ, jix yalon abꞌ teꞌ teꞌ, tet teꞌ higo, tol chi oc teꞌ syaawiloj masanil teꞌ teꞌ. 11 Jix yalon abꞌ pax teꞌ higo jaxca tiꞌ: Cꞌamaj, ta chin oc je yaawiloj je masanil, cꞌamxa mi chi wakꞌ jin sat caw chiꞌ chi akꞌon tzalabꞌoj scꞌul ebꞌ ánima yetoj cꞌal Dios, ẍi abꞌ teꞌ.

12 Jix yalon abꞌ pax teꞌ tet an uva jaxca tiꞌ: Tol chi oc teꞌ syaawiloj masanil teꞌ teꞌ. 13 Jix yalon abꞌ pax an uva tuꞌ jaxca tiꞌ: Cꞌamaj, ta chin oc je yaawiloj je masanil, chim jin bꞌej wakꞌon jin vinoal chi akꞌon tzalabꞌoj scꞌul Dios, yetoj cꞌal ebꞌ ánima, ẍi abꞌ an. 14 Yin xa abꞌ slawubꞌal, jix yalon masanil teꞌ teꞌ tet teꞌ qꞌuix, tol chi oc teꞌ syaawiloj teꞌ. 15 Jix yalon abꞌ teꞌ qꞌuix jaxca tiꞌ: Tol chi skeꞌ yoc teꞌ syaawiloj teꞌ teꞌ masanil. Jix yalon abꞌ teꞌ jaxca tiꞌ: Ta yel yin masanil je cꞌul chin je yaoc je yaawiloj, ocanwej yalan wenel je masanil. Ta cꞌam pax chi ẍaꞌ je cꞌul chin oc je yaawiloj an xin, el ojabꞌtej junoj miman xaj kꞌakꞌ win, catuꞌ chi tzꞌaꞌcantoj teꞌ kꞌuteꞌ bꞌey txꞌotxꞌ Líbano, ẍi abꞌ teꞌ.

16 Jaꞌ tinaniꞌ xin, chin kꞌanle ey jex: ¿Tumi yel watxꞌ che yunne, yuxan jix je yaoc naj Abimélec tuꞌ je yaawiloj? ¿Tumi smoo jaxca tuꞌ che yute ebꞌ yicꞌaal naj Jerubaal tuꞌ tinaniꞌ? 17 Jix jex col-le el yu naj jin mam yul skꞌabꞌ ebꞌ Madianita. 18 Jal jex jaex tiꞌ, tol jix jex meltzo oc yin ebꞌ yicꞌaal naj jin mam tuꞌ, jix je makꞌon cam ebꞌ 70 scꞌaal naj yibꞌan jun chꞌen chꞌen. ¿Tzet wal je ye xin, yuxan jix je yaoc naj Abimélec je yaawiloj, jaꞌton naj yuneꞌ jun ix scaabꞌ yistil naj jin mam, asan mi yutol eyto je yu je bꞌa yetoj ix xutx naj tuꞌ? 19 Chi wal can ey jex tinaniꞌ: Ta yel tol jichan je yeoc yu naj jin mam tol camnajxa tuꞌ, catuꞌ che yunen jaxca tuꞌ yetoj ebꞌ yicꞌaal naj, watxꞌ ojabꞌ je ye yetoj naj Abimélec tuꞌ, catuꞌ watxꞌ ojabꞌ cꞌal oj yun yeloc naj je xol. 20 Ta cꞌamaj xin, tit ojabꞌ can junoj miman bꞌolobꞌ yin naj Abimélec tuꞌ, catuꞌ chi qꞌueycan el conobꞌ Siquem, yetoj cꞌal conobꞌ Bet-milo; jaxa bꞌey Siquem cꞌal bꞌey Bet-milo chi el pax tej junoj miman kꞌakꞌ, yet chi qꞌueyle el naj Abimélec, ẍi naj Jotam.

21 Jix lawi yalon naj Jotam wan kꞌane tuꞌ, catuꞌ jix el naj tituꞌ, jix too caey naj bꞌey jun conobꞌ chi yij Beer, yutol chi xiw naj tet jun yuẍtaj chi yij Abimélec tuꞌ.

