Jix Oc Yistil Naj Sansón
14
Ey jun tiempoal xin, jix apni oc naj Sansón yul jun sconobꞌ ebꞌ Filisteo chi yij Timná, catuꞌ jix yaoc sat naj yin jun ix kꞌopo bꞌey tituꞌ. 2 Jaꞌ yet jix meltzo naj bꞌey sna, jix yalon naj tet smam cꞌal tet xutx jaxca tiꞌ:—Ey jun ix kꞌopo jix wil bꞌey Timná xol ebꞌ Filisteo, caw jix can jin naꞌbꞌal yin ix, yuxan chi wal ey jex an tol chi too je kꞌan jun ix kꞌopo tuꞌ yet chi oc ix wistiloj, ẍi naj.
3 Catuꞌ jix takꞌwi smam cꞌal xutx naj tet, jix yalon ebꞌ jaxca tiꞌ:
—¿Tzet yuxan jaꞌ bꞌey xol ebꞌ Filisteo oj toj ja seytej ja wistil tuꞌ, yutol txꞌoj conobꞌal ebꞌ? ¿Tumi cꞌamxa junoj ix watxꞌ yoc ja wistiloj xol ebꞌ ket conobꞌ tiꞌ? ẍi smam cꞌal xutx naj tuꞌ.
Catuꞌ jix takꞌwi naj Sansón jaxca tiꞌ:
—Asan xin, caw jaꞌ jun ix kꞌopo tuꞌ chi woche an, yuxan jaꞌ ix chi too je kꞌan wistiloj, ẍi naj.
4 Caw wal man yotaj oj smam cꞌal xutx naj tzet snaꞌbꞌal Jehová yin naj, yutol naꞌbꞌilxa yu Dios tzet oj yun yel yich junoj jowal yetoj ebꞌ Filisteo tuꞌ, yutol jaꞌ ebꞌ chi yakꞌ yaawil yibꞌan conobꞌ Israel yet tuꞌ. 5 Yuxan jix too naj Sansón yetoj smam cꞌal xutx bꞌey conobꞌ Timná. Jaꞌ yet jix ecꞌtoj ebꞌ bꞌey jun tujan an uva awbꞌil yu ebꞌ a conobꞌ Timná, jix eltej jun noꞌ achꞌe león yin naj Sansón tuꞌ, chi el yaw noꞌ yet jix tit noꞌ yin naj. 6 Jaꞌ yet jun txolan tuꞌ, jix oc Yespíritu Jehová, jix akꞌle yip naj, cꞌam cꞌal niꞌoj tzetyetal iꞌbꞌil oc yu naj, yetoj cꞌal skꞌabꞌ naj jix kocꞌtzilnentoj jun noꞌ león tuꞌ naj, jaxca chi yun cu kocꞌ polnentoj junoj noꞌ yuneꞌ chiw. Ma cꞌal yal naj tet smam cꞌal tet xutx, yu tzet jix yun tuꞌ. 7 Jix lawi tuꞌ, catuꞌ jix apni oc ebꞌ bꞌey conobꞌ Timná tuꞌ, jix kꞌanabꞌ naj yetoj ix kꞌopo tuꞌ, catuꞌ jix can xacꞌal snaꞌbꞌal naj yin ix.
8 Jaxa yet jix ecꞌtoj jayebꞌ cꞌual, yet lalan stoo naj Sansón yet oj nupoj naj yetoj ix kꞌopo Filisteo tuꞌ, catuꞌ jix ecꞌ naj bꞌey jix smakꞌ cam jun noꞌ león tuꞌ. Jaxa yet jix apni oc naj, jix yiloni, tol eyxa octoj noꞌ awcabꞌ yul sjucubꞌal sbꞌajil noꞌ león tuꞌ, caw nonaj el yu yaal scabꞌil noꞌ awcabꞌ tuꞌ. 9 Jix lawi tuꞌ, jix yiꞌon eltej yaal noꞌ awcabꞌ tuꞌ naj, jix sloꞌoni, catuꞌ jix too naj. Jaxa yet jix tzajlo naj yintaj smam cꞌal xutx tuꞌ, jix yakꞌon noꞌ yal awcabꞌ tuꞌ sloꞌ ebꞌ, cꞌam cꞌal tzet jix yalaꞌ ta tol jaꞌ bꞌey yul sjucubꞌal yul sbꞌajil noꞌ león tuꞌ jix yiꞌeltej noꞌ yal awcabꞌ tuꞌ naj.
