—Jix jin apni oc yetoj ix scaabꞌ wistil bꞌey conobꞌ Guibeá, yul yet Benjamín, yet watxꞌ chi cu ecꞌ jun akꞌbꞌal tituꞌ. 5 Jaꞌ yet jun akꞌbꞌal tuꞌ jix syambꞌa oc sbꞌa ebꞌ winaj caan bꞌey jun conobꞌ tuꞌ yinlaj na bꞌey ey jin posada tuꞌ, yet chi yochen ebꞌ chin smakꞌon camoj, yuxan jaxa ix wistil jix oc ian ebꞌ naj yetneni, masantaꞌcꞌal jix cam ix yu ebꞌ. 6 Yu jun tuꞌ, jix wiꞌontoj smimanil ix an, catuꞌ jix jin kocꞌ kꞌupnentoj smimanil, jix waontoj tet masanil ebꞌ ket conobꞌ, yet watxꞌ chi yotajne el masanil Israel tzet jix yun yoc jun camich tuꞌ. 7 Yu tuꞌ xin, yutol ket Israelal wej cu bꞌa, oj cu naꞌwej yibꞌan; oj je yalaꞌ tzet oj kunwej yu jun tiꞌ, ẍi naj tet ebꞌ.

8 Yuxan junxane jix yute snaꞌbꞌal ebꞌ masanil, jix yalon ebꞌ jaxca tiꞌ:

—Cꞌam junoj jon chi cu meltzotoj bꞌey cu na bꞌey caan jon masantaꞌcꞌal chi yal sbꞌa tzet chi eloc jun kꞌane tiꞌ. 9 Asan jun tzetyetal sowalil chi kunne, tol chi cu tulnewej cu xol tiꞌ, yet watxꞌ chi kilaꞌ mactxequel jon oj cu toj akꞌo jowal yin conobꞌ Guibeá. 10 Jix yalon ebꞌ, tol yin junjun icꞌaaleal chi sicꞌle can el laonwan winaj, jaꞌ ebꞌ tuꞌ chi oc can yibꞌan seyon cu loꞌbꞌe jaon soldado jon tiꞌ. Jaxa jon cu masanil xin, chi too kaecꞌ spaj tet ebꞌ a Guibeá yu jun spenail jix yun ebꞌ cu xol tiꞌ, ẍi ebꞌ.

11 Junxane jix yute sbꞌa ebꞌ Israel tuꞌ yet chi oc ebꞌ yul conobꞌ yakꞌon jowal. 12 Jix yaontoj ẍejabꞌ ebꞌ bꞌey masanil yul yet ebꞌ Benjamín, jix ecꞌ ebꞌ yalon jaxca tiꞌ: Yel xacꞌal pena tzet jix je yun jaywanoj jex jaex tiꞌ. 13 Jaꞌ tinaniꞌ xin, jaꞌ wan winaj jix yun spenail je xol tuꞌ, iꞌwej eltej ebꞌ naj a Guibeá tuꞌ ey jon, catuꞌ chi cu makꞌon cam ebꞌ, queytuꞌ oj yun yel jun spenail cu xol jaon Israel jon tiꞌ, ẍi ebꞌ. Jaxa ebꞌ yicꞌaal Benjamín tuꞌ, ma ẍaꞌ yabꞌ ebꞌ tzet jix yal ebꞌ Israel tuꞌ.

14 Jaꞌ jun jix yun ebꞌ, tol jix syambꞌa sbꞌa ebꞌ bꞌey Guibeá, yet watxꞌ chi too yakꞌon jowal ebꞌ yetoj wanxa ebꞌ yet Israelal tuꞌ. 15 Ey 26,000 ebꞌ soldado jix tit xol ebꞌ yicꞌaal Benjamín tuꞌ yin akꞌo jowal, txꞌoj pax yeoc ebꞌ 700 soldado caw wal jelan yin jowal, a Guibeá ebꞌ. 16 Jaꞌ xol masanil ebꞌ soldado tuꞌ ey 700 ebꞌ tol yetoj skꞌexan kꞌabꞌ chi kꞌojwa yetoj jinich, caxcꞌal junoj xil jolome chi michꞌcha cꞌal yu ebꞌ. 17 Jaxa pax wanxa ebꞌ Israel tuꞌ, ey 400,000 ebꞌ soldado caw jelan ebꞌ yin akꞌo jowal sicꞌlebꞌil, yet chi yakꞌon jowal ebꞌ yetoj ebꞌ yicꞌaal Benjamín.

