—¿Mactxequel jix jaach iꞌontej titiꞌ? ¿Tzet yu, yuxan ey jaach ecꞌ titiꞌ? ¿Tzet chi jul ja wunne? ẍi ebꞌ tet naj.

4 Jix yalon naj Levita tuꞌ tet ebꞌ, yutol jaꞌ naj Micaías jix alon ey jin yet chin oc yin yakꞌomaloj xaambꞌal naj. 5 Jix lawi tuꞌ xin, jix yalon ebꞌ tet naj:

—Kꞌanle ja wabꞌ tet Dios ku jon xin, ta tol watxꞌ oj yun yeloc jun cu chejbꞌanil bꞌey chi cu too tiꞌ jon.

6 Jix yalon jun naj Levita, jun yakꞌomal xaambꞌal tuꞌ tet ebꞌ jaxca tiꞌ:

—Asiꞌwej yin tzalacꞌulal, jaꞌ Jehová oj jex teynen bꞌey oj jex toj oc cꞌal, ẍi naj tet ebꞌ.

7 Yuxan jix toocan ebꞌ jowan ilom txꞌotxꞌ tuꞌ bꞌey conobꞌ Lais. Jaꞌ ebꞌ ánima caan bꞌey jun conobꞌ tuꞌ caw cꞌam tzet chi snaꞌ ebꞌ, jaxca cꞌal sbꞌeybꞌal ebꞌ Sidonio. Jaꞌ ebꞌ tuꞌ, eyecꞌ ebꞌ yin tzalacꞌulal, cꞌam cꞌal niꞌoj sbꞌiscꞌulal ebꞌ, tzꞌajan cꞌal ey tzetyetal tet ebꞌ, catuꞌ naat yeel ebꞌ yin conobꞌ Sidón, cꞌam cꞌal mactxequel ey yalon yet yin ebꞌ, yet cꞌal sbꞌa ebꞌ xꞌojli. 8 Jaꞌ yet jix meltzo ebꞌ naj ilom txꞌotxꞌ tuꞌ bꞌey Sora cꞌal bꞌey Estaol, jaꞌton bꞌey ey can wanxa yetbꞌi ebꞌ tuꞌ, jix skꞌanlen ebꞌ tet ebꞌ jaxca tiꞌ:

—¿Watxꞌ mi cꞌal jix yun yeloc je chejbꞌanil? ẍi ebꞌ. Jix takꞌwi ebꞌ naj ilom txꞌotxꞌ tuꞌ jaxca tiꞌ:

9 —Jix ecꞌ kil masanil jun txꞌotxꞌ tuꞌ jon, jix kilaꞌ tol caw watxꞌ jun txꞌotxꞌ tuꞌ. Toonwej kilwej, kakꞌwej eyqꞌuey ebꞌ, cꞌam cꞌal mactxequel tucꞌal chi cancan chotan xew titiꞌ. Toonwej, yet chi kiꞌon ecꞌ jun txꞌotxꞌ tuꞌ. 10 Jaꞌ ebꞌ ánima tituꞌ eyecꞌ ebꞌ yin tzalacꞌulal, caw lean txꞌotxꞌ, caw tzꞌajan cꞌal ey tzetyetal sat txꞌotxꞌ. Jaꞌ Dios oj akꞌon jun txꞌotxꞌ tuꞌ ey jon, ẍi ebꞌ.

11 Yu tuꞌ xin, ey 600 ebꞌ winaj yin yicꞌaal Dan jix el bꞌey Sora cꞌal bꞌey Estaol. Masanil ebꞌ ey smitxꞌkꞌabꞌ ebꞌ yet jowal. 12 Jix apni oc ebꞌ bꞌey Judá. Jaꞌ tituꞌ jix swaꞌne ey bꞌulan sbꞌa ebꞌ yetcꞌulal bꞌey chi too cꞌu bꞌey Quiriat-jearim, jaꞌton jun txꞌotxꞌ chi yij sbꞌi, bꞌey bꞌulan ey ebꞌ yet Dan. 13 Jix el pax ebꞌ tituꞌ xin, jix toocan ebꞌ bꞌey txꞌotxꞌ tzalquiltaj yul yet Efraín. Jix apni oc ebꞌ bꞌey sna naj Micaías. 14 Yuxan jaꞌ ebꞌ jowan jix bꞌet ilon ecꞌ txꞌotxꞌ txꞌotxꞌ bꞌey Lais tuꞌ, jix yalon ebꞌ tet ebꞌ yet conobꞌ tuꞌ jaxca tiꞌ:

