2 Jix yambꞌale oc ebꞌ conobꞌ Israel yu naj Moisés,

jix yalon jaxca tiꞌ:

Jaex tiꞌ,

jix cam wal je yilon tzet jix yun Jehová yetoj naj sreyal Egipto,

yetoj cꞌal ebꞌ eyoc yin yaawilal,

yetoj cꞌal masanil ebꞌ ey yul snación tuꞌ.

3 Testigo jex yin wan syaꞌilal,

cꞌal tzet tol qꞌueyubꞌtaj jix yun Naj.

4 Jaꞌ tinaniꞌ,

cꞌamto chi akꞌle je yotajne el yu Jehová,

cꞌal snaꞌcha el tzet chi yal yeloc apnoj wan tuꞌ.

5 Jain tiꞌ jix jex wijbꞌa yin cawinaj abꞌil bꞌey cusiltaj txꞌotxꞌ.

Jaꞌ yet jun tiempoal tuꞌ,

ma lawoj el je pichil,

tam wal jix lawi el je xanabꞌ.

6 Ma je loꞌ pan,

ma je yucꞌ yal uva,

cꞌal yal uva tol jaxca teꞌ an yoqui,

yet watxꞌ chi naꞌcha el je yu,

tol jaꞌ Jehová jaꞌton cu Diosal.

7 Jaꞌ yet jix cu apni oc bꞌey jun tujan txꞌotxꞌ txꞌotxꞌ tiꞌ,

jix eltej naj Sihón,

reyal Hesbón yakꞌon jowal kin,

yetoj naj Og,

sreyal Basán,

jix eyqꞌuey ebꞌ ku.

8 Jix kiꞌon can oc xꞌotxꞌ ebꞌ,

catuꞌ jix kakꞌon txꞌotxꞌ tet ebꞌ yicꞌaal Rubén,

cꞌal tet ebꞌ yicꞌaal Gad,

yetoj cꞌal tet nanxa tujan ebꞌ yicꞌaal Manasés.

9 Yu tuꞌ xin,

jijewej cꞌal catuꞌ che bꞌeybꞌalne jun chejbꞌanile tiꞌ,

yet watxꞌ,

watxꞌ cꞌal oj yun je yeloc yin masanil tzetyetal oj je yunne.

10 Jaꞌ tinaniꞌ,

yaman jon oc cu masanil sattaj Jehová cu Diosal,

jex yaaw je yeoc yin junjun tujan icꞌaaleal,

jex icham winaj je yeoc yul conobꞌ,

jex ey je yopiso,

yetoj je masanil jex winaj a Israel,

11 ebꞌ unin,

cꞌal ebꞌ ix ix,

yetoj cꞌal ebꞌ txꞌoj conobꞌal caan ecꞌ je xol,

jaꞌton ebꞌ siꞌwom,

cꞌal ebꞌ bꞌelom jaꞌ,

12 yaman jon ecꞌoj yet watxꞌ chi kakꞌ can cu tiꞌ yin cu jijen jun swa kꞌane Jehová cu Diosal chi yakꞌ ketoj tinaniꞌ.

13 Jaꞌ tinaniꞌ chi txeclo can eloj tol sconobꞌ jon Jehová cu Diosal,

jaxa Naj chi oc can cu Diosaloj,

jaxca jix yun yakꞌon can stiꞌ tet Abraham,

tet Isaac,

cꞌal tet Jacob,

jaꞌton ebꞌ tuꞌ kichmam yeocoj.

14 Man asanne oj je yetoj chi yakꞌ can stiꞌ Jehová tinaniꞌ,

15 yutol chi yakꞌ cꞌal pax can stiꞌ tet ebꞌ kicꞌaal tol to oj aloj.

16 Jaex tiꞌ,

caw wal je yotaj sicꞌlebꞌil,

tzet wal jix yun cu caey ecꞌ bꞌey txꞌotxꞌ Egipto,

yetoj cꞌal tzet jix yun kecꞌtej yul-laj bꞌe yul wan conobꞌlaj.

17 Jaꞌ tituꞌ jix kil yin wan comon dios,

wan echele tol teꞌ,

chꞌen chꞌen,

chꞌen plata,

cꞌal chꞌen oro,

tol caw yaabꞌetaj tzet chi yun ebꞌ ánima tuꞌ yin yakꞌon eyilal ebꞌ tet.

18 Chi cam je yiloni tol cꞌam ojabꞌ junoj winaj,

tam wal junoj ix ix cu xol tiꞌ,

tam wal junoj tujan icꞌaaleal chi bꞌejon can Jehová cu Diosal,

catuꞌ oj oc yin eyilal tet sdiosal wan nación tuꞌ.

Ta chi yun ebꞌ wan tuꞌ,

laan mi ebꞌ jaxca junoj an cꞌultaj tol caw kꞌakꞌ,

catuꞌ ey svenenoal xeꞌ.