22 Oxebꞌ abꞌil jix yakꞌ yaawil naj Abimélec tuꞌ yul conobꞌ Israel. 23 Jix lawi tuꞌ xin, jaꞌ Dios jix aontej jun pena espíritu snan xol ebꞌ a Siquem yetoj naj Abimélec tuꞌ, catuꞌ jix scajlen a sbꞌa ebꞌ naj. 24 Queytuꞌ jix yun spajtzele tet naj yu scamichal ebꞌ 70 yuẍtaj naj jix smakꞌ cam tuꞌ. Jix pajtzele cꞌal pax tet ebꞌ conobꞌ Siquem tuꞌ, yutol jix yaoc sbꞌa ebꞌ yetoj naj Abimélec yin jun spenail tuꞌ. 25 Ey ebꞌ a Siquem tuꞌ, jix too yewbꞌa el sbꞌa bꞌey stiꞌlaj bꞌe bꞌey txꞌotxꞌ tzalquiltaj, comon xacꞌal chi elkꞌanele ecꞌ stzettaj yetal ebꞌ ánima chi ecꞌ yul-laj bꞌe tuꞌ yu ebꞌ bꞌey scawilal conobꞌ tuꞌ. Jix yabꞌen oc naj Abimélec tol jaxca tuꞌ chi yun ebꞌ naj.

26 Jaꞌ yet tuꞌ xin, jix apni oc jun winaj chi yij Gáal, scꞌaal naj Ébed yetoj ebꞌ yican bꞌey conobꞌ Siquem tuꞌ, caw watxꞌ naj yul sat ebꞌ ánima tuꞌ. 27 Jaꞌ yet tuꞌ, jix eltoj ebꞌ bꞌey stiꞌeltoj conobꞌ, yet chi syambꞌa an uva ebꞌ, catuꞌ jix spitzꞌon el yal an uva ebꞌ tuꞌ yuqꞌueꞌ. Catuꞌ jix yaon oc jun kꞌin ebꞌ, jix low ebꞌ, cꞌal yuqꞌuen an ebꞌ bꞌey yul stemplo sdiosal tuꞌ. Jaꞌ yet tuꞌ, caw pena jix yal ebꞌ yin naj Abimélec tuꞌ. 28 Catuꞌ jix oc ian naj Gáal yaloni: ¿Tzet yu, yuxan jaꞌ naj chi yij Abimélec chi akꞌon yaawil cu xol? Jaꞌ naj tuꞌ, scꞌaal Jerubaal naj, jaꞌ naj Zebul eyoc yakꞌomaloj servil naj. Jaꞌ ebꞌ tuꞌ cꞌam niꞌoj yeloc apnoj ebꞌ. Jal jon pax a Siquem jon tiꞌ, ¿tzet animail jon? ¿Tumi chi cu oc xacꞌal ẍejabꞌoj ebꞌ naj tiꞌ? Caw chi cam cu naꞌonwejtej tinaniꞌ, tol jaꞌ naj kichmam Hamor, tol jaꞌ naj jix waꞌnen a conobꞌ Siquem tiꞌ, yuxan kiꞌwej el cu bꞌa yul skꞌabꞌ naj Abimélec tiꞌ. 29 A… ta jain ey jin oc je yaawiloj, xax mi jin qꞌueyel naj Abimélec tuꞌ, xax mi wal tet naj jaxca tiꞌ: Yambꞌa oc masanil ebꞌ ja soldado, catuꞌ chi kakꞌon jowal, jin chi mi tet naj, ẍi naj Gáal tuꞌ.

30 Jaꞌ yet jix yabꞌen naj Zebul, naj eyoc syaawiloj conobꞌ Siquem tuꞌ, yu tzet chi yal naj Gáal tuꞌ, caw jix tit sjowal naj. 31 Eyman jix yatoj kꞌane naj tet naj Abimélec yin ewantajil, yet eyecꞌ naj bꞌey conobꞌ Arumá. Jix yalontoj naj jaxca tiꞌ: Jaꞌ naj Gáal, scꞌaal naj Ébed, jix jul naj yetoj ebꞌ yuẍtaj bꞌey conobꞌ Siquem tiꞌ, lalan yakꞌon scꞌul ebꞌ ánima naj, yet chi oc ebꞌ naj cu cajatoj. 32 Yu tuꞌ xin, titan yet jun akꞌbꞌalil yetoj ebꞌ ja soldado, catuꞌ che yewbꞌan el je bꞌa bꞌey stiꞌlaj conobꞌ tiꞌ. 33 Jaꞌ yet tuxa chi sajbꞌi eloj, catuꞌ chex oc je yakꞌon jowal yin jun conobꞌ tiꞌ, jaꞌ yet chi eltoj naj Gáal yakꞌon jowal ja wetoj yetoj ebꞌ soldado, oj xacꞌal je yilaꞌ tzet oj je yute ebꞌ, ẍi toj naj Zebul tuꞌ.

