Jix Bꞌetecꞌ Naj Sansón Bꞌey Conobꞌ Gaza
16
Jaxa yet jun cꞌual xin, jix bꞌetecꞌ naj Sansón bꞌey conobꞌ Gaza. Jaꞌ tituꞌ jix yil jun ix amul ix naj, jix octoj naj yul sna ix ix tuꞌ, catuꞌ jix wey naj yetoj ix yet jun akꞌbꞌal tuꞌ. 2 Jaꞌ yet jix yabꞌen oc ebꞌ ánima caan yul conobꞌ tuꞌ, tol jaꞌ tituꞌ eyecꞌ naj Sansón tuꞌ, catuꞌ jix sjoyon oc sbꞌa ebꞌ yinlaj na tuꞌ, jix steynen ebꞌ bꞌey eyoc spuertail jun conobꞌ tuꞌ yet jun akꞌbꞌal tuꞌ. Catuꞌ tzꞌin xacꞌal ẍi ebꞌ masanil yet jix smajon ebꞌ yet jun akꞌbꞌal tuꞌ, yin mi wal chuman akꞌbꞌal jix too ebꞌ weyoj, jix snaꞌon ebꞌ tol jaꞌ yet chi kꞌinibꞌi a yet junxa cꞌu oj smakꞌon cam naj ebꞌ yaloni. 3 Jaxa naj Sansón xin, jix a waan naj yet jix oc chuman akꞌbꞌal, catuꞌ jix eltoj naj bꞌey eyoc spuertail jun conobꞌ tuꞌ, jix stokꞌon eltej jun miman puerta tuꞌ naj yetoj cꞌal smarcoal, jix sjolomxicꞌnetoj, catuꞌ jix too naj yaon can atoj bꞌey jun tzalan sattaj ecꞌtoj Hebrón.Naj Sansón Yetoj Ix Dalila
4 Jix lawi tuꞌ xin, catuꞌ jix yaon oc snaꞌbꞌal naj yin jun ix ix chi yij Dalila, caan ix bꞌey spananil jun txꞌotxꞌ chi yij Sorec. 5 Jaxa ebꞌ naj syaawil yeoc xol ebꞌ Filisteo, jix too kꞌanabꞌ ebꞌ yetoj ix Dalila tuꞌ, jix yalon ebꞌ jaxca tiꞌ tet ix:
—Cha monte wal jun Sansón tuꞌ cu kꞌanaꞌ, catuꞌ cha kꞌanlen el tet, bꞌeytuꞌ chi titoc yipal tuꞌ, tzet wal chi yun kakꞌon eyqꞌueyoj, catuꞌ chi cu kꞌalon eyoj, yet watxꞌ cꞌamxa tzet chi yute sbꞌa. Junjun jon oj kakꞌ 1,100 siclo chꞌen tumin plata ey jaach jon, ẍi ebꞌ tet ix ix tuꞌ.
6 Jix lawi tuꞌ xin, catuꞌ jix yalon ix tet naj Sansón jaxca tiꞌ:
—Chin oc wal tean ja win, tol cha walel ey jin bꞌeytuꞌ chi titoc ja wipal tol txꞌoj yel tiꞌ, ¿ey mi wal tzet chi yun ja kꞌal-le eyoj, catuꞌ cꞌamxa chi skeꞌ ja xuyon el ja bꞌa? ẍi ix tet naj.
7 Catuꞌ jix takꞌwi naj Sansón tet ix jaxca tiꞌ:
—Ta chin kꞌal-le ey yetoj jujebꞌoj acꞌ txꞌan tol cꞌamto chi cam taji, chi el wip tiꞌ an, jaxca xacꞌal yip junoj comon winaj chi wun canoj, ẍi naj tet ix.
