4 Jix ecꞌ cꞌaltoj jun tiempoal tuꞌ xin, catuꞌ jix oc ebꞌ Amonita yakꞌon jowal yin ebꞌ Israel. 5 Yu jun tuꞌ xin, jaꞌ ebꞌ yaaw eyoc bꞌey Galaad tuꞌ, jix awtele naj Jefté yu ebꞌ, tol chi tit naj yul yet txꞌotxꞌ Tob tuꞌ. 6 Jix yalon ebꞌ jaxca tiꞌ tet naj:

—Titan ketoj jon, chi yoche cu cꞌul tol jaach chach oc cu yaawiloj yin akꞌo jowal yin ebꞌ Amonita, ẍi ebꞌ.

7 Jix takꞌwi naj Jefté tet ebꞌ jaxca tiꞌ:

—Jaex tiꞌ caw pena jix je yute je naꞌbꞌal win an, jix je yakꞌ xacꞌal je yip jin je yujten el bꞌey sna naj jin mam, yuxan ¿tzet yu, tol jaꞌ yet ey je cawxinajil tiꞌ catuꞌ chex jul jin je seyon ecꞌoj? ẍi naj Jefté tet ebꞌ.

8 —Jix yalon ebꞌ a Galaad tuꞌ jaxca tiꞌ: Yel toni, caw ey jon oc yin jun miman cawxinajil tiꞌ, yuxan chach jul kilaꞌ. Yutol caw chi yoche cu cꞌul tol chach too ketoj jon, jaach wal oj ja wakꞌ jowal yetoj ebꞌ Amonita, catuꞌ jaach oj jaach oc yin yaawil cu xol cu masanil jaon caan jon bꞌey Galaad tiꞌ, ẍi ebꞌ tet naj.

9 Ta tol che yoche chin meltzotoj an xin, catuꞌ chi wakꞌon jowal yetoj ebꞌ Amonita tuꞌ, ta jaꞌ Jehová oj aon oc ebꞌ yul jin kꞌabꞌ, ¿yel mi wal che yal xin, tol oj jin je yaoc je yaawiloj, chi yal tuꞌ? ẍi naj Jefté tet ebꞌ.

10 Jix takꞌwi ebꞌ yaaw tuꞌ tet naj Jefté jaxca tiꞌ:

—Sattaj wal Jehová chi kalon jon, tol oj kun jaxca cha wal tuꞌ, ẍi ebꞌ tet naj.

11 Yu tuꞌ xin, jix too naj Jefté yetoj ebꞌ, jix ale oc naj yin yaawilal yu ebꞌ. Jaꞌ bꞌey conobꞌ Mizpá tuꞌ jix scaecꞌne naj Jefté tuꞌ yalon wan kꞌane sattaj Jehová, jaꞌton wan jix yal tet ebꞌ a Galaad yet sbꞌabꞌelal. 12 Jix lawi tuꞌ xin, catuꞌ jix yaontoj wan ẍejabꞌ naj Jefté bꞌey naj sreyal Amón, yet chi skꞌanlen ebꞌ tet jaxca tiꞌ: ¿Tzet yu, yuxan chi tit sjowal je cꞌul kin, yuxan chex jul je yakꞌ jowal kin? ẍi toj naj. 13 Jix spajtzen naj sreyal ebꞌ Amonita tet ebꞌ ẍejabꞌ naj Jefté jaxca tiꞌ: Jaꞌ yet jix jex el jaex Israel jex tiꞌ bꞌey txꞌotxꞌ Egipto, jix je yiꞌecꞌ cu txꞌotxꞌ txꞌotxꞌ chi too tacꞌal bꞌey jaꞌ jaꞌ Arnón, masantaꞌcꞌal jix apni oc bꞌey jaꞌ Jaboc cꞌal bꞌey jaꞌ Jordán. Jaꞌ tinaniꞌ xin, akꞌwej meltzo txꞌotxꞌ ey jon yin watxꞌcꞌulal, ẍi naj rey tuꞌ.

14 Jix lawi tuꞌ xin, jix yaontoj wanxa ẍejabꞌ naj Jefté bꞌey naj sreyal ebꞌ Amonita tuꞌ junelxa, 15 jix too yalon pax ebꞌ tet naj jaxca tiꞌ: Jaxca wal tiꞌ jix yun yalontej naj Jefté ey jon: Jaon Israel jon tiꞌ, cꞌam xꞌotxꞌ ebꞌ Moabita jix kiꞌecꞌoj, cꞌam pax yet ebꞌ Amonita jix kiꞌecꞌoj. 16 Jaꞌ yet jix cu eltej bꞌey txꞌotxꞌ Egipto, jaꞌ bꞌey txꞌotxꞌ cusiltaj txꞌotxꞌ jix cu ecꞌ cꞌaltej jon, masantaꞌcꞌal jix cu jul bꞌey jaꞌ Cajin Mar, jix cu apni oc bꞌey conobꞌ Cadés. 17 Jix lawi tuꞌ, catuꞌ jix kaontoj wan cu chejabꞌ bꞌey naj sreyal conobꞌ Edom, tol chi cu ẍaꞌ ecꞌtoj naj bꞌey sat xꞌotxꞌ tuꞌ, ma cꞌaltaꞌ yal scꞌul ebꞌ jix cu ecꞌtoj jon. Jacꞌalaꞌ jix kalon cꞌal pax tet ebꞌ sreyal Moab, tol chi cu ẍaꞌ ecꞌtoj ebꞌ sat xꞌotxꞌ, jacꞌalaꞌ ma pax yal scꞌul ebꞌ jix cu ecꞌtoj tituꞌ. Yu jun tuꞌ xin, yuxan jix cu cancan bꞌey Cadés. 18 Jix lawi tuꞌ xin, jix cu ecꞌ cꞌaltej bꞌey txꞌotxꞌ cusiltaj txꞌotxꞌ, jix cu joyon cꞌal cu bꞌa yinlaj xꞌotxꞌ ebꞌ Edom, cꞌal yinlaj yet ebꞌ a Moab, masantaꞌcꞌal jix cu apni oc yetcꞌulal bꞌey chi aol cꞌu yul yet txꞌotxꞌ Moab. Jaꞌ tituꞌ jix cu apni oc bꞌulan bꞌey junxa skꞌaxepal ecꞌtej stiꞌ jaꞌ Arnón. Ma cꞌaltaꞌ cu kꞌaxbꞌo ecꞌtoj tituꞌ, yutol jaꞌ tituꞌ chi ẍaꞌel yich xꞌotxꞌ ebꞌ a Moab. 19 Yu jun tuꞌ xin, jix kaontoj cu chejabꞌ bꞌey naj Sihón, sreyal ebꞌ Amorreo, bꞌey yul yet Hesbón, jix kalon cꞌal pax tet naj tol chi cu ẍaꞌ ecꞌtoj bꞌey sat xꞌotxꞌ, yet watxꞌ chi cu apni oc bꞌey ey cu txꞌotxꞌ tuꞌ jon, cu chi tet naj jon. 20 Ma cꞌaltaꞌ ẍaꞌ yabꞌ naj Sihón tzet jix kal jon, ma cu ẍaꞌ ecꞌtoj naj bꞌey sat xꞌotxꞌ. Jaꞌ jun jix yun naj, tol jix syambꞌa oc masanil ebꞌ soldado naj, jix too swaꞌne ey bꞌulan sbꞌa ebꞌ bꞌey Jahas, catuꞌ jix oc ian naj yakꞌon jowal kin jon. 21 Yu jun tuꞌ, jaꞌ Jehová cu Diosal jaon Israel jon tiꞌ, jix ale oc ebꞌ yul cu kꞌabꞌ, yuxan jix eyqꞌuey ebꞌ ku jon. Queytuꞌ jix yun kiꞌon can xꞌotxꞌ ebꞌ Amorreo bꞌey jun txꞌotxꞌ tuꞌ. 22 Jix kiꞌon can oc masanil xꞌotxꞌ ebꞌ Amorreo chi too tacꞌal bꞌey jaꞌ Arnón, masantaꞌcꞌal chi apni oc bꞌey jaꞌ Jaboc. Chi too cꞌal pax bꞌey txꞌotxꞌ cusiltaj txꞌotxꞌ, masantaꞌcꞌal bꞌey jaꞌ Jordán. 23 Jix lawi tuꞌ, jix skꞌanle ebꞌ tet naj syaawil ebꞌ Amorreo jaxca tiꞌ: ¿Tumi chi yoche je cꞌul che tokꞌ pax ecꞌoj, jaꞌ Jehová jix akꞌon ey jon, jon? 24 Ta jaꞌ jun comon dios chi yij Quemós chi akꞌon niꞌoj tzetyetal ey jex, jaꞌ jun tuꞌ che yaloc je yetoj, ¿man mi yeloj jaxca tuꞌ? Quey cꞌal pax tuꞌ tzet jix yakꞌ Jehová cu Diosal ey jon, jaꞌton chi kaloc ketoj jon. 25 ¿Tumi cha naꞌ tol yel xacꞌal watxꞌ jaach yintaj naj Balac, scꞌaal Zipor, sreyal Moab? Yutol jix yakꞌ jowal naj ketoj yu jun txꞌotxꞌ tiꞌ. 26 Eyxa 300 abꞌil cu caey ecꞌ bꞌey Hesbón tiꞌ, cꞌal bꞌey Aroer, cꞌal yetoj bꞌey wanxa aldealaj scawilal tuꞌ, yetoj cꞌal masanil wan conobꞌlaj ey bꞌey stiꞌlaj jaꞌ Arnón. ¿Tzet yu, yuxan jato wal tinaniꞌ che yakꞌ sowalil ey jon yu jun txꞌotxꞌ tuꞌ? 27 Jain tiꞌ, cꞌam junoj tzetyetal pena chi wun ey jaach. Jal jaach, jaach tiꞌ, caw pena cha wunne, chach jul ja wakꞌ ja jowal kin jon. Asan xin, jaꞌ Jehová, Naj Juez yeoc kibꞌan jon, jaꞌ oj naꞌon oc kin jaon Israel jon tiꞌ, cꞌal jex jaex tiꞌ, ẍi toj naj Jefté tet ebꞌ.

28 Caxcꞌal mi jaxca tuꞌ yeocoj, caw ma ẍaꞌ ebꞌ yabꞌ tzet jix yaltoj naj Jefté tuꞌ.

29 Jix lawi tuꞌ xin, jix oc Yespíritu Jehová yin naj Jefté, queytuꞌ jix yun yecꞌ cꞌal naj yul yet Galaad, cꞌal yul yet Manasés, jix ecꞌ cꞌal pax naj bꞌey Mizpá yul yet Galaad tuꞌ, jix too yakꞌon jowal naj yin ebꞌ Amonita. 30 Jix yakꞌon stiꞌ naj Jefté tet Jehová: Ta tol oj ja waoc ebꞌ Amonita tuꞌ yul jin kꞌabꞌ, 31 jaꞌ junoj mactxequel bꞌabꞌel oj eltej jin jul ẍaꞌon yul bꞌe bꞌey jin na, yet oj jin meltzo yin jowal tiꞌ, jaꞌ jun tuꞌ oj wakꞌ tzꞌaꞌ yin xaambꞌal ey jaach, ẍi naj.

32 Jix too naj Jefté yakꞌon jowal yin ebꞌ Amonita, catuꞌ jix eyqꞌuey ebꞌ yu naj yetoj scolwal Jehová. 33 Caw ecꞌal wan scajat ebꞌ tuꞌ jix cam yu naj Jefté, ey 20 conobꞌ jix yakꞌ eyqꞌuey naj Jefté bꞌey snan xol txꞌotxꞌ Aroer, bꞌey Minit, cꞌal bꞌey Abel-queramim. Queytuꞌ jix yun yeyqꞌuey ebꞌ Amonita tuꞌ yu ebꞌ Israel.

34 Jaxa yet jix meltzo naj Jefté bꞌey sna bꞌey conobꞌ Mizpá, jaꞌ jun kꞌetxan scutzꞌin naj, jix eltej jul chaꞌoni, catuꞌ jix yakꞌon canal ix, lalan stenon wan chꞌen patxquiltaj chꞌen ix, wan chi yij pandereta yet jix eltej ix tuꞌ. Asanne ix, cꞌam junoj scꞌaal naj. 35 Jaꞌ yet jix eltej ix tuꞌ, catuꞌ jix stzilontoj spichil naj yu xꞌoxon eloj tol ey scuscꞌulal, jix yalon naj jaxca tiꞌ:

—¡Ay… jaach jin cutzꞌin! ¡Caw wal yaꞌ chi wabꞌ ja wu! Jaach wal jix ja wiꞌeltej jun syaꞌilal tiꞌ wibꞌan an, yutol jix wakꞌ jin tiꞌ tet Jehová, yuxan jaꞌ tinaniꞌ, sowalil oj jin jije bꞌey jix wakꞌcan jin tiꞌ tuꞌ, ẍi naj.

36 Catuꞌ jix takꞌwi ix tet smam:

—Mamin, yun ojabꞌ win bꞌey jix ja wakꞌ ja tiꞌ tet Jehová, tuxa jix eyqꞌuey ebꞌ Amonita tuꞌ yul jaꞌ kꞌabꞌ yu Jehová. 37 Asan xin, chin kꞌan ey jaach, tol cha wakꞌ caabꞌojxa xꞌaaw ey jin yet chin too ecꞌabꞌ yetoj ebꞌ ix wet kꞌopoal bꞌey txꞌotxꞌ tzalquiltaj txꞌotxꞌ, yet chin okꞌ yetoj ebꞌ ix, yutol sowalil oj jin cam yet cꞌamto chin nupi, ẍi ix.

38 Jix yakꞌon naj Jefté caabꞌ xꞌaaw tuꞌ tet ix. Jaꞌ yet jun tiempoal tuꞌ, jix too ix bꞌey txꞌotxꞌ tzalquiltaj yetoj ebꞌ yet kꞌopoal ix tuꞌ, jix okꞌ ix, yutol oj cam ix yet cꞌamto chi nupi ix. 39 Jix lawi caabꞌ xꞌaaw tuꞌ xin, catuꞌ jix meltzo ix bꞌey eyecꞌ smam tuꞌ; jix yakꞌon eloc bꞌey jix yakꞌ can stiꞌ naj Jefté tet Jehová, queytuꞌ jix yun scam ix scutzꞌin naj Jefté tuꞌ yet cꞌam tocꞌal junoj winaj jix yiꞌle ix. 40 Yu jun tuꞌ xin, jix oc xacꞌal ebꞌ Israel sbꞌeybꞌalne jun tuꞌ, junjun cꞌal abꞌil chi syambꞌa oc sbꞌa ebꞌ ix kꞌopo yokꞌ yin canebꞌ cꞌual, yu snaꞌletej ix scutzꞌin naj Jefté.