2 Jaꞌ bꞌey conobꞌ Sora, xol ebꞌ yicꞌaal Dan, ey jun winaj chi yij sbꞌi Manoa. Cꞌam cꞌaltaꞌ yuneꞌ ix yistil naj. 3 Ey jun yángel Jehová jix xꞌox sbꞌa tet ix, jix yalon jaxca tiꞌ: Jaach tiꞌ, yel cꞌam cꞌaltaꞌ junoj ja wuneꞌ cha wilaꞌ. Jaꞌ tinaniꞌ oj ja wijoc ja wuneꞌ, catuꞌ oj aloj junoj ja winaj unin. 4 Jaꞌ yet oj bꞌey cꞌaltoj, cꞌam cꞌal vino cha wuqꞌue, cꞌam ojabꞌ junoj tzetyetal tol jow cha wuqꞌueytoj, cꞌam ojabꞌ cha loꞌ cꞌal pax tzet ey sowalil, jatacꞌalaꞌ yalon ley. 5 Jaꞌ yet oj aloj jun ja wuneꞌ tuꞌ, man oj tzujle el xil sjolom, yutol Nazareo oj yunne, yutol yet Dios yeoc yet cꞌamto chi ali; tol jaꞌ oj chaꞌon el yich scolon el conobꞌ Israel bꞌey yul skꞌabꞌ ebꞌ Filisteo, ẍi jun ángel tuꞌ tet ix.

6 Catuꞌ jix too ix bꞌey eyecꞌ yichamil, jix yalon ix tet naj: Ey jun ẍejabꞌ Dios jix jul bꞌey ey jin ecꞌoj, caw jix qꞌueya jin cꞌul yu, jaxca wal tol yángel Jehová jix wilaꞌ. Ma jin kꞌanle tet mactxequel, ma yal cꞌal pax el ey jin mactxequel. 7 Asan tol jix yal ey jin jaxca tiꞌ, tol oj aloj junoj wuneꞌ, jix yaloni tol manxa oj wucꞌ vino, cꞌal junojxa tzetyetal tol caw jow, cꞌal junoj tzet ey sowalil cu loꞌoni, jatacꞌalaꞌ yalon ley; jaxa jun unin tuꞌ yet Dios yeocoj yet oj aloj tuꞌ, masantaꞌcꞌal yet oj camoj, ẍi ix.

8 Catuꞌ jix txali naj Manoa tet Jehová, jix yalon naj jaxca tiꞌ: Jaach jin Diosal, chi wal ey jaach, ta chi el yin ja cꞌul tol cha chejtej ja chejabꞌ tuꞌ ey jon junelxa, yet watxꞌ chi yal ey jon, tzet wal oj kun yetoj jun unin oj aloj tuꞌ, ẍi naj.

9 Catuꞌ jix yabꞌen Dios tzet jix yal naj Manoa tuꞌ yin xa, jix xꞌoxon sbꞌa jun yángel tuꞌ tet ix yistil naj tuꞌ junelxa bꞌey xol mulnail, cꞌam naj Manoa tuꞌ eyecꞌ yet tuꞌ. 10 Eyman jix too lemna ix yalon tet naj:

—Eyman, titan, yutol jix xꞌox pax sbꞌa jun ẍejabꞌ Dios chi jul kꞌanabꞌ ey jin junelxa, ẍi ix.

11 Catuꞌ jix tit lemna naj Manoa, jix too naj yetoj yistil tuꞌ, jix yaloni:

—¿Tumi jaach tiꞌ jix jaach jul kꞌanabꞌ tet ix wistil tiꞌ yet junel? ẍi naj tet. Jix takꞌwi jun ángel tuꞌ tet naj jaxca tiꞌ:

—Jaaꞌ, jain toni, ẍi jun ángel tuꞌ.

12 Catuꞌ jix skꞌanlen naj Manoa tuꞌ tet jaxca tiꞌ:

—Jaꞌ yet oj yunen jun tzet jix ja wal tuꞌ, ¿tzet wal oj kun yetoj, cꞌal kilon chꞌibꞌ jun unin tuꞌ jon? ẍi naj Manoa tuꞌ.