8 Yuxan jix yiꞌtoj jujebꞌ acꞌ txꞌan ebꞌ Filisteo tol cꞌamto chi taji, jix yakꞌon ebꞌ tet ix Dalila tuꞌ, catuꞌ jix kꞌal-le ey naj Sansón tuꞌ yu ix. 9 Eyxa wan ebꞌ winaj xax yewbꞌa el sbꞌa bꞌey yul sna ix tuꞌ, catuꞌ caw ip jix yun yaon el yaw ix:
—¡Sansón, chi jul ebꞌ naj Filisteo jaach smitxꞌoni! ẍi ix.
Yet cꞌal jun txolan tuꞌ, jix snicꞌontoj wan txꞌan naj Sansón tuꞌ jaxca cꞌal snicꞌletoj junoj an txꞌal tol tzꞌaꞌilxa, queytuꞌ jix yutetoj naj. Ma cꞌal naꞌcha el yu ebꞌ Filisteo bꞌey chi titoc yipal naj tuꞌ. 10 Jix yalon ix Dalila tet naj Sansón jaxca tiꞌ:
—E… caw wal pena jaach, jix jin ja wetne, jix ja wakꞌ lekꞌtiꞌal ey jin an. Tinaniꞌ xin, chin kꞌan ey jaach. Al ey jin, tzet wal chi yun ja kꞌal-le eyoj, ẍi ix.
11 Jix takꞌwi naj Sansón jaxca tiꞌ:
—Ta chin kꞌal-le ey yetoj mimej acꞌ lasu, catuꞌ chi elcan wipal tiꞌ an, jaxca xacꞌal yip junoj comon winaj chi wun canoj, ẍi naj tet ix.
12 Yu jun tuꞌ xin, yuxan jix sey wan mimej acꞌ lasu ix Dalila tuꞌ, catuꞌ jix kꞌal-le ey naj yu ix yetoj txꞌan. Jix yaon pax el yaw ix junelxa:
—¡Sansón, chi jul ebꞌ Filisteo jaach smitxꞌoni! ẍi ix.
Jacꞌalaꞌ yet junelxa tuꞌ eyxa ebꞌ naj jix yewbꞌa el sbꞌa yul sna ix tuꞌ. Cꞌam cꞌal niꞌoj yeloc apnoj yul sat naj, jaxca cꞌal chi yun snicꞌletoj an txꞌal, queytuꞌ jix yutetoj txꞌan lasu naj tuꞌ. 13 Jix yalon pax ix Dalila tet naj jaxca tiꞌ:
—Caw quey cꞌal tiꞌ chi yun jin ja wetneni, catuꞌ cha wakꞌon cꞌal lekꞌtiꞌal ey jin. Al wal el ey jin xin, tzet wal chi yun jaach cu kꞌalon eyoj, ẍi ix. Jix takꞌwi naj Sansón jaxca tiꞌ:
—Ta cha patxꞌone ey jujebꞌoj tujan xil jin jolom tiꞌ yetoj an txꞌal tol chi chemle eyoj, catuꞌ caw tꞌininaj cha wute yetoj teꞌ chembꞌal, queytuꞌ chi yun yelcan wip tiꞌ an, catuꞌ jaxca xacꞌal yip junoj ebꞌ comon winaj chi wun canoj, ẍi naj Sansón tet ix.
Catuꞌ jix akꞌle wey naj Sansón yu ix. Jaxa yet jix weya naj tuꞌ xin, jix ẍemon ey xil sjolom naj tuꞌ ix yetoj an txꞌal chi chemlei. 14 Jaꞌ yet jix lawi ey ẍemon ix yetoj teꞌ chembꞌal tuꞌ, catuꞌ jix yaon el yaw ix:
—¡Sansón, chi jul ebꞌ naj Filisteo jaach smitxꞌoni! ẍi ix.
Jix a jucna naj Sansón tuꞌ, jix stokꞌon atej teꞌ chembꞌal naj yetoj an txꞌal tuꞌ. 15 Catuꞌ jix yalon ix tet naj jaxca tiꞌ:
—Jaach tiꞌ, caw wal lekꞌtiꞌ jaach, ¿tzet yuxan cha walaꞌ tol chin ja woche, yin xa yoxelal chin ja wetne tiꞌ, caw wal cꞌam cꞌaltaꞌ cha walel ey jin bꞌeytuꞌ chi titoc masanil ja wip tuꞌ? ẍi ix.
16 Jix oc cꞌal ian ix skꞌanlen el tet naj, bꞌeytuꞌ chi titoc masanil yip naj tuꞌ, jix cajtza a scꞌul naj yawi oc ix yin naj, yuxan jix bꞌejcha xacꞌal scꞌul naj Sansón tuꞌ scami. 17 Catuꞌ jix yalon el naj, bꞌeytuꞌ chi titoc masanil yip naj tuꞌ:
—Cꞌam tocꞌal juneloj chi tzujle el xil jin jolom yechel tax cꞌal wali, yutol jaꞌ yet cꞌamto chin ali, jix jin sicꞌle can el yu Dios, yet chin oc Nazareoal, chi yal yeloc apnoj tol yet cꞌaltaꞌ Dios weocoj. Yuxan ta ey mac chi tzujon el xil jin jolom tiꞌ, catuꞌ chi elcan jun wipal tiꞌ an, jaxca xacꞌal junoj comon winaj chi wun canoj, ẍi naj.
18 Queytuꞌ jix yun yotajne el ix tol jaꞌ yet junelxa tiꞌ, yel chi yal naj Sansón tuꞌ. Catuꞌ jix yaontoj kꞌane ix tet ebꞌ syaawil conobꞌ yeoc xol ebꞌ Filisteo tuꞌ:
—Jaꞌ tinaniꞌ, titanwej junelxa ey jin tiꞌ an, jix yalel naj Sansón ey jin bꞌeytuꞌ chi titoc yipal tuꞌ, ẍi ix tet ebꞌ.
Yu tuꞌ xin, jix apni oc ebꞌ naj scꞌatan ix yetoj chꞌen tumin tuꞌ.
19 Catuꞌ jix akꞌle wey naj Sansón tuꞌ yu ix Dalila tuꞌ bꞌey sat xubꞌ, jix yawten ix jun naj tzujwam, catuꞌ jix tzujle el jujebꞌ tujan xil sjolom naj. Jix lawi tuꞌ, jix oc ian xꞌemle naj yu ix, yutol xax el yip naj. 20 Catuꞌ jix yaon el yaw ix jaxca tiꞌ:
—¡Sansón, chi jul ebꞌ naj Filisteo jaach smitxꞌoni! ẍi ix.
Jix el sweyan naj Sansón tuꞌ, jaꞌ snaꞌon naj tol oj to skeꞌ scolon sbꞌa jaxca cꞌaltaꞌ jix yun yet yalantoj. Man yotaj oj naj ta tol xax bꞌejlecan naj yu Jehová. 21 Jix lawi tuꞌ xin, jix apni oc ebꞌ Filisteo scꞌatan naj, jix skꞌalon ey ebꞌ, catuꞌ jix iꞌle eltej sbꞌakꞌ sat naj yu ebꞌ, catuꞌ jix yiꞌontoj ebꞌ bꞌey conobꞌ Gaza. Jaꞌ tituꞌ jix yaoc chꞌen cadena ebꞌ yin naj, jix smajchen octoj ebꞌ yul preso, jix yaon oc ebꞌ yin mulnail yin chꞌen jutxꞌbꞌal ixim bꞌey yul preso tuꞌ. 22 Jaꞌ yet jix bꞌey cꞌaltoj tuꞌ xin, jix chꞌibꞌ pax xil sjolom naj junelxa.
Scamichal Naj Sansón
23 Catuꞌ jix syambꞌa oc sbꞌa ebꞌ syaawil conobꞌ yeoc xol ebꞌ Filisteo yin tzalacꞌulal, yutol jix mitxꞌle ey naj Sansón yu ebꞌ, jix yakꞌon xaambꞌal ebꞌ tet sdiosal chi yij Dagón, catuꞌ chi cꞌoli sbꞌitni ebꞌ tet jaxca tiꞌ:
Jaꞌ jun cu diosal tiꞌ jix aon oc jun cu cajat tiꞌ yul cu kꞌabꞌ, ẍi ebꞌ.