18 Jaxa ebꞌ Israel tuꞌ jix too ebꞌ bꞌey Betel, yet chi skꞌanlen ebꞌ tet Dios yet chi yotajne el ebꞌ mac icꞌaaleal chi bꞌabꞌi oc yakꞌon jowal yin ebꞌ yicꞌaal Benjamín. Jix yalon Jehová tol jaꞌ Judá chi bꞌabꞌi to yin jowal. 19 Jix a waan ebꞌ Israel tuꞌ yet skꞌinibꞌal, catuꞌ jix bꞌet swaꞌne ey bꞌulan sbꞌa ebꞌ sattaj ecꞌtoj conobꞌ Guibeá. 20 Jix too ebꞌ yakꞌon jowal yin ebꞌ yet Benjamín, catuꞌ jix swaꞌnen oc sbꞌa ebꞌ yin xolilal yin jowal sattaj conobꞌ Guibeá. 21 Jaxa ebꞌ yet Benjamín tuꞌ, jix eltej ebꞌ yul conobꞌ Guibeá tuꞌ. Jaꞌ yet jun cꞌual tuꞌ, ey 22,000 ebꞌ yet Israelal ebꞌ tuꞌ, jix smakꞌ camoj. 22-24 Yu tuꞌ xin, jix meltzo ebꞌ Israel bꞌey Betel, caw chi okꞌ ebꞌ yu cuscꞌulal sattaj Jehová masantaꞌcꞌal jix kꞌejbꞌi eyoj, catuꞌ jix skꞌanlen ebꞌ tet Jehová: ¿Chi tom skeꞌ too kakꞌon jowal yin ebꞌ ket Israelal, ebꞌ yicꞌaal Benjamín junelxa? ẍi ebꞌ. Jix yalon Jehová jaxca tiꞌ: Asiꞌwej ẍi Naj. Jix yiꞌon wal yip ebꞌ, jaxa yet junxa cꞌual jix too ebꞌ yakꞌon jowal yin ebꞌ yicꞌaal Benjamín, jacꞌalaꞌ bꞌey jix oc ebꞌ yet sbꞌabꞌelal, jatuꞌ jix oc pax ebꞌ yakꞌ jowal junelxa. 25 Jacꞌalaꞌ yet junelxa tuꞌ jix el pax tej ebꞌ yet Benjamín yakꞌon jowal yin ebꞌ a Guibeá, jix makꞌle cam junxa 18,000 ebꞌ soldado yet Israelal yu ebꞌ. 26 Yu jun tuꞌ, jix meltzo pax toj masanil ebꞌ soldado, yetoj ebꞌ conobꞌ bꞌey Betel, jix oc pax ebꞌ yin cuscꞌulal sattaj Jehová. Masanil cꞌu, cꞌam niꞌoj loꞌbꞌe jix sloꞌ ebꞌ, jix yakꞌon tzꞌaꞌ xaambꞌal ebꞌ cꞌal yakꞌon xaambꞌal yet watxꞌcꞌulal ebꞌ.

27-28 Jaꞌ yet jun tiempoal tuꞌ, jaꞌ teꞌ Scaẍail Swa Kꞌane Jehová, jatuꞌ eyecꞌ bꞌey Betel. Jaꞌ naj Finees, scꞌaal Eleazar, yitxiquin naj Aarón, jaꞌ naj eyoc yin yakꞌomaloj xaambꞌal. Jix skꞌanlen ebꞌ Israel tet Jehová, ta tol chi skeꞌ yoc pax ebꞌ yakꞌon jowal junelxa yin ebꞌ yet Benjamín, ma tol chi sbꞌej xacꞌal ey sbꞌa ebꞌ jaxca tuꞌ. Jix yalon Jehová tet ebꞌ: Ocanwej, akꞌwej jowal, jaꞌ yet yecal jain oj wakꞌ eyqꞌuey ebꞌ, ẍi Jehová.