10 Jix lawi tuꞌ xin, jix apni oc ebꞌ bꞌey sna ix kꞌopo tuꞌ, jix ẍaꞌon skꞌinal snupil naj Sansón tuꞌ, jaxca cꞌaltaꞌ sbꞌeybꞌal ebꞌ naj achꞌe bꞌey jun conobꞌ tuꞌ. 11 Jaꞌ yet jix yilon ebꞌ naj Filisteo, tol jix apni oc naj Sansón tuꞌ, jix yawten 30 ebꞌ achꞌe yet chi yilon skꞌinal jun nupil ebꞌ tuꞌ. 12 Catuꞌ jix yalon naj Sansón tet ebꞌ naj achꞌe tuꞌ jaxca tiꞌ:
—Ey jun tzet oj wal ey jex: Ta jaꞌ yul jujebꞌ cꞌual kꞌin tiꞌ, oj je yal tzet chi yal yeloc apnoj jun tzet oj wal ey jex tuꞌ, oj wakꞌ junjunoj an kꞌap je xotiloj junjun jex, an tol lino cꞌal eloj, cꞌal junjunoj moan je pichil yet kꞌin. 13 Ta man oj naꞌcha el je yu xin, jaex oj je yakꞌ junjunoj an kꞌap tuꞌ ey jin yetoj junjunoj moan jin pichil yet kꞌin, ẍi naj tet ebꞌ. Catuꞌ jix takꞌwi ebꞌ tet naj jaxca tiꞌ:
—Al ey jon xin, tzetyetal cha woche cha walaꞌ, ẍi ebꞌ naj.
14 Jix yalon naj jaxca tiꞌ:
Jaꞌ yin junoj chiꞌwawom noꞌ, jatuꞌ jix eltej tzet chi ucꞌlei.
Jaꞌ yin jun caw ey yip, jatuꞌ jix eltej tzetyetal caw wal chiꞌ, ẍi naj.
Jaxa yet yox cꞌual kꞌin tuꞌ, cꞌam cꞌal chi skeꞌ spajtzen ebꞌ naj. 15 Jix lawi tuꞌ xin, jaxa yet scan cꞌual, jix yalon ebꞌ naj tet yistil naj Sansón tuꞌ jaxca tiꞌ:
—Monte wal el ja wabꞌ tet naj ja wichamil tuꞌ, tzet chi yal yeloc apnoj jun tzet jix yal naj ey jon tiꞌ, chi lawi tuꞌ catuꞌ cha walon ey jon. Ta cꞌamaj, oj jaach cu nus tzꞌaꞌ yetoj ja mam ja txutx, cꞌal masanil mac eyecꞌ yul ja na tiꞌ. Jaxca wal tol tucꞌal chon je yawte titiꞌ, catuꞌ chon je yaon oc yin mebꞌail, ẍi ebꞌ naj.
16 Jix lawi tuꞌ, jix okꞌa ix, catuꞌ jix too ix yalon tet naj Sansón:
—Cꞌam chin ja woche jaach tiꞌ, catuꞌ cꞌam chin ja camcꞌulne. Jix ja wal jun ja kꞌane, yet chi snaꞌon el ebꞌ naj wet conobꞌ tiꞌ, catuꞌ cꞌam cꞌal cha wal niꞌoj ey jin, tzet chi yal yeloc apnoj, ẍi ix tet naj. Catuꞌ jix takꞌwi naj tet ix jaxca tiꞌ:
—Cꞌam tax mi chi wal tet jin mam cꞌal tet jin txutx, ¿tumi jato wal ey jaach oj walaꞌ? ẍi naj.
17 Catuꞌ jix oc cꞌal ian yokꞌ ix tet naj yin jujebꞌ cꞌual kꞌin tuꞌ, catuꞌ ey cꞌal oc ix yalon tet naj junjun cꞌu. Jaxa yet sjuj cꞌual xin, catuꞌ jix yalon naj tet ix. Jix lawi cꞌal yabꞌen ix, jix too ix yalon tet ebꞌ yet conobꞌ tuꞌ tzet chi yal yeloc apnoj. 18 Jaxa yet skꞌejbꞌintajil yet sjuj cꞌual tuꞌ, jix bꞌet yalon ebꞌ tet naj Sansón jaxca tiꞌ:
Cꞌam junojxa tzetyetal yel xacꞌal chiꞌ yintaj noꞌ yal awcabꞌ.
Cꞌam junojxa yel xacꞌal ey yip yintaj noꞌ león, ẍi ebꞌ naj.
Catuꞌ jix takꞌwi naj Sansón jaxca tiꞌ:
Asan yutol jaꞌ ix wistil tuꞌ jix je yiꞌoc je yetoj, yuxan jix naꞌcha el je yalon tzet chi yal yeloc apnoj jun kꞌane tiꞌ, ẍi naj.
19 Jix lawi tuꞌ xin, jix oc pax Yespíritu Jehová yin naj Sansón yu yakꞌon yipal yin naj, catuꞌ jix too naj bꞌey conobꞌ Ascalón, jix bꞌet smakꞌon cam jun 30 ebꞌ Filisteo naj tituꞌ. Jaꞌ spichil ebꞌ naj eyocoj tuꞌ, jaꞌ jix yiꞌel naj, catuꞌ jix yakꞌon stooloj tzet jix yal tuꞌ. Jix lawi tuꞌ, jix meltzotoj naj bꞌey sna smam, yutol caw chi chichon scꞌul naj. 20 Jal ix yistil naj tuꞌ xin, jix aletoj ix tet junoj ebꞌ yamigo sbꞌa yetoj naj Sansón.