24 Jacꞌalaꞌ cꞌal pax ebꞌ ánima, jaꞌ yet jix yilon oc yin naj Sansón tuꞌ ebꞌ, jix bꞌitni ebꞌ tet sdiosal tuꞌ:
Jaꞌ jun cu diosal tiꞌ jix aon oc jun cu cajat tiꞌ yul cu kꞌabꞌ, jun jix nuson tzꞌaꞌ cu awo, catuꞌ ecꞌal ebꞌ ket conobꞌ jix smakꞌ camoj, ẍi ebꞌ.
25 Caw wal chi tzala ebꞌ ánima tuꞌ, yutol jix kꞌanle eltej naj Sansón tuꞌ yu ebꞌ yul preso tuꞌ, yet chi etnele naj yu ebꞌ. Jix yaon octoj ebꞌ snan xol yoyal templo tuꞌ, yu yetnen ebꞌ. 26 Jix yalon naj Sansón tet jun naj achꞌe quetznen ocoj:
—Iꞌ jintoj bꞌey yoyal snan yul templo tiꞌ jin kꞌanaꞌ, chi woche chin oc kꞌean niꞌoj yin, ẍi naj.
27 Masanil ebꞌ syaawil Filisteo tuꞌ, ebꞌ winaj cꞌal ebꞌ ix yaman oc ebꞌ yul templo tuꞌ, caw nonaj yu ebꞌ ánima tuꞌ, ey mi junoj 3,000 ebꞌ ánima eyatoj bꞌey yul scaabꞌ piso, watxꞌ xacꞌal smatzꞌli eytej ebꞌ yin tzet chi utele naj Sansón tuꞌ. 28 Jix lawi tuꞌ xin, jix yalon naj Sansón tet Jehová: Jaach jin Diosal, chin kꞌan ey jaach, tol chin ja naꞌtej, asanxane junelxa tiꞌ, catuꞌ cha wakꞌon wip yet chi waon ecꞌ spaj tet ebꞌ Filisteo tiꞌ, yu caabꞌ sbꞌakꞌ jin sat jix yiꞌeltej ebꞌ tiꞌ, ẍi naj Sansón tuꞌ. 29 Jix oc wal mitxꞌan naj yin caabꞌ mimej yoyal snan yul templo tuꞌ, jaꞌton wan ijnen a yalil jun templo tuꞌ, 30 jix lawi tuꞌ, caw ip jix yun yaon el yaw naj: ¡Caxcꞌal chin cami, asan tol chi cam ebꞌ Filisteo tiꞌ wetoj an! ẍi naj Sansón tuꞌ.
Jix lawi tuꞌ, jix yakꞌon yip stenon ecꞌ caabꞌ mimej yoyal templo tuꞌ, catuꞌ jix tit wejlabꞌoj yibꞌan masanil ebꞌ syaawil conobꞌ tuꞌ, cꞌal yibꞌan masanil ebꞌ ánima eyecꞌ tituꞌ. Yel xacꞌal miman ebꞌ ánima tuꞌ jix cam yu Sansón yet jix cꞌamxa cꞌal tuꞌ, yintaj ebꞌ jix smakꞌ cam yet yalantoj.
31 Jaꞌ yet jix lawi yunen jun tuꞌ xin, catuꞌ jix apni oc ebꞌ yuẍtaj naj yetoj cꞌal ebꞌ eyto yu sbꞌa yetoj, jix bꞌet yiꞌontej smimanil ebꞌ, jix mujle can naj yu ebꞌ bꞌey snan xol txꞌotxꞌ Sora yetoj Estaol bꞌey ey smujbꞌal camom naj Manoa, jaꞌton smam. Ey 20 abꞌil jix yakꞌ yaawil naj Sansón xol ebꞌ conobꞌ Israel.