29 Yuxan ey wan ebꞌ soldado yet Israel tuꞌ jix too yewbꞌan el sbꞌa bꞌey yinlaj conobꞌ Guibeá tuꞌ. 30 Jal wanxa ebꞌ xin, jix too yakꞌ jowal ebꞌ yin ebꞌ soldado yet Benjamín, jal wanxa ebꞌ xin, jix swaꞌne oc sbꞌa ebꞌ yin yakꞌon jowal yetoj ebꞌ conobꞌ a Guibeá, jaxca jix yun ebꞌ yet scaelal. 31 Jix el pax tej ebꞌ yet Benjamín bꞌey yul sconobꞌ tuꞌ yin jowal junelxa yin ebꞌ Israel tuꞌ, jix bꞌey cꞌal stit ebꞌ naat yin yakꞌon jowal yin ebꞌ, jix too wal cam junxa 30 ebꞌ Israel yu ebꞌ bꞌey yul sbꞌeal Betel, cꞌal yul sbꞌeal Guibeá, cꞌal bꞌey cꞌamxa mac caan. 32 Jaꞌ mi snaꞌon ebꞌ tol lalan yel ebꞌ yet Israelal ebꞌ tuꞌ, jaxca jix yun ebꞌ yet ewi cꞌal yet caabꞌi, asan tucꞌal chi ela ebꞌ niꞌoj tet ebꞌ, yet watxꞌ chi moncha can eltej wan scajat ebꞌ tuꞌ bꞌey stiꞌel conobꞌ. 33 Jaxa yet jix apni oc ebꞌ Israel bꞌey scawilal Baal-tamar, yin eymanil jix swaꞌne oc sbꞌa ebꞌ yin xolilal yin yakꞌon jowal, catuꞌ jix el pax tej ebꞌ jix yewbꞌa el sbꞌa yinlaj conobꞌ Guibeá tuꞌ. 34 Ey 10,000 ebꞌ soldado sicꞌbꞌil el xol ebꞌ Israel, ebꞌ tol caw jelan yakꞌon jowal, jix yakꞌon jowal ebꞌ yetoj ebꞌ conobꞌ Guibeá, yelcꞌulal jix oc jowal yu ebꞌ. Jaꞌ ebꞌ yet Benjamín tuꞌ, cꞌam chi snaꞌ ebꞌ ta tol oj akꞌle eyqꞌuey ebꞌ yin jowal tuꞌ.

35 Jaꞌ Jehová jix colwa yetoj ebꞌ Israel yet jix yakꞌon eyqꞌuey ebꞌ yicꞌaal Benjamín tuꞌ. Jaꞌ yet jun cꞌual tuꞌ, jix cam 25,100 soldado ebꞌ yicꞌaal Benjamín. 36 Catuꞌ jix yilontej sbꞌa ebꞌ yet Benjamín tol jix eyqꞌuey ebꞌ.

Jaꞌ ebꞌ soldado Israel tuꞌ, naat xa chi el ebꞌ sattaj ebꞌ yet Benjamín, yutol jaꞌ ebꞌ naj jix yewbꞌa can el sbꞌa yintaj ecꞌtoj conobꞌ Guibeá, jaꞌ ebꞌ tuꞌ eyoc yipoj scꞌul ebꞌ. 37 Jaxa ebꞌ naj soldado ewan can ecꞌtoj tuꞌ, yin eymanil jix yun yoc ebꞌ yakꞌon jowal bꞌey Guibeá, catuꞌ jix makꞌle cam masanil ánima yu ebꞌ yetoj chꞌen espada. 38 Jaꞌ ebꞌ jix yewbꞌa el sbꞌa tuꞌ, jix yal-le can ebꞌ yabꞌe yetoj wanxa ebꞌ soldado tol yetbꞌi sbꞌa yetoj ebꞌ, tol jaꞌ yet oj eyqꞌuey jun conobꞌ tuꞌ yu ebꞌ, catuꞌ oj yakꞌon tzꞌaꞌ conobꞌ tuꞌ ebꞌ, catuꞌ oj a wacacoj smucꞌal, yet watxꞌ chi yotajne el ebꞌ tol xax eyqꞌuey jun conobꞌ tuꞌ. 39 Jaꞌ yet tuꞌ, jaꞌ ebꞌ Israel lalan yel ebꞌ tet ebꞌ yet Benjamín, jix yilon ebꞌ jun miman mucꞌ tuꞌ, yuxan jix meltzo ebꞌ, jix stecꞌbꞌan sbꞌa ebꞌ sattaj ebꞌ yet yicꞌaal Benjamín yakꞌon jowal.

