4 Jaxa yet junxa cꞌual xin, jix a waan ebꞌ Israel yet skꞌinibꞌalil, jix swaꞌnen jun yet xaambꞌal ebꞌ, jix yakꞌon tzꞌaꞌ xaambꞌal ebꞌ sattaj Jehová cꞌal yakꞌon xaambꞌal ebꞌ yet watxꞌcꞌulal. 5 Jix cꞌoli skꞌanlen ebꞌ tet junjun jaxca tiꞌ: ¿Mactxequel cu xol tiꞌ ma bꞌetecꞌ ketoj yin jun yambꞌabꞌail jix oc bꞌey Mizpá tuꞌ? ẍi ebꞌ. Yutol xax yakꞌ stiꞌ ebꞌ, ta tol ey mac cꞌam chi too yin jun yambꞌabꞌail tuꞌ, tol chi cami.

6 Jaꞌ ebꞌ Israel tuꞌ, caw wal eyoc ebꞌ yin cuscꞌulal yu tzet jix yun yeloc ebꞌ yetoj ebꞌ yicꞌaal Benjamín tuꞌ, yutol yet Israelal sbꞌa ebꞌ, jix cꞌoli yalon ebꞌ jaxca tiꞌ: Jaꞌ yet jun cꞌu tiꞌ jix qꞌueyle can el jun icꞌaaleal cu xol jaon Israel jon tiꞌ. 7 ¿Tzet watxꞌ chi kunne, yet chi ilcha oc yistil ebꞌ naj yicꞌaal Benjamín tiꞌ, ebꞌ naj tol ma cam yin jowal tiꞌ? Jaonwej tiꞌ, kakꞌnaj can cu tiꞌ sattaj Jehová tol cꞌam junoj jon oj kakꞌ cu cutzꞌin yet chi oc yistiloj ebꞌ naj. 8 ¿Ey mi ebꞌ ket Israelal tiꞌ ma bꞌetecꞌ sattaj Jehová ketoj bꞌey Mizpá yin jun yambꞌabꞌail jix oqui? ẍi ebꞌ.

Catuꞌ jix snaꞌontej ebꞌ, tol jaꞌ ebꞌ caan bꞌey conobꞌ Jabés yul yet Galaad, cꞌam junoj ebꞌ jix bꞌetecꞌ yin jun yambꞌabꞌail tuꞌ. 9 Jaꞌ yet jix awtele a sbꞌi masanil ebꞌ, cꞌam cꞌal junoj ebꞌ a Jabés tuꞌ jix takꞌwi. 10-11 Jaꞌ yet jix yabꞌen oc masanil ebꞌ conobꞌ jun tuꞌ, jix ẍejontoj jun 12,000 soldado ebꞌ caw wal jelan yin akꞌo jowal, jix yalon ebꞌ tet ebꞌ, tol chi too makꞌle cam masanil ebꞌ a Jabés yetoj espada, masanil ebꞌ winaj, ebꞌ unin, yetoj masanil ebꞌ ix ix eyxa yichamil.

12 Jaꞌ xol masanil ebꞌ a Jabés tuꞌ, ey 400 ebꞌ ix kꞌopo ix cꞌamto winaj chi yiꞌle, jix iꞌletej ebꞌ ix tuꞌ yu ebꞌ bꞌey bꞌulan ey bꞌey Siló, yul yet Canaán. 13 Jix lawi tuꞌ xin, jix yaontoj ẍejabꞌ ebꞌ conobꞌ tuꞌ, yu stoo yal-le tet ebꞌ naj yicꞌaal Benjamín eycantoj bꞌey chꞌen nachꞌen chi yij Rimón, jix awtele ebꞌ yet chi oc watxꞌcꞌulal yetoj ebꞌ. 14 Catuꞌ jix meltzotej ebꞌ yicꞌaal Benjamín tuꞌ, catuꞌ jix akꞌle ebꞌ ix kꞌopo tuꞌ yistiloj ebꞌ naj, jaꞌton ebꞌ ix jix bꞌet iꞌlecantej yu ebꞌ yet jix oc jowal bꞌey Jabés tuꞌ, asan xin ma tzꞌajna yiꞌon yistil ebꞌ naj, yutol cꞌam txꞌial sbꞌisil ebꞌ ix kꞌopo tuꞌ.

15 Masanil ebꞌ Israel tuꞌ, caw jix cus scꞌul ebꞌ yu ebꞌ yicꞌaal Benjamín tuꞌ, yutol jaꞌ Jehová jix akꞌon qꞌueyle el jun icꞌaaleal xol ebꞌ conobꞌ Israel tuꞌ. 16 Jaꞌ ebꞌ yaaw yeoc xol conobꞌ tuꞌ jix skꞌanle ebꞌ tet junjun jaxca tiꞌ: ¿Tzet wal oj yun yilcha pax yistil wanxa ebꞌ naj jix cancan tiꞌ, yutol jix cam ebꞌ ix ix masanil? 17 Jix yalon ebꞌ Israel tuꞌ jaxca tiꞌ: Tol sowalil oj jul cꞌaltaꞌ ebꞌ yicꞌaal Benjamín sat xꞌotxꞌ, yet watxꞌ cꞌam chi qꞌueyel jun icꞌaaleal tiꞌ cu xol jaon Israel jon tiꞌ. 18 Asan xin jaon tiꞌ, cꞌam chi skeꞌ kakꞌon ebꞌ ix cu cutzꞌin yet chi oc yistiloj ebꞌ naj, yutol kakꞌnaj xa can cu tiꞌ sattaj Jehová, tol cꞌam chi kakꞌ ebꞌ ix cu cutzꞌin tiꞌ tet ebꞌ naj yicꞌaal Benjamín, yuxan ta ey mac chi yakꞌ scutzꞌin tet ebꞌ naj, chi tit sjowal scꞌul Dios yibꞌan. 19 Yuxan junjun cꞌal abꞌil ey jun miman kꞌin chi yaoc ebꞌ sattaj Jehová bꞌey Siló. (Jatuꞌ ey bꞌey yetcꞌulal snorteal Betel, yetcꞌulal bꞌey chi too cꞌu chi apni bꞌey Siquem, bꞌey yetcꞌulal sur yul yet Leboná.)

20 Jaꞌ ebꞌ yaaw yeoc xol ebꞌ Israel tuꞌ, jix yaltoj jun kꞌane ebꞌ tuꞌ tet ebꞌ yicꞌaal Benjamín, jix yalon ebꞌ jaxca tiꞌ: Asiꞌwej, catuꞌ chi too je yewbꞌa el je bꞌa xol-laj an uva bꞌey scawilal Siló. 21 Watxꞌ chi yun je yewbꞌan el je bꞌa tituꞌ, jaꞌ yet oj eltoj bꞌululoj ebꞌ ix kꞌopotaj ix a Siló yakꞌon canal tituꞌ. Catuꞌ chex eltej bꞌey che yewbꞌa el je bꞌa tuꞌ, catuꞌ che yelkꞌanentoj junjunoj je yistil junjun jex, catuꞌ chex meltzotoj bꞌey je txꞌotxꞌ. 22 Ta chi jul smam ebꞌ ix ma ebꞌ naj sno ebꞌ ix kꞌopo tuꞌ jul yalon ey jon, jon, oj kal tet ebꞌ jaxca tiꞌ: Chi cu kꞌan mimancꞌulal ey jex yu ebꞌ naj, yutol ma ilcha yistil ebꞌ naj masanil yet jix oc jowal bꞌey Jabés. Yetoj cꞌal pax oj, tol man jaex oj jix je yatej ebꞌ ix tet ebꞌ naj, yuxan cꞌam chi oc jun tiꞌ je penailoj yu bꞌey jix je yakꞌ can je tiꞌ, queytuꞌ oj yun kalon tet ebꞌ jon, ẍi ebꞌ naj syaawil ebꞌ Israel tuꞌ.

23 Jix ẍaꞌ scꞌul ebꞌ yicꞌaal Benjamín jaxca jix yun yal-le tet ebꞌ tuꞌ, yuxan junjun cꞌal ebꞌ jix yelkꞌane el junjun ebꞌ ix kꞌopo ix ebꞌ yet lalan scanalwi ebꞌ ix tuꞌ, catuꞌ jix yiꞌontoj ebꞌ yin eymanil bꞌey xꞌotxꞌal, jaxca tuꞌ jix yun swaꞌnen sconobꞌ ebꞌ junelxa, catuꞌ jix caey ecꞌ ebꞌ tituꞌ.

24 Jacꞌalaꞌ wanxa ebꞌ yet Israelal ebꞌ tuꞌ, jix meltzotoj ebꞌ junjun bꞌey xꞌotxꞌal, cꞌal bꞌey ey can yicꞌaal ebꞌ.

25 Jaꞌ yet tuꞌ, cꞌam cꞌal junoj rey eyoc xol ebꞌ Israel, yuxan junjun cꞌal ebꞌ jix el yunen jaxca tzet chi yoche scꞌul.