—Chi woche chin octoj wil ix wistil bꞌey yul na tuꞌ an, ẍi naj tet sniꞌ tuꞌ.

Ma xa chaꞌle octoj naj yu sniꞌ tuꞌ. 2 Yuxan jix al-le tet naj jaxca tiꞌ:

—Jaꞌ jin naꞌoni tol manxa oj ja woche ix ja wistil tiꞌ, yuxan jix wakꞌ ix tet junxa naj; asan xin, ey junxa sno ix caw sakꞌal xacꞌal yili ix yintaj ix ja wistil tuꞌ, jaꞌ ix tuꞌ chi skeꞌ yoc ix ja wistiloj, ẍi naj ey scutzꞌin tuꞌ tet naj.

3 Jix takꞌwi naj Sansón jaxca tiꞌ tet naj:

—Jaꞌ tinaniꞌ xin, cꞌam chi oc jin penail yu tzetyetal oj wute ebꞌ ja wet conobꞌ tiꞌ yu waon ecꞌ spaj tet ebꞌ an, ẍi naj Sansón tuꞌ.

4 Catuꞌ jix too naj, jix bꞌet smitxꞌontej jun 300 noꞌ waax naj, jix skꞌalon oc junjun yuchan teꞌ ta yin sne catajcꞌon noꞌ waax tuꞌ naj. 5 Jix lawi tuꞌ, jix yaon oc skꞌakꞌal teꞌ ta naj tuꞌ, catuꞌ jix jajletoj noꞌ waax tuꞌ yu naj bꞌey xol ixim stiriw ebꞌ Filisteo tuꞌ. Masanil ixim cꞌupbꞌilxa a bꞌulanoj, cꞌal ixim eyto oc yin yajan, pilan jix tzꞌaꞌtoj ixim, jix lawi cꞌal pax el an uva, cꞌal teꞌ olivo yu kꞌakꞌ. 6 Jaꞌ yet jix yilon oc ebꞌ naj Filisteo tuꞌ, catuꞌ jix oc ian ebꞌ naj skꞌanlen ecꞌoj, mactxequel jix uten jaxca tuꞌ. Catuꞌ jix al-le tet ebꞌ naj, tol jaꞌ naj Sansón jix uteni jaxca tuꞌ, yutol caw jix chichon scꞌul naj yu tzet jix utele naj yu sniꞌ, jaꞌton naj a conobꞌ Timná, yutol jix iꞌle ecꞌ yistil naj, catuꞌ jix akꞌle ix tet junxa yamigo naj, yu cꞌal jun tuꞌ, jix apni oc ebꞌ naj Filisteo yu snusle tzꞌaꞌ ix ix tuꞌ yetoj smam yu ebꞌ. 7 Jix lawi tuꞌ xin, jix yalon naj Sansón jaxca tiꞌ:

—Yutol jaxca tiꞌ jix je yunne, yuxan man cꞌal oj jin oc tucan jex wetneni, masantaꞌcꞌal tol oj wa can ecꞌ spaj ey jex, ẍi naj tet ebꞌ.

8 Yet cꞌal jun txolan tuꞌ, caw jix tit sjowal naj sicꞌlebꞌil, yuxan caw ecꞌal ánima jix smakꞌcan camoj, catuꞌ jix too caey naj bꞌey sjolanil jun chꞌen nachꞌen bꞌey Etam.

9 Jal ebꞌ Filisteo xin, jix apni oc ebꞌ yul yet Judá, jix swaꞌne ey bꞌulan sbꞌa ebꞌ bꞌey yacꞌalil txꞌotxꞌ Lehi, 10 catuꞌ jix skꞌanlen ebꞌ Israel caan bꞌey Judá tuꞌ tet ebꞌ:

—¿Tzet yu, yuxan chex jul je yakꞌ jowal ketoj jon? ẍi ebꞌ. Jix takꞌwi ebꞌ Filisteo tet ebꞌ jaxca tiꞌ:

—Tol chi jul cu mitxꞌ naj Sansón, yu kaon ecꞌ spaj tet naj jon, yutol caw jix cu yetne naj jon, ẍi ebꞌ.

