—Jaꞌ yet jix elkꞌaneletoj chꞌen ja tumin, chꞌen 1,100 siclo plata, jaꞌ yet tuꞌ jix ja wal cantoj pena kꞌane yibꞌan jun elkꞌom tuꞌ. Jix wabꞌ ja walon wan kꞌane tuꞌ, yuxan jaꞌ tinaniꞌ eyecꞌ chꞌen yul jin kꞌabꞌ, jain jix welkꞌane el chꞌen ja tumin tuꞌ, ẍi naj tet xutx.

Yu tuꞌ xin, chi yalon ix txutxe tuꞌ jaxca tiꞌ:

—¡Jaꞌ ojabꞌ Jehová chi yakꞌ syaaxilal ja wibꞌan, jaach wuneꞌ! ẍi ix tet naj.

3 Jaꞌ yet jix yakꞌon meltzo chꞌen tumin tuꞌ naj tet xutx tuꞌ, jix yalon ix jaxca tiꞌ:

—Jaach wuneꞌ, jaꞌ jun tumin tiꞌ chi wakꞌ chꞌen tet Jehová, yet watxꞌ chi waꞌxi junoj echele tol chi josle eyoj, catuꞌ chi waꞌnele ey yul smolteal, chi ale oc chꞌen plata yin, catuꞌ oj wakꞌon ey jaach an, ẍi ix tet yuneꞌ tuꞌ.

4 Jix yakꞌ meltzo naj Micaías chꞌen tumin tuꞌ tet xutx. Catuꞌ jix yakꞌon jun 200 siclo chꞌen plata tumin tuꞌ ix tet jun naj chi waꞌnen chꞌen plata, yet chi waꞌnele ey jun echele tuꞌ. Jix lawi tuꞌ, jix yiꞌontoj bꞌey yul sna naj Micaías.

5 Queytuꞌ jix yun yoc sna naj Micaías tuꞌ yin snaoj wan comon dios tuꞌ. Jix swaꞌnen jun an pichile naj chi skꞌan ebꞌ yakꞌomal xaambꞌal yetoj wanxa echele, jix yaon oc jun scꞌaal naj yin yakꞌomaloj xaambꞌal. 6 Yutol jaꞌ yet jun tiempoal tuꞌ, cꞌam sreyal ebꞌ Israel chi ijbꞌani, junjun cꞌal ebꞌ chi el yunen tzet chi yoche scꞌul.

7 Jaꞌ bꞌey conobꞌ Belén yul yet Judá, jatuꞌ caan jun naj achꞌe Levita, tucꞌal chi ecꞌabꞌtoj naj yul yet Judá. 8 Jaꞌ jun achꞌe tuꞌ, jix el naj bꞌey yul yet Belén, yet chi too naj seyon bꞌey chi caey ecꞌoj, jix ecꞌ cꞌaltoj naj bꞌey txꞌotxꞌ tzalquiltaj yul yet Efraín. Jix lawi tuꞌ, jix apni oc naj bꞌey sna naj Micaías.

9 —¿Bꞌeytuꞌ jix jaach titocoj? ẍi naj Micaías tuꞌ tet naj. Jix yaloni:

—Jaꞌ bꞌey Belén yul yet Judá jix jin tita. Jain tiꞌ Levita jin, lalan jin seyon ecꞌ bꞌey oj jin caey ecꞌoj, ẍi naj.

10 —Ta tol jaxca tuꞌ xin, canan can wetoj an, yet watxꞌ chach oc yakꞌomaloj jin xaambꞌal an, jaxca wal jin mam cha wun ocoj. Oj wakꞌ laonebꞌ siclo chꞌen tumin plata ey jaach yin ja tooloj yin junjun abꞌil, catuꞌ oj wakꞌon cꞌal pax ja pichil cꞌal ja loꞌbꞌe, ẍi naj Micaías tet jun achꞌe tuꞌ.

11 Jix ẍaꞌ scꞌul jun naj Levita tuꞌ scan caey yetoj naj Micaías tuꞌ, jaxca wal scꞌaal jix yun ocoj. 12 Jix ale oc naj Levita tuꞌ yakꞌomaloj xaambꞌal yu naj Micaías tuꞌ, queytuꞌ jix yun scaey ecꞌ naj tituꞌ. 13 Yu jun tuꞌ, yuxan jix snaꞌ naj Micaías tol oj yakꞌ syaaxilal Dios yibꞌan, yutol Levita jun naj eyoc yin yakꞌomaloj xaambꞌal tuꞌ.