19 Ta ey junoj jex jaex tiꞌ,

jaꞌ yet chi lawi yabꞌen jun kꞌane bꞌey lalan kakꞌon can cu tiꞌ,

tala ey junoj chi snaꞌ tol yel xacꞌal watxꞌ yeocoj,

catuꞌ oj yalon yin snaꞌbꞌal:

Yel xacꞌal watxꞌ chi wute jin bꞌa,

caxcꞌal chi wun spenail jaxca wal tzet chi yoche jin cꞌul,

ta ẍi.

Ta jaxca tuꞌ,

yu cꞌal jun mactxequel tuꞌ chi tit sjowal scꞌul Dios je yibꞌan je masanil.

20 Yuxan jaꞌ Jehová ma xacꞌal yakꞌ mimancꞌulal.

Yutol caw oj tit can sjowal scꞌul yibꞌan jun ánima tuꞌ.

Catuꞌ chi tit can sjowal scꞌul Dios tol albꞌilcan yul an libro tiꞌ.

Jaꞌ junoj mactxequel jaxca tuꞌ chi yute sbꞌa,

oj qꞌueyle el masanil yicꞌaal sat txꞌotxꞌ txꞌotxꞌ tiꞌ yu Jehová.

21 Jaꞌ Jehová oj iꞌon el jun mactxequel tuꞌ xol masanil ebꞌ yicꞌaal Israel,

yu yaon oc syaꞌilal yibꞌan,

yuxan masanil syaꞌilal chi bꞌina can yul an libro bꞌey tzꞌibꞌebꞌilcan ey masanil ley,

oj tit yibꞌan jun ánima tuꞌ.

22 Jaꞌ ebꞌ je yicꞌaal yet bꞌakꞌin,

yetoj cꞌal wanojxa ánima txꞌoj conobꞌal naat chi tita,

oj yil wan syaꞌilal tuꞌ ebꞌ,

cꞌal wan syaꞌilal oj yatej Jehová yibꞌan txꞌotxꞌ txꞌotxꞌ tuꞌ.

23 Oj yil ebꞌ tol jaꞌ jun txꞌotxꞌ tuꞌ,

asan azufre,

atzꞌam,

cꞌal tzꞌaꞌil txꞌotxꞌ ey.

Cꞌamxa tzetyetal oj skeꞌ yawle bꞌey jun txꞌotxꞌ tuꞌ.

Cꞌam junojxa awo chi skeꞌ yakꞌoni,

tam wal junoj an comon cꞌultaj chi skeꞌ ẍꞌibꞌaoj.

Jaxca wal jix yun slawi ey conobꞌ Sodoma,

Gomorra,

Admá cꞌal Seboím,

jaꞌton wan conobꞌ tuꞌ jix yakꞌ lawoj ey Jehová yetoj sjowal scꞌul,

queytuꞌ oj yun ebꞌ.

24 Yu tuꞌ xin,

masanil ánima bꞌey yul yibꞌankꞌinal tiꞌ oj skꞌanle ebꞌ jaxca tiꞌ:

¿Tzet yu,

yuxan queytuꞌ jix yute Jehová jun conobꞌ tuꞌ?

¿Tzet la yu,

yuxan yel xacꞌal miman jix yun stit sjowal scꞌul yin ebꞌ?

ta ẍi ebꞌ.

25 Jaxa spajtzen ebꞌ jaxca tiꞌ:

Yutol jaꞌ wan conobꞌ tiꞌ jix yintajne can el swa kꞌane Dios ebꞌ jix swaꞌne can yetoj ebꞌ kichmam yet jix eltej ebꞌ bꞌey txꞌotxꞌ Egipto.

26 Yutol jix oc ebꞌ yin eyilal tet comon dios tol man otajbꞌiloj yu ebꞌ yet yalantoj,

tol manaj Jehová jix alon tet ebꞌ tol chi oc ebꞌ yin eyilal tet,

cꞌam niꞌoj tzet jix akꞌle tet ebꞌ yu.

27 Yuxan caw jix tit sjowal scꞌul Jehová yibꞌan jun conobꞌ tiꞌ,

yuxan jix eyqꞌuey masanil wan syaꞌilal tzꞌibꞌebꞌilcan ey yul an libro yibꞌan ebꞌ.

28 Jaꞌ Jehová jix ujten el jun conobꞌ tuꞌ yetoj sjowal scꞌul,

catuꞌ jix toocan ebꞌ bꞌey xol-laj wanxa nación,

jaxca ton lalan yunen tinaniꞌ,

jaꞌton spajtzebꞌal tuꞌ.

29 Ey wan tzetyetal tol man kotajoj.

Jaꞌ wan tuꞌ asan Jehová cu Diosal otajneni.

Asan xin,

ey pax wan tzetyetal tol chi akꞌle kotajne eloj,

cꞌal yotajne el ebꞌ kuninal,

yet watxꞌ chi cu jije masanil wan tiꞌ,

jaꞌton masanil wan ẍejbꞌanil,

cꞌal sley.