Yutol jix cam 30 ebꞌ Israel yu ebꞌ yet Benjamín, yuxan jix snaꞌ ebꞌ yet Benjamín tuꞌ, tol lalan yeyqꞌuey ebꞌ yu ebꞌ, jaxca jix yun ebꞌ yet sbꞌabꞌelal. 40 Jaxa yet jun txolan tuꞌ xin, tol wacaqui xacꞌal ya smucꞌal jun conobꞌ tuꞌ. Jaꞌ yet jix meltzotoj tꞌanan ebꞌ yet Benjamín tuꞌ yintaj, tuxa cꞌal chi nilxi xaj kꞌakꞌ cꞌal ya wacacoj smucꞌal jun conobꞌ tuꞌ satcan. 41 Catuꞌ jix stecꞌbꞌa sbꞌa ebꞌ Israel tuꞌ yakꞌon jowal sattaj ebꞌ yet Benjamín tuꞌ, caw wal jix xiwa ebꞌ, yutol lalan yeyqꞌuey ebꞌ. 42 Yu jun tuꞌ xin, jix ela ebꞌ tet ebꞌ Israel tuꞌ, jix toocan ebꞌ bꞌey chi too can sbꞌeal txꞌotxꞌ cusiltaj txꞌotxꞌ, ma xacꞌal skeꞌ scolon sbꞌa ebꞌ. Yutol jix michꞌcha oc ebꞌ, catuꞌ jix makꞌle cam ebꞌ yu ebꞌ Israel. 43 Jix joymo oc ebꞌ Israel tuꞌ yin ebꞌ yet Benjamín, queytuꞌ jix yun yeyqꞌuey masanil ebꞌ, jix ujtele cꞌal ebꞌ bꞌey Menúha masantaꞌcꞌal sattaj ecꞌtej Guibeá yetcꞌulal bꞌey chi aol cꞌu.

44 Jaꞌ yet tuꞌ, jix cam 18,000 ebꞌ soldado yicꞌaal Benjamín. 45 Jal wanxa ebꞌ xin, jix meltzo ebꞌ yintaj, jix ela ebꞌ jix too ebꞌ bꞌey txꞌotxꞌ cusiltaj txꞌotxꞌ, yetcꞌulaltoj chꞌen nachꞌen chi yij Rimón, jaꞌ yul-laj bꞌe tuꞌ jix cam jun 5,000 ebꞌ. Yutol ujtebꞌil oc ebꞌ yu ebꞌ Israel tuꞌ, masantaꞌcꞌal bꞌey Guidón, jix makꞌle cam junxa 2,000 ebꞌ soldado tuꞌ yu ebꞌ. 46 Jaꞌ yet jun cꞌual tuꞌ, jix cam 25,000 ebꞌ soldado tol caw jelan yin jowal xol ebꞌ yicꞌaal Benjamín. 47 Eyto wal junxa 600 ebꞌ yet Benjamín jix too tzaji yelcanoj, jix too yewbꞌa el sbꞌa ebꞌ bꞌey cusiltaj txꞌotxꞌ. Canebꞌ xꞌaaw jix cancan ebꞌ bꞌey nachꞌen bꞌey yet Rimón. 48 Yin xacꞌal eymanil jix yun yakꞌle eyqꞌuey ebꞌ yicꞌaal Benjamín tuꞌ yu ebꞌ Israel, jix stzokꞌon cam masanil ánima ebꞌ bꞌey junjun conobꞌ, jix smakꞌon cꞌal pax cam noꞌ jobꞌbꞌeal noꞌ ebꞌ, jix sqꞌueyon can el masanil tzetyetal jix ilcha oc yu ebꞌ, cꞌal yakꞌon can tzꞌaꞌ jun conobꞌ tuꞌ ebꞌ.