—Tumi taꞌ je yotaj jun tzetyetal tuꞌ tinaniꞌ. Yutol jaꞌ bꞌey yul junoj wan na tuꞌ, eyoctoj jun an pichile yet ebꞌ yakꞌomal xaambꞌal, yetoj wan echele, cꞌal jun echele tol josbꞌil eyoj, cꞌal jun waꞌnebꞌil yul molte, yuxan tzet wal oj je yun yetoj che naꞌ, ẍi ebꞌ.

15 Jix lawi tuꞌ, jix too ebꞌ ilom txꞌotxꞌ tuꞌ bꞌey sna jun naj achꞌe Levita tuꞌ, jaꞌton bꞌey sna naj Micaías. Jix apni oc ebꞌ, jix akꞌle scawil scꞌul naj achꞌe yakꞌomal xaambꞌal tuꞌ yu ebꞌ. 16 Jaꞌ ebꞌ naj 600 soldado yet Dan tuꞌ, chi echbꞌanen ebꞌ bꞌey stiꞌ puerta tuꞌ, iꞌbꞌil oc smitxꞌkꞌabꞌ yet jowal ebꞌ. 17 Jaꞌ ebꞌ jowan ilom txꞌotxꞌ tuꞌ jix octoj ebꞌ yin sbꞌabꞌelal bꞌey yul na tuꞌ, jix yiꞌon eltej jun echele tol josbꞌil ey tuꞌ ebꞌ, yetoj jun pichile yet ebꞌ yakꞌomal xaambꞌal, cꞌal wanxa yechel comon dios, yetoj cꞌal jun echele waꞌnebꞌil ey yul smolteal, yajbꞌan eyecꞌ jun yakꞌomal xaambꞌal tuꞌ yetoj 600 ebꞌ soldado tuꞌ bꞌey stiꞌ puerta.

18 Jaꞌ yet jix yilon jun yakꞌomal xaambꞌal tuꞌ tol jix octoj ebꞌ yul sna naj Micaías tuꞌ, yu yiꞌon eltej wan tzetyetal tuꞌ ebꞌ, jix yaloni:

—¿Tzet che yun titiꞌ? ẍi naj tet ebꞌ.

19 Jix yalon ebꞌ jaxca tiꞌ:

—Tzꞌin cꞌal ja chi jaach tiꞌ, asan tol chach too ketoj jon; chi koche tol jaach chach oc yakꞌomaloj cu xaambꞌal jon, jaxca cu mam cha wun ocoj. ¿Tumi man watxꞌoj cha wabꞌe tol chach oc yin yakꞌomaloj xaambꞌal xol junoj ebꞌ yicꞌaal Israel, yintaj pax tol asan chꞌan yin junoj nail ánima? ẍi ebꞌ tet naj.

20 Jaꞌ jun naꞌbꞌale tuꞌ jix ẍaꞌ scꞌul naj yakꞌomal xaambꞌal tuꞌ, jix yiꞌontoj jun echele tuꞌ ebꞌ, yetoj jun pichile yet ebꞌ yakꞌomal xaambꞌal tuꞌ, yetoj cꞌal wanxa sdiosal naj Micaías tuꞌ, catuꞌ jix too yetoj ebꞌ yicꞌaal Dan tuꞌ. 21 Jix lawi tuꞌ xin, jaꞌ ebꞌ unin jix akꞌle bꞌabꞌoj yu ebꞌ, yetoj cꞌal noꞌ sjobꞌbꞌeal noꞌ, cꞌal jantaj stzetyetal ebꞌ, jix oc tzajan ebꞌ soldado yintaj ebꞌ, queytuꞌ jix yun stoo ebꞌ. 22 Jaꞌ yet naat xacꞌal chi too ebꞌ xin, catuꞌ jix syambꞌan oc sbꞌa naj Micaías yetoj ebꞌ caan scawilal tuꞌ, catuꞌ jix oc tzajan naj yintaj ebꞌ. 23 Jaꞌ yet jix yabꞌen ebꞌ yicꞌaal Dan yel yaw ebꞌ tzajan oc yintaj ebꞌ tuꞌ, jix meltzotej tꞌanan ebꞌ yet Dan tuꞌ, jix skꞌanlen ebꞌ tet naj Micaías jaxca tiꞌ:

—¿Tzet chach iꞌon yetoj wan ánima tuꞌ? ẍi ebꞌ.

