Xolilal Tzet Chi Yun Scolchai Cꞌal Ẍaꞌon Syaxilal
30
Jaꞌ yet oj jul masanil wan tzet jix wal ey jex tiꞌ,
jaꞌton syaaxilal cꞌal syaꞌtajilal,
yuxan chi wakꞌ je sicꞌle,
ta tol oj snaꞌ sbꞌa je cꞌul yet ey jex xa ecꞌ bꞌey wan nacionlaj bꞌey oj jex apnoj oc yu Jehová cu Diosal.
2 Ta yetoj masanil je cꞌul,
cꞌal yetoj masanil je pixan,
catuꞌ oj sjijen cꞌal pax ebꞌ je yuninal jaxca chi yun walon can ey jex tiꞌ an.
3 Ta jaxca tuꞌ,
jaꞌ Jehová cu Diosal,
oj sqꞌuex snaꞌbꞌal je yin,
catuꞌ oj jex yaon oc yin swatxꞌil.
Oj yiloc scꞌul Naj je yin,
catuꞌ oj jex syambꞌantej Naj junelxa bꞌey jix jex sajlem cantoj xol-laj nacionlaj.
4 Caxcꞌal jix jex sajlem cantoj bꞌey chi apni taꞌcꞌal ian jun yul yibꞌankꞌinal tiꞌ,
je masanil oj jex yambꞌaletej yu Jehová cu Diosal,
masantaꞌcꞌal oj jex toj seyletej bꞌey ey jex ecꞌoj,
5 catuꞌ oj jex syambꞌantej Naj bꞌey jix caey ecꞌ ebꞌ kichmam.
Jaꞌ tituꞌ oj jex caey ecꞌ junelxa.
Caw oj jex oc bꞌeomal yu Naj,
catuꞌ ecꞌal sbꞌisil je yuninal yintaj ebꞌ kichmam tuꞌ.
6 Oj yaoc yechel swa kꞌane Jehová yin je pixan cꞌal yin snaꞌbꞌal ebꞌ je yicꞌaal,
yet watxꞌ oj je camcꞌulne cꞌal yin masanil je cꞌul,
cꞌal yin masanil je naꞌbꞌal.
Ta jaxca tuꞌ oj naatbꞌoj je kꞌinal.
7 Jaxa Jehová oj aon cantoj masanil syaꞌtajilal yibꞌan ebꞌ je cajat chi chichon oc scꞌul je yin,
jaꞌton ebꞌ chex etneni.
8 Jal jex jaex tiꞌ xin,
oj jex meltzo can oc yul skꞌabꞌ Jehová yin je jijen masanil ẍejbꞌanil chi wal can ey jex tinaniꞌ.
9 Yu tuꞌ xin,
caw wal tol bꞌeom oj je yun can oc yu Jehová,
catuꞌ oj yakꞌon syaaxilal Naj yibꞌan tzetyetal che yunne,
cꞌal yibꞌan ebꞌ je yuninal,
yibꞌan noꞌ je jobꞌbꞌeal noꞌ,
cꞌal yibꞌan je yawo.
10 Ta che jijewej masanil tzet chi yal Naj,
cꞌal masanil ẍejbꞌanil,
cꞌal cuybꞌanile tzꞌibꞌebꞌilcan ey yul an yuunal ley,
ta yetoj wal masanil je cꞌul cꞌal yin masanil je pixan che yaon oc je bꞌa yul skꞌabꞌ Jehová,
caw oj tzalabꞌoj a scꞌul Naj yakꞌon syaaxilal ey jex,
jaxca jix yun yakꞌon tzalabꞌoj scꞌul yetoj ebꞌ kichmam.
11 Jaꞌ wan chejbꞌanile chi wakꞌ je yotajne can eloj,
man yaꞌtaj oj je jijeni tam wal naat yeel je cꞌatan.
12 Manaj bꞌey satcan ey,
yet watxꞌ cꞌam che yal jaxca tiꞌ:
¿Mactxequel chi skeꞌ yatoj bꞌey satcan tuꞌ,
catuꞌ chi too yiꞌon eytej jun chejbꞌanile tuꞌ,
catuꞌ chi yakꞌon kotajne eloj,
yet watxꞌ chi cu bꞌeybꞌalne?
man je chioj.
13 Yetoj cꞌal pax oj,
toj wal jata bꞌey skꞌaxepal ecꞌtoj jaꞌ mar ey,
catuꞌ che yalon jaxca tiꞌ:
¿Mac wal txequel chi skeꞌ skꞌaxbꞌonen ecꞌtoj jaꞌ mar,
yet chi too yiꞌon ecꞌtej ey jon catuꞌ chi kotajnen eloj yet chi cu bꞌeybꞌalneni?
man je chioj.
14 Jajxa xin,
jaꞌ jun chejbꞌanile tiꞌ eyecꞌ cu xol tinaniꞌ,
chi kaloꞌtane,
ey cꞌal oc yin cu naꞌbꞌal,
yet watxꞌ chi cu jije.a
15 Yuxan jaꞌ tinaniꞌ xin,
chi wakꞌ je sicꞌle bꞌeytet che yoche:
¿Jam cawile cꞌal swatxꞌilal,
ma jaꞌ uchlebꞌail cꞌal camich che yoche?
16 Ta che jije masanil tzet chi wal can ey jex tiꞌ yin je camcꞌulnen Jehová cu Diosal,
catuꞌ chex oc cꞌal tzajan yintaj Naj,
catuꞌ che jijen cꞌal ẍejbꞌanil,
cꞌal scuybꞌanil,
queytuꞌ oj yun je bꞌey cꞌaltoj yin swatxꞌilal,
caw oj chꞌibꞌ sbꞌisil ebꞌ je yuninal.
Catuꞌ oj yakꞌon syaaxilal Jehová cu Diosal je yibꞌan bꞌey sat txꞌotxꞌ txꞌotxꞌ oj akꞌle ey jex tuꞌ.
17 Ta cꞌam cꞌal che chaꞌ je yabꞌ wan tuꞌ xin,
ta bꞌejan xacꞌal je cꞌul je yijbꞌaletoj yintaj wan comon dios,
catuꞌ chex ey kaan yin eyilal tet ebꞌ,
18 ta tol jaxca tuꞌ;
jaꞌ yet jun txolan tiꞌ chi wal can ey jex,
tol oj jex cam xacꞌal.
Man xacꞌal oj naatbꞌoj je kꞌinal sat txꞌotxꞌ txꞌotxꞌ oj je yiꞌ yet oj jex kꞌaxbꞌo ecꞌtoj bꞌey jaꞌ Jordán tuꞌ.
19 Jaꞌ yet jun cꞌu tiꞌ chi waoc satcan cꞌal txꞌotxꞌ txꞌotxꞌ tiꞌ yin testigoaloj je yin,
tol chi wakꞌ je sicꞌle cawile ma jaꞌ je camichal che yoche,
swatxꞌilal ma syaꞌtajilal.
Yuxan jaꞌ tinaniꞌ,
sicꞌwej el cawile,
yet watxꞌ,
watxꞌ cꞌal chi yun je bꞌeytoj yetoj ebꞌ je yicꞌaal yet bꞌakꞌin.
20 Camcꞌulnewej Jehová cu Diosal.
Jijem cꞌal che yute je bꞌa tet,
yutol jaꞌ yu je jijemal tuꞌ,
oj je yiꞌ je cawil.
Yuxan miman tiempoal oj jex caey cꞌal ecꞌ bꞌey sat txꞌotxꞌ txꞌotxꞌ bꞌey jix yakꞌ can stiꞌ yakꞌon tet ebꞌ kichmam,
jaꞌton tet Abraham,
tet Isaac,
cꞌal tet Jacob,
ẍi naj Moisés tet ebꞌ.