34 Yuxan jix tit naj Abimélec yet akꞌbꞌalil yetoj ebꞌ soldado tuꞌ. Canebꞌ tujan jix yun spoꞌon ecꞌ sbꞌa ebꞌ bꞌey yinlaj conobꞌ Siquem, catuꞌ jix yewbꞌa el sbꞌa ebꞌ. 35 Jix eltoj naj Gáal bꞌey stiꞌ spuertail smuroal conobꞌ tuꞌ, catuꞌ jix eltej naj Abimélec yetoj ebꞌ soldado bꞌey ewan el ebꞌ tuꞌ. 36 Jaꞌ yet jix yilon naj Gáal jun tuꞌ, catuꞌ jix yalon tet naj Zebul jaxca tiꞌ:

—Il ton abꞌi, masanil bꞌey satlaj txꞌotxꞌ wonan chi eyol ebꞌ soldado, ẍi naj Gáal.

—Cꞌamaj, yenel wonan jun cha wil tuꞌ, ẍi naj Zebul tuꞌ tet naj.

37 Jix yalon pax naj Gáal junelxa:

—Jacꞌalaꞌ cꞌal pax bꞌey txꞌotxꞌ tzalan chi yij smuxuc txꞌotxꞌ txꞌotxꞌ chi eytej wanxa ebꞌ soldado, yetoj cꞌal bꞌey sbꞌeal teꞌ jii yet ebꞌ naꞌom el kꞌane, jatuꞌ chi ey pax jul wanxa ebꞌ soldado, ẍi naj Gáal tuꞌ.

38 Jix takꞌwi naj Zebul jaxca tiꞌ:

—¡Chi cam wal ja naꞌon tzet cha walaꞌ! Caw lekꞌtiꞌ jaach. Tol jix ja walaꞌ tol cꞌam yeloc apnoj naj Abimélec yet chi cu oc ẍejabꞌoj. Jaꞌ tinaniꞌ, jaꞌton ebꞌ soldado jix ja bꞌuchuꞌ, elantoj tinaniꞌ, yet cha wakꞌon jowal yetoj ebꞌ, ẍi naj Zebul tuꞌ.

39 Jix lawi tuꞌ, jix oc naj Gáal yijbꞌan ebꞌ ánima bꞌey conobꞌ Siquem, yet chi too yakꞌon jowal ebꞌ yetoj naj Abimélec. 40 Jix too lemna naj Abimélec yetoj ebꞌ soldado yin naj Gáal, yetoj cꞌal ebꞌ jaꞌjun yetoj, yuxan jix too scol sbꞌa naj Gáal, jix octoj naj bꞌey spuertail conobꞌ. Caw ecꞌal ebꞌ jix cam bꞌey spuertail conobꞌ tuꞌ. 41 Jix lawi tuꞌ xin, jix meltzotoj naj Abimélec bꞌey conobꞌ Arumá. Jaxa naj Zebul jix ujten el naj Gáal, yetoj ebꞌ yuẍtaj bꞌey conobꞌ Siquem yin junelne.

42 Jix yabꞌen naj Abimélec tol chi eltoj ebꞌ a Siquem yu yakꞌon jowal yet junxa cꞌu. 43 Jaꞌ yet jix yabꞌen oc naj, catuꞌ jix spoꞌontoj ebꞌ soldado naj yin oxebꞌ tujan, jix yewbꞌa el sbꞌa ebꞌ xol-laj teꞌ. Jaꞌ yet jix yilon yelol ebꞌ ánima ebꞌ bꞌey spuertail conobꞌ tuꞌ, jix eltej ebꞌ soldado bꞌey ewan el ebꞌ tuꞌ, catuꞌ jix yakꞌon jowal ebꞌ yetoj ebꞌ. 44 Yet cꞌal jun txolan tuꞌ xin, catuꞌ jix too naj Abimélec yetoj junxa tujan ebꞌ soldado smajon bꞌey spuertail conobꞌ, jal caabꞌxa tujan ebꞌ xin, jix oc ebꞌ yakꞌon jowal yetoj ebꞌ ánima jix eltoj yinlaj conobꞌ Siquem tuꞌ. 45 Masanil yet jun cꞌual tuꞌ eyoc jowal yu naj Abimélec, masantaꞌcꞌal jix eyqꞌuey jun conobꞌ tuꞌ yu naj, catuꞌ jix sqꞌueyon can eloj, jix smakꞌon cam masanil ánima naj, catuꞌ jix secon can ey atzꞌam naj yibꞌan jun conobꞌ tuꞌ.

46 Jaꞌ yet jix yabꞌen oc ebꞌ ánima bꞌey snail bꞌey chi scol sbꞌa ebꞌ bꞌey conobꞌ Siquem tuꞌ, yu tzet jix yun cantoj conobꞌ Siquem yu naj Abimélec tuꞌ, jix too yewbꞌa el sbꞌa bꞌey yul stemplo jun echele chi yij Baal-berit. 47 Jaꞌ yet jix yabꞌen oc naj Abimélec, tol jaꞌ tituꞌ chi yewbꞌa el sbꞌa ebꞌ ánima tuꞌ, 48 jix too naj rey Abimélec yetoj masanil ebꞌ soldado bꞌey sjolom jun wonan chi yij Salmón, jix yiꞌontoj jun eche naj, catuꞌ jix stzokꞌon el wan skꞌabꞌ teꞌ naj, jix yaon atoj sjolom xicꞌ, jix yalon tet masanil ebꞌ soldado jaꞌjun yetoj tuꞌ, tol queytuꞌ chi yun cꞌal pax ebꞌ naj yin eymanil. 49 Yuxan masanil ebꞌ soldado tuꞌ jix stzokꞌon el skꞌabꞌ teꞌ teꞌ ebꞌ, jix oc tzajan ebꞌ yintaj naj Abimélec tuꞌ, masantaꞌcꞌal jix apni oc ebꞌ bꞌey jun templo tuꞌ, catuꞌ jix sbꞌulbꞌan oc wan skꞌabꞌ teꞌ tuꞌ ebꞌ yin jun na bꞌey chi scol sbꞌa ebꞌ tuꞌ. Jix yaon oc skꞌakꞌal ebꞌ, yuxan jix cam masanil ebꞌ ánima yaman ecꞌ tituꞌ, ey mi junoj mil ebꞌ winaj yetoj ebꞌ ix ix.

50 Jix lawi tuꞌ xin, jix too naj Abimélec yakꞌon jowal yin conobꞌ Tebés. Eyman jix oc joyan ebꞌ yin jun conobꞌ tuꞌ, catuꞌ jix eyqꞌuey yu ebꞌ. 51 Jaꞌ bꞌey snan yul jun conobꞌ tuꞌ, jatuꞌ eya jun miman na caw naat yea steel bꞌey chi scol sbꞌa ebꞌ ánima yet ey jowal. Jaꞌ tituꞌ jix too ebꞌ ánima yewbꞌa el sbꞌa. Caw kꞌanani jix yun smajchen spuertail jun na tuꞌ ebꞌ, jix atoj ebꞌ yibꞌan. 52 Catuꞌ jix apni oc lemna naj Abimélec, jix jitzon oc sbꞌa naj bꞌey spuertail jun na tuꞌ, yet chi yaoc skꞌakꞌal yaloni. 53 Ey jun ix ix eyatoj yibꞌan jun na tuꞌ, jix skꞌojon eytej jun chꞌen chꞌen yet molino ix, cꞌuxan wal yin sjolom naj Abimélec tuꞌ jix eyol chꞌen, catuꞌ jix poꞌotoj sjolom naj. 54 Eyman jix yal naj tet jun naj yijomal smitxꞌkꞌabꞌ yet jowal: Iꞌatej ja wespada, catuꞌ chin ja makꞌon camoj, caw cꞌam chi woche tol oj al-leoj, tol jaꞌ junoj ix ix chin makꞌon camoj, ẍi naj. Yu tuꞌ xin, jix yiꞌontej yespada naj, jix sjejontoj yul scꞌul, queytuꞌ jix yun scam naj. 55 Jaꞌ yet jix yabꞌen ebꞌ soldado tol jix cam naj Abimélec, catuꞌ jix meltzotoj ebꞌ bꞌey sna.

56 Jaxca tuꞌ jix yun spajtzen Dios tet naj Abimélec yu spenail jix yun naj yin smam, yutol jix smakꞌ cam 70 ebꞌ yuẍtaj naj. 57 Jacꞌalaꞌ jaxca tuꞌ jix yun cꞌal pax spajtzen Dios yin ebꞌ ánima bꞌey conobꞌ Siquem yu spenail ebꞌ, catuꞌ jix yunen el jaxca jix yun yalon can naj Jotam yibꞌan ebꞌ, scꞌaal naj Jerubaal.