—¿Tzet yu, yuxan ma ja wal ey jon yet jix jaach too ja wakꞌon jowal yin ebꞌ Amonita, ta jix ja wal ey jon, jix mi cu too ja wetoj? Yuxan jaꞌ tinaniꞌ oj jaach cu nus tzꞌaꞌ yetoj ja na tiꞌ, ẍi ebꞌ tet naj.

2 Jix yalon naj Jefté tet ebꞌ jaxca tiꞌ:

—Jain tiꞌ, yetoj ebꞌ jin conobꞌ tiꞌ, ey jun miman jowal cu xol yetoj ebꞌ Amonita, jix jex wawtele jaex tiꞌ, ma jex jul colwa ketoj jon. 3 Yutol jix wilaꞌ, tol ma cꞌaltaꞌ jex colwa ketoj jon, yuxan jix jin bꞌej xacꞌal jin kꞌinal yul skꞌabꞌ jowal tuꞌ, jix wakꞌ jowal yetoj ebꞌ Amonita, yetoj scolwal Jehová, yuxan jix eyqꞌuey ebꞌ wu. ¿Tzet yuxan chex jul je yakꞌ jowal win tinaniꞌ? ẍi naj.

4 Jaꞌ ebꞌ yet Efraín tuꞌ, jix yal ebꞌ yin ebꞌ a Galaad tuꞌ jaxca tiꞌ: Tol jaꞌ ebꞌ yet Efraín tuꞌ, cꞌal ebꞌ yet Manasés, tucꞌal jix bꞌejlecan ebꞌ yet Efraín tuꞌ yu ebꞌ. Yu jun tuꞌ, yuxan jix yambꞌale oc masanil ánima caan bꞌey Galaad yu naj Jefté, jix yakꞌon jowal ebꞌ yetoj ebꞌ a Efraín, jix eyqꞌuey ebꞌ yicꞌaal Efraín tuꞌ yu ebꞌ. 5 Jaꞌ ebꞌ a Galaad tuꞌ, jix oc ebꞌ smajon bꞌey chi ecꞌtoj ebꞌ ánima yul jaꞌ Jordán, ta ey junoj ebꞌ yet Efraín tuꞌ chi elaoj, catuꞌ chi yoche chi kꞌaxbꞌon ecꞌtoj yul jaꞌ jaꞌ tuꞌ, chi skꞌanlen ebꞌ a Galaad ta yet Efraín ebꞌ. Cꞌamaj, ta ẍi junoj mac chi yoche chi ecꞌtoj tuꞌ, 6 catuꞌ chi yalon ebꞌ tet, ta tol chi yal ebꞌ jun kꞌane tiꞌ, “Ẍibolet”. Ta yet Efraín ebꞌ xin, “Sibolet”, chi yun yalon ebꞌ, yutol cꞌam chi skeꞌ wal yalon ebꞌ yin watxꞌ, queytuꞌ chi yun smitxꞌon xacꞌal ey ebꞌ, catuꞌ jix smakꞌon xacꞌal cam ebꞌ bꞌey chi kꞌaxbꞌon ecꞌ ebꞌ ánima yul jaꞌ Jordán tuꞌ. Jaꞌ yet tuꞌ ey 42,000 ebꞌ winaj yin yicꞌaal Efraín, jix cami.

7 Jaꞌ yet tuꞌ, ey wajebꞌ abꞌil jix oc naj Jefté yin yaawilal xol ebꞌ Israel. Jaꞌ yet jix cam naj, jix mujle naj bꞌey jun conobꞌ yul yet Galaad.

8 Jaꞌ yintaj naj Jefté tuꞌ jix oc can naj Ibzán a conobꞌ Belén, yin syaawiloj ebꞌ Israel. 9 Ja Naj tuꞌ, ey 30 scꞌaal naj, cꞌal 30 scutzꞌin. Jix nupi ebꞌ ix scutzꞌin naj tuꞌ yetoj ebꞌ cꞌamxa yu sbꞌa yetoj, jacꞌalaꞌ cꞌal pax ebꞌ scꞌaal naj tuꞌ, jix yiꞌ yistil ebꞌ naj xol ebꞌ cꞌamxa yu sbꞌa yetoj. Jaꞌ naj Ibzán tuꞌ, jujebꞌ abꞌil jix yakꞌ yaawil naj xol ebꞌ Israel. 10 Jaꞌ yet jix camtoj naj, jatuꞌ jix mujle naj bꞌey conobꞌ Belén.

11 Jix lawi tuꞌ xin, jaxa naj Elón yicꞌaal Zabulón, jaꞌ naj jix yakꞌ yaawil yin laonebꞌ abꞌil xol ebꞌ Israel. 12 Jaxa yet jix camtoj naj Elón tuꞌ, jatuꞌ jix mujle naj bꞌey conobꞌ Aialón, bꞌey xꞌotxꞌ ebꞌ yicꞌaal naj.

13 Jix lawi tuꞌ, jaxa naj Abdón, scꞌaal Hilel a conobꞌ Piratón, jaꞌ jix yakꞌ yaawil xol ebꞌ Israel, 14 waxajebꞌ abꞌil jix yakꞌ yaawil naj. Ey 40 scꞌaal yetoj 30 ebꞌ yitxiquin naj, junjun cꞌal ebꞌ tuꞌ jix a ebꞌ yibꞌan noꞌ bꞌuru. 15 Jaꞌ yet jix camtoj naj xin, jix mujle naj bꞌey Piratón, jatuꞌ ey yul yet txꞌotxꞌ yet Efraín bꞌey tzalquiltaj txꞌotxꞌ yul yet ebꞌ Amalec.