2 Jain tiꞌ eyxa 120 abꞌil jin kꞌinal,

cꞌamxa wal wip jex wijbꞌani.

Yetoj cꞌal pax oj,

jix yal Jehová ey jin tol manxa oj jin kꞌaxbꞌo ecꞌtoj bꞌey jaꞌ Jordán tuꞌ.

3 Asan xin,

jaꞌ Jehová cu Diosal,

jaꞌ oj bꞌabꞌoj cꞌal je sattaj catuꞌ oj sqꞌueyon can el masanil wan nacionlaj eyecꞌ bꞌey oj jex apnoj oc tuꞌ,

yet watxꞌ oj jex caey ecꞌ bꞌey sat xꞌotxꞌ ebꞌ tuꞌ.

Jacꞌalaꞌ jix yal pax Dios tol jaxa naj Josué oj oc je yaawiloj cꞌal jex yijbꞌani.

4 Jaꞌcaw Jehová oj qꞌueyon el ebꞌ conobꞌ jaxca jix yun sqꞌueyle el ebꞌ sreyal Amorreo,

jaꞌton naj Sihón cꞌal naj Og,

yetoj snación ebꞌ.

5 Jaꞌ Naj oj aon oc wan nación tuꞌ yul je kꞌabꞌ,

catuꞌ oj je qꞌueyon el ebꞌ jaxca jix yun walon can ey jex.

6 Tecꞌbꞌawej je bꞌa.

Cꞌam ojabꞌ chex xiwa yet oj je chaꞌlen je bꞌa yetoj ebꞌ je cajat tuꞌ,

yutol jaꞌ Jehová cu Diosal eyoc je yetoj.

Cꞌam ojabꞌ che naꞌ ta tol oj jex bꞌejlecan yu Naj,

tam wal oj jex yakꞌ can Naj je txꞌojli,

ẍi naj Moisés tet ebꞌ.

7 Jix lawi tuꞌ xin,

catuꞌ jix awteletej naj Josué yu naj Moisés sattaj masanil ebꞌ conobꞌ Israel,

jix yalon jaxca tiꞌ:

Caw wal cha tecꞌbꞌa ja bꞌa,

cꞌam ojabꞌ chach xiwi.

Jaach oj ja wiꞌtoj jun conobꞌ tiꞌ bꞌey sat txꞌotxꞌ txꞌotxꞌ bꞌey jix yakꞌ can stiꞌ Jehová yakꞌon tet ebꞌ kichmam.

Jaach oj ja wil yapni can oc ebꞌ conobꞌ tiꞌ bꞌey jun txꞌotxꞌ tuꞌ.

8 Jaꞌ Jehová oj toj ja sattaj.

Ey cꞌal ecꞌ Naj ja wetoj,

cꞌam cꞌal bꞌey oj jaach bꞌejlecan yu,

yuxan cꞌam ojabꞌ chach xiwi,

cꞌam ojabꞌ chach meltzo ja wintaj,

ẍi naj Moisés tet naj Josué.

9 Jaꞌ naj Moisés jix stzꞌibꞌen can wan ley tiꞌ,

catuꞌ jix yakꞌon can tet ebꞌ yakꞌomal xaambꞌal,

jaꞌton ebꞌ yicꞌaal Leví,

ebꞌ chi iꞌontoj teꞌ Scaẍail Swa Kꞌane Jehová,

jix yakꞌon cꞌal pax can tet ebꞌ icham winaj yeoc yul conobꞌ Israel.

10 Jix yalon jun chejbꞌanile tuꞌ naj jaxca tiꞌ:

Jaꞌ yet chi tzꞌajna junjun jujebꞌ abꞌil,

yet eyoc skꞌinal pat waꞌnebꞌil a yetoj xaj teꞌ,

jaꞌton yet chi oc mimancꞌulal yibꞌan sjec ebꞌ ánima.

11 Jaꞌ yet chi syambꞌa oc sbꞌa masanil ebꞌ conobꞌ sattaj Jehová cu Diosal,

jaꞌton bꞌey jun lugar sicꞌbꞌil el yu Dios,

jaꞌ tituꞌ chi awtele a an yuunal ley,

yet chi yabꞌen oc masanil ebꞌ conobꞌ.

12 Sowalil chi syambꞌa oc sbꞌa masanil ebꞌ conobꞌ,

ebꞌ winaj,

ebꞌ ix ix cꞌal ebꞌ yaliẍ unin,

yetoj cꞌal ebꞌ txꞌoj conobꞌal eyecꞌ je xol,

yu yabꞌen ebꞌ cꞌal yotajnen el ebꞌ masanil tzet chi yal an yuunal ley,

yet watxꞌ ey yeloc apnoj Jehová cu Diosal yul sat ebꞌ,

cꞌal sjijen ebꞌ tzet chi yalaꞌ.

13 Quey cꞌal pax tuꞌ ebꞌ je yuninal jaex tiꞌ,

ebꞌ tol man to otajnenoj jun ley tiꞌ,

sowalil oj yabꞌoc ebꞌ,

oj scuyon pax ebꞌ,

yet watxꞌ ey yeloc apnoj Jehová cu Diosal yul sat ebꞌ.

Jaꞌton yet ey jex xa ecꞌ sat txꞌotxꞌ txꞌotxꞌ oj je yiꞌoc tuꞌ,

yet oj jex apnoj oc skꞌaxepal ecꞌtoj jaꞌ Jordán,

ẍi naj Moisés.

14 Jix lawi tuꞌ,

jix yalon Jehová tet naj Moisés jaxca tiꞌ:

Jaꞌ tinaniꞌ lalanxa sjul stiempoal yet oj jaach camoj.

Yuxan awte naj Josué,

catuꞌ chex too je cawanil bꞌey jun Kꞌap Na bꞌey chin chaꞌle jin bꞌa je yetoj,

yet watxꞌ oj wal can jin chejbꞌanil tiꞌ tet naj tituꞌ,

ẍi Jehová.

Catuꞌ jix too naj Moisés yetoj naj Josué.

15 Jaꞌ tituꞌ jix xꞌox sbꞌa Jehová xol jun miman bꞌocꞌan asun jix oc bꞌocꞌan bꞌey spuertail stiꞌ jun snail scalubꞌal Dios.

16 Jix yalon Jehová tet naj Moisés jaxca tiꞌ:

Jaach tiꞌ tuxa oj jaach camoj.

Jaꞌ ebꞌ conobꞌ tiꞌ oj tojcan tzajan ebꞌ yintaj wan echele tuꞌ,

jaꞌton sdiosal wan conobꞌ bꞌey oj caey ecꞌ ebꞌ tuꞌ.

Oj jin bꞌejlecan yu ebꞌ,

catuꞌ oj yetnentoj jun jin wa kꞌane ebꞌ jix jin waꞌne can yetoj ebꞌ an.

17 Yu tuꞌ xin,

oj tit jin jowal yin ebꞌ,

catuꞌ oj jin bꞌejon can ebꞌ xꞌojli.

Manxa oj jin oc il yu ebꞌ,

manxa oj jin naꞌtej ebꞌ.

Manxa jantajoj syaꞌtajilal oj tit can yibꞌan ebꞌ,

masantaꞌcꞌal oj yal ebꞌ jaxca tiꞌ:

¿Tzet taꞌ wal yu,

yuxan chi kabꞌ syaꞌil,

yu mi tol manxa eyoj ecꞌ cu Diosal ketoj?

ẍi ebꞌ,

oj yalon ebꞌ.

18 Jaꞌton wal yet jun cꞌual tuꞌ oj jin el scꞌatan ebꞌ yu masanil spenail jix yun ebꞌ,

yu cꞌal tol jix oc ebꞌ yin eyilal tet wan comon dios.

19 Jaꞌ tinaniꞌ xin,

tzꞌibꞌe can skꞌaneal jun bꞌit oj wal ey jaach tiꞌ,

chi lawi tuꞌ,

cha wakꞌon scuy ebꞌ conobꞌ Israel yet chi sbꞌitnen ebꞌ,

yet chi oc can yin testigoal wu yin ebꞌ.

20 Jaꞌ yet oj lawoj wiꞌon octoj ebꞌ ánima tuꞌ bꞌey sat txꞌotxꞌ txꞌotxꞌ bꞌey jix wakꞌcan jin tiꞌ wakꞌon tet ebꞌ je yichmam,

txꞌotxꞌ caw ey syaxil sat,

bꞌey oj low ebꞌ sicꞌlebꞌil,

bꞌey oj no scꞌul ebꞌ,

catuꞌ oj bꞌakꞌechbꞌoj ebꞌ.

Jaꞌ yet tuꞌ,

oj toj tzajan ebꞌ yintaj wan comon dios,

oj oc ebꞌ yin eyilal tet wan tuꞌ.

Oj jin intajnele can el yu ebꞌ,

catuꞌ oj yetnentoj jin wa kꞌane jix jin waꞌne can yetoj ebꞌ.

21 Jaxa wal yet oj jul wan mimej syaꞌilal yibꞌan ebꞌ,

cꞌal bꞌiscꞌulal,

jaꞌ jun bꞌit tiꞌ,

jaꞌ oj oc yin testigoal yin ebꞌ.

Jaxa yicꞌaal ebꞌ oj naꞌontej jun bꞌit tiꞌ,

catuꞌ oj sbꞌitnen ebꞌ.

Yet cꞌam tocꞌal chi apni oc ebꞌ bꞌey jun txꞌotxꞌ tuꞌ,

bꞌey jix wakꞌcan jin tiꞌ wakꞌon tet ebꞌ,

wotajxa cꞌaltaꞌ tzet naꞌbꞌil yu ebꞌ,

ẍi Jehová.

22 Jaꞌ yet jun cꞌual tuꞌ jix stzꞌibꞌen can jun bꞌit naj Moisés tuꞌ,

catuꞌ jix yakꞌon scuy ebꞌ conobꞌ Israel.

23 Jix yalon Jehová jun chejbꞌanile tiꞌ tet naj Josué,

naj scꞌaal Nun,

jaxca tiꞌ:

Caw tecꞌan cha wute ja bꞌa,

cꞌam ojabꞌ chach xiwi,

ey jin cꞌal ecꞌ ja wetoj,

yutol jaach tiꞌ oj ja wiꞌoctoj ebꞌ conobꞌ Israel tiꞌ bꞌey sat txꞌotxꞌ txꞌotxꞌ bꞌey jix wakꞌcan jin tiꞌ wakꞌon can ey jex,

ẍi Jehová.

24 Jix lawi stzꞌibꞌen masanil wan ley naj Moisés yul an juun tuꞌ,

25 jix yalon naj tet ebꞌ Levita chi iꞌon bꞌey teꞌ Scaẍail Swa Kꞌane Jehová jaxca tiꞌ:

26 Iꞌwejtoj an yuunal ley tiꞌ,

catuꞌ che yaon octoj scꞌatan Scaẍail Swa Kꞌane Jehová cu Diosal,

yet chi oc testigoal je yin.

27 Yutol wotaj,

tol jaex tiꞌ caw pit jex,

caw cꞌam che jije niꞌoj tzet chi yalaꞌ.

Jaꞌ yet ey jin to ecꞌ je yetoj,

cꞌam che jije tzet chi yal Dios,

jajxam wal yet oj jin camoj.

28 Awtewej ebꞌ icham winaj yeoc yul conobꞌ,

cꞌal ebꞌ syaawil yeoc xol junjun icꞌaaleal,

yu walon can wan tiꞌ tet ebꞌ.

Chi waoc satcan cꞌal txꞌotxꞌ txꞌotxꞌ tiꞌ yin testigoal yin ebꞌ.

29 Wotajxa tol jaꞌ yet oj jin camoj oj je yetne cantoj je bꞌa,

catuꞌ oj je bꞌejon can jun bꞌe bꞌey chex wa can oc tiꞌ.

Jacꞌalaꞌ wotajxa cꞌal pax oj tol jaꞌ yet bꞌakꞌin,

oj jul syaꞌilal je yibꞌan,

yutol oj je txꞌemtej sjowal scꞌul Jehová je yibꞌan,

yu spenail oj je yun sattaj Naj,

ẍi naj Moisés.

30 Jix lawi tuꞌ xin,

jix oc ian naj Moisés yalon masanil skꞌaneal jun bꞌit sattaj ebꞌ conobꞌ jaxca tiꞌ: