Jix Yakꞌ Yaawil Naj Tolá Yetoj Cꞌal Naj Jaír
10
Jaꞌ yet xax camtoj naj Abimélec, ey jun winaj xol ebꞌ yicꞌaal Isacar chi yij Tolá, scꞌaal naj Puvá, yitxiquin naj Dodo. Jaꞌ naj tuꞌ jix colon el ebꞌ yet Israelal. Jaꞌ naj Tolá tuꞌ, jatuꞌ jix caey ecꞌ naj bꞌey Samaria, bꞌey txꞌotxꞌ tzalquiltaj yul yet Efraín. 2 Ey 23 abꞌil jix yakꞌ yaawilal naj xol ebꞌ Israel, masantaꞌcꞌal yet jix cam naj, jix mujle naj yu ebꞌ bꞌey conobꞌ Samir.3 Jix lawi tuꞌ, jaxa naj Jaír a Galaad, jix oc yaawiloj xol ebꞌ Israel, yin 22 abꞌil. 4 Jaꞌ naj Jaír tuꞌ, ey 30 ebꞌ scꞌaal naj, junjun cꞌal ebꞌ scꞌaal naj tuꞌ, yibꞌan cꞌal noꞌ bꞌuru chi ecꞌ ebꞌ, ey junjun sconobꞌ ebꞌ bꞌey yul yet txꞌotxꞌ Galaad. Jaꞌ jun 30 conobꞌ tuꞌ, chi tocꞌal bꞌina tinaniꞌ: Jaꞌ wan sconobꞌ ebꞌ yet Jaír, ẍi ebꞌ ánima.
5 Jaꞌ yet jix cam naj Jaír tuꞌ, jatuꞌ jix mujle naj bꞌey jun conobꞌ chi yij Camón.
Chi Etex Ebꞌ Israel Yu Ebꞌ Amonita
6 Jix oc pax ebꞌ Israel yunen spenail sattaj Jehová junelxa, catuꞌ jix cꞌoli yoc ebꞌ yin eyilal sattaj wan yechel Baal, cꞌal yechel Astarté, cꞌal tet sdiosal ebꞌ a Siria, ebꞌ a Sidón, ebꞌ a Moab, ebꞌ a Amón, cꞌal ebꞌ Filisteo. Queytuꞌ jix yun sbꞌejoncan Jehová cu Diosal ebꞌ, caw cꞌamxa chi oc ebꞌ yin eyilal tet Dios. 7 Yu tuꞌ xin, caw jix tit sjowal scꞌul Jehová yin ebꞌ, jix ale oc ebꞌ yul skꞌabꞌ ebꞌ Filisteo, cꞌal yul skꞌabꞌ ebꞌ Amonita; jaꞌ yet jun abꞌil tuꞌ jix eyqꞌuey ebꞌ Israel yu ebꞌ. 8 Ey 18 abꞌil jix oc ebꞌ Israel yul skꞌabꞌ ebꞌ, jix oc ian yetnele ebꞌ Israel yu ebꞌ, ebꞌ caan bꞌey Galaad bꞌey skꞌaxepal ecꞌtoj jaꞌ Jordán, bꞌey xꞌotxꞌ ebꞌ Amorreo. 9 Jix kꞌaxbꞌo ecꞌtoj ebꞌ Amonita bꞌey jaꞌ Jordán, yet chi yakꞌon jowal ebꞌ yin ebꞌ yicꞌaal Judá cꞌal yin ebꞌ yicꞌaal Benjamín, cꞌal yin ebꞌ yicꞌaal Efraín. Yu tuꞌ xin, jix yilon oc ebꞌ Israel tol yelcꞌulal xacꞌal chi etnele ebꞌ. 10 Yu jun tuꞌ xin, jix skꞌanon scolwal Jehová ebꞌ, jix yalon ebꞌ jaxca tiꞌ: Jaach cu Diosal, caw wal jix oc cu penail ey jaach, jix jaach cu bꞌejcanoj, jaxa cꞌal tet jun comon dios Baal, jix cu oc yin eyilal, ẍi ebꞌ.
11 Jix yalon Jehová tet ebꞌ jaxca tiꞌ: Jaex tiꞌ jix jex etex yu ebꞌ a Egipto, cꞌal yu ebꞌ Amorreo, yu ebꞌ Amonita, cꞌal yu ebꞌ Filisteo, 12 yu ebꞌ Sidonio, yu ebꞌ Amalecita, cꞌal yu ebꞌ Amonita. Jaxa yet jix a je yaw ey jin, jix jex jin coloꞌ. 13 Caxcꞌal mi jaxca tuꞌ jix jex wute an, jacꞌalaꞌ jix jin je bꞌejcanoj, yu je yoc yin eyilal tet wanxa comon dios, yu jun tuꞌ, yuxan jaꞌ tinaniꞌ, manxa oj jin colwa je yetoj. 14 Asiꞌwej, kꞌanwej scolwal wan comon dios eyoc yipoj je cꞌul tuꞌ, jaꞌ ojabꞌ ebꞌ chi colwa je yetoj yet ey jex oc yin je cawxinajil jaxca tiꞌ, ẍi Dios tet ebꞌ.
15 Jix takꞌwi ebꞌ Israel tet Jehová jaxca tiꞌ: Caw wal yel jix oc cu penail ey jaach, asan xin, jaꞌ tinaniꞌ chi skeꞌ ja wunen tzet chi yoche ja cꞌul kin jon, asan tol chach colwa kin tinaniꞌ jon, ẍi ebꞌ. 16 Jix makꞌle poꞌo jantaj sdiosal ebꞌ txꞌoj conobꞌal yu ebꞌ Israel, jix lawi tuꞌ, catuꞌ jix oc ebꞌ yin eyilal tet Jehová. Yu tuꞌ xin, caw jix okꞌ scꞌul Jehová yin ebꞌ, yutol caw chi yabꞌ syaꞌil ebꞌ.
17 Jix lawi tuꞌ xin, jix yakꞌon slista sbꞌa ebꞌ Amonita yin jowal, jix syambꞌa oc sbꞌa ebꞌ bꞌey Galaad, jal pax ebꞌ Israel xin, jix syambꞌa pax oc sbꞌa ebꞌ bꞌey conobꞌ Mizpá. 18 Jaꞌ ebꞌ yaaw yeoc xol masanil ebꞌ Israel caan bꞌey Galaad tuꞌ, jix yalon ebꞌ jaxca tiꞌ: ¿Jaꞌ junoj mactxequel chi cu ijbꞌan oc yin jowal yin ebꞌ Amonita? Jaꞌton wal jun tuꞌ yaaw chi yun can oc cu xol bꞌey Galaad tiꞌ, ẍi ebꞌ.