Jun Levita Yetoj Yistil
19
Jaꞌ yet jun tiempoal yet cꞌamto junoj rey eyoc xol ebꞌ conobꞌ Israel tuꞌ, ey jun Levita caan bꞌey jun txꞌotxꞌ naat yeel bꞌey txꞌotxꞌ tzalquiltaj yul yet Efraín, ey jun ix a Belén yul yet Judá, jix oc yin scaabꞌ yistiloj naj. 2 Asan xin, jix yaoc spenail ix yul skꞌabꞌ naj, yuxan jix paxtoj ix bꞌey sna smam bꞌey Belén tuꞌ. Canebꞌ xꞌaaw jix eecꞌ ix tituꞌ, jix lawi canebꞌ xꞌaaw tuꞌ, 3 catuꞌ jix too pax naj Levita tuꞌ smonten ix junelxa, tala chi tit pax ix yetoj naj. Jix yiꞌtoj jun yakꞌomal servil naj yetoj, jix yiꞌontoj cacꞌon sbꞌuru ebꞌ, catuꞌ jix chaꞌle apnoj naj yu ix bꞌey sna smam tuꞌ, jaxa yet jix yilon oc naj smam ix tuꞌ caw jix chaꞌle apnoj naj yin tzalacꞌulal yu sniꞌ tuꞌ. 4 Jix yalon naj smam ix tuꞌ tol chi cancan naj yetoj ebꞌ. Yuxan jix cancan naj Levita yetoj jun yakꞌomal servil jaꞌjun yetoj tuꞌ yin oxebꞌ cꞌual bꞌey sna smam ix ix tuꞌ. Jix low ebꞌ, jix yuqꞌuen jaꞌ ebꞌ, catuꞌ jix wey ebꞌ tituꞌ. 5 Jaxa yet scan cꞌual xin, jix a waan ebꞌ yet skꞌinibꞌal, jaxa stoo ebꞌ yaloni. Jaxa yet tuxa wal chi too ebꞌ xin, jix yalon naj smam ix ix tuꞌ tet sniꞌ tuꞌ jaxca tiꞌ:—Oj jaach lowoj, catuꞌ oj jaach toj, yet watxꞌ ey ja wip ja bꞌeyi, ẍi naj tet sniꞌ tuꞌ.
6 Yuxan jix ey chotan ebꞌ lowoj cꞌal yuqꞌuen jaꞌ ebꞌ scawanil, jix oc cꞌal pax tean naj smam ix ix tuꞌ yin ebꞌ tol chi can ebꞌ junojxa akꞌbꞌal yin tzalacꞌulal. 7 Caxcꞌal jix a waan jun Levita tuꞌ yet chi yochen xacꞌal chi paxtoj, jaxa pax sniꞌ naj tuꞌ jix oc cꞌal pax tean yin, yuxan jix toocan ebꞌ yetoj.
8 Jaxa yet sjoꞌ cꞌual xin, jix a waan jun Levita tuꞌ yet skꞌinibꞌal yet chi paxtoj, jix oc cꞌal pax tean naj smam ix ix tuꞌ yin junelxa yet chi low yetoj, catuꞌ chi toi, yet watxꞌ ey yip yet chi too yul-laj bꞌe. Jix low ebꞌ xin, yajbꞌan chi a cꞌal cꞌu. 9 Jaꞌ yet jix a waan jun Levita tuꞌ stoo yetoj yistil yetoj cꞌal jun yakꞌomal servil jaꞌjun yetoj tuꞌ, jix yalon pax sniꞌ naj tuꞌ tet tol lalan yeycꞌu, yuxan jix oc pax tean yin yet chi can pax can yet junxa akꞌbꞌal tuꞌ yin tzalacꞌulal, jaxa yet junxa cꞌual chi too ebꞌ. 10 Jaxa jun naj Levita tuꞌ xin, ma xa yal scꞌul jix can yet junxa akꞌbꞌal tuꞌ, yuxan jix too xacꞌal yetoj yistil tuꞌ yetoj cꞌal jun yakꞌomal servil tuꞌ, yetoj cacꞌon noꞌ sbꞌuru eyxa oc stzꞌuum. Jaꞌ yet jix apni oc ebꞌ sattaj ecꞌtej conobꞌ Jebús, jaꞌton conobꞌ Jerusalén, yet lalanxa yeycꞌu. 11 Jix yalon jun yakꞌomal servil jun Levita tuꞌ tet:
—¿Tzet mi ẍi ja cꞌul jaach tiꞌ, ta chi cu can yet jun akꞌbꞌal tiꞌ bꞌey conobꞌ Jebús tiꞌ? ẍi naj.