13 Catuꞌ jix takꞌwi Naj yángel Jehová jaxca tiꞌ:

—Sjije ojabꞌ ix ja wistil tuꞌ tzetyetal jix walaꞌ: 14 Cꞌam ojabꞌ chi yucꞌ vino ix, cꞌal junojxa tzetyetal tol jow, cꞌam chi yuqꞌueꞌ. Catuꞌ cꞌam chi sloꞌ sat an uva ix, an yaaxto ma tajin uva. Cꞌam ojabꞌ chi sloꞌ tzetyetal tol ey sowalil sloꞌlei, jaꞌton wan tuꞌ jix wal tet ix, tol sowalil chi sjije ix, ẍi jun ángel tuꞌ.

15-16 Jaꞌ naj Manoa tuꞌ, man yotaj oj naj ta tol jaꞌ Naj yángel Jehová tuꞌ, yuxan jix yal naj jaxca tiꞌ:

—Chi wal ey jaach, el ojabꞌ yin ja cꞌul tol cha wechbꞌane, tol chin too wiꞌtej junoj noꞌ yuneꞌ chiw ja chiꞌ, ẍi naj tet.

Jix takꞌwi jun ángel tuꞌ:

—Caxcꞌal chin can je yetoj, ma cꞌal jin low je yetoj; chi skeꞌ je yakꞌon noꞌ yuneꞌ chiw tuꞌ yin xaambꞌalil tet Jehová, ẍi.

17 Jix lawi tuꞌ, jix yalon naj Manoa tuꞌ tet jaxca tiꞌ:

—Al can ja bꞌi ey jon xin, yet watxꞌ chi skeꞌ kalon yu diosal ey jaach yet chi yunen el tzet jix jul ja wal can ey jon tiꞌ, ẍi naj Manoa.

18 Jix takꞌwi jun ángel tuꞌ tet naj jaxca tiꞌ:

—¿Tzet yuxan cha kꞌanle jin bꞌi? Jaꞌ jun tuꞌ caw qꞌueyubꞌtaj yoqui, ẍi jun ángel tuꞌ.

19 Catuꞌ jix yiꞌontej jun noꞌ chiw naj Manoa tuꞌ, cꞌal wanxa saꞌbꞌeal jix yakꞌ yin ixim tiriw. Catuꞌ jix yakꞌon tzꞌaꞌ xaambꞌal tet Jehová bꞌey yibꞌan jun chꞌen chꞌen. Jix lawi tuꞌ, jix xꞌoxon Jehová jun caw qꞌueyubꞌtaj yili sattaj naj Manoa yetoj yistil tuꞌ. 20 Jaꞌ yet jix a nilna xaj kꞌakꞌ yibꞌan jun yet xaambꞌal tuꞌ, catuꞌ jix octoj jun ángel tuꞌ xol xaj kꞌakꞌ, jix paxa bꞌey satcan. Jaꞌ yet jix yilon ebꞌ jaxca tuꞌ, jix ey kaan ebꞌ, catuꞌ jix ey noan ebꞌ sat txꞌotxꞌ. 21 Queytuꞌ jix yun snaꞌcha el yu naj Manoa tuꞌ, tol ẍejabꞌ Jehová jun ángel tuꞌ. Cꞌamxa bꞌey jix xꞌox sbꞌa junelxa tet naj Manoa yetoj tet yistil. 22 Catuꞌ jix yalon naj tet yistil tuꞌ jaxca tiꞌ:

—Jaꞌ tinaniꞌ caw oj cu camoj, yutol jix kil wal yin Dios, ẍi naj tet yistil tuꞌ. 23 Catuꞌ jix takꞌwi ix tet naj jaxca tiꞌ:

—Ta tol ey snaꞌbꞌal Jehová tol oj cu cam yu, ma mi ẍaꞌ cu xaambꞌal jix kakꞌ tet, cꞌal cu saꞌbꞌeal tuꞌ, catuꞌ ma mi xꞌox wan tiꞌ kilaꞌ, catuꞌ ma mi yal wan tuꞌ ey jon, ẍi ix tet naj.

24 Jaꞌ yet jix apni scꞌual yali yuneꞌ ix tuꞌ, jix yakꞌon yij sbꞌi, Sansón. Jaxa yet jix chꞌibꞌa naj unin tuꞌ xin, jix yakꞌ swatxꞌcꞌulal Dios yibꞌan naj. 25 Jaxa Yespíritu Jehová jix oc ian xꞌoxon sbꞌa yin naj Sansón tuꞌ, yet eyecꞌ naj bꞌey bꞌulan ey ebꞌ yicꞌaal Dan, bꞌey snan xol conobꞌ Sora yetoj Estaol.