11 Jaꞌ yet jix yabꞌen ebꞌ naj yicꞌaal Judá jun tuꞌ, ey jun 3,000 ebꞌ jix too ilon naj Sansón bꞌey chꞌen nachꞌen ey bꞌey Etam, jix yalon ebꞌ tet naj jaxca tiꞌ:

—¿Tumi man ja wotaj oj tol ey jon oc yalan ẍejbꞌanil ebꞌ naj Filisteo tiꞌ, catuꞌ caw ey yip ebꞌ naj? ¿Tzet yuxan cha wiꞌtej jun jowal tiꞌ cu xol yetoj ebꞌ naj? ẍi ebꞌ tet naj.

Catuꞌ jix takꞌwi naj Sansón:

—Cꞌam junojxa tzet jix wunne, asan tol jix wa can ecꞌ spaj yu tzet jix jin yute ebꞌ naj, ẍi naj tet ebꞌ.

12 Jix yalon ebꞌ tet naj jaxca tiꞌ:

—Yu cꞌal jun tuꞌ, yuxan chach jul cu kꞌaltoj tinaniꞌ, catuꞌ chach too kakꞌon can tet ebꞌ naj, ẍi ebꞌ.

Catuꞌ jix takꞌwi naj Sansón:

—Akꞌwej je tiꞌ ey jin xin, ta tol yel cꞌam chin je makꞌ cam jaex tiꞌ, ẍi naj tet ebꞌ.

13 Jix takꞌwi ebꞌ tet naj jaxca tiꞌ:

—Cꞌamaj, cꞌam cꞌal chach cu makꞌ camoj, asan tucꞌal chach cu kꞌaltoj, catuꞌ chach too kakꞌon tet ebꞌ naj Filisteo tuꞌ, ẍi ebꞌ tet naj.

Jix lawi tuꞌ, catuꞌ jix skꞌalon ey ebꞌ yetoj caabꞌ txꞌan lasu caw acꞌto, jix yiꞌon eltej ebꞌ bꞌey yul jun chꞌen nachꞌen tuꞌ.

14 Jaꞌ yet jix apni oc ebꞌ bꞌey txꞌotxꞌ Lehi, jix eltej ebꞌ Filisteo tuꞌ chaꞌlei naj yu ebꞌ. Caw chi el yaw ebꞌ yu tzalacꞌulal. Jaꞌ yet jun txolan tuꞌ, eyman jix oc pax Yespíritu Jehová yin naj Sansón yu yakꞌle yip naj, jix snicꞌontoj jun txꞌan lasu tuꞌ naj jaxca xacꞌal tzꞌaꞌil kꞌap. 15 Yin eymanil jix yiꞌa jun sbꞌajil scaẍail stiꞌ bꞌuru naj tol yaaxto wal yoqui. Jaꞌ yetoj jun tuꞌ jix makꞌle cam jun 1,000 ebꞌ naj Filisteo yu naj. 16 Jix lawi tuꞌ jix yaloni:

17 Jix lawi yaloni, jix sbꞌejon ey jun sbꞌajil stiꞌ noꞌ bꞌuru tuꞌ. Yu tuꞌ xin, Ramat-lehi jix yij can sbꞌi jun txꞌotxꞌ tuꞌ.^a 18 Jaxa naj Sansón tuꞌ caw ey stajin tiꞌal, yuxan jix a yaw tet Jehová, jix yalon jaxca tiꞌ: “Jaach jix ja wakꞌ wip yet jix eyqꞌuey ebꞌ naj tuꞌ wu an. ¿Jaxa tinaniꞌ, tumi oj jin ja chaꞌ cam yu tajin tiꞌal tiꞌ, catuꞌ oj jul pax wan txꞌoj conobꞌal tiꞌ jin smitxꞌoni?” ẍi naj Sansón.

19 Jix lawi tuꞌ xin, jaꞌ Jehová jix jajon jun jaꞌ ucꞌbꞌal jaꞌ bꞌey Lehi tuꞌ, jix yuqꞌuen jaꞌ naj Sansón tuꞌ, caw wal jix oc yip naj jix yabꞌe. Yuxan En-hacore jix yij can sbꞌi jun jaꞌ yaliẍ jaꞌ tuꞌ, masantaꞌcꞌal tinaniꞌ. (Chi yal yeloc apnoj yucꞌbꞌal jaꞌ mac ebꞌ chi a yaw).

20 Ey 20 abꞌil jix yakꞌ yaawil naj Sansón xol ebꞌ Israel, yet eyoc ebꞌ yalan ẍejbꞌanil ebꞌ Filisteo tuꞌ.