12 Jix yalon jun Levita tuꞌ jaxca tiꞌ:
—Cꞌamaj, cꞌam chi skeꞌ cu can wey bꞌey junoj conobꞌ tol man Israeloj. Toon cꞌal, masantaꞌcꞌal chi cu apni oc bꞌey conobꞌ Guibeá. 13 Jaꞌ bꞌey Guibeá tuꞌ oj ecꞌ akꞌbꞌal ku, ma bꞌey Ramá xin, ẍi naj.
14 Catuꞌ jix too cꞌal ebꞌ xin. Lalanxa skꞌejbꞌi eyoj yet jix apni oc ebꞌ bꞌey Guibeá, jaꞌton jun conobꞌ tuꞌ yet ebꞌ yicꞌaal naj Benjamín. 15 Jix elcan ebꞌ yul bꞌe, jix toocan ebꞌ bꞌey Guibeá. Jaꞌ tituꞌ oj ecꞌ akꞌbꞌal yu ebꞌ. Jix too ey chotan ebꞌ bꞌey txombꞌal bꞌey jun conobꞌ tuꞌ, yutol cꞌam mac chi akꞌon sposada ebꞌ.
16 Jix lawi tuꞌ xin, lalanxa yecꞌ akꞌbꞌal jix ecꞌtoj jun naj icham winaj speto bꞌey smulnail. Jaꞌ jun winaj tuꞌ, jatuꞌ caan yet yalantoj bꞌey txꞌotxꞌ tzalquiltaj bꞌey yul yet Efraín. Jal tinaniꞌ, jatuꞌ caan ecꞌ bꞌey conobꞌ Guibeá tuꞌ, jaxca wal tol tucꞌal chi ecꞌabꞌtoj xol ebꞌ yicꞌaal Benjamín. 17 Jaꞌ yet jix yilon oc naj icham winaj tuꞌ jun Levita tuꞌ, jix skꞌanlen tet jaxca tiꞌ:
—¿Bꞌeytuꞌ jix jaach titocoj, cꞌal bꞌeytuꞌ chach toocoj? ẍi naj tet.
18 Jix takꞌwi jun Levita tuꞌ jaxca tiꞌ:
—Tucꞌal chi cu ecꞌtoj titiꞌ jon, jatuꞌ cu peto bꞌey conobꞌ Belén, jatuꞌ chi cu too bꞌey jun txꞌotxꞌ caw naat ye cantoj bꞌey txꞌotxꞌ tzalquiltaj yul yet Efraín. Yutol jaꞌ tituꞌ caan jin. Jix jin eecꞌ jayebꞌ cꞌual bꞌey Belén, jaxa tinaniꞌ xin, chin too bꞌey scalubꞌal Jehová, asan xin, caw cꞌam junoj mactxequel chi akꞌon jin posada titiꞌ an. 19 Ey sloꞌbꞌe noꞌ jin bꞌuru tiꞌ iꞌbꞌil ocoj, ey cꞌal pax cu loꞌbꞌe iꞌbꞌil oc yetoj ix wistil tiꞌ yetoj naj wakꞌomal servil tiꞌ. Cꞌam cꞌal tzet chi cu naꞌ jon, ẍi naj.
20 Jix takꞌwi naj icham winaj tuꞌ tet naj jaxca tiꞌ:
—Toon wetoj an xin, jain oj wakꞌ masanil tzetyetal oj ja kꞌanaꞌ, ma yal jin cꞌul oj jaach can bꞌey txombꞌal yet akꞌbꞌalil tiꞌ, ẍi naj.
21 Yuxan jix too ebꞌ bꞌey sna naj icham winaj tuꞌ, jix akꞌle yan noꞌ sbꞌuru tuꞌ yu naj. Jix lawi tuꞌ xin, jix xꞌaon el yajan ebꞌ, catuꞌ jix low ebꞌ, cꞌal yuqꞌuen jaꞌ ebꞌ. 22 Yajbꞌan chi tzala ebꞌ yet jun txolan tuꞌ, jaxa jix yunne jix jul oc joyan wan winaj a conobꞌ tuꞌ tol cꞌam swatxꞌil snaꞌbꞌal yinlaj jun na tuꞌ, catuꞌ jix cꞌoli smakꞌon octoj spuertail na tuꞌ ebꞌ, jix yalon ebꞌ tet naj icham winaj tuꞌ jaxca tiꞌ:
—Iꞌeltej jun winaj eyecꞌ ey jaach tiꞌ, chi koche chi ketne jon, ẍi ebꞌ.
23 Jix yalon naj yaaw na tuꞌ tet ebꞌ jaxca tiꞌ:
—Caw cꞌamaj jex wet animail, cꞌam ojabꞌ che yun junoj spenail yin jun winaj eyecꞌ posadail jin cꞌatan tiꞌ an. 24 Ilaꞌla, ti ey jun ix jin cutzꞌin caw kꞌopo ix to ix, yetoj cꞌal pax jun ix yistil jun naj winaj tiꞌ. Jaꞌ ebꞌ ix tiꞌ chi skeꞌ waon eltoj ebꞌ ix ey jex, yet che yun je yochwan yetoj ebꞌ, jal pax jun winaj tiꞌ xin, cꞌam ojabꞌ che yun junoj spenail tuꞌ yin, ẍi naj tet ebꞌ.
25 Caw cꞌam cꞌal chi ẍaꞌ ebꞌ yabꞌ tzet jix yal naj icham winaj tuꞌ. Yuxan jix yaeltoj jun scaabꞌ yistil jun Levita tuꞌ stiꞌ na tet ebꞌ, catuꞌ jix etnele ix yu ebꞌ masanil akꞌbꞌal masantaꞌcꞌal jix kꞌinibꞌi aoj, catuꞌ jix sbꞌejoncan ix ebꞌ. 26 Lalanxa wal sajbꞌi, jix meltzo octej ix ix tuꞌ bꞌey sna naj icham winaj bꞌey eyecꞌ yichamil ix tuꞌ, jaxa yet jix apni oc ix bꞌey stiꞌ spuertail na tuꞌ jix telkꞌotoj ix, catuꞌ jix cam xacꞌal el ix. 27 Jaxa yet jix a waan naj yichamil ix tuꞌ, jix sjajon smajil na tuꞌ naj yet chi bꞌeelwi naj yet junxa cꞌual tuꞌ; jix yiloni, tol telan ey ix yistil naj bꞌey stiꞌ na tuꞌ, jabꞌan can octoj skꞌabꞌ ix yibꞌan smarcoal stiꞌ teꞌ na tuꞌ. 28 Jix yalon naj tet ix:
—Aan waanoj, toon, ẍi naj tet ix.
Ma xa takꞌwoj ix tet naj, jix yiꞌon a smimanil ix tuꞌ naj, jix yaon atoj naj yibꞌan jun sbꞌuru tuꞌ, jix yiꞌontoj naj bꞌey sna. 29 Jaꞌ yet jix apni oc naj bꞌey sna, jix skocꞌ kꞌupnentoj smimanil scaabꞌ yistil tuꞌ bꞌey chi snubꞌle sbꞌa sbꞌajil ix, lacawebꞌ tujan jix yute eloj, catuꞌ jix yaontoj bꞌey masanil bꞌey caan ebꞌ yet Israelal. 30 Jaꞌ masanil ebꞌ jix ilon jun tuꞌ, jix yalon ebꞌ jaxca tiꞌ:
—Yet tax cꞌal jix cu eltej bꞌey txꞌotxꞌ Egipto cꞌam tocꞌal bꞌey chi kil junoj jaxca jun tiꞌ. Yuxan sowalil chi cam cu naꞌonwej yibꞌan jun tiꞌ, tzet watxꞌ chi kunwej yetoj, ẍi ebꞌ.