24 Jix takꞌwi naj Micaías tet ebꞌ jaxca tiꞌ:

—Jaex tiꞌ jix je yiꞌtej jin diosal jix jin waꞌne an, jix je yiꞌon pax tej naj yakꞌomal jin xaambꞌal an, cꞌamxa cꞌal niꞌoj tzet jix je yakꞌ can ey jin, catuꞌ chi to wal je tecꞌbꞌan je bꞌa je kꞌanlen ey jin yu tzet chin iꞌon an, ẍi naj tet ebꞌ.

25 Jix yalon ebꞌ yet Dan tet naj jaxca tiꞌ:

—Cꞌam chi yoche cu cꞌul tol miman cha wute yel yaw yul ja nukꞌ kin jon, yutol ey ebꞌ naj cꞌam niꞌoj smimancꞌulal jaꞌjun ketoj tiꞌ jon, jaxa tala chi yunne, chach qꞌueyle el yu ebꞌ naj yetoj ja wuninal, ẍi ebꞌ tet naj.

26 Jaꞌ yet jix yilon naj Micaías tol ecꞌbꞌan yip ebꞌ yintaj naj, catuꞌ caw ecꞌal pax ebꞌ, yuxan jix meltzo cantoj naj bꞌey sna, jal ebꞌ yicꞌaal Dan jix too cꞌal ebꞌ bꞌey chi too tuꞌ. 27 Jaꞌ ebꞌ yet Dan tuꞌ, pilan jix yelkꞌanetoj masanil tzet waꞌnebꞌil yu naj Micaías tuꞌ, yetoj cꞌal jun yakꞌomal xaambꞌal, masantaꞌcꞌal jix apni oc ebꞌ bꞌey conobꞌ Lais. Jaꞌ masanil ebꞌ ánima caan tituꞌ caw eyoc ebꞌ yin tzalacꞌulal, cꞌam cꞌal niꞌoj tzet chi snaꞌ ebꞌ, yuxan caw subꞌotaj xacꞌal jix yun smakꞌle cam masanil ebꞌ yu ebꞌ yicꞌaal Dan; jix yakꞌon cꞌal pax tzꞌaꞌ masanil jun conobꞌ tuꞌ ebꞌ. 28 Yutol jaꞌ jun conobꞌ tuꞌ naat ta yeel yin conobꞌ Sidón, yuxan cꞌam junoj mactxequel ey yalon yet yin ebꞌ, cꞌam pax junoj mactxequel jix colon el ebꞌ. Jaꞌ bꞌey spananil sjobꞌeal yet Bet-rehob ey jun conobꞌ tuꞌ. Jix lawi tuꞌ, jaꞌ ebꞌ yet Dan jix scaꞌ waꞌnen a jun conobꞌ tuꞌ, queytuꞌ jix yun scaey ecꞌ ebꞌ tituꞌ. 29 Jaꞌ yet yalantoj Lais yoc sbꞌi jun conobꞌ tuꞌ, jaxa tinaniꞌ, Dan jix yakꞌ yij sbꞌi ebꞌ, yu yakꞌon bꞌina sbꞌi yichmam ebꞌ tuꞌ, jaꞌton Dan naj scꞌaal Israel. 30 Jaꞌ jun yechel comon dios tol josbꞌil eyoj, jatuꞌ jix swaꞌne ey ebꞌ, catuꞌ jix oc ebꞌ eyilal tet. Jaꞌ jun yakꞌomal xaambꞌal ebꞌ, jaꞌton Jonatán, yicꞌaal naj Guersón scꞌaal naj Moisés. Jaꞌ xol ebꞌ yicꞌaal Jonatán tuꞌ, jix oc cꞌal ebꞌ yakꞌomaloj xaambꞌal xol ebꞌ yicꞌaal Dan, masantaꞌcꞌal yet jix toocan ebꞌ jaxca yin presowomal yu ebꞌ Asiria. 31 Jaꞌ jun echele jix swaꞌne naj Micaías tuꞌ, jaꞌ jix oc cꞌal sdiosaloj ebꞌ yin masanil tiempo yet eyecꞌ jun scalubꞌal Jehová